2 Jaꞌ wan cuybꞌanile chi walaꞌ,

laan jaxca nabꞌ chi eyqꞌuey sat txꞌotxꞌ txꞌotxꞌ.

Jaꞌ jin kꞌane chi walaꞌ laan jaxca yal akꞌbꞌal chi eyi,

jaxca cꞌal yeyqꞌuey nabꞌ yibꞌan teꞌ teꞌ cꞌal yibꞌan an ita cꞌal yibꞌan an cꞌultaj,

jaxca ton tuꞌ yeocoj.

3 Yet chi walon can eloj tol miman yeloc apnoj sbꞌi Jehová.

¡Iꞌwej a can sbꞌi Jehová cu Diosal,

yutol miman yipalil!

4 Jaꞌ Naj eyoc keneloj jaxca junoj chꞌen miman nachꞌen.

Tzꞌajan chi eloc tzet chi yunne,

chi yun cꞌal tzet chi yalaꞌ,

caw watxꞌ ton Naj.

Jaꞌ Dios chi kꞌanabꞌi,

chi cꞌal yun tzet chi yalaꞌ.

Cꞌam junoj lekꞌtiꞌal chi yalaꞌ,

jichan cꞌal Naj yin masanil tzet chi yunne.

5 Jex wet conobꞌ,

caw cꞌam niꞌoj je watxꞌil,

caw pit jex tet Jehová.

Caw wal man je moo oj chex oc yuninal oj Dios.

6 ¿Tumi jaxca wal tuꞌ oj yun je yakꞌon spaj tet Jehová?

Jaex conobꞌ jex tiꞌ cꞌam niꞌoj je naꞌbꞌal,

cꞌam niꞌoj je jelanil.

¿Tumi man je Mamoj yeoc Jehová xin?

¿Tumi manaj Naj jix jex waꞌneni?

Jaꞌ Naj jix cu waꞌneni,

chi yakꞌon je cawil.

7 Naꞌwejtej jantaj tzet jix yun Jehová,

catuꞌ che naꞌontej yin wan tiempo xax ecꞌ can eloj.

Kꞌanlewej je yabꞌ tet je mam cꞌal tet je txutx.

Kꞌanlewej je yabꞌ tet ebꞌ naj icham winaj.

8 Yet jix poꞌole cantoj ebꞌ ánima cꞌal ebꞌ nacionlaj yu Jehová,

Naj Tol Jaxa Cꞌal Ocoj,

jix yaon can ey smoonal junjun conobꞌ,

yin sbꞌabꞌelal jix snaꞌ Naj jantaj wal cu bꞌisil jaon Israel jon tiꞌ.

9 Jaꞌ jaon yicꞌaal jon Jacob tiꞌ,

jix jon sicꞌ can el Naj yet chi cu oc can sconobꞌoj.

10 Jix cu chaꞌlo yu bꞌey cusiltaj txꞌotxꞌ,

bꞌey tajin yili sat txꞌotxꞌ,

bꞌey caw jow kaꞌeꞌ.

Jaꞌ tituꞌ jix cu yiꞌoc Naj yul skꞌabꞌ.

Caw wal jix cu syaꞌilne Naj,

jaxca wal cu yaꞌilnen sbꞌakꞌ cu sat queytuꞌ jix cu yute Naj.

11 Jaꞌton Naj jix cu teyneni,

jaxca wal chi yun stoo jenan xicꞌ noꞌ chii yibꞌan yuneꞌ,

jaxca chi yun yijbꞌantoj yuneꞌ noꞌ yet chi ecꞌ jenenoj noꞌ,

jaxca wal chi yun yiꞌontoj yuneꞌ noꞌ chii yibꞌan xicꞌ,

jaxca wal tuꞌ jix cu utele jaon Israel jon tiꞌ yu Jehová.

12 Jaꞌ Jehová jix cu ijbꞌani,

yutol sconobꞌ jon Naj,

cꞌam junoj comon dios jix colwa yetoj.

13 Oj ale oc txꞌotxꞌ sjolomtaj wonanlaj naat yea yul je kꞌabꞌ yu Jehová,

oj je loꞌ sat awo chi chꞌibꞌa sat txꞌotxꞌ txꞌotxꞌ tuꞌ,

cꞌal je yuqꞌuen noꞌ yal awcabꞌ chi eltej bꞌey yul-laj chꞌen chꞌen,

cꞌal aceite chi el yin teꞌ olivo chi chꞌibꞌa bꞌey satlaj chꞌen chꞌen tuꞌ.

14 Ey noꞌ lech cꞌal queso oj el yin noꞌ je wacax.

Oj je chiꞌ noꞌ achꞌe meꞌ,

noꞌ icham meꞌ,

yetoj noꞌ chiw ey bꞌey txꞌotxꞌ Basán.

Oj je loꞌwej ixim tiriw caw wal watxꞌ,

catuꞌ oj je yuqꞌuen yal uva.

15 Jaxa yet oj jex bꞌakꞌechbꞌoj jaex a Jesurún,^a

jex tiꞌ,

oj pitbꞌoj el je naꞌbꞌal yin Dios,

jaꞌton Naj jix cu waꞌneni.

Oj je yintajne el jun cu Colomal tuꞌ.

16 Caw wal oj je txꞌemtej sjowal scꞌul Jehová,

yutol jix jex oc yin eyilal tet wan comon dios tol yaabꞌil el yu Dios.

17 Oj je yakꞌ je xaambꞌal tet ebꞌ pena espíritu,

jaꞌton wan comon dios tol man je yotaj oj yet yalantoj,

wan comon dios tol to chi waꞌxi,

man otajbꞌiloj yu ebꞌ cu mam icham.

18 Jex wet Israelal,

caw jix too qꞌueycꞌulal Dios je yu,

jaꞌton Naj cu Colomal yeocoj.

Ma xacꞌal je naꞌtej je Diosal,

Naj tol chi akꞌon je cawil.

19 Yu jun tuꞌ,

caw oj tit sjowal scꞌul Jehová yet chi yilon oc wan tuꞌ.

Yuxan jix cu yintajne can el jaon yuninal jon tiꞌ.

20 Jix yalon Jehová jaxca tiꞌ:

¡Manxa oj jin oc tꞌanan yin ebꞌ;

jaxa wichin oj wa cantoj sattaj ebꞌ!

¡Oj wilaꞌ tzet oj yute sbꞌa ebꞌ!

Caw yel jaꞌ wan ánima tiꞌ,

caw cꞌam niꞌoj swatxꞌil ebꞌ,

cꞌam chi skeꞌ waon oc ebꞌ yipoj jin cꞌul.

21 Jix xꞌemtej sjowal jin cꞌul ebꞌ,

yu sdiosal ebꞌ tol man dios oj.

Jix yakꞌon chichon jin cꞌul ebꞌ yu wan dios tol cꞌam yeloc apnoj.

Yuxan oj tit sjowal scꞌul yin jun conobꞌ tiꞌ,

chi yal ebꞌ tol man jin conobꞌoj yeocoj.

Oj wakꞌ tit sjowal ebꞌ yet oj jin txꞌoxon jin watxꞌcꞌulal yibꞌan jun conobꞌ tol cꞌamto chi naꞌcha el yu ebꞌ.

22 Jaꞌ sjowal jin cꞌul jix oc can kopan xaam jin cꞌul jaxca junoj xaj kꞌakꞌ.

Masanil tzet ey sat txꞌotxꞌ txꞌotxꞌ chi tzꞌaꞌcantoj yu,

catuꞌ chi chaw skꞌakꞌal bꞌey yul txꞌotxꞌ bꞌey yichlaj mimej wonan.

23 Oj wa cantoj masanil tujan syaꞌilal yibꞌan ebꞌ.

Oj low masanil jin julbꞌal yin ebꞌ.

24 Oj cam ebꞌ yu wail cꞌal yu kꞌakꞌ yaꞌbꞌil;

jaꞌ junoj syaꞌilal caw wal jow,

oj qꞌueyon el ebꞌ.

Oj waon cantoj noꞌ chiꞌwawom noꞌ xol ebꞌ,

cꞌal noꞌ labꞌa caw jow svenenoal.

25 Oj cam yuninal ebꞌ yul-laj calle yu chꞌen espada.

Yin xacꞌal xiwcꞌulal oj yun scaey ecꞌ ebꞌ bꞌey sna.

Oj cam ebꞌ achꞌe cꞌal ebꞌ ix kꞌopo,

ebꞌ icham ánima cꞌal ebꞌ unin chi txutxwi.

26 Jix jin naꞌ wuchon sajlem ebꞌ Israel tiꞌ,

cꞌal jin qꞌueyon can el ebꞌ sat txꞌotxꞌ txꞌotxꞌ tiꞌ,

yet watxꞌ cꞌamxa cꞌal bꞌey oj bꞌina ecꞌ ebꞌ.

27 Asan xin,

cꞌam chi yal jin cꞌul chi wabꞌ bꞌuchwal kꞌane yu ebꞌ chi jowi oc win.

Cꞌam chi yal jin cꞌul chi smeyne sbꞌa ebꞌ.

Tala chi yal ebꞌ jaxca tiꞌ:

Jaon wal tiꞌ jix kakꞌ eyqꞌuey ebꞌ Israel tiꞌ,

manaj Jehová jix akꞌon eyqꞌueyoj,

ẍi tala ebꞌ.

28 Cꞌam niꞌoj snaꞌbꞌal ebꞌ ánima tuꞌ,

cꞌam chi naꞌcha el yu ebꞌ.

29 Ta ey snaꞌbꞌal ebꞌ,

chim skeꞌ snaꞌcha el yu ebꞌ tzet oj elocoj.

30 ¿Tzet wal chi yun yela junoj mil Israel tet junoj ebꞌ scajat?

¿Tzet wal yu,

yuxan jaꞌ tet cawan chi ela junoj 10,000 ebꞌ?

Cꞌam niꞌoj tzet chi skeꞌ yu ebꞌ ta man jain oj Jehová jin tiꞌ,

chex waoc yul skꞌabꞌ ebꞌ je cajat tuꞌ,

ẍi Dios.

31 Caw wal yotaj ebꞌ pena snaꞌbꞌal tuꞌ,

tol jaꞌ scolomal ebꞌ cꞌam chi skeꞌ slaanbꞌane sbꞌa yipal yetoj cu Colomal.

32 Jaꞌ ebꞌ pena snaꞌbꞌal tuꞌ caw chi tzala ebꞌ yetoj spenail,

jaxca spenail ebꞌ a Sodoma cꞌal ebꞌ a Gomorra.

Jaxa stzalacꞌulal ebꞌ laan jaxca junoj veneno.

33 Jaꞌ teꞌ an chi swaꞌne ebꞌ laan jaxca svenenoal stiꞌ noꞌ labꞌa,

tol chi cam ánima yu.

34 Chi yalon pax Jehová jaxca tiꞌ:

Masanil spenail ebꞌ cꞌam chin ocheni,

naꞌan cꞌal wu jaxca tol tucꞌal cꞌuan ecꞌ wu yul junoj cꞌunaꞌ.

35 Jain tiꞌ ey walon wet waon oc syaꞌilal yibꞌan ebꞌ.

Jain tiꞌ oj waecꞌ spaj tet ebꞌ,

ey jun cꞌual oj eyqꞌuey ebꞌ.

Cawilxa chi jul scꞌual yet oj lawoj ey ebꞌ.

Cawilxa cꞌal chi jul yorail yet oj ẍaꞌon spajtzebꞌal junjun ebꞌ,

ẍi Jehová.

36 Jaꞌ Jehová oj colwa yetoj ebꞌ sconobꞌ yet oj yilon ebꞌ tol lalan spax yip ebꞌ.

Oj cusoc scꞌul Naj yin ebꞌ ẍejabꞌ,

yet oj yilon ocoj tol cꞌamxa junoj mactxequel chi skeꞌ scolwa yetoj,

tam wal ebꞌ yakꞌomal servil,

cꞌal ebꞌ yet sbꞌa yul yet.

37 Catuꞌ oj yalon Jehová tet ebꞌ ánima jaxca tiꞌ:

¿Bꞌeytuꞌ eyoc je diosal tuꞌ tinaniꞌ;

wan je colomal bꞌey che yaoc yipoj je cꞌul tuꞌ,

38 wan chi chiꞌon eytoj ẍepuꞌal noꞌ je xaambꞌal,

cꞌal yuqꞌuen eytoj teꞌ an che yakꞌ tet yin xaambꞌal tuꞌ?

Jaꞌ ojabꞌ wan je diosal tuꞌ chi colwa je yetoj,

jaꞌ ojabꞌ ebꞌ chex teyneni.

39 Jain tiꞌ,

asanne jin ton Dios jin.

Cꞌam jaywanojxa dios jin sattaj.

Jain chi wakꞌ cam junoj mactxequel,

catuꞌ Jain chi wakꞌ cꞌal pax skꞌinal.

Jain chi wakꞌ yasoj ebꞌ ánima,

jain chi wante pax ebꞌ.

¡Cꞌam junoj mactxequel chi skeꞌ scolon el sbꞌa yul jin kꞌabꞌ!

40 Asanne jin ey jin ecꞌ yin tobꞌalkꞌinal.

Chi wiꞌa jin kꞌabꞌ bꞌey satcan tiꞌ,

catuꞌ chi wakꞌon jin tiꞌ,

41 tol jaꞌ yet oj jin nijon atej ye chꞌen wespada tuxa cꞌal chi kopopi,

oj jin waꞌne yeoc jun jowal tuꞌ.

Oj jin pajtze jin bꞌa tet ebꞌ chi jowi oc win,

catuꞌ oj waon oc syaꞌilal ebꞌ jaxca tzet chi snaꞌ ebꞌ win.

42 Caw oj bꞌoncha cantoj jin julbꞌal tiꞌ yu ẍiqꞌuil ebꞌ.

Jaꞌ chꞌen wespada oj tzokꞌon cantoj ẍiꞌbꞌeal ebꞌ camnaj,

cꞌal yetoj ebꞌ mitxꞌbꞌiltej yin jowal.

Jaxa sjolom ebꞌ chi jowi oc win,

chicꞌtaj xacꞌal oj yun cantoj,

ẍi Jehová.

43 Jex nacionlaj,

tzalaanwej yetoj ebꞌ sconobꞌ Jehová,

yutol oj spajtze scamichal ebꞌ ẍejabꞌ Naj.

Oj yakꞌ lawoj Naj jantaj ebꞌ chi jowi oc yin ebꞌ,

catuꞌ oj yakꞌon mimancꞌulal yibꞌan spenail ebꞌ conobꞌ,

ẍi Moisés.