Chi tit Jehová bꞌey txꞌotxꞌ wonan Sinaí.

Jaꞌ tituꞌ jix cu stzejtaneletej yu bꞌey txꞌotxꞌ Seír.

Chi stzejtanetej bꞌey txꞌotxꞌ wonan Parán.

Yelcꞌulal chi tit Naj cu cawilal yetoj ebꞌ yángel yin xa smilal ey sbꞌisil ebꞌ.

Jaꞌ swatxꞌ kꞌabꞌ iꞌnen oc an ley,

caw wal chi chaw skꞌakꞌal.

3 Caw wal chi scamcꞌulne sconobꞌ Naj,

chi steyne ebꞌ yet xa yeocoj.

Jaꞌ ebꞌ tuꞌ chi oc ebꞌ yin eyilal tet,

catuꞌ chi sjijen pax ebꞌ tzet chi yal ẍejbꞌanil.

4 Jaꞌ jun ley jix wakꞌcan tiꞌ,

jaxca tol sbꞌeomal oj ebꞌ yicꞌaal Jacob yeocoj.

5 Jaꞌ Jehová eyoc Reyal bꞌey txꞌotxꞌ Jesurún,^a

yet chi syambꞌa oc sbꞌa ebꞌ syaawil conobꞌ,

yet chi syambꞌa oc sbꞌa masanil ebꞌ yicꞌaal Israel,

ẍi naj Moisés.

6 Jix ẍaꞌon el yich naj Moisés yalon can el watxꞌ kꞌane yibꞌan junjun icꞌaaleal.

Yin sbꞌabꞌelal jix yal yibꞌan ebꞌ yicꞌaal naj Rubén jaxca tiꞌ:

Ey ojabꞌ scawil ebꞌ yicꞌaal Rubén,

cꞌam ojabꞌ bꞌakꞌin chi qꞌueyeloj,

caxcꞌal cꞌam wal txꞌial ebꞌ yicꞌaal,

ẍi naj.

7 Jix yalon cꞌal pax yin ebꞌ yicꞌaal Judá jaxca tiꞌ:

Jaach Jehová cu Diosal,

abꞌ cꞌal tzet chi yal ebꞌ yicꞌaal Judá ey jaach,

junxane ojabꞌ cha wute ebꞌ yetoj yet conobꞌ.

Cha colel ebꞌ yetoj ja wipalil yet cha colon el ebꞌ tet ebꞌ pena snaꞌbꞌal,

ẍi naj Moisés.

8 Jacꞌalaꞌ jix yun yalon cꞌal pax yin ebꞌ yicꞌaal Leví jaxca tiꞌ:

Jaach Jehová cu Diosal,

cha txꞌoxel ja wochwan yin chꞌen Urim cꞌal yin chꞌen Tumim akꞌbꞌil ja wu yul skꞌabꞌ ebꞌ ja chejabꞌ tol jijem ey jaach,

ebꞌ jix ja wakꞌ porobꞌal bꞌey txꞌotxꞌ Masah,

ebꞌ jix ja teele ja bꞌa yetoj bꞌey jaꞌ Meribá.

9 Jaꞌton ebꞌ ecꞌbꞌan xacꞌal jix yun jaach scamcꞌulne yintaj smam xutx,

yintaj yuẍtaj cꞌal yintaj yuninal.

Jaꞌ ebꞌ tuꞌ jix sjije ja chejbꞌanil ebꞌ,

cꞌam bꞌey jix yetnetoj ja wa kꞌane ebꞌ albꞌilcanoj.

10 Chi cuyle ebꞌ yicꞌaal Jacob yu ebꞌ yetoj ja chejbꞌanil.

Chi yalon cꞌal el ja chejbꞌanil ebꞌ xol-laj conobꞌ Israel.

Catuꞌ oj yakꞌon cꞌal tzꞌaꞌ teꞌ incienso ebꞌ ja sattaj,

catuꞌ oj yakꞌon tzꞌaꞌ xaambꞌal ebꞌ yibꞌan yet xaambꞌal.

11 Jaach Jehová cu Diosal,

aoc ja watxꞌcꞌulal yibꞌan ebꞌ,

yetoj masanil ja cꞌul cha chaꞌon tzet chi yakꞌ ebꞌ ey jaach.

Cha tecꞌon kꞌa yichin ebꞌ scajat ebꞌ,

yet watxꞌ cꞌamxa chi skeꞌ ya waan ebꞌ,

ẍi naj Moisés.

12 Jix yalon cꞌal pax yin ebꞌ yicꞌaal Benjamín jaxca tiꞌ:

Caw wal ochebꞌil ebꞌ yicꞌaal Benjamín yu Jehová,

yuxan caw tzalacꞌulal yeoc ebꞌ,

jaꞌ Naj chi colwa yetoj ebꞌ,

jaꞌ Naj eyoc steynemaloj ebꞌ,

ẍi naj Moisés.

13 Jix yalon cꞌal pax yin ebꞌ yicꞌaal José jaxca tiꞌ:

Yakꞌ ojabꞌ syaaxilal Jehová yibꞌan xꞌotxꞌ ebꞌ yicꞌaal José.

Cꞌam ojabꞌ bꞌakꞌin chi oc tucan yakꞌon nabꞌ yibꞌan ebꞌ,

cꞌam ojabꞌ bꞌakꞌin chi tantoj jaꞌ kꞌobꞌ jaꞌ jotbꞌil yu ebꞌ.

14 Watxꞌ ojabꞌ chi yun skꞌanbꞌi sat yawo ebꞌ yu skꞌaxanil yajan cꞌu,

catuꞌ watxꞌ ojabꞌ chi yun yakꞌon sat teꞌ awbꞌeal teꞌ yin stiempoal.

15 Nonaj ojabꞌ cꞌal el yu yawo ebꞌ bꞌey wonanlaj tol ey cꞌaltaꞌ ecꞌ yet peyxa.

16 Nonaj ojabꞌ el sat txꞌotxꞌ yu masanil tzetyetal tol watxꞌ chi yakꞌa,

cꞌal yu syaaxilal Jehová,

Naj jix xꞌox sbꞌa xol teꞌ qꞌuix chi chaw skꞌakꞌal.

Tit ojabꞌ can masanil syaaxilal yibꞌan José,

naj tol sicꞌbꞌil el xol ebꞌ yuẍtaj.

17 Caw wal watxꞌ naj jaxca junoj achꞌe wacax bꞌabꞌel alinaj.

Tol ey yip jaxca junoj noꞌ xol-laj teꞌal wacax mimej yucꞌaꞌ.

Oj stej cam masanil conobꞌ masantaꞌcꞌal bꞌey slawubꞌal txꞌotxꞌ txꞌotxꞌ.

Jaxca yucꞌaꞌ junoj noꞌ wacax,

queytuꞌ chi yun xꞌoxontej yipalil,

tol yin xa smilal ey sbꞌisil ebꞌ yicꞌaal Efraín,

yin xacꞌal pax smilal ey sbꞌisil ebꞌ yicꞌaal Manasés,

ẍi naj Moisés.

18 Jix yalon cꞌal pax yin ebꞌ yicꞌaal Zabulón,

cꞌal Isacar jaxca tiꞌ:

Tzalaanwej jex yicꞌaal Zabulón,

yal cꞌal bꞌeytuꞌ chex eqꞌui.

Jacꞌalaꞌ cꞌal pax jex yicꞌaal Isacar,

tzalaanwej bꞌey yul je kꞌap na.

19 Che yawte masanil ebꞌ nación bꞌey sjolomlaj wonan,

catuꞌ che yakꞌon je xaambꞌal tol chi ẍaꞌ scꞌul Jehová.

Che yakꞌon je naꞌbꞌal yin masanil sbꞌeomal jaꞌ mar cꞌal syaaxilal bꞌey stiꞌlaj jaꞌ,

ẍi naj Moisés.

20 Jacꞌalaꞌ jix yal cꞌal pax yin ebꞌ yicꞌaal Gad,

jix yalon jaxca tiꞌ:

Iꞌle ojabꞌ a can sbꞌi Jehová,

yutol caw miman txꞌotxꞌ jix akꞌle can tet ebꞌ.

Laan ebꞌ jaxca junoj noꞌ león,

chi sjechtoj skꞌabꞌ cꞌal sjolom junojxa yet noꞌal,

queytuꞌ oj yute ebꞌ yicꞌaal Gad,

yet chi jul ebꞌ pena snaꞌbꞌal yin ebꞌ.

21 Jaꞌ ebꞌ yicꞌaal Gad jix iꞌon can oc txꞌotxꞌ txꞌotxꞌ caw wal watxꞌ yili.

Jaꞌ jun txꞌotxꞌ tuꞌ smoo tol jaꞌ ebꞌ yaaw yeoc yul conobꞌ chi iꞌon can ocoj.

Jaꞌ yet jix syambꞌan sbꞌa ebꞌ syaawil conobꞌ Israel,

jaꞌ ebꞌ yicꞌaal Gad jix ijbꞌan ebꞌ jaxca yalon ẍejbꞌanil cꞌal sley Jehová,

ẍi naj Moisés.

22 Jacꞌalaꞌ jix yalon cꞌal pax yin ebꞌ yicꞌaal Dan jaxca tiꞌ:

Jaꞌ naj Dan tiꞌ,

laan wal jaxca junoj noꞌ achꞌe león,

jix tit tacꞌal tꞌujna bꞌey txꞌotxꞌ Basán,

ẍi naj Moisés.

23 Jacꞌalaꞌ jix yalon cꞌal pax yin ebꞌ yicꞌaal Neftalí,

jaxca tiꞌ:

Jaꞌ xol ebꞌ yicꞌaal Neftalí,

watxꞌ ye can oc ebꞌ yu swatxꞌcꞌulal Jehová,

yet ebꞌ ye can oc jaꞌ naabꞌ jaꞌ masantaꞌcꞌal bꞌey chi lawi ecꞌ eltoj jaꞌ,

ẍi naj Moisés.

24 Jacꞌalaꞌ jix yalon cꞌal pax yin ebꞌ yicꞌaal Aser jaxca tiꞌ:

Yakꞌ ojabꞌ masanil syaaxilal Jehová yibꞌan ebꞌ yicꞌaal Aser.

Jaꞌ xol masanil ebꞌ yicꞌaal Jacob,

camcꞌulnele ojabꞌ ebꞌ yican yu ebꞌ yuẍtaj.

Miman ojabꞌ aceite olivo ey tet ebꞌ.

25 Watxꞌ ojabꞌ cꞌal yeoc smajil sna ebꞌ yul sconobꞌ.

Jaꞌ ojabꞌ chꞌen hierro ma chꞌen bronce eyoc smajiloj.

Ey ojabꞌ cꞌal yip ebꞌ yet tecꞌanto skꞌinal ebꞌ.

26 Cꞌam mactxequel chi skeꞌ slaanbꞌane sbꞌa yetoj sDiosal Jesurún.

Caw wal ey smey yecꞌabꞌ bꞌey yibꞌan asun yet chi colwa yetoj ebꞌ.

27 Jaꞌ Dios ey cꞌal ecꞌ yin tobꞌalkꞌinal.

Jaꞌ eyoc cu teynemaloj.

Jaꞌ yipalil Naj cꞌam slawubꞌal,

jaꞌ eyoc kipomaloj.

Jaꞌ Naj oj iꞌon el ebꞌ cu cajat cu sattaj,

catuꞌ oj yalon Naj tol oj qꞌueyle el ebꞌ.

28 Jex wet conobꞌ,

yelcꞌulal chex caey can ecꞌ sat txꞌotxꞌ tuꞌ.

Yin cꞌal tzalacꞌulal oj yun je yeecꞌ jaex yicꞌaal jex Jacob tiꞌ.

Jaꞌ bꞌey txꞌotxꞌ je txꞌotxꞌ tuꞌ caw watxꞌ oj yun ixim tiriw cꞌal je yal uva oj je yambꞌa aoj.

Cꞌam bꞌakꞌin oj oc tucan yakꞌon nabꞌ yibꞌan je txꞌotxꞌ tuꞌ.

29 Jex wet Israelal,

caw wal watxꞌ ket,

¿mac wal txequel junoj chi skeꞌ slaanbꞌane sbꞌa ketoj?

Jaꞌ Jehová jix cu coloni,

jaꞌ Naj chi cu teyneni cꞌal scolwa ketoj.

Jaxca wal junoj cu espada yeoc Naj yet chi kakꞌon eyqꞌuey ebꞌ cu cajat,

catuꞌ oj cu tecꞌon ey ebꞌ yetoj smeynebꞌail,

ẍi naj Moisés.