Sowalil Chi Xew Txꞌotxꞌ Txꞌotxꞌ Yin Jujebꞌ Abꞌil
25
Jaꞌ yet eyecꞌ naj Moisés bꞌey sjolom wonan Sinaí,
jix yalon Jehová tet naj jaxca tiꞌ:
2 Al masanil wan chejbꞌanile tiꞌ tet ebꞌ ja wet Israelal tol jain chi wal wan tiꞌ:
Jaꞌ yet ey jex xa ecꞌ bꞌey txꞌotxꞌ txꞌotxꞌ oj wakꞌ ey jex tuꞌ,
sowalil tol oj xew txꞌotxꞌ junoj abꞌil,
yu je yiꞌon a can jin bꞌi,
jain je Diosal jin tiꞌ.
3 Asanne wajebꞌ abꞌil chi skeꞌ chex mulna sat je txꞌotxꞌ.
Jaꞌ yin wajebꞌ abꞌil tuꞌ chi skeꞌ che yiꞌel yakꞌinal an je yuva,
cꞌal je yambꞌan a sat an.
4 Jaxa yet sjujebꞌ abꞌil xin,
sowalil chi xew txꞌotxꞌ,
yu je yiꞌon a can jin bꞌi.
Cꞌam cꞌal niꞌoj tzet che yaw sat txꞌotxꞌ txꞌotxꞌ yin jun abꞌil tuꞌ,
tam wal chi skeꞌ je yiꞌon el yakꞌinal an je yuva tuꞌ.
5 Cꞌam chi skeꞌ je kꞌupon a ixim tiriw tucꞌal chi aoloj yet xax lawi ecꞌ stiempoal skꞌuple a ixim,
tam wal chi skeꞌ je yambꞌan a sat an uva tol man elnaj oj yakꞌinal,
yutol chi xew txꞌotxꞌ txꞌotxꞌ yet jun abꞌil tuꞌ.
6 Jaꞌ masanil tzetyetal chi yakꞌ txꞌotxꞌ txꞌotxꞌ yet lalan xew txꞌotxꞌ yin jun abꞌil tuꞌ,
chi skeꞌ je loꞌoni,
chi skeꞌ sloꞌon jantaj ebꞌ naj je yakꞌomal servil cꞌal ebꞌ ix je yakꞌomal servil,
cꞌal ebꞌ chi mulna je yetoj,
cꞌal yetoj ebꞌ txꞌoj conobꞌal eyecꞌ je xol,
7 yetoj cꞌal pax noꞌ je jobꞌbꞌeal noꞌ,
cꞌal yetoj noꞌ xol-laj teꞌal noꞌ ey bꞌey jun txꞌotxꞌ tuꞌ.
Yuxan jaꞌ masanil tzet oj el sat txꞌotxꞌ txꞌotxꞌ yet jun abꞌil tuꞌ,
jaꞌ oj je loꞌ,
cꞌal yetoj noꞌ je jobꞌbꞌeal noꞌ.
8 Sowalil che bꞌis yin jujebꞌ abꞌil.
Jaꞌ jujebꞌ abꞌil tuꞌ chi bꞌisle yin jujel,
queytuꞌ chi yun yeloc yin 49 abꞌil.
9 Jaxa yet laonebꞌxa cꞌual yoc yet sjuj xꞌaaw,
jaꞌton jun scꞌual yet chi akꞌle tan spenail,
jaꞌ yet tuꞌ chi xuꞌle chꞌen trompeta bꞌey masanil yul je conobꞌ tuꞌ.
10 Jaxa yet chi aapnoj yin 50 abꞌil xin,
jaꞌ yet tuꞌ che yalaꞌ tol miman yeloc apnoj jun abꞌil tuꞌ,
jaꞌ yet tuꞌ chi jajcha el masanil tzetyetal.
Chi jajcha el ebꞌ ánima tol xonnajtoj sbꞌa yin akꞌo servilal,
yet watxꞌ chi pax toj ebꞌ bꞌey sconobꞌ xol ebꞌ yican.
Queytuꞌ chi yun pax ebꞌ xonnaj el xꞌotxꞌ,
jaꞌ yet tuꞌ chi akꞌle meltzo xꞌotxꞌ ebꞌ yul skꞌabꞌ junelxa.
11 Jaxa yet abꞌil 50 tuꞌ,
je yet yeoc jaex Israel jex tiꞌ,
yu je naꞌontej yet oj jex jajcha eltej.
Jaꞌ yet jun abꞌil tuꞌ,
cꞌam che yaw je yawo,
cꞌam cꞌal che kꞌupa ixim tiriw tucꞌal chi chꞌibꞌa jaxca tuꞌ.
Cꞌam che yiꞌel yakꞌinal an uva,
cꞌal je yambꞌan a sat an.
12 Miman ojabꞌ yeloc apnoj jun abꞌil tuꞌ yul je sat yet oj jex jajcha eltej tuꞌ.
Jaꞌ tzetyetal tucꞌal chi chꞌibꞌa sat txꞌotxꞌ je txꞌotxꞌ,
jaꞌ che loꞌ.
13 Jaꞌ yet jun abꞌil yet jajbꞌanilal tuꞌ,
junjun jex cꞌal che yiꞌ cꞌal pax can oc je txꞌotxꞌ tuꞌ junelxa.
14 Yuxan ta ey mactxequel chi sman xꞌotxꞌ ma chi xontoj xꞌotxꞌ tet junoj mactxequel,
cꞌam che naꞌ je yiꞌon miman tumin yin.
15 Jaꞌ mactxequel chi manon tuꞌ,
sowalil chi stoolane,
jantajxa stiempoal sjajcha el jun txꞌotxꞌ tuꞌ.
Jaꞌ mactxequel chi txonon el jun txꞌotxꞌ tuꞌ,
sowalil chi ẍaꞌ stool sat yawo tuꞌ sat xꞌotxꞌ tuꞌ,
jatacꞌalaꞌ jantaj to stiempoal oj yambꞌale a sat awo yet oj jul junxa abꞌil yet chi jajcha el jun txꞌotxꞌ tuꞌ.
16 Jatacꞌalaꞌ ta ecꞌal to abꞌil oj yambꞌale a sat awo tuꞌ,
queytuꞌ chi yun stoolanele sat awo tuꞌ tet.
Ta jayebꞌxane abꞌil xin,
txenne pax stool txꞌotxꞌ oj akꞌle tet,
yutol jaꞌ sat awo tuꞌ chi txonle eloj,
jatacꞌalaꞌ jayelto chi yambꞌale aoj.
17 Man comonoj che tokꞌecꞌ tzetyetal tet junojxa mactxequel.
Jaꞌ tiꞌ je yet tol che txꞌoxeloj tol ey weloc apnoj yul je sat,
yutol jain tiꞌ je Diosal jin.
18 Jijewej jin chejbꞌanil tiꞌ,
catuꞌ che bꞌeybꞌalnewej jin ley.
Ta oj je jije,
tzalacꞌulal cꞌal oj yun je caey ecꞌ bꞌey je conobꞌ.
19 Caw watxꞌ oj yun sat je yawo sat je txꞌotxꞌ,
yin xacꞌal tzalacꞌulal oj yun je loꞌon sat je yawo tuꞌ.
20 Tala cꞌuxan ey jex oj je kꞌanle jaxca tiꞌ:
¿Tzet oj cu loꞌ yet sjuj abꞌil tuꞌ,
ta cꞌamxa tzet oj kawaꞌ,
cꞌamxa tzet oj cu yambꞌa aoj,
ta je chi?
21 Cꞌam chex oc yin bꞌiscꞌulal,
yutol oj waeytej syaaxilal yibꞌan je yawo yet swaj abꞌil tuꞌ.
Caw miman sat je yawo oj je yambꞌa ocoj,
yuxan cꞌuxan cꞌal oj yabꞌ je loꞌon yin oxebꞌ abꞌil.
22 Jaꞌ tzet oj je yambꞌawej aoj,
jaꞌ oj je loꞌ,
yajbꞌan chex mulna yet swaxajebꞌ abꞌil tuꞌ.
Jaꞌ tzet yaman can oc je yu tuꞌ,
jaꞌ oj je loꞌ yajbꞌan chi elol sat je yawo yet sbꞌalonebꞌ abꞌil tuꞌ.
23 Jaꞌ txꞌotxꞌ txꞌotxꞌ tuꞌ,
cꞌam chi skeꞌ je txonon el txꞌotxꞌ yin junelne,
yutol wet yeoc txꞌotxꞌ an,
jaex tiꞌ tucꞌal ecꞌabꞌwom cꞌal je yeoc sat txꞌotxꞌ txꞌotxꞌ tuꞌ wu an.
24 Yuxan ta ey junoj chi sman xꞌotxꞌ,
catuꞌ chi smanon pax ecꞌ xꞌotxꞌ jun chi txonon el tuꞌ,
chi skeꞌ smanon pax ecꞌ xꞌotxꞌ tuꞌ junelxa ta chi skeꞌ yu.
25 Ta ey junoj je yet conobꞌ chi can xacꞌal can yin cꞌamxa niꞌoj tzet ey tet,
catuꞌ chi xonon xacꞌal cantoj xꞌotxꞌ ey jex,
jaxa junoj yican to sbꞌa yetoj,
jaꞌ jun tuꞌ chi skeꞌ smanon pax ecꞌ txꞌotxꞌ tet.
26 Ta cꞌamxa junoj yican chi skeꞌ smanon ecꞌ smajul txꞌotxꞌ tuꞌ xin,
ta chi yamcha pax stumin,
chi skeꞌ smanon ecꞌ xꞌotxꞌ tuꞌ junelxa.
27 Asan chi naꞌlei Jantajxa stiempoal xonon el xꞌotxꞌ tuꞌ,
catuꞌ chi yiꞌon meltzo tet naj jix manon jun txꞌotxꞌ tuꞌ,
jatacꞌalaꞌ jantaj to stiempoal yet oj jul junxa abꞌil yet chi jajle el junoj tzetyetal,
catuꞌ chi yiꞌon pax oc xꞌotxꞌ tuꞌ junelxa.
28 Ta cꞌam cꞌal chi yamcha chꞌen tumin yu naj yet chi smanon ecꞌ xꞌotxꞌ tuꞌ junelxa,
jaꞌ jun tuꞌ chi can cꞌal can yul skꞌabꞌ jun mactxequel tol jix manon el txꞌotxꞌ txꞌotxꞌ tuꞌ,
masantaꞌcꞌal yet chi jul junxa abꞌil yet jajbꞌanilal.
Jaꞌ yet tuꞌ chi jajcha el txꞌotxꞌ,
catuꞌ chi yiꞌon pax can oc xꞌotxꞌ naj tuꞌ junelxa.
29 Ta ey mactxequel chi xontoj junoj sna bꞌey junoj miman conobꞌ tol eyoc smuroal yinlaj,
chi skeꞌ smanon ecꞌ junelxa,
yet cꞌamto chi lawi jun abꞌil xonon eloj.
30 Ta cꞌamto chi skeꞌ smanon el naj jun na tuꞌ yet cꞌamto chi tzꞌajna jun abꞌil tuꞌ,
jaꞌ jun tuꞌ chi can xacꞌal can yin junelne tet naj jix manon tuꞌ,
cꞌal tet ebꞌ yicꞌaal.
Jaꞌ jun na tuꞌ cꞌamxa chi skeꞌ sjajcha el yet chi oc jun abꞌil yet chi jajle el junoj tzetyetal.
31 Jal pax na bꞌey cꞌam smuroal conobꞌ eyocoj,
laan cꞌal jaxca comon txꞌotxꞌ.
Chi skeꞌ smanle ecꞌ junelxa,
ma sjajcha el yet chi oc jun abꞌil yet chi jajle el junoj tzetyetal.
32 Jal pax ebꞌ Levita xin,
chi skeꞌ cꞌal smanon ecꞌ sna ebꞌ junelxa yal cꞌal tzet tiempoal,
caxcꞌal eyoc yul smuroal sconobꞌ ebꞌ.
33 Ta ey junoj Levita cꞌam chi skeꞌ scaꞌ manon ecꞌ sna bꞌey yul conobꞌal tuꞌ,
jaxa yet chi oc jun abꞌil yet chi jajle el junoj tzetyetal,
yutol jaꞌ ebꞌ Levita tuꞌ,
tol asanne yin sna ebꞌ ey yalon yet yul je nación tuꞌ.
34 Jaꞌ txꞌotxꞌ txꞌotxꞌ bꞌey chi low noꞌ sjobꞌbꞌeal noꞌ ebꞌ Levita bꞌey yinlaj eltoj conobꞌ tuꞌ,
cꞌam chi skeꞌ xonon el ebꞌ,
yutol slowbꞌal snoꞌ ebꞌ yeoc jun txꞌotxꞌ tuꞌ.
35 Ta ey junoj ebꞌ je yet conobꞌ caan je cawilal tuꞌ,
ta chi can xacꞌal can yin cꞌamxa niꞌoj tzet ey tet,
sowalil chex colwa yin jaxca chi yun je colwa tet junoj txꞌoj conobꞌal chi ecꞌabꞌ je xol,
yet watxꞌ ey cꞌal ecꞌ ebꞌ je xol.
36 Cꞌam ojabꞌ che kꞌan yuneꞌ je tumin,
ma je tzetyetal chi smaane junoj mactxequel ey jex.
Jaꞌ tiꞌ je yet,
tol ey ojabꞌ yeloc apnoj ebꞌ je yet animail yul je sat,
yet watxꞌ chi eecꞌal ecꞌ ebꞌ je yetoj.
37 Cꞌam ojabꞌ che kꞌan yuneꞌ je tumin che yakꞌ smaane ebꞌ,
cꞌam ojabꞌ che yiꞌa stool sloꞌbꞌe ebꞌ che yakꞌa.
38 Yutol jain Jehová je Diosal jin chi walaꞌ;
jain jix jex wiꞌeltej bꞌey txꞌotxꞌ Egipto yet chi wakꞌ txꞌotxꞌ Canaán ey jex,
yet chin oc je Diosaloj.
39 Ta ey junoj je yet conobꞌ eyecꞌ je yetoj,
cꞌamxa cꞌal niꞌoj tzet ey tet,
catuꞌ chi xonon xacꞌal cantoj sbꞌa ey jex,
manche je yute jaxca junoj je yakꞌomal servil,
40 tol ojabꞌ che yute jaxca junoj mulnawom,
ma jaxca junoj tucꞌal chi ecꞌabꞌtoj che yute.
Chi skeꞌ smulna je yetoj,
masantaꞌcꞌal yet chi jul jun abꞌil yet chi jajle el junoj tzetyetal.
41 Chi lawi tuꞌ xin,
chi xa skeꞌ je jajon el yetoj yuninal yet chi paxtoj bꞌey sna,
catuꞌ chi meltzotoj xol ebꞌ yican bꞌey caan cꞌaltaꞌa.
42 Yutol jaex tiꞌ,
jin chejabꞌ je yeocoj.
Jain caw jix jex wiꞌeltej bꞌey txꞌotxꞌ Egipto,
yuxan man smoo oj tol chex txonle el yin yakꞌomaloj servil.
43 Cꞌam ojabꞌ chex ecꞌ xacꞌal yibꞌan je yakꞌon yaawilal yibꞌan ebꞌ je yet conobꞌ.
Jaꞌ tiꞌ je yet,
tol miman ojabꞌ weloc apnoj yul je sat.
44 Ta tol che yoche che manel junoj je yakꞌomal servil,
winaj ma ix,
chi skeꞌ je manon bꞌey xol wanxa conobꞌlaj ey je cawilal tuꞌ.
45 Ma xin,
chi skeꞌ je manon ebꞌ txꞌoj conobꞌal eyecꞌ je xol,
ma yuninal ebꞌ tol alinaj bꞌey yul je conobꞌ tiꞌ,
chi skeꞌ je manon oc ebꞌ je chejabꞌoj,
46 jaxa yet oj jex camoj,
chi cancan ebꞌ ẍejabꞌoj ebꞌ je yuninal yet bꞌakꞌin.
Jal jex jaex tiꞌ xin,
cꞌam ojabꞌ junoj ebꞌ je yet conobꞌ chi skeꞌ je manon yin junelne,
yutol je yet conobꞌ je bꞌa yetoj ebꞌ.
47 Ta ey junoj ebꞌ txꞌoj sconobꞌ eyecꞌ je xol chi oc yin bꞌeomal,
jaxa pax junoj je yet conobꞌ tuꞌ junne caan yetoj,
chi oc xacꞌal mebꞌail yin,
catuꞌ chi xonontoj sbꞌa tet jun txꞌoj conobꞌal eyecꞌ scawilal tuꞌ,
ma bꞌey junojxa eyto yu sbꞌa yetoj jun txꞌoj sconobꞌ tuꞌ,
48 jaꞌ jun tuꞌ,
chi skeꞌ smanon el sbꞌa naj junelxa tet bꞌey xonnajtoj sbꞌa tuꞌ,
ma chi manle el yu junoj yican.
49 Chi skeꞌ smanle el yu junoj yuẍtaj smam,
ma yu junoj tol yican to sbꞌa yetoj.
Ta chi skeꞌ yu xin,
chi skeꞌ smanon el sbꞌa xꞌojli.
50 Chi bꞌisle yu ebꞌ jantajxa tiempo xonontoj sbꞌa naj tet naj manwinaj tuꞌ,
chi ẍaꞌel yich sbꞌislei masantaꞌcꞌal yet chi jul jun abꞌil yet chi jajle el junoj tzetyetal.
Jaꞌ stool chi akꞌle tuꞌ,
jatacꞌalaꞌ jantaj yabꞌilal tuꞌ,
queytuꞌ chi yun sbꞌislei eloj jantaj tumin chi yiꞌtoj yin smulnail,
jaxca stool scꞌu ebꞌ mulnawom.
51 Ta eyto yapni stiempoal yet chi oc jun abꞌil yet chi jajle el junoj tzetyetal,
catuꞌ chi scaꞌ manon el sbꞌa,
chi yakꞌ meltzo niꞌojxa chꞌen tumin tuꞌ,
jatacꞌalaꞌ jantaj tumin jix ẍaꞌ naj yet jix xonon el sbꞌa naj tuꞌ.
52 Ta txenxane pax tiempo xin,
jun abꞌil yet chi jajle el junoj tzetyetal,
asanxane niꞌojxa chꞌen tumin tuꞌ chi yakꞌ meltzo naj.
53 Ta jaꞌ junoj je yet conobꞌ chi xontoj sbꞌa tet junoj txꞌoj conobꞌal,
chi utele jaxca junoj mulnawom tol chi mulna yin abꞌil.
Cꞌam che chaꞌ etex jun ánima tuꞌ je sattaj.