2 Al tet ebꞌ ja wet Israelal tol chi yiꞌtej yaceiteal sat teꞌ olivo ey jaach,

yutol jaꞌ jun aceite tuꞌ oj kꞌanbꞌalnele yet chi oc skꞌakꞌal tzejtebꞌal.

3 Jaꞌ naj Aarón oj waꞌnen oc skꞌakꞌal,

yet watxꞌ ey cꞌal oc skꞌakꞌal chi ecꞌ akꞌbꞌal jin sattaj bꞌey jin calubꞌal bꞌey chin chaꞌle jin bꞌa je yetoj,

bꞌey sattaj eltej an cortina bꞌey eyoctoj Scaẍail Jin Wa Kꞌane.

Jaꞌ jun tiꞌ,

ley chi yun can ey jex.

4 Watxꞌ ojabꞌ chi yun swaꞌnen oc skꞌakꞌal wan tzejtebꞌal tuꞌ naj Aarón,

bꞌey yibꞌan jun sbꞌatxlubꞌal tol oro cꞌal eloj,

ey ojabꞌ cꞌal oc skꞌakꞌal jin sattaj.

5 Iꞌle ojabꞌtej ixim jarina caw wal watxꞌ,

catuꞌ chi waꞌxi lacawebꞌoj ixim mimej pan,

tol ey nanoj sjoꞌ libra jarina chi oc yin junjun ixim,

6 chi lawi tuꞌ,

chi latzꞌle ey ixim pan tuꞌ yibꞌan jun meẍa tol oro cꞌal eloj;

caabꞌ chi yun ya latzꞌan ixim yibꞌan meẍa tuꞌ;

wajebꞌ yin junjun latzꞌan.

7 Chi ale cꞌal pax ey teꞌ incienso sukꞌukꞌi yoc sabꞌ yetcꞌulal junjun latzꞌan ixim pan tuꞌ;

jaꞌ teꞌ incienso tuꞌ chi akꞌle tzꞌaꞌ teꞌ jin sattaj,

jaꞌton chi txꞌoxon eloj,

tol wet yeoc ixim pan tuꞌ.

8 Junjun cꞌal yet scꞌual xewilal chi bꞌatxbꞌale ey ixim pan tuꞌ jin sattaj,

yu sjijen ebꞌ ja wet conobꞌ Israel jun jin wa kꞌane tiꞌ.

9 Jal wanxa ixim pan chi iꞌle can el tuꞌ,

yet naj Aarón chi yun can oc yetoj ebꞌ yicꞌaal.

Jaꞌ ebꞌ chi loꞌon ixim pan tuꞌ bꞌey junoj lugar tol wet yeocoj,

yutol yel xacꞌal miman yeloc apnoj xol wan tzetyetal yet cꞌaltaꞌ ebꞌ yakꞌomal xaambꞌal tol chi iꞌle el yin wan ofrenda chi akꞌle tzꞌaꞌ jin sattaj,

ẍi Jehová.

10 Jaꞌ xol ebꞌ Israel,

ey jun winaj alinaj xol ebꞌ tuꞌ,

Israel xutx naj,

Selomit sbꞌi ix,

scutzꞌin naj Dibrí,

titnaj yin yicꞌaal naj Dan,

jal smam naj a Egipto naj.

11 Jaꞌ jun winaj tuꞌ jix steele sbꞌa yetoj jun naj Israel bꞌey bꞌulan ecꞌ ebꞌ tuꞌ.

Jaꞌ yin jun teelebꞌail tuꞌ,

jaꞌ naj yuneꞌ ix a Israel chi yij sbꞌi Selomit tuꞌ,

jix oc spenail yutol jix bꞌawa naj yin Dios,

yuxan jix iꞌletoj naj sattaj Moisés.

12 Jix teynele naj masantaꞌcꞌal jix yal Jehová tzet sowalil chi utele naj.

13 Jix yalon Jehová tet naj Moisés jaxca tiꞌ:

14 Iꞌwej eltoj naj penawom tuꞌ bꞌey bꞌulan jex ecꞌ tuꞌ,

catuꞌ jaꞌ masanil ebꞌ jix abꞌen tzet jix yal naj tuꞌ,

ya ojabꞌ oc skꞌabꞌ ebꞌ yibꞌan sjolom naj,

jaxa masanil ebꞌ conobꞌ chi kꞌojon cam yetoj chꞌen.

15 Al wan tiꞌ tet ebꞌ ja wet Israelal:

Jaꞌ mactxequel chi oc spenail yin yalon pena kꞌane win an,

sowalil chi makꞌle cam yu spenail tuꞌ.

16 Jaꞌ masanil ebꞌ chi oc spenail yin yalon bꞌuchwal kꞌane win,

sowalil chi kꞌojchꞌennele camoj.

Caxcꞌal txꞌoj conobꞌal,

ma a conobꞌ titiꞌ,

ta pena tzet chi yal ebꞌ win,

sowalil chi cami.

17 Jaꞌ mactxequel chi makꞌon cam junoj yet animail,

sowalil chi cami.

18 Jaꞌ mactxequel chi makꞌon cam sjobꞌbꞌeal noꞌ junojxa mactxequel,

sowalil chi yakꞌ sqꞌuexel jun noꞌ noꞌ tuꞌ.

19 Jaꞌ mactxequel chi makꞌon junoj yet animail,

jaxca chi yute jun mactxequel tuꞌ,

queytuꞌ chi utele cꞌal pax oj.

20 Ta tol chi kꞌatoj junoj mactxequel yu junoj,

sowalil chi makꞌle pax kꞌatoj.

Ta chi eltej sbꞌakꞌ sat junoj mactxequel,

sowalil chi makꞌle eltej sbꞌakꞌ sat.

Ta chi eltej yee junoj mactxequel yu junoj,

sowalil chi makꞌle eltej yet.

Jaxca tzet chi utele junoj ánima yu junojxa mactxequel,

queytuꞌ chi utele pax jun mactxequel tuꞌ.

21 Jaꞌ mactxequel chi smakꞌ cam sjobꞌbꞌeal noꞌ junoj yet animail,

sowalil chi yakꞌ sqꞌuexel.

Jal pax mactxequel chi smakꞌ cam junoj yet animail xin,

jaꞌ jun tuꞌ sowalil chi makꞌle camoj.

22 Jaꞌ jun ley tiꞌ chi oc yopiso tet ebꞌ txꞌoj conobꞌal,

cꞌal tet ebꞌ conobꞌ Israel.

Jain Jehová je Diosal jin chi walaꞌ.

23 Queytuꞌ jix yun yalon naj Moisés tet ebꞌ yet Israelal,

yuxan jix iꞌle eltoj naj jix alon pena kꞌane tuꞌ yin Jehová bꞌey stiꞌeltoj bꞌey bꞌulan ecꞌ ebꞌ conobꞌ tuꞌ.

Jaꞌ tituꞌ jix kꞌojchꞌennele cam naj.

Jix sjije yunen ebꞌ jaxca jix yun yalon Jehová tet naj Moisés.