Jun Yet Xaambꞌal Tol Chꞌen Bronce Cꞌal Eloj
27
Jix yalon pax Jehová jaxca tiꞌ:
Cha wakꞌon pax waꞌxoj junoj yet xaambꞌal tol laan chi yun scanpaqꞌuil.
Jaꞌ teꞌ chemteꞌ tol acacia chi ale oc yin,
caabꞌ metro yetoj 25 centímetro junjun pacꞌ,
caabꞌ metro yetoj 25 centímetro chi yun steel.
2 Cha waon oc yucꞌaꞌ bꞌey xiquinlaj scanpaqꞌuil.
Jaꞌ wan yucꞌaꞌ tuꞌ,
junne chi yun swaꞌxi yetoj jun yet xaambꞌal tuꞌ.
Chi lawi tuꞌ,
cha wakꞌon waꞌxoj oc chꞌen bronce yin.
3 Masanil smitxꞌkꞌabꞌeal jun yet xaambꞌal tuꞌ,
bronce ojabꞌ cꞌal eloj:
Jaxca sneetal bꞌey chi ey stikꞌakꞌil taan,
cꞌal slutxbꞌanil,
yetoj mimej secꞌ,
yetoj chꞌen slutxbꞌanil eltej stzakꞌakꞌ,
cꞌal yetoj sneetal bꞌey chi ey stzakꞌakꞌ.
4 Cha waꞌne pax junoj chꞌen srejail tol bronce cꞌal eloj,
catuꞌ chi oc junjunoj chꞌen slocxomal yinlaj xiquin jun reja tuꞌ.
5 Cha waon pax oc bꞌey yalan stiꞌlaj jun yet xaambꞌal tuꞌ,
asan bꞌey snan jun yet xaambꞌal tuꞌ chi ina jun reja tuꞌ.
6 Catuꞌ chi waꞌxi pax wanojxa sbꞌatxbꞌanil jun yet xaambꞌal tuꞌ;
jaꞌ teꞌ acacia chi oc yin,
chi lawi tuꞌ,
chi ale oc chꞌen bronce yin.
7 Jaꞌ teꞌ sbꞌatxbꞌanil tuꞌ,
sowalil chi ecꞌtoj teꞌ yul chꞌen slocxomal eyoc yin jun yet xaambꞌal tuꞌ.
Jaꞌ yet chi iꞌletoj jun yet xaambꞌal tuꞌ,
chi jul-le ecꞌtoj junjun teꞌ bꞌatxbꞌale tuꞌ junjun pacꞌ.
8 Jaꞌ jun yet xaambꞌal tuꞌ,
chemteꞌ chi oc yin,
jolan chi yun can yul,
jaxca yechel jix jin txꞌox ey jaach bꞌey sjolom wonan tiꞌ.
Sattaj Eltoj Stiꞌ Snail Scalubꞌal Jehová
9 Jix yalon pax Jehová jaxca tiꞌ:
Cha waꞌne pax an cortina tol lino cꞌal eloj,
an caw watxꞌ yili,
yet chi oc joyan smajiloj sattaj eltoj stiꞌ jin calubꞌal tiꞌ.
Jaꞌ bꞌey jun pacꞌ yetcꞌulal sur,
ey 45 metro chi yun stoo tꞌinan an cortina tuꞌ.
10 Veinte oy chi eyi,
20 pax sbꞌatxlubꞌal tol bronce cꞌal eloj chi ey yichlaj,
jaxa slocxomal yetoj smajil sjolom oy chi oqui,
tol plata chꞌen ojabꞌ cꞌal eloj.
11 Jaxca tuꞌ chi yun pax bꞌey yetcꞌulal norte,
sowalil chi oc cꞌal pax an cortina yin masanil spacꞌul,
45 metro chi yunne,
20 pax yoyal chi oqui,
yetoj 20 sbꞌatxlubꞌal tol bronce cꞌal eloj,
yetoj cꞌal slocxomal cꞌal yetoj smajil tol chꞌen plata cꞌal eloj.
12 Jaxa yetcꞌulal bꞌey chi too cꞌu,
jaꞌ an cortina chi oc yin,
22 metro sat yetoj nanxa,
yetoj laonebꞌ yoyal,
cꞌal yetoj laonebꞌ sbꞌatxlubꞌal oy tuꞌ.
13 Queytuꞌ chi yun pax yetcꞌulal bꞌey chi aol cꞌu,
bꞌey yamakꞌil stiꞌ snail jin calubꞌal tuꞌ,
22 metro yetoj nanxa an cortina oj oc yin.
14 Jaxa an cortina bꞌey spacꞌul bꞌey chi cu octoj,
ey jujebꞌ metro an chi oqui,
yetoj oxebꞌ yoyal,
cꞌal yetoj oxebꞌ sbꞌatxlubꞌal oy tuꞌ.
15 Jacꞌalaꞌ pax bꞌey jun pacꞌxa tuꞌ,
ey jujebꞌ metro an chi oqui yetoj oxebꞌ oy,
cꞌal oxebꞌ sbꞌatxlubꞌal oy tuꞌ.
16 Jacꞌalaꞌ pax bꞌey stiꞌ yamakꞌil jin calubꞌal tuꞌ,
sowalil chi oc pax an cortina tol chembꞌil yetoj yaax txꞌal,
an txꞌal púrpura,
cꞌal an cajin txꞌal,
cꞌal lino tol txꞌumbꞌil,
9 metro chi yun sat,
chi tzꞌisle pax oc yelawil yu junoj tzꞌiswom tol jelan;
canebꞌ pax yoyal yetoj canebꞌ sbꞌatxlubꞌal oy tuꞌ chi oqui.
17 Masanil oy yinlaj stiꞌ snail jin calubꞌal tuꞌ,
chi oc chꞌen plata smajiloj ẍumuc,
cꞌal chꞌen slocxomal chi oc yinlaj,
plata cꞌal pax eloj.
Jaxa pax sbꞌatxlubꞌal xin,
bronce cꞌal eloj.
18 Jaꞌ yamakꞌil tuꞌ,
ey 45 metro skꞌatil,
jaxa sat,
ey 22 metro yetoj nanxa,
laan cꞌal chi yun scanpaqꞌuil.
Jaxa steel yea an cortina xin,
ey caabꞌ metro yetoj 25 centímetro.
Jaxa an cortina chi oc yin,
jaꞌton an lino tol txꞌumbꞌil.
Jaꞌ sbꞌatxlubꞌal yoyal tuꞌ,
chꞌen bronce cꞌal eloj.
19 Masanil mitxꞌkꞌabꞌe oj kꞌanle bꞌey jin calubꞌal,
bronce cꞌal eloj,
quey cꞌal pax tuꞌ masanil yestacail scolalil,
yetoj cꞌal yestacail eyoc bꞌey yamakꞌil stiꞌ snail jin calubꞌal tuꞌ.
Aceite Yet Tzejtebꞌal
20 Jix yalon pax Jehová jaxca tiꞌ:
Al tet ebꞌ ja wet Israelal tol chi yiꞌtej aceite ebꞌ chi el yin sat teꞌ olivo,
yet watxꞌ ey cꞌal oc skꞌakꞌal tzejtebꞌal.
21 Jaxa naj Aarón,
yetoj ebꞌ scꞌaal ey can oc ebꞌ yin swaꞌnen oc skꞌakꞌal tzejtebꞌal tuꞌ,
yet watxꞌ chi chaw cꞌal skꞌakꞌal jin sattaj,
yet chi ecꞌ akꞌbꞌal bꞌey yul Kꞌap Na,
bꞌey chin chaꞌle jin bꞌa je yetoj,
bꞌey sattaj eltej an cortina eyoc yeneloj teꞌ scaẍail yet jin wa kꞌane.
Jaꞌ jun tiꞌ,
ley chi yun can je xol jaex Israel jex tiꞌ yin junelne,
yetoj cꞌal tet ebꞌ je yicꞌaal yet bꞌakꞌin.