Swaꞌxubꞌal Yet Xaambꞌal Tol Bronce Cꞌal Eloj
38
Jix waꞌnele pax jun bꞌey chi tzꞌaꞌ xaambꞌal yu naj Besalel,
yin teꞌ acacia jix waꞌnelei,
caabꞌ metro yetoj 25 centímetro jix yun scanpaqꞌuil,
jun metro yetoj 25 centímetro jix yun steel.
2 Jaꞌ bꞌey xiquinlaj,
jix waꞌxi a canebꞌ yucꞌaꞌ,
junne cꞌal jix yun yetoj jun bꞌey chi tzꞌaꞌ xaambꞌal,
chꞌen bronce cꞌal jix oc yin.
3 Jacꞌalaꞌ bronce cꞌal smitxꞌkꞌabꞌil jun yet xaambꞌal tuꞌ,
cꞌal sneetal bꞌey chi ey staanil,
cꞌal chꞌen sletxbꞌanil chi yambꞌantej,
cꞌal mimej secꞌ,
chꞌen slutxbꞌanil,
yetoj cꞌal sneetal stzakꞌakꞌ.
4 Jix swaꞌnen pax oc jun txayibꞌ chꞌen yin jun yet xaambꞌal tuꞌ,
tol bronce cꞌal eloj.
Jaꞌ bꞌey yalan stiꞌ jix oqui,
jaꞌ tituꞌ chi apni bꞌey snan jun yet xaambꞌal tuꞌ.
5 Jix swaꞌnen pax canebꞌ chꞌen slocxomal tol bronce cꞌal eloj,
junjun yet junjun xiquin bꞌey eyoc srejail tuꞌ.
Jaꞌ yul wan tuꞌ chi ecꞌtoj sbꞌatxbꞌanil.
6 Jaꞌ teꞌ acacia jix oc yin sbꞌatxbꞌanil tuꞌ,
jix oc chꞌen bronce yinlaj teꞌ.
7 Jix yaon ecꞌtoj teꞌ ebꞌ yul chꞌen slocxomal tuꞌ,
bꞌey spacꞌul jun yet xaambꞌal tuꞌ,
yet chi skeꞌ sbꞌatxletoj.
Jaꞌ jun yet xaambꞌal tuꞌ,
chemteꞌ jix oc yin,
catuꞌ jolan jix yun can yul.
Swaꞌxubꞌal Jun Miman Palangana Bronce Cꞌal Eloj
8 Jaꞌ chꞌen nen tol bronce cꞌal eloj jix skꞌanbꞌalne ebꞌ ix ix chi colwa yin steynen bꞌey stiꞌ scalubꞌal Jehová,
jaꞌ yetoj chꞌen jix waꞌnele jun chꞌen miman palangana yetoj cꞌal sbꞌatxlubꞌal yet yalan yu naj Besalel.
Swaꞌxubꞌal Yamakꞌil Scalubꞌal Jehová
9 Jacꞌalaꞌ jix swaꞌne pax an cortina naj Besalel bꞌey yamakꞌil scalubꞌal Jehová.
Jaꞌ bꞌey yetcꞌulal sur,
jaꞌ tituꞌ jix oc 45 metro an cortina tuꞌ;
jaxa an cortina tuꞌ,
jaꞌton an lino txꞌumbꞌil eyoc yin.
10 Jaxa 20 yoyal yetoj cꞌal sbꞌatxlubꞌal yoyal tuꞌ,
bronce cꞌal eloj.
Jaxa chꞌen slocxomal,
cꞌal smajil sjolom oy tuꞌ,
plata cꞌal eloj.
11 Jaꞌ bꞌey yetcꞌulal norte eyoc 45 metro an cortina,
cꞌal 20 oy yetoj cꞌal sbꞌatxlubꞌal tol bronce cꞌal eloj;
jaxa slocxomal cꞌal smajil sjolom oy,
jaꞌ chꞌen plata jix ale cꞌal oc yin.
12 Jaꞌ spacꞌul bꞌey chi too cꞌu,
jaꞌ tituꞌ jix oc 22 metro yetoj nanxa sat an cortina,
cꞌal laonebꞌ yoyal,
yetoj cꞌal sbꞌatxlubꞌal,
jaꞌ slocxomal,
cꞌal smajil sjolom,
plata cꞌal eloj.
13 Quey cꞌal pax tuꞌ yetcꞌulal bꞌey chi aol cꞌu,
jaꞌ an cortina eyocoj,
ey 22 metro yetoj nanxa.
14 Jaꞌ bꞌey jun pacꞌ bꞌey sjolom octoj,
ey jujebꞌ metro an cortina eyoctoj,
yetoj oxebꞌ yoyal yetoj cꞌal sbꞌatxlubꞌal.
15 Jal bꞌey jun pacꞌxa xin,
ey pax jujebꞌ metro an cortina tituꞌ,
ey oxebꞌ yoyal yetoj cꞌal sbꞌatxlubꞌal.
16 Masanil wan tuꞌ,
lino kꞌap tol txꞌumbꞌil eyoc yin,
17 bronce cꞌal eyoc sbꞌatxlubꞌoj wanxa oy tuꞌ;
jaxa chꞌen slocxomal,
cꞌal smajil sjolom oy,
plata cꞌal eloj.
18 Jaꞌ an cortina eyoc smajiloj stiꞌ sattaj eltoj stiꞌ scalubꞌal Jehová tuꞌ,
tzꞌisbꞌil cꞌal oc yelawil an,
chembꞌil yetoj an kꞌejweinaj kꞌap,
an púrpura,
an cajin yili,
cꞌal yetoj an lino tol txꞌumbꞌil.
Nan sbꞌalonebꞌ metro sat,
jaxa steel,
ey caabꞌ metro yetoj 25 centímetro.
Laan cꞌal yetoj masanil an eyoc yin sattaj eltoj yamakꞌil scalubꞌal Jehová.
19 Ey canebꞌ yoyal yetoj canebꞌ sbꞌatxlubꞌal tol bronce cꞌal eloj;
jaꞌ slocxomal,
cꞌal smajil sjolom oy,
plata cꞌal eloj.
20 Jaꞌ masanil yestacail scalubꞌal Jehová,
yetoj cꞌal yet an cortina eyoc yin sattaj eltoj stiꞌ scalubꞌal Jehová,
bronce cꞌal eloj.
Chꞌen Chꞌen Jix Kꞌanle Yin Scalubꞌal Jehová
21 Jix yalon naj Moisés tol chi waꞌxi slistail jantaj chꞌen oro,
cꞌal chꞌen plata,
yetoj chꞌen bronce jix oc yin swaꞌxubꞌal a scalubꞌal Jehová,
jaꞌton bꞌey chi cꞌubꞌale a scaẍail yet swa kꞌane Dios.
Jaꞌ ebꞌ Levita jix waꞌnen slistail tuꞌ,
jaꞌ naj Itamar scꞌaal Aarón,
jix ijbꞌan ebꞌ.
22 Jaꞌ naj Besalel,
scꞌaal Urí,
yitxiquin Hur,
naj yicꞌaal Judá,
jaꞌ jix waꞌnen masanil tzetyetal jix yal Jehová tet naj Moisés tol chi waꞌxi.
23 Jaꞌ Aholiab,
scꞌaal Ahisamac,
titnaj yin yicꞌaal naj Dan,
jaꞌ jix colwa yetoj.
Jaꞌ jun tuꞌ,
ey yopiso yin waꞌnem chꞌen,
yotaj chi chemwi kꞌap,
chi skeꞌ cꞌal pax tzꞌison oc yelawil an kꞌap,
an kꞌejweinaj,
an púrpura,
an cajin,
yetoj an lino caw wal watxꞌ.
24 Masanil chꞌen oro jix kꞌanle yin swaꞌxubꞌal a scalubꞌal Jehová,
yin saꞌbꞌeal ebꞌ ánima jix yun syamcha ocoj.
Jaꞌ wan oro tuꞌ,
21 quintal yetoj 95 libra,
jatacꞌalaꞌ jantaj yalil chꞌen echbꞌal chi kꞌanbꞌalnele bꞌey scalubꞌal Jehová.
25 Jaxa chꞌen plata jix yamcha a yet jix iꞌle a sbꞌisil ebꞌ ánima tuꞌ,
ey 75 quintal yetoj caabꞌxa arroba jatacꞌalaꞌ jantaj yalil chꞌen echbꞌal chi kꞌanle bꞌey scalubꞌal Jehová.
26 Jaꞌ masanil ebꞌ winaj jix tzꞌibꞌele sbꞌi,
ebꞌ 20 abꞌil xa skꞌinal,
ey 603,550 ebꞌ yin masanil.
Junjun cꞌal ebꞌ tuꞌ jix yakꞌ nannan siclo chꞌen plata ebꞌ,
jatacꞌalaꞌ jantaj yalil chꞌen echbꞌal chi kꞌanle bꞌey scalubꞌal Jehová.
27 Ey 75 quintal chꞌen plata jix oc yin sbꞌatxlubꞌal ẍemteꞌal scalubꞌal Jehová,
cꞌal sbꞌatxlubꞌal yoyal bꞌey chi oc an cortina tuꞌ.
Jaꞌ masanil wan chꞌen plata jix oc yin tuꞌ,
cien sbꞌatxlubꞌal jix oqui,
chi yal yeloc apnoj tol chi oc 75 libra yin junjun.
28 Jaꞌ masanil chꞌen plata jix yakꞌ ebꞌ ánima tuꞌ,
jaꞌ yetoj chꞌen jix swaꞌne naj Besalel chꞌen slocxomal wan chꞌen oy tuꞌ,
cꞌal smajil sjolom oy yetoj chꞌen slocxomal.
29 Jaꞌ masanil chꞌen bronce jix akꞌle yin saꞌbꞌeal tet Jehová,
jix aapnoj sbꞌisil yin 53 quintal yetoj laonebꞌxa libra.
30 Jaꞌ yetoj chꞌen bronce tuꞌ jix waꞌxi sbꞌatxlubꞌal yoyal bꞌey jix oc smajil,
bꞌey chi cu octoj bꞌey yul kꞌap na bꞌey chi ẍaꞌle sbꞌa Dios yetoj ebꞌ ánima.
Yetoj jun yet xaambꞌal tol bronce cꞌal eloj,
yetoj cꞌal jun txayibꞌ chꞌen,
bronce cꞌal el masanil smitxꞌkꞌabꞌil tuꞌ.
31 Yetoj pax sbꞌatxlubꞌal yoyal cꞌal yestacail joyan oc yin yamakꞌil eltoj scalubꞌal Jehová,
yetoj cꞌal bꞌey eyoc smajil.