2 Jaꞌ yet jix waꞌnele an camiẍe chaleco tuꞌ,

jix oc oro txꞌal yin an,

yetoj kꞌejweinaj txꞌal,

cꞌal an púrpura,

an cajin txꞌal,

cꞌal yetoj an lino tol chembꞌil.

3 Jix chacꞌle ey patxan chꞌen oro;

kocꞌ xacꞌal jix yun skꞌupon ey ebꞌ,

jaxca xacꞌal txꞌal jix yunne yet chi skeꞌ ẍemon oc ebꞌ xol wanxa txꞌal tuꞌ,

jix chemle yu junoj tol yotaj chi swaꞌne.

4 Catuꞌ jix ale oc caabꞌ patxan an chi ecꞌtoj sjolom xicꞌ an camiẍe chaleco tuꞌ,

yet chi ẍaꞌlen sbꞌa an sattaj yetoj an yintaj.

5 Jaꞌ spixil chi kꞌalon oc yin jun chaleco tuꞌ,

laan cꞌal jix yun swaꞌxi jaxca yetoj an chaleco tuꞌ.

Jix oc oro txꞌal xol an kꞌejweinaj txꞌal,

an txꞌal púrpura,

yetoj an cajin txꞌal,

cꞌal yetoj an lino tol txꞌumbꞌil,

jaxca wal jix yun yalon Jehová tet naj Moisés.

6 Jix yaon oc chꞌen cornalina ebꞌ yin bꞌey eyoc spixil tol oro cꞌal eloj,

eyoc sbꞌi ebꞌ yuninal Israel yin chꞌen,

jaxca yeoc stzꞌibꞌil junoj sello.

7 Jix lawi tuꞌ,

jix yaon oc chꞌen chꞌen naj Besalel yin sjolom xicꞌ jun camiẍe chaleco tuꞌ,

yet chi naꞌletej ebꞌ yuninal Israel,

jaxca wal jix yun yalon Jehová tet naj Moisés.

8 Jal pax an yet smajil xaamscꞌul tuꞌ xin,

watxꞌ jix yun yale oc yelawil an,

jaxca jix yun yet an chaleco tuꞌ.

Jix oc oro txꞌal xol an kꞌejweinaj txꞌal,

an txꞌal púrpura,

an cajin txꞌal,

cꞌal an lino tol chembꞌil.

9 Caabꞌ pajan jix yun can ey an,

laan cꞌal yechel stiꞌlaj an yet pajbꞌilxa eyoj,

22 centímetro jix yun scanpaqꞌuil stiꞌlaj an.

10 Jaꞌ an pichile tuꞌ,

canebꞌ txol jix yun yoc chꞌen chꞌen caw watxꞌ yili tuꞌ yin.

Jaꞌ yin jun bꞌabꞌel txol,

jix oc jun chꞌen rubí,

jun chꞌen crisólito,

yetoj jun chꞌen esmeralda.

11 Jaxa yin yet scaabꞌ txol,

jix oc jun chꞌen granate,

jun chꞌen zafiro yetoj jun chꞌen jade.

12 Jaxa yin yet yox txol,

jix oc jun chꞌen jacinto,

jun chꞌen ágata yetoj jun chꞌen amatista.

13 Jaxa yin yet scan txol,

jix oc jun chꞌen topacio,

jun chꞌen cornalina yetoj jun chꞌen jaspe.

Oro cꞌal jix oc yin smitxꞌbꞌaniloj wan chꞌen chꞌen tuꞌ.

14 Lacawebꞌ tujan chꞌen,

yutol lacawan sbꞌisil ebꞌ yuninal Israel;

jaꞌ yin junjun chꞌen chꞌen tuꞌ,

jaꞌ tituꞌ jix oc sbꞌi junjun ebꞌ yuninal Israel.

Jaxca wal yeoc stzꞌibꞌil junoj sello queytuꞌ jix yun yoc sbꞌi ebꞌ tuꞌ yin.

15 Jaꞌ yin an pichile yet smajil xamcꞌule tuꞌ,

jix waꞌxi pax oc wan chꞌen cadena tol oro cꞌal eloj,

tol patxꞌonebꞌil eyoj.

16 Jix swaꞌnen pax ey caabꞌ smitxꞌbꞌanil ebꞌ yetoj caabꞌ chꞌen slocxomal tol oro cꞌal eloj,

catuꞌ jix oc caabꞌ slocxomal tuꞌ bꞌey scaabꞌil xiquin an yet smajil xamcꞌule tuꞌ.

17 Jix lawi tuꞌ,

jix yaon pax oc ebꞌ caabꞌ chꞌen cadena tol oro cꞌal eloj yin caabꞌ chꞌen slocxomal tuꞌ.

18 Jaꞌ yin xam caabꞌ chꞌen cadena tuꞌ,

jatuꞌ jix yaoc caabꞌ smitxꞌbꞌanil tol oro cꞌal el ebꞌ,

catuꞌ jix oc yin scaabꞌil sjolom xicꞌ an camiẍe chaleco tuꞌ bꞌey sattaj.

19 Jix swaꞌnen pax ebꞌ caabꞌxa slocxomal tol oro cꞌal eloj,

catuꞌ jix oc bꞌey yul scaabꞌil yul xiquin an yet xamcꞌule tuꞌ,

yet watxꞌ junxane chi can an yetoj an camiẍe chaleco tuꞌ.

20 Jix swaꞌnen pax caabꞌxa chꞌen slocxomal ebꞌ oro cꞌal eloj,

catuꞌ jix oc yin xamlaj bꞌey chi ecꞌtoj sjolom xicꞌ an chaleco tuꞌ,

catuꞌ chi ey apnoj bꞌey sattaj.

Junne jix can yetoj bꞌey chi ey apnoj stzꞌisil,

cꞌal yibꞌan atej bꞌey chi kꞌal-le oc an chaleco tuꞌ.

21 Jix lawi tuꞌ,

jix yakꞌon ẍaꞌlen ey sbꞌa chꞌen slocxomal eyoc yin an chaleco tuꞌ ebꞌ,

yetoj chꞌen eyoc yin xaamscꞌul an tuꞌ,

yetoj jun kꞌejweinaj txꞌal,

yet watxꞌ jaꞌ an yet xamcꞌule tuꞌ,

chi can bꞌey yibꞌan atoj jun kꞌalile eyoc yin an chaleco tuꞌ,

yet watxꞌ cꞌam chi spoꞌole sbꞌa an,

jaxca jix yun yalon Jehová tet naj Moisés.

22 Jaꞌ an jojan pichile eyoc yul an chaleco tuꞌ,

chembꞌil an yetoj an kꞌejweinaj txꞌal eyoc yin.

23 Jaꞌ bꞌey yul sjolanil yet snukꞌ,

jix pajle eyoj,

watxꞌ jix yun stzꞌisle eyoj yet watxꞌ cꞌam chi nicꞌchatoj.

24 Jix oc yelawil yin stiꞌlaj an pichile tuꞌ yetoj an kꞌejweinaj txꞌal jaxca yechel sat teꞌ granada,

yetoj cꞌal an púrpura,

an cajin txꞌal cꞌal yetoj an lino tol patxꞌonebꞌil.

25 Jix swaꞌnen pax wan chꞌen kocꞌ campana ebꞌ,

oro cꞌal eloj,

jix oc yechel sat teꞌ granada yin stiꞌlaj an pichile tuꞌ.

26 Jaꞌton an pichile tuꞌ chi skꞌan ebꞌ yin yopiso,

jaxca jix yun yalon Jehová tet naj Moisés.

27 Jaꞌ an sjojan spichil naj Aarón,

yetoj cꞌal yet ebꞌ scꞌaal,

jaꞌ yin an lino jix waꞌnelei yu junoj yotaj yin chemo kꞌap.

28 Jacꞌalaꞌ jix waꞌxi an kꞌap yet skꞌoxil sjolom tol chembꞌil,

cꞌal yetoj junxa an skꞌoxil jolome lino cꞌal eloj;

jaxa an cꞌotxan kꞌap yet yul wexe,

jaꞌ an lino chembꞌil jix oc yin.

29 Jacꞌalaꞌ an lino chembꞌil eyoc yin jun kꞌalile,

tzꞌisbꞌil oc yelawil yetoj an kꞌejweinaj txꞌal,

cꞌal an púrpura,

yetoj cꞌal an cajin,

watxꞌ jix yun yoc yelawil yu ebꞌ jix waꞌnen tuꞌ,

jaxca jix yun yalon Jehová tet naj Moisés.

30 Jix swaꞌnen pax ey jun chꞌen placa ebꞌ,

tol oro cꞌal eloj,

jix tzꞌibꞌele oc wan kꞌane yin jaxca chi yun junoj sello,

jaxca tuꞌ jix yun yoc skꞌaneal yin,

“Yet Jehová Yeocoj”,

ẍi,

yet watxꞌ jaꞌ chi txꞌoxon eloj tol jaꞌ naj Aarón sat yakꞌomal xaambꞌal tet Dios yeocoj.

31 Jix lawi tuꞌ,

jix yaon oc jun kꞌejweinaj txꞌal ebꞌ yin,

yet chi skeꞌ skꞌal-le oc jun chꞌen placa tuꞌ bꞌey sattaj an kꞌoxile tol bꞌacꞌbꞌil ocoj,

jaxca jix yun yalon Jehová tet naj Moisés.

32 Queytuꞌ jix yun slawi swaꞌxi a jun kꞌap na tol scalubꞌal Jehová,

bꞌey chi ẍaꞌle sbꞌa ebꞌ ánima yetoj Dios.

Jix sjije ebꞌ Israel masanil jaxca jix yun yalon Jehová tet naj Moisés.

33 Jix lawi tuꞌ,

catuꞌ jix ale can oc scalubꞌal Jehová yul skꞌabꞌ naj Moisés,

jun bꞌey chi ẍaꞌle sbꞌa ebꞌ ánima yetoj,

cꞌal masanil tzet chi kꞌanbꞌalnele yul jun kꞌap na tuꞌ,

jaꞌton chꞌen slocxomal,

ẍemteꞌal,

sreglail,

yoyal yetoj cꞌal sbꞌatxbꞌanil.

34 Yetoj jun chi oc jenan bꞌey snan yul,

jaꞌton stzꞌuumal noꞌ meꞌ bꞌonbꞌil yetoj cajin,

yetoj noꞌ tzꞌuum caw labꞌabꞌi xacꞌal,

jaꞌton chi majchen ey teꞌ scaẍail bꞌey eeytoj wan chejbꞌanile.

35 Jix iꞌle pax toj teꞌ caẍa tuꞌ yu ebꞌ,

yetoj cꞌal chꞌen chꞌen eyoc sbꞌatxlubꞌoj,

cꞌal yetoj smajil bꞌey chi akꞌle mimancꞌulal yibꞌan spenail.

36 Teꞌ meẍa yetoj cꞌal smitxꞌkꞌabꞌil,

yetoj ixim pan chi akꞌle sattaj Jehová,

37 yetoj sbꞌatxlubꞌal tzejtebꞌal tol oro cꞌal eloj,

yetoj cꞌal tzejtebꞌal eyoc yibꞌan,

yetoj cꞌal masanil smitxꞌkꞌabꞌil,

yetoj aceite yet chi oc skꞌakꞌal tzejtebꞌal tuꞌ.

38 Jaꞌ jun yet xaambꞌal oro cꞌal eloj,

yetoj cꞌal pax aceite olivo chi kꞌanlei,

yet chi sicꞌle el junoj mactxequel ma junoj tzetyetal tol yet Dios chi yun can ocoj,

cꞌal teꞌ incienso sukꞌukꞌi yoc sabꞌ,

ey jun an cortina jenan oc bꞌey chi octoj yul jun kꞌap na tuꞌ,

39 jun yet xaambꞌal tol chꞌen bronce cꞌal eloj,

yetoj cꞌal txayibꞌ chꞌen tol bronce cꞌal eloj,

yetoj cꞌal sreglail chi oc sbꞌatxlubꞌoj,

yetoj cꞌal smitxꞌkꞌabꞌil,

cꞌal yetoj jun palangana chꞌen yetoj cꞌal sbꞌatxlubꞌal yet yalan.

40 An cortina eyoc yinlaj bꞌey yamakꞌil scalubꞌal Jehová,

cꞌal yoyal yetoj cꞌal sbꞌatxlubꞌal,

yetoj cꞌal xꞌanil,

cꞌal yestacail bꞌey yinlaj sattaj eltoj scalubꞌal Jehová,

yetoj cꞌal masanil mitxꞌkꞌabꞌe chi kꞌanbꞌalnele bꞌey scalubꞌal Jehová bꞌey chi ẍaꞌle sbꞌa ebꞌ ánima yetoj,

41 yetoj cꞌal an pichile chi skꞌan ebꞌ yakꞌomal xaambꞌal tet Dios,

jaꞌton an pichile caw watxꞌ yili chi yaoc naj Aarón,

yetoj cꞌal spichil ebꞌ scꞌaal naj chi yaoc yin yopiso.

42 Jix sjije masanil ebꞌ Israel jaxca wal jix yun yalon Jehová tet naj Moisés.

43 Jaxa yet jix yilon naj Moisés tol watxꞌ jix yun swaꞌnen ebꞌ,

jaxca jix yun yalon Jehová,

catuꞌ jix yalon can watxꞌ kꞌane yibꞌan ebꞌ.