Spichil Ebꞌ Yakꞌomal Xaambꞌal Tet Dios
28
Jix yalon pax Jehová jaxca tiꞌ:
Awte naj ja wuẍtaj Aarón,
yetoj ebꞌ scꞌaal,
jaꞌton Nadab,
Abihú,
Eleazar,
cꞌal yetoj Itamar.
Yet watxꞌ chi oc ebꞌ yin yakꞌomaloj xaambꞌal ey jin an.
2 Waꞌnele ojabꞌ spichil naj ja wuẍtaj Aarón tol caw chi tzejeji yili,
yet watxꞌ chi txeclo yili yetoj yopiso.
3 Al tet masanil ebꞌ tol jelan snaꞌbꞌal,
jaꞌton ebꞌ tol jelan snaꞌbꞌal yin swaꞌnen pichile,
jaꞌ ebꞌ oj waꞌnen spichil Aarón yetoj ebꞌ scꞌaal,
yet oj oc ebꞌ yin yakꞌomal xaambꞌal ebꞌ ánima ey jin.
4 Jaꞌ an pichile oj waꞌxoj tuꞌ,
jaꞌton wan tiꞌ:
Jaꞌ an oj oc xaamscꞌul,
yetoj cꞌal yelawil,
cꞌal ẍalecoal,
jaxa an jojan camiẍe,
yetoj junxa an yel xacꞌal jojan oj oc yul,
tol oj tzꞌisle oc yelawil,
yetoj cꞌal jaxca junoj xotil sjolom tol txꞌumbꞌil,
cꞌal yetoj scꞌalil snan.
Yuxan waꞌnele ojabꞌ spichil naj ja wuẍtaj Aarón yetoj ebꞌ scꞌaal,
tol watxꞌ ojabꞌ chi yun scawxi,
yet watxꞌ chi oc yopiso ebꞌ yin yakꞌomaloj xaambꞌal ey jin an.
5 Jaꞌ ebꞌ oj waꞌnen wan pichile tuꞌ,
oj skꞌanbꞌalne chꞌen oro ebꞌ,
an kꞌejweinaj txꞌal,
an púrpura,
an cajin yili,
yetoj an lino tol txꞌumbꞌil.
6 Jaꞌ an camiẍe jaxca chaleco tuꞌ,
jaxca yili oro jaxca ojabꞌ tuꞌ yili,
yetoj an kꞌejweinaj yili,
an púrpura,
an cajin,
yetoj an lino txꞌumbꞌil chi oc yin,
catuꞌ chi tzꞌisle oc yelawil yin yu junoj tzꞌiswom tol jelan.
7 Chi ecꞌtoj patxan skꞌabꞌ sjolom xicꞌ yu sjunbꞌanen ey sbꞌa an sattaj yetoj an yintaj.
8 Chi waꞌxi pax junoj kꞌalile yet chi kꞌal-le oc jun chaleco tuꞌ;
junne cꞌal chi yun yetoj;
jaꞌ jun tuꞌ oro txꞌal cꞌal chi oc yin,
yetoj an kꞌejweinaj txꞌal,
an púrpura,
an cajin,
cꞌal yetoj an lino txꞌumbꞌil chi oc yin.
9 Cha wakꞌon waꞌnele caabꞌoj patxan chꞌen cornalina,
tol elawtaj xacꞌal yili,
jaꞌ yin chꞌen chi tzꞌibꞌele oc sbꞌi ebꞌ lacawan scꞌaal Israel.
10 Xolil cꞌal chi yun yoqui,
jaxca cꞌal jix yun yali ebꞌ;
wajebꞌ chi oc yin junjun chꞌen.
11 Jaꞌ mactxequel chi aon oc wan bꞌie tuꞌ yin chꞌen chꞌen tuꞌ,
jaꞌton junoj yotaj chi mulna oc yin waꞌnen chꞌen,
caw watxꞌ chi yun scawxi,
jaxca chi yun yoc sletrail junoj sello,
queytuꞌ chi yun yoc bꞌie tuꞌ yin.
12 Chi lawi tuꞌ,
chi ale oc an kꞌap bꞌey sjolom xicꞌ jun chaleco tuꞌ.
Jaꞌ yopiso wan chꞌen tuꞌ,
jaꞌton snaꞌbꞌaniltej ebꞌ yicꞌaal Israel.
Queytuꞌ chi yun yiꞌle ecꞌ sbꞌi ebꞌ Israel yu Aarón bꞌey sjolom xicꞌ jin sattaj yet chin naꞌontej ebꞌ.
13 Jaxa caabꞌ smitxꞌbꞌanil chꞌen tuꞌ,
oro cꞌal chi oc yin.
14 Cha waꞌnen junoj chꞌen cadena oro cꞌal eloj,
caw watxꞌ xacꞌal chi yun spatxꞌonele eyoj,
chi oc cꞌal pax smitxꞌbꞌanilal yinlaj.
15 Jaxa an yet xaamscꞌul xin,
chi oc yopiso yet chi naꞌcha el wochwan,
laan oj ja wute jaxca chi yun swaꞌxi chaleco tuꞌ.
Chi oc oro yin,
yetoj an kꞌejweinaj kꞌap,
an púrpura,
an cajin,
cꞌal yetoj an lino tol txꞌumbꞌil waꞌnebꞌil yu junoj tzꞌiswom tol jelan.
16 Caabꞌ pajan chi yunne,
catuꞌ laan cꞌal sat scanebꞌal xiquin,
22 centímetro junjun stiꞌlaj.
17 Chi lawi tuꞌ,
chi ale oc yelawil,
chi oc lacawebꞌ chꞌen chꞌen caw watxꞌ yili yin an,
canebꞌ txol chi yun yoqui.
Jaꞌ yin bꞌabꞌel txol,
chi oc junoj chꞌen rubí,
junoj chꞌen crisólito,
cꞌal junoj chꞌen esmeralda.
18 Jaxa yin yet scaabꞌ txol,
chi oc junoj chꞌen granate,
junoj chꞌen safiro,
yetoj junoj jade.
19 Jaxa yin yet yox txol,
chi oc junoj chꞌen jacinto,
junoj ágata cꞌal yetoj junoj chꞌen amatista.
20 Jaxa pax yin yet scan txol,
chi oc junoj chꞌen topacio,
junoj chꞌen cornalina,
cꞌal yetoj junoj chꞌen jaspe.
Jaꞌ masanil wan chꞌen tuꞌ,
oro cꞌal chi yun yoc txolan yin bꞌey sjolom xicꞌ.
21 Sowalil tol lacawebꞌ wan chꞌen chꞌen tuꞌ chi waꞌxi,
yutol lacawan ebꞌ scꞌaal Israel.
Jaꞌ yin junjun wan chꞌen chꞌen tuꞌ,
chi ale oc sbꞌi junjun tujan ebꞌ yicꞌaal Israel,
jaxca yeoc sletrail junoj sello,
queytuꞌ chi yun yoc wan bꞌie tuꞌ yin.
22 Cha wakꞌon waꞌxoj junoj chꞌen cadena tol patxꞌonebꞌil,
jaꞌton chi oc yopiso yin an chi oc smajiloj an yet xamcꞌule tuꞌ.
23 Cha wakꞌon pax waꞌxoj caabꞌoj chꞌen slocxomal tol oro chi oc yin,
catuꞌ chi oc yin caabꞌ xiquin an xamcꞌule tuꞌ.
24 Chi oc chꞌen cadena oro tuꞌ yin scaabꞌil chꞌen slocxomal tuꞌ junjun pacꞌ.
25 Catuꞌ chi oc junjunxa xam chꞌen cadena tuꞌ yin chꞌen smitxꞌbꞌanil chꞌen chꞌen bꞌey eyoc yin sjolom xicꞌ an xamcꞌule tuꞌ,
yet chi cancan an xamcꞌule tuꞌ bꞌey yetcꞌulal.
26 Chi waꞌxi pax caabꞌoj chꞌen slocxomal tol oro cꞌal eloj,
catuꞌ chi oc bꞌey yul caabꞌ xiquin an smajil xamcꞌule tuꞌ bꞌey yalan,
tol junne chi can yetoj jun smajil xamcꞌule tuꞌ.
27 Cha wakꞌon pax waꞌxoj caabꞌoj chꞌen slocxomal tol oro cꞌal eloj,
chi ale oc yin xamlaj an chi ecꞌtoj sjolom xicꞌ an chaleco bꞌey sattaj.
Junne chi can yetoj bꞌey chi ey apnoj stzꞌisil tuꞌ,
yetoj cꞌal pax yibꞌan atej bꞌey chi ecꞌ scꞌalil snan an chaleco tuꞌ.
28 Jaxca tuꞌ chi yun ẍaꞌlen sbꞌa chꞌen slocxomal yet an xamcꞌule tuꞌ,
yetoj yet an chaleco tuꞌ.
Jaꞌ junoj an kꞌejweinaj txꞌal chi oc xꞌaliloj yet chi ẍaꞌle sbꞌa tuꞌ,
yet watxꞌ jaꞌ an xamcꞌule tuꞌ chi cancan yibꞌan atej scꞌalil snan an chaleco tuꞌ,
yet watxꞌ cꞌam chi sjajle sbꞌa an.
29 Yuxan jaxa yet oj octoj naj Aarón jin sattaj bꞌey jin calubꞌal tuꞌ,
ey ojabꞌ oc an pichile tuꞌ yu bꞌey eyoc sbꞌi ebꞌ yicꞌaal Israel,
yet chin naꞌontej ebꞌ,
yutol eyoc sbꞌi ebꞌ yin an smajil xamcꞌule tuꞌ.
Jaꞌ yopiso an,
jaꞌ yu yotajnele eloj tzet chi yoche jin cꞌul.
30 Jaꞌ yul an smajil xamcꞌule tuꞌ cha wakꞌ waꞌxoj caabꞌoj chꞌen chꞌen,
chi yij Urim cꞌal Tumim.
Jaꞌ wan chꞌen tuꞌ,
yopiso chꞌen xꞌoxon el wochwan;
sowalil ey ojabꞌ cꞌal oc xaamscꞌul Aarón yet chi jul jin sattaj.
Jaxca wal tuꞌ oj yute Aarón yiꞌon bꞌey wan chꞌen chꞌen tuꞌ jin sattaj,
jain Jehová jin tiꞌ.
31 Jaꞌ junoj an jojan pichile kꞌejweinaj kꞌap ojabꞌ cꞌal eloj,
32 jaxa bꞌey snan an jojan pichile tuꞌ chi cancan junoj jolan yet sjolom.
Watxꞌ ojabꞌ chi yun ẍul-le ey bꞌey chi jol-le yet snukꞌ tuꞌ,
jaxca an yet an tzꞌuum chaleco,
yet watxꞌ cꞌam chi nicꞌchatoj an.
33 Masanil yul sat an jojan pichile tuꞌ chi oc txolan yelawil jaxca sat junoj teꞌ loꞌbꞌeal teꞌ.
34 Chi waꞌnele oc yetoj txꞌal,
an kꞌejweinaj txꞌal,
an púrpura yetoj cajin txꞌal;
catuꞌ chi oc pax yaliẍ campana oro cꞌal eloj bꞌey snanlaj xol an txꞌal yin masanil stiꞌlaj.
35 Jaꞌ yet oj mulna Aarón tuꞌ yin yopiso,
sowalil eyoc an pichile tuꞌ yu,
yet chi yaon oc stiꞌ ebꞌ ánima ey jin.
Yet chi octoj naj jin sattaj bꞌey jin calubꞌal,
cꞌal yet chi eltej naj,
ta chi abꞌle yel yaw chꞌen campana,
chi yal yeloc apnoj cꞌam naj chi cami.
36 Cha wakꞌon waꞌxoj junoj chꞌen placa tol oro cꞌal eloj,
catuꞌ cha wakꞌon tzꞌibꞌele oc skꞌaneal jaxca junoj sello.
Chi ale oc wan kꞌane tuꞌ jaxca tiꞌ:
Yet Jehová yeocoj.
37 Cha wakꞌon kꞌal-le oc jun chꞌen placa tuꞌ bꞌey sattaj jun jaxca kꞌoxkꞌome yet Aarón,
chi kꞌal-le oc yetoj junoj pixbꞌal yin jun kꞌoxkꞌome tuꞌ.
38 Ey ojabꞌ cꞌal oc yu Aarón yibꞌan snan spalan,
yutol jaꞌ yet chi yakꞌon yofrenda ebꞌ Israel ey jin,
caxcꞌal ey spenail ebꞌ,
jaꞌ yu jun placa tuꞌ,
chin chaꞌ yofrenda ebꞌ.
39 Cha wakꞌon pax waꞌxoj junojxa an pichile yel xacꞌal jojan,
yetoj junoj kꞌoxkꞌome,
tol jaꞌ an lino txꞌal chi oc yin.
Jacꞌalaꞌ an kꞌalile,
watxꞌ chi yun yoc pax stzꞌibꞌil yu junoj tzꞌiswom tol jelan.
40 Cha wakꞌon pax waꞌxoj sjojan spichil ebꞌ scꞌaal naj Aarón tuꞌ yetoj scꞌalil ebꞌ,
cꞌal skꞌoxcꞌom ebꞌ,
yet watxꞌ yili ebꞌ cꞌal yu xeclo el yopiso ebꞌ.
41 Jaxca tuꞌ oj yun spichon sbꞌa ja wuẍtaj Aarón tuꞌ yetoj ebꞌ scꞌaal.
Chi lawi tuꞌ,
cha waon atoj aceite olivo yin sjolom ebꞌ yet chi oc can yopiso ebꞌ yin yakꞌomaloj xaambꞌal ey jin an.
42 Catuꞌ cha wakꞌon pax waꞌxoj scutux wex ebꞌ chi ina bꞌey xubꞌ ebꞌ,
chi a cꞌal pax apnoj yin snan ebꞌ.
43 Sowalil chi yaoc Aarón wan pichile tiꞌ yetoj ebꞌ yuninal,
yet chi octoj ebꞌ yul jin calubꞌal bꞌey chin chaꞌle jin bꞌa yetoj,
yet chi swaꞌnen smulnail ebꞌ,
yet watxꞌ cꞌam chi oc spenail ebꞌ catuꞌ cꞌam chi cam ebꞌ.
Jaꞌ jun tiꞌ ley chi yun canoj,
sowalil chi sjije Aarón yetoj ebꞌ yicꞌaal,
ẍi Dios tet Moisés.