Ocnaj Aarón Yetoj Ebꞌ Yuninal Yin Yopiso
29
Jix yalon pax Jehová jaxca tiꞌ:
Jaꞌ yet oj oc can Aarón yetoj ebꞌ scꞌaal yin yakꞌomaloj xaambꞌal ey jin an,
jaꞌton wan tiꞌ oj ja waꞌne yetoj ebꞌ:
Cha wiꞌtej junoj noꞌ achꞌe wacax,
yetoj cacꞌonoj noꞌ icham meꞌ tol cꞌam bꞌey eyoc syaꞌbꞌil.
2 Cha waꞌnen pax ixim pan yetoj jarina caw wal watxꞌ.
Cha waꞌnen pax ixim pan cꞌam yich eeyoj,
yetoj wocꞌox pan tol cꞌam yich eeyoj,
caw watxꞌ chi yun scal-le yetoj aceite olivo,
cꞌal ixim niẍtej wocꞌox pan tol cꞌam yich eeyoj,
chi bꞌonle oc aceite olivo yin.
3 Chi lawi tuꞌ,
cha waon ey ixim yul junoj yaliẍ xuc,
catuꞌ cha wiꞌontoj bꞌey jin calubꞌal,
yetoj noꞌ achꞌe wacax,
cꞌal yetoj cacꞌon noꞌ icham meꞌ tuꞌ.
4 Chi lawi tuꞌ,
cha wiꞌontoj Aarón yetoj ebꞌ scꞌaal bꞌey sattaj jun kꞌap na bꞌey chin chaꞌle jin bꞌa je yetoj;
cha walon tet ebꞌ tol chi aẍni can ebꞌ tituꞌ.
5 Chi yiꞌontoj spichil ebꞌ chi skꞌan yin yopiso tuꞌ,
chi yaon oc spichil Aarón,
jaꞌton an jojan pichile,
an chaleco,
yetoj an smajil xamcꞌule,
catuꞌ chi yaon oc scꞌalil snan jun chaleco tuꞌ.
6 Chi lawi tuꞌ,
chi yaon atoj jun jaxca kꞌoxkꞌome tuꞌ yin sjolom.
Jaꞌ yin jun kꞌoxkꞌome tuꞌ cha waoc jun placa tol eyoc yecheloj tol wet yeocoj.
7 Cha wiꞌontej jun aceite olivo chi kꞌanbꞌalnele yet chi sicꞌle el junoj mactxequel chi oc can wetoj.
Cha waon atoj aceite olivo yibꞌan sjolom Aarón yet chi oc can yin yakꞌomaloj xaambꞌal ey jin an.
8 Jaxca pax tuꞌ chi yun ebꞌ scꞌaal tol chi jul pax ebꞌ jin cꞌatan,
catuꞌ chi yaon oc sjojan spichil ebꞌ.
9 Jaxca cha wute Aarón,
jaxca pax tuꞌ cha wute yet ebꞌ scꞌaal tuꞌ.
Watxꞌ cha wute oc scꞌalil snan spichil ebꞌ.
Watxꞌ pax cha wute oc jun jaxca kꞌoxkꞌome yin sjolom.
Jaxca tuꞌ oj ja wute oc ebꞌ yin yopiso.
Jaxa jun yopiso ebꞌ tiꞌ chi oc can ebꞌ yin junelne.
10 Chi lawi tuꞌ xin,
cha wiꞌontoj noꞌ achꞌe wacax bꞌey sattaj snail jin calubꞌal bꞌey chin chaꞌle jin bꞌa je yetoj,
yet watxꞌ chi yaoc skꞌabꞌ Aarón yetoj ebꞌ scꞌaal yibꞌan sjolom noꞌ wacax tuꞌ.
11 Jaꞌ bꞌey sattaj eltoj snail jin calubꞌal tuꞌ,
cha makꞌ cam noꞌ jin sattaj.
12 Cha bꞌonoc niꞌoj ẍiqꞌuil noꞌ yin yiximal ja kꞌabꞌ,
catuꞌ cha bꞌonoc yin yucꞌaꞌ jun yet xaambꞌal eya bꞌey xiquinlaj,
jaxa masanil chicꞌ chi cancan tuꞌ,
cha sec can ey bꞌey yajantaj jun yet xaambꞌal tuꞌ.
13 Jaxa masanil ẍepuꞌal eyoc yin xꞌanil yul scꞌul noꞌ,
cꞌal yin skꞌej noꞌ,
cꞌal yin yubꞌal noꞌ,
chi iꞌle eloj,
catuꞌ chi akꞌle tzꞌaꞌ yibꞌan yet xaambꞌal.
14 Jaxa noꞌ chiꞌbꞌe,
yetoj stzꞌuumal noꞌ cꞌal yetoj saꞌ noꞌ,
masanil wan tiꞌ chi akꞌle tzꞌaꞌ bꞌey stiꞌeltoj bꞌey bꞌulan jex ecꞌ tuꞌ,
yutol jaꞌ jun tuꞌ,
xaambꞌal chi yunne yu yakꞌle tan je penail.
15 Cha wiꞌontej junoj noꞌ icham meꞌ,
jaxa Aarón yetoj ebꞌ scꞌaal,
chi sbꞌatxbꞌan oc skꞌabꞌ ebꞌ yibꞌan sjolom noꞌ.
16 Chi lawi tuꞌ,
cha makꞌon cam noꞌ,
catuꞌ cha tiẍontoj ẍiqꞌuil noꞌ yin spacꞌul yet xaambꞌal tuꞌ.
17 Chi lawi tuꞌ,
cha kocꞌ tzokꞌnetoj ẍiꞌbꞌeal noꞌ,
chi txꞌale el xꞌanil yul scꞌul yetoj cꞌal yajan noꞌ,
junne chi ey yetoj noꞌ kocꞌ tzokꞌbꞌiltoj tuꞌ,
yetoj cꞌal sjolom noꞌ.
18 Masanil ẍiꞌbꞌeal noꞌ icham meꞌ tuꞌ chi tzꞌaꞌ yibꞌan jun yet xaambꞌal jin sattaj,
yu wiꞌle a can.
Jaꞌ jun xaambꞌal tiꞌ caw watxꞌ yel sabꞌ chi wabꞌe.
19 Chi lawi tuꞌ,
cha wiꞌontej junxa noꞌ icham meꞌ tuꞌ,
chi yaon oc skꞌabꞌ Aarón yetoj ebꞌ scꞌaal yibꞌan sjolom noꞌ,
20 cha makꞌon cam noꞌ,
cha wiꞌon a niꞌoj ẍiqꞌuil noꞌ,
cha waon oc yin xaxoal xiquin Aarón,
yetoj cꞌal ebꞌ scꞌaal bꞌey yetcꞌulal swatxꞌ kꞌabꞌ ebꞌ,
catuꞌ chi oc cꞌal pax niꞌoj yin xutxal yiximal skꞌabꞌ ebꞌ,
cꞌal yin xutxal yiximal yajan ebꞌ bꞌey swatxꞌ kꞌabꞌ.
Chi lawi tuꞌ,
catuꞌ cha stiẍon can ey masanil ẍiqꞌuil noꞌ icham meꞌ tuꞌ bꞌey yin scan spaqꞌuil jun yet xaambꞌal tuꞌ.
21 Jaxa niꞌojxa ẍiqꞌuil noꞌ meꞌ eyoc yibꞌan yet xaambꞌal tuꞌ,
cha cal yetoj aceite olivo chi kꞌanle yin junoj mactxequel chi sicꞌcha can oc wetoj.
Cha wiꞌon a niꞌoj,
catuꞌ cha txiontoj yibꞌan Aarón,
cꞌal yin spichil,
cꞌal yibꞌan ebꞌ scꞌaal,
yetoj cꞌal pax yinlaj spichil ebꞌ.
Queytuꞌ chi yun sicꞌle can el Aarón yetoj ebꞌ scꞌaal,
cꞌal yetoj spichil ebꞌ.
22 Chi lawi tuꞌ,
cha wiꞌon el ẍepuꞌal eyoc yin sne noꞌ icham meꞌ,
yetoj cꞌal yin xꞌanil yul scꞌul noꞌ,
cꞌal yin skꞌej noꞌ,
cha wiꞌon pax tej caabꞌ yubꞌal noꞌ,
yetoj cꞌal ẍepuꞌal eyoc yin,
yetoj ẍiꞌbꞌeal xubꞌ noꞌ bꞌey swatxꞌ kꞌabꞌ,
yutol jaꞌ noꞌ icham meꞌ tuꞌ,
jaꞌton chi kꞌanle yet chi oc can yopiso ebꞌ chi oc yakꞌomaloj xaambꞌal ey jin an.
23 Cha wiꞌon atej ixim pan cꞌam yich eyocoj,
wan eey yul xuc,
junoj ixim pan tol xoyan ye,
yetoj junoj ixim pan calbꞌil yetoj aceite olivo,
yetoj junoj ixim wocꞌox pan.
24 Jaꞌ masanil wan tuꞌ cha waoc yul skꞌabꞌ Aarón,
cꞌal tet ebꞌ scꞌaal,
catuꞌ chi bꞌatxbꞌale ey jin sattaj.
25 Chi lawi tuꞌ,
cha chaꞌon ecꞌ yul skꞌabꞌ ebꞌ,
catuꞌ cha wakꞌon tzꞌaꞌ yibꞌan yet xaambꞌal tuꞌ.
Junne chi yun yakꞌle stzꞌaꞌ yetoj noꞌ icham meꞌ lalan stzꞌaꞌ yin xaambꞌal tuꞌ,
yutol caw watxꞌ yoc sabꞌ chi wabꞌe.
Chi akꞌle wan ofrenda tuꞌ yu yiꞌle a can jin bꞌi.
26 Jaꞌ noꞌ icham meꞌ chi kꞌanle yu yoc can Aarón yin yopiso,
cha wiꞌeltej xaamscꞌul noꞌ.
Cha bꞌatxbꞌan ey jin sattaj jain Jehová jin tiꞌ;
ja wet chi yun can jun tujan noꞌ chiꞌbꞌe tuꞌ.
27 Cha poꞌon can el noꞌ xamcꞌule jix ja bꞌatxecꞌ tuꞌ,
cꞌal noꞌ xubꞌ jix ja bꞌatxbꞌa ey jin sattaj,
jaꞌton noꞌ icham meꞌ jix kꞌanbꞌalnele yet jix oc can Aarón cꞌal ebꞌ scꞌaal yin yakꞌomal xaambꞌal ey jin an.
28 Jal junxa tujan noꞌ chiꞌbꞌe tuꞌ,
yet Aarón yetoj ebꞌ scꞌaal chi yun can ocoj.
Ley chi yun can jun tiꞌ yetoj ebꞌ je yet Israelal.
Jaꞌ jun xaambꞌal chi yakꞌ ebꞌ ey jin jain Jehová jin tiꞌ,
jaꞌton xaambꞌal yet naꞌobꞌail chi yun can ocoj.
29 Jaꞌ spichil naj Aarón chi yaoc yin yopiso,
oj cancan tet ebꞌ yicꞌaal yet bꞌakꞌin.
Oj yiꞌcan oc junoj yicꞌaal tuꞌ jaꞌton junoj ebꞌ oj oc can skꞌexeloj yin sat yakꞌomal xaambꞌal ey jin an.
30 Jaꞌ junoj ebꞌ yicꞌaal Aarón oj oc yin sat yakꞌomal xaambꞌal tuꞌ,
jaꞌton ebꞌ smoo yoctoj yul jin calubꞌal bꞌey chin chaꞌle jin bꞌa je yetoj,
yet chin je yakꞌon servil.
Jaꞌ yet chi yilontoj yopiso ebꞌ tuꞌ,
sowalil tol eyoc spichil ebꞌ yin jujebꞌoj cꞌual.
31 Chi lawi tuꞌ,
cha wiꞌontej ẍiꞌbꞌeal noꞌ icham meꞌ tuꞌ,
noꞌ jix kꞌanle yet chi sicꞌle oc junoj mac chi oc yin yopiso,
jaxa ẍiꞌbꞌeal noꞌ,
jatuꞌ cha txic noꞌ bꞌey sicꞌbꞌil el wu,
tol wet yeocoj.
32 Jal Aarón yetoj ebꞌ yicꞌaal,
jaꞌ ebꞌ oj chiꞌon ẍiꞌbꞌeal noꞌ icham meꞌ yetoj ixim pan eey yul jun yaliẍ xuc tuꞌ.
Oj low ebꞌ bꞌey stiꞌ jun kꞌap na bꞌey chin chaꞌle jin bꞌa yetoj ebꞌ.
33 Oj sloꞌ ebꞌ wan tuꞌ,
yutol jix akꞌle yin xaambꞌalil yu yakꞌle mimancꞌulal yin spenail ebꞌ,
cꞌal yu waon can oc yopiso ebꞌ yin yakꞌomaloj xaambꞌal ey jin an.
Cꞌam ojabꞌ junojxa txꞌoj ánima chi skeꞌ sloꞌon wan loꞌbꞌe tuꞌ,
yutol wet yeocoj.
34 Ta tol eyto noꞌ chiꞌbꞌe cꞌal ixim pan chi cancan yet junxa cꞌual,
cha wakꞌ tzꞌaꞌ jantaj to chi cancan tuꞌ.
Cꞌam junojxa mactxequel chi skeꞌ ẍiꞌoni,
yutol wet yeocoj.
35 Unwej masanil wan tiꞌ yetoj naj Aarón yetoj cꞌal ebꞌ yuninal,
jaxca wal ye can walon yin jin chejbꞌanil,
jaxca tuꞌ cha wute.
Jujebꞌ cꞌual chi yiꞌtoj yet chi oc can yopiso ebꞌ tuꞌ.
36 Junjun cꞌal noꞌ achꞌe wacax cha wakꞌ yin xaambꞌalil yin junjun cꞌual,
yu yakꞌle tan spenail ebꞌ.
Cha sajbꞌane pax jun yet xaambꞌal tuꞌ,
cha wakꞌon tzꞌaꞌ junoj noꞌ xaambꞌal yibꞌan,
jaꞌton noꞌ chi akꞌon tan je penail.
Catuꞌ cha secontoj aceite olivo yibꞌan,
yet chi oc can wetoj.
37 Yin jujebꞌ cꞌual cha wakꞌ tzꞌaꞌ noꞌ xaambꞌal yibꞌan jun yet xaambꞌal tuꞌ,
yu yakꞌon lawoj je penail.
Queytuꞌ chi yun yoc can jun yet xaambꞌal tuꞌ wetoj.
Yal cꞌal mactxequel chi tenon jun yet xaambꞌal tuꞌ,
chi oc can wetoj.
Ofrenda Chi Akꞌle Yin Junjun Cꞌu
38 Junjun cꞌal cꞌu sowalil chi akꞌle cacꞌon noꞌ meꞌ jun abꞌil skꞌinal yin xaambꞌaloj yibꞌan jun yet xaambꞌal tuꞌ.
39 Jun noꞌ cha wakꞌ tzꞌaꞌ yin xaambꞌal yet skꞌinibꞌalil,
junxa noꞌ yet yeycꞌualil.
40 Jaꞌ yetoj noꞌ cha wakꞌ tzꞌaꞌ yet skꞌinibꞌ tuꞌ,
cha wakꞌon tzꞌaꞌ canebꞌoj libra ixim jarina caw wal watxꞌ,
cha calon ixim yetoj junoj litro aceite olivo.
Cha secon pax ey junoj litro yal uva yin ofrendail yibꞌan.
41 Jacꞌalaꞌ queytuꞌ cha wute pax junojxa noꞌ meꞌ yet yeycꞌualil,
yetoj cꞌal ixim jarina,
cꞌal an yal uva yin ofrendail.
Jaꞌ wan ofrenda tuꞌ caw wal watxꞌ yoc sabꞌ chi wabꞌe.
42 Masanil ebꞌ conobꞌ Israel,
yetoj cꞌal ebꞌ yicꞌaal,
chi yiꞌtej ebꞌ wan saꞌbꞌeal tiꞌ yet chi jul ebꞌ bꞌey jin calubꞌal.
43 Jaꞌ tituꞌ oj jin chaꞌle jin bꞌa yetoj ebꞌ ja wet Israelal,
jaꞌton tituꞌ oj jin kꞌanabꞌ je yetoj,
cꞌal jin txꞌoxon wipalil,
yet chi oc can wetoj.
44 Jal jun snail jin calubꞌal cꞌal jun yet xaambꞌal tuꞌ,
yetoj pax Aarón yetoj ebꞌ yuninal,
tol jain jix jin sicꞌ can oc ebꞌ yin yakꞌomaloj xaambꞌal ebꞌ Israel ey jin.
45 Jain tiꞌ,
oj jin caey ecꞌ je xol yutol je Diosal jin.
46 Queytuꞌ oj yun je yotajne eloj,
tol jain ton Jehová je Diosal jin,
jain ton jix jex wiꞌeltej bꞌey Egipto,
yu jun tuꞌ,
chin caey ecꞌ je xol yutol je Diosal jin,
ẍi Dios.