2 Al jun chejbꞌanile tiꞌ tet ebꞌ ja wet Israelal,

tol cꞌam ojabꞌ chi sbꞌej yakꞌon yofrenda ebꞌ ey jin.

Yutol txequel ye can stiempoal yet chi yakꞌon ixim pan ebꞌ,

cꞌal wan ofrenda chi akꞌle tzꞌaꞌ yin xaambꞌaloj ey jin,

tol caw watxꞌ yoc sabꞌ chi wabꞌe,

ẍi Dios.

3 Cha walon pax tet ebꞌ,

tzetyetal tol smoo chi yakꞌ ebꞌ yin xaambꞌal ey jin.

Yin junjun cꞌu chi yun smakꞌon cam ebꞌ cꞌal yakꞌon tzꞌaꞌ ebꞌ cacꞌon noꞌ meꞌ jun abꞌil skꞌinal,

noꞌ tol tzꞌajan smimanil.

4 Jun noꞌ chi akꞌle yin xaambꞌalil yet skꞌinibꞌ,

jaxa junxa noꞌ chi akꞌle yet yeycꞌualil.

5 Jal pax ofrenda yin ixim tiriw xin,

sowalil chi akꞌle canebꞌoj libra ixim jarina caw wal watxꞌ,

catuꞌ chi cal-le yetoj junoj litro aceite yet teꞌ olivo.

6 Jaꞌton wan xaambꞌal tiꞌ chi akꞌle tzꞌaꞌ bꞌey wonan Sinaí,

jaꞌton wal wan tiꞌ caw watxꞌ yoc sabꞌ chi wabꞌ jain Jehová jin tiꞌ.

7 Jal pax ofrenda chi akꞌle yin yal uva,

jun litro chi akꞌle yetoj noꞌ meꞌ chi akꞌle tzꞌaꞌ tuꞌ.

Jaꞌ jun yal uva tuꞌ chi txile can oc yin jin calubꞌal yet chi iꞌle a can jin bꞌi.

8 Jaxa junxa noꞌ meꞌ chi akꞌle yin xaambꞌal yet yeycꞌualil,

chi akꞌle cꞌal pax ixim jarina cꞌal yal uva yin ofrendail yetoj noꞌ meꞌ,

laan cꞌal chi yun wan xaambꞌal tuꞌ jaxca wan chi akꞌle yet skꞌinibꞌ.

Jaꞌ jun ofrenda tuꞌ caw watxꞌ yoc sabꞌ chi wabꞌe yet chi akꞌle tzꞌaꞌ jin sattaj,

ẍi Jehová.

9 Jaꞌ yet scꞌual xewilal sowalil che yakꞌ cacꞌonoj noꞌ achꞌe meꞌ jun abꞌil skꞌinal,

tol watxꞌ ojabꞌ smimanil,

yetoj waxajebꞌoj libra ixim jarina caw wal watxꞌ,

catuꞌ che calon yetoj aceite olivo,

yet chi akꞌle yin ofrendail yin ixim tiriw.

Catuꞌ chi akꞌle cꞌal pax yal uva yetoj,

jaxca cꞌaltaꞌ chi yun yakꞌlei.

10 Jaꞌ wan xaambꞌal tuꞌ,

chi akꞌle yet scꞌual xewilal,

chi akꞌle cꞌal pax yal uva yetoj,

txꞌoj pax ye wan xaambꞌal chi akꞌle yin junjun cꞌu.

11 Jaꞌ yet sbꞌabꞌel cꞌual yin junjun xꞌaaw chi akꞌle cacꞌon noꞌ achꞌe wacax yin xaambꞌalil,

yetoj junoj noꞌ icham meꞌ cꞌal jujcꞌon noꞌ achꞌe meꞌ jun abꞌil skꞌinal;

tol watxꞌ ojabꞌ smimanil.

12 Jaꞌ yin junjun noꞌ wacax tuꞌ,

che yakꞌwej lacawebꞌoj libra ixim jarina caw wal watxꞌ,

calbꞌil yetoj aceite olivo.

Jaxa yetoj noꞌ icham meꞌ chi akꞌle waxajebꞌoj libra ixim jarina caw wal watxꞌ,

chi cal-le yetoj aceite olivo.

13 Jaxa yetoj junjun noꞌ achꞌe meꞌ tuꞌ,

chi akꞌle canebꞌoj libra ixim jarina caw wal watxꞌ calbꞌil yetoj aceite olivo.

Jaꞌ jun ofrenda chi akꞌle tzꞌaꞌ tiꞌ,

caw watxꞌ yoc sabꞌ chi wabꞌe,

ẍi Dios.

14 Jal pax yal uva chi akꞌle yin ofrendail yetoj junjun noꞌ achꞌe wacax tuꞌ,

chi akꞌle nan scaabꞌ litro chi akꞌle yetoj junjun noꞌ wacax tuꞌ,

nan scaabꞌ litro yin junjun noꞌ icham meꞌ,

junjun litro yin junjun noꞌ achꞌe meꞌ.

Jaꞌton wan ofrenda tiꞌ sowalil chi akꞌle yet junjun xꞌaaw yul abꞌil.

15 Sowalil chi akꞌle pax junoj noꞌ chiw yin xaambꞌalil yu stooloj je penail,

yetoj cꞌal pax xaambꞌal chi akꞌle junjun cꞌu,

yetoj cꞌal yal uva chi akꞌle yin ofrendail.

16 Jaꞌ yet 14 yeoc yet bꞌabꞌel xꞌaaw yul abꞌil,

jaꞌ yet tuꞌ che yaonwej oc skꞌinal yet che naꞌontej yet jix jex jajcha eloj,

yu je yiꞌon a can jin bꞌi jain Jehová jin tiꞌ.

17 Jaxa yet 15 yeoc jun xꞌaaw tuꞌ,

catuꞌ chi ẍaꞌel yich jujebꞌ cꞌu kꞌin jaꞌton yet che loꞌon ixim pan cꞌam yich eeyoj.

18 Jaꞌ jun bꞌabꞌel cꞌu yul wan jujebꞌ cꞌual tuꞌ,

jaꞌ yet tuꞌ chi oc jun miman yambꞌabꞌail,

yet chex oc yin eyilal ey jin.

Jaꞌ yet jun cꞌual tuꞌ,

cꞌam junoj mactxequel chi mulnai,

yutol miman yeloc apnoj.

19 Che yakꞌwej tzꞌaꞌ je xaambꞌal jin sattaj,

cacꞌon noꞌ achꞌe wacax,

jun noꞌ meꞌ yetoj jujcꞌon noꞌ achꞌe meꞌ tol jun abꞌil skꞌinal,

noꞌ tol watxꞌ cꞌal smimanil.

20 Jaꞌ yetoj wan xaambꞌal tiꞌ,

chi akꞌle wanxa ofrenda chi akꞌle cꞌaltaꞌ yetoj ixim jarina calbꞌil yetoj aceite olivo,

chi akꞌle jaxca tiꞌ:

Lacawebꞌ libra ixim jarina yetoj junjun noꞌ wacax,

waxajebꞌ libra chi akꞌle yetoj junjun noꞌ icham meꞌ,

21 catuꞌ canebꞌ libra chi akꞌle yetoj noꞌ achꞌe meꞌ.

22 Catuꞌ che yakꞌon pax junoj noꞌ icham chiw yin xaambꞌaloj yu je penail,

yet chi tancan el je penail.

23 Queytuꞌ oj yun je yakꞌon wan xaambꞌal yin junjun skꞌinibꞌ yin junjun cꞌu.

24 Jaxca tuꞌ che yun junjun cꞌu yin jujebꞌ cꞌual kꞌin tuꞌ.

Chi akꞌle tzꞌaꞌ wan ofrenda tuꞌ,

yutol caw watxꞌ yoc sabꞌ chi wabꞌ jain Jehová jin tiꞌ.

Asan xin,

txꞌoj pax yeoc wan xaambꞌal chi akꞌle cꞌaltaꞌ yin junjun cꞌu yetoj cꞌal pax yal uva.

25 Jaꞌ yet sjuj cꞌual yet eyoc jun kꞌin tuꞌ,

che yaoc junxa miman yambꞌabꞌail yu je yoc yin eyilal jin sattaj.

Jaꞌ yet jun cꞌual tuꞌ cꞌam junoj mactxequel chi too mulna xol smulnail.

26 Jaꞌ yet xax ecꞌ el jujebꞌ semana yecꞌ jun kꞌin tuꞌ,

catuꞌ che yakꞌon je yofrenda yu je bꞌabꞌel sat awo,

catuꞌ che yambꞌan je bꞌa yu je yoc yin eyilal ey jin,

cꞌam ojabꞌ junoj mactxequel chi mulna xol smulnail.

27 Che yakꞌon cꞌal pax je xaambꞌal caw wal watxꞌ yoc sabꞌ chi wabꞌe,

cacꞌon noꞌ achꞌe wacax,

jun noꞌ icham meꞌ,

yetoj jujcꞌon noꞌ achꞌe meꞌ jun abꞌil skꞌinal.

28 Chi akꞌle pax ixim jarina yetoj wan xaambꞌal tuꞌ,

ixim tol watxꞌ chi yun scal-le yetoj aceite olivo,

lacawebꞌ libra jarina chi akꞌle yetoj junjun noꞌ wacax tuꞌ,

waxajebꞌ libra jarina chi akꞌle yetoj noꞌ icham meꞌ,

29 canebꞌ libra ixim jarina chi akꞌle yetoj junjun noꞌ achꞌe meꞌ.

30 Catuꞌ che yakꞌon cꞌal pax junoj noꞌ icham chiw yin xaambꞌal yu yakꞌle mimancꞌulal yin je penail.

31 Jaꞌ yetoj wan xaambꞌal tuꞌ,

che yakꞌ pax ixim jarina yetoj yal uva yin ofrendail,

che yakꞌon cꞌal pax noꞌ xaambꞌal chi akꞌle cꞌaltaꞌ yet junjun cꞌu.

Jaꞌ masanil noꞌ xaambꞌal chi akꞌle tuꞌ sowalil tol watxꞌ ojabꞌ cꞌal smimanil.