Jaꞌ wan kꞌin albꞌilcan tol wet yeocoj,

jaꞌton yet tuꞌ che yambꞌa je bꞌa yet chex oc yin eyilal ey jin.

3 Wajebꞌ cꞌu chex mulnai,

jaxa yet sjujebꞌ cꞌual xin,

cꞌamxa junoj tzetyetal che yunne.

Tol chex xewi,

cꞌal je yambꞌan oc je bꞌa yin eyilal jin sattaj,

yal cꞌal bꞌeytuꞌ ey jex ecꞌoj.

4 Jaꞌton wan kꞌin tuꞌ tol miman yeloc apnoj,

yu je yiꞌon a can jin bꞌi,

yet che yambꞌan oc je bꞌa yin eyilal yet scꞌual tol albꞌilcan wu.

5 Jaꞌ jun kꞌin snaꞌbꞌaniltej yet jix jin ecꞌ stiꞌlaj je na bꞌey Egipto,

chi el yich yet yeycꞌualil yet 14 yoc bꞌabꞌel xꞌaaw,

jaꞌ jun kꞌin che yaoc tuꞌ,

yu je yiꞌon a can jin bꞌi.

6 Jaxa yet 15 yoc jun xꞌaaw tuꞌ xin,

catuꞌ che yaon pax oc skꞌinal ixim pan tol cꞌam yich eeyoj,

yu je yiꞌon a can jin bꞌi.

Yin jujebꞌ cꞌual che loꞌ ixim pan tol cꞌam yich eeyoj.

7 Jaꞌ yet bꞌabꞌel cꞌu tuꞌ,

che yambꞌawej oc je bꞌa yin eyilal jin sattaj.

Cꞌam junoj mulnail che waꞌne yet jun cꞌu tuꞌ.

8 Jaꞌ yul jujebꞌ cꞌual tuꞌ,

che yakꞌ tzꞌaꞌ je xaambꞌal jin sattaj.

Jaxa yet sjuj cꞌual tuꞌ,

che yambꞌa oc je bꞌa yin eyilal ey jin.

Cꞌam junoj tujan mulnail chi skeꞌ je waꞌneni,

ẍi Dios.

9 Jix yalon pax Jehová tet naj Moisés jaxca tiꞌ:

10 Al tet ebꞌ ja wet Israelal jaxca tiꞌ:

Jaꞌ yet ey jex xa ecꞌ bꞌey txꞌotxꞌ txꞌotxꞌ oj wakꞌ ey jex tuꞌ,

jaꞌ yet oj je chaꞌon el yich je kꞌupon a ixim je tiriw,

jaꞌ jun bꞌabꞌel topan ixim che kꞌupa tuꞌ,

che yiꞌtej tet ebꞌ yakꞌomal xaambꞌal.

11 Jaxa yet junxa cꞌual yet xax lawi can ecꞌ scꞌual xewilal tuꞌ,

catuꞌ chi yakꞌon ebꞌ yakꞌomal xaambꞌal tuꞌ yin ofrendail yin tzet che yakꞌ tuꞌ,

yet watxꞌ chin chaꞌ ey jex.

12 Jaꞌ yet jun cꞌu yet che yakꞌon jun topan ixim tiriw tuꞌ,

jaꞌ yet tuꞌ che yakꞌ junoj noꞌ achꞌe meꞌ yin xaambꞌaloj jin sattaj;

jun abꞌil ojabꞌ skꞌinal noꞌ,

cꞌam ojabꞌ stacnajil yili smimanil noꞌ.

Jaꞌ jun xaambꞌal tuꞌ caw watxꞌ yoc sabꞌ chi wabꞌ jain Jehová jin tiꞌ.

13 Catuꞌ che yakꞌon pax bꞌalonebꞌoj libra ixim jarina caw watxꞌ,

tol calbꞌilxa yetoj aceite olivo yet chi tzꞌaꞌ yin ofrendail jin sattaj,

caw watxꞌ yoc sabꞌ chi wabꞌe.

Catuꞌ che yakꞌon cꞌal pax junoj litro yal uva yin ofrendail chi secle ey yibꞌan wan ofrenda tuꞌ.

14 Cꞌam ojabꞌ che loꞌ ixim acꞌ tiriw tol to chi kꞌuple aoj,

cꞌam chi skeꞌ je loꞌon ixim yin panil,

tam wal yin kꞌanbꞌinaj,

tam wal yin syaaxil,

masantaꞌcꞌal yet jun cꞌual yet che yakꞌon ixim bꞌabꞌel topan yin ofrendail tuꞌ ey jin.

Ley chi yun can jun tiꞌ ey jex,

yal cꞌal bꞌeytuꞌ ey jex ecꞌoj.

15 Jaxa yet scꞌual Domingo tuꞌ xin,

yet xax ecꞌ can el scꞌual xewilal,

yet che yiꞌontej jun topan ixim tiriw yin ofrendail tuꞌ,

jaꞌton yet tuꞌ che chaꞌon el yich je bꞌison jujebꞌ semana,

16 jaxa yet junxa cꞌu,

yet xax lawi jujebꞌ semana yet scꞌual xewilal tuꞌ,

jaꞌton yet chi tzꞌajna 50 cꞌu,

jaꞌ yet tuꞌ che yakꞌon junxa je yofrenda yin ixim acꞌ tiriw ey jin an.

17 Junjun nail chi yiꞌtej caabꞌcaabꞌoj ixim pan yin ofrendail,

ixim chi waꞌnele yetoj ixim acꞌ jarina,

chi ey yich,

canebꞌ libra jarina chi oc yin junjun.

Jaꞌ ixim tuꞌ ofrenda chi yun yakꞌle jin sattaj,

yu bꞌabꞌel sat awo chi eloloj.

18 Jaꞌ yetoj ixim pan tuꞌ,

sowalil chi akꞌle jujcꞌonoj noꞌ achꞌe meꞌ jun abꞌil skꞌinal,

yetoj junoj noꞌ achꞌe wacax,

yetoj cacꞌon noꞌ icham meꞌ tol cꞌam niꞌoj bꞌey man tzꞌajanoj.

Jaꞌ noꞌ noꞌ tuꞌ chi akꞌle tzꞌaꞌ masanil jin sattaj,

caw watxꞌ yoc sabꞌ chi wabꞌe,

catuꞌ che yakꞌon pax ixim jarina,

yetoj cꞌal yal uva yin ofrendail yetoj noꞌ xaambꞌal tuꞌ.

19 Che yakꞌon pax junoj noꞌ icham chiw yin xaambꞌaloj yu stancan el je penail,

yetoj cacꞌonoj noꞌ meꞌ jun abꞌil skꞌinal che yakꞌ yin ofrendail,

yu je txꞌoxon eloj tol ey watxꞌcꞌulal wu je yetoj.

20 Jaꞌ jun yakꞌomal xaambꞌal tuꞌ chi bꞌatxbꞌan ey noꞌ meꞌ cꞌal ixim pan yin xaambꞌalil jin sattaj,

tol wet yeocoj.

Chi lawi tuꞌ xin,

chi cancan tet jun yakꞌomal xaambꞌal tuꞌ.

21 Jaꞌ yet eyoc jun kꞌin tuꞌ,

cꞌam junoj tujan mulnail chi skeꞌ je waꞌneni.

Che yambꞌawej oc je bꞌa yin eyilal ey jin an.

Ley chi yun can jun tiꞌ ey jex,

yetoj cꞌal tet ebꞌ je yicꞌaal,

yal cꞌal bꞌeytuꞌ ey jex ecꞌoj.

22 Jaꞌ yet chi aapnoj stiempoal je kꞌupon a ixim je tiriw,

cꞌam che sicꞌa ixim chi cancan xol-laj yajan,

cꞌal ixim ey bꞌey stiꞌlaj,

yutol jaꞌ wan tuꞌ,

yet ebꞌ mebꞌa cꞌal ebꞌ txꞌoj conobꞌal eyecꞌ je xol.

Jain Jehová je Diosal jin chi walaꞌ.

23 Jix yalon pax Jehová tet naj Moisés jaxca tiꞌ:

24 Al tet ebꞌ ja wet conobꞌ jaxca tiꞌ:

Jaꞌ yet bꞌabꞌel cꞌual yet sjujebꞌ xꞌaaw chex xewi,

che yambꞌan oc je bꞌa yin eyilal jin sattaj,

catuꞌ chi xuꞌle chꞌen trompeta yet chin je naꞌontej.

25 Sowalil che yakꞌ tzꞌaꞌ noꞌ je xaambꞌal ey jin an.

Cꞌam ojabꞌ junoj jex chex mulna yet jun cꞌual tuꞌ,

ẍi Dios.

26 Jix yalon pax Jehová tet naj Moisés jaxca tiꞌ:

27 Jaꞌ yet laonebꞌ cꞌual yet sjuj xꞌaaw,

jaꞌton scꞌual yet chi akꞌle can tan spenail,

che yambꞌa oc je bꞌa yin eyilal ey jin,

cꞌal je yijlen nocha je bꞌa,

catuꞌ che yakꞌon tzꞌaꞌ je saꞌbꞌeal yin xaambꞌaloj ey jin.

28 Cꞌam cꞌal chex mulna yet jun cꞌual tuꞌ,

yutol jaꞌ yet jun cꞌual tuꞌ chi tancan el je penail jin sattaj jain Jehová je Diosal jin tiꞌ.

29 Ta ey junoj mactxequel tol cꞌam chi sjije yijle nocha sbꞌa yet jun cꞌual tuꞌ,

sowalil chi qꞌueyle el je xol.

30 Yetoj cꞌal pax oj,

yal cꞌal mactxequel chi mulna yet jun cꞌual tuꞌ,

jain oj jin qꞌueyeloj.

31 Cꞌam junoj mactxequel chi mulna yin yal cꞌal tzet mulnail yet jun cꞌual tuꞌ.

Jaꞌ jun tiꞌ ley chi yun can oc je xol,

cꞌal tet ebꞌ je yicꞌaal yal cꞌal bꞌeytuꞌ ey jex ecꞌoj.

32 Jaꞌ jun cꞌual tuꞌ,

scꞌual xewilal chi yun can ey jex,

scꞌual pax yet che yijle nocha je bꞌa.

Chi ẍaꞌel yich yet bꞌalonebꞌ yoc xꞌaaw yet skꞌejbꞌintajil,

masantaꞌcꞌal yet skꞌejbꞌintajil yet junxa cꞌu,

ẍi Dios tet naj Moisés.

33 Jix yalon pax Jehová tet naj Moisés jaxca tiꞌ:

34 Al tet ebꞌ ja wet conobꞌ Israel tol jain chi wal wan tiꞌ:

Jaꞌ yet jolajonebꞌxa yoc xꞌaaw yet sjuj xꞌaaw tuꞌ,

che yaoc jujebꞌoj cꞌual kꞌin yet wan pat na,

yu je yiꞌon a can jin bꞌi.

35 Che yambꞌawej oc je bꞌa yin eyilal yet bꞌabꞌel cꞌu;

jaꞌ yet jun cꞌual tuꞌ,

cꞌam junoj mactxequel chi mulna xol smulnail.

36 Jaꞌ yul jujebꞌ cꞌu tuꞌ,

junjun cꞌal cꞌu che yakꞌ tzꞌaꞌ je xaambꞌal ey jin;

jaxa yet swaxajebꞌ cꞌual xin,

che yambꞌawej oc je bꞌa yin eyilal jin sattaj,

cꞌal je yakꞌon tzꞌaꞌ je xaambꞌal,

yutol jin kꞌin yeoc jun cꞌu tuꞌ,

cꞌam junoj mactxequel chi mulna xol smulnail.

37 Jaꞌton yet wan scꞌual kꞌin tuꞌ che yiꞌa can jin bꞌi.

Che yambꞌawej oc je bꞌa yin eyilal,

cꞌal je yakꞌon tzꞌaꞌ je xaambꞌal jin sattaj.

Che yiꞌon el je yofrenda yin ixim tiriw ma yin ixim cebada,

yetoj an yal uva,

junjun tujan chi akꞌle yin jatacꞌalaꞌ jun scꞌual albꞌilcanoj.

38 Jaꞌ wan xaambꞌal tuꞌ,

txꞌoj yel yintaj wan xaambꞌal chi akꞌle yet scꞌual xewilal albꞌilcan wu ey jex.

Txꞌoj yel wan xaambꞌal tuꞌ yintaj xaambꞌal chi akꞌle cꞌaltaꞌa.

Txꞌoj yel pax yintaj je saꞌbꞌeal che yakꞌ bꞌey je yakꞌnaj can je tiꞌ je yakꞌoni,

yetoj cꞌal je yofrenda tol chi el yin je cꞌul je yakꞌon ey jin.

39 Jaxa yet jolajonebꞌ cꞌu yet sjuj xꞌaaw,

yet xax yamcha a sat je yawo bꞌey je txꞌotxꞌ tuꞌ,

catuꞌ che yaonwej oc kꞌin jin sattaj yin jujebꞌ cꞌual,

yu je yiꞌon a can jin bꞌi.

Jaꞌ yet bꞌabꞌel cꞌu tuꞌ,

scꞌual xewilal,

jacꞌalaꞌ pax yet swaxajebꞌ cꞌual tuꞌ.

40 Jaꞌ yet bꞌabꞌel cꞌu tuꞌ,

che yiꞌtej sat teꞌ teꞌ tol caw wal watxꞌ,

teꞌ xaj palma,

cꞌal skꞌabꞌ teꞌ sauce ey bꞌey stiꞌlaj jaꞌ jaꞌ,

cꞌal skꞌabꞌ wanxa teꞌ teꞌ ecꞌal xaj.

Jaxca tuꞌ chi yun je yaon oc skꞌinal wan pat na tuꞌ.

Jaxca tuꞌ oj yun je yakꞌon tzalabꞌoj je cꞌul je yeecꞌ jin sattaj.

41 Junjun cꞌal abꞌil yet sjuj xꞌaaw,

catuꞌ che yaon oc jun kꞌin tuꞌ yin jujebꞌ cꞌual,

yu je yiꞌon a can jin bꞌi.

Jaꞌ jun tiꞌ ley chi yun can je xol,

cꞌal tet ebꞌ je yicꞌaal.

42 Jaꞌ yul jujebꞌ cꞌu tuꞌ,

je masanil jaex Israel jex tiꞌ,

sowalil chex caey ecꞌ bꞌey yul-laj je pat na yet eyoc jun kꞌin tuꞌ,

43 yet watxꞌ chi yotajne el ebꞌ je yicꞌaal yet bꞌakꞌin,

tol jaꞌ bꞌey yul-laj pat na ecꞌnaj jex caan yet jix jex wiꞌon eltej bꞌey txꞌotxꞌ Egipto.

Jain Jehová je Diosal jin chi walaꞌ.

44 Jaxca tuꞌ jix yun yalon naj Moisés tet ebꞌ conobꞌ Israel,

jaxca yu wan kꞌin tol miman yeloc apnoj yu yiꞌle a can sbꞌi Dios.