Ebꞌ Cꞌam Chi Skeꞌ Sloꞌon Wan Ofrenda Chi Akꞌle Tet Jehová
22
Jix kꞌanabꞌ Jehová tet naj Moisés,
jix yalon jaxca tiꞌ:
2 Al tet naj Aarón,
yetoj cꞌal tet ebꞌ yicꞌaal,
tol sowalil chi syaꞌilne sbꞌa ebꞌ yetoj wan ofrenda chi yakꞌ ebꞌ je yet Israelal ey jin,
ta cꞌamaj cꞌam niꞌoj weloc apnoj yul sat ebꞌ chi yal tuꞌ.
3 Cha walon pax tet ebꞌ,
tinaniꞌ,
cꞌal yet bꞌakꞌin,
ta ey junoj yicꞌaal ebꞌ tol man watxꞌoj chi yute sjijen jin ley,
ta man yin oj xolilal chi yun yakꞌon ebꞌ wan xaambꞌal chi yakꞌ ebꞌ je yet Israelal ey jin,
jaꞌ jun mactxequel tuꞌ,
sowalil chi qꞌueyle el yin yopiso tuꞌ.
Jain caw Jehová jin chi walaꞌ.
4 Cꞌam ojabꞌ junoj ebꞌ yicꞌaal Aarón tol eyoc lepra yin smimanil chi loꞌon tzetyetal tol wet yeocoj,
masantaꞌcꞌal chi to waꞌxi scꞌul ebꞌ,
catuꞌ chi skeꞌ sloꞌon ebꞌ.
Caw yaabꞌetaj chi yun can el ebꞌ yul jin sat,
ta tol chi smitxꞌ junoj tzetyetal ebꞌ tol tzꞌiltaj,
junoj mimanile tol camnajxa,
ma xin,
ta ey bꞌey chi malecꞌ yinatil junoj mactxequel yin.
5 Caw yaabꞌetaj chi yun can el ebꞌ yul jin sat ta tol chi smitxꞌ junoj noꞌ noꞌ ebꞌ,
noꞌ chi sjutx sbꞌa sat txꞌotxꞌ,
jaꞌton noꞌ tzꞌiltaj,
jaxca yalon ley,
jaꞌ jun mactxequel tuꞌ chi etex can eloj,
tzꞌiltaj chi yun can el yu wan tzetyetal tol chi smitxꞌ tuꞌ.
6 Ta tzꞌiltaj yeoc yu tzet chi yun tuꞌ,
cꞌam chi skeꞌ sloꞌon junoj tzetyetal tol wet yeocoj,
masantaꞌcꞌal yet chi kꞌejbꞌi eyoj catuꞌ chi aẍni.
7 Jato yet chi ey cꞌu,
catuꞌ chi waꞌxi el jaxca yalon ley.
Chi xa skeꞌ pax sloꞌon masanil tzetyetal ebꞌ tol wet yeocoj,
yutol yet cꞌaltaꞌ ebꞌ yeocoj.
8 Cꞌam chi skeꞌ ẍiꞌon ebꞌ ẍiꞌbꞌeal noꞌ noꞌ tol tucꞌal chi cameloj,
ma noꞌ chi makꞌle cam yu noꞌ xol-laj teꞌal noꞌ,
yet watxꞌ cꞌam chi etex el ebꞌ yul jin sat.
Jain Jehová jin tiꞌ chi walaꞌ.
9 Al tet ebꞌ tol chi sjije jin chejbꞌanil ebꞌ tiꞌ,
yet watxꞌ cꞌam chi oc spenail ebꞌ,
yet cꞌam chi cam pax ebꞌ.
Ta cꞌam yeloc apnoj jin chejbꞌanil tiꞌ yul sat ebꞌ,
chi tit yibꞌan ebꞌ,
yutol jain Jehová jin jix jin sicꞌ can el ebꞌ.
10 Asanne ojabꞌ ebꞌ jato cꞌal oc yetoj ebꞌ yakꞌomal xaambꞌal tuꞌ,
chi skeꞌ sloꞌon ebꞌ tzetyetal tol wet yeocoj.
Tam wal ebꞌ tucꞌal eyecꞌ scꞌatan ebꞌ yakꞌomal xaambꞌal tuꞌ,
ma ebꞌ tucꞌal eyecꞌ mulnail bꞌey ebꞌ,
cꞌam chi skeꞌ sloꞌon ebꞌ.
11 Ta jaꞌ junoj naj yakꞌomal xaambꞌal tuꞌ chi sman junoj ẍejabꞌ yetoj tumin,
jaꞌ jun ẍejabꞌ tuꞌ,
chi skeꞌ sloꞌon wan tzetyetal tol wet yeocoj.
Yetoj cꞌal pax ebꞌ tol alinaj yul sna jun yakꞌomal xaambꞌal tuꞌ,
jaꞌ ebꞌ tuꞌ chi skeꞌ sloꞌon masanil tzetyetal ebꞌ tol wet yeocoj.
12 Ta ey junoj scutzꞌin naj yakꞌomal xaambꞌal tuꞌ chi yiꞌ junoj winaj tol cꞌam yopiso yin yakꞌomaloj xaambꞌal tuꞌ,
cꞌamxa chi skeꞌ sloꞌon ix wan ofrenda tol yet ebꞌ yakꞌomal xaambꞌal tuꞌ chi yun yakꞌlei.
13 Asan xin,
ta tol camnajxa yichamil ix,
ma xin tol spoꞌolenaj sbꞌa ix yetoj yichamil,
ta cꞌam pax junoj yuneꞌ ix,
ta xax meltzotej ix yintaj smam tuꞌ junelxa,
jaxca cꞌaltaꞌ yet tol kꞌopo ix to ix,
chi skeꞌ sloꞌon wan loꞌbꞌe tuꞌ ix yetoj smam.
Jal pax wanojxa ebꞌ txꞌoj animail xin,
cꞌam chi skeꞌ sloꞌon wan loꞌbꞌe ebꞌ tuꞌ yetoj ebꞌ yakꞌomal xaambꞌal tuꞌ.
14 Ta ey mactxequel comon cꞌal chi chiꞌon noꞌ chiꞌbꞌe tol wet yeocoj,
yin tol man yotaj oj ta wet yeocoj,
sowalil chi yakꞌ sqꞌuexel jun mactxequel tuꞌ tet jun yakꞌomal xaambꞌal tuꞌ,
yetoj junojxa yet joebꞌ tujan yibꞌan.
15 Man comonoj xacꞌal che chaꞌ chiꞌle wan tzetyetal chi yakꞌ ebꞌ je yet conobꞌ tiꞌ ey jin an.
16 Ta comon xacꞌal che chaꞌ chiꞌle wan tzetyetal tuꞌ,
jaꞌ ey jin chi oc spenail jun mactxequel chi chiꞌon tuꞌ,
sowalil chi stoolane,
yutol comon cꞌal chi ẍiꞌ ebꞌ,
yutol wet yeocoj.
Jain Jehová jin jix jin sicꞌ can el noꞌ noꞌ tuꞌ,
ẍi Dios.
Sleyalil Yibꞌan Noꞌ Noꞌ Chi Akꞌle Yin Xaambꞌal
17 Jix yalon Jehová tet naj Moisés jaxca tiꞌ:
18 Al jun tiꞌ tet naj Aarón,
yetoj cꞌal tet ebꞌ scꞌaal,
yetoj pax tet masanil ebꞌ je yet Israelal tol jain chi wal wan kꞌane tiꞌ:
Ta tol ey junoj jex jaex Israel jex tiꞌ,
ma junoj ebꞌ txꞌoj conobꞌal caan ecꞌ je xol,
ta chi yoche ebꞌ chi yakꞌ tzꞌaꞌ junoj noꞌ noꞌ yin xaambꞌaloj jin sattaj an,
yet chi yakꞌon bꞌey yakꞌnaj can stiꞌ yakꞌoni,
ma tucꞌal chi el yin scꞌul yakꞌoni,
19 sowalil jaꞌ junoj noꞌ icham chi yakꞌa.
Junoj noꞌ caw watxꞌ smimanil chi yakꞌa,
yet watxꞌ chin chaꞌ jun xaambꞌal tuꞌ.
Chi skeꞌ yakꞌon junoj noꞌ achꞌe wacax,
ma junoj noꞌ icham meꞌ,
ma junoj noꞌ icham chiw,
20 cꞌam ojabꞌ bꞌey eyoc syaꞌbꞌil noꞌ chi yakꞌ tuꞌ,
ta yaꞌey noꞌ,
cꞌam chin chaꞌ noꞌ xaambꞌal tuꞌ an.
21 Yal cꞌal mactxequel chi yakꞌ junoj xaambꞌal ey jin yet chi oc mimancꞌulal yin,
ma yu bꞌey yakꞌnaj can stiꞌ yakꞌoni,
ma tucꞌal chi el yin scꞌul yakꞌoni,
sowalil jaꞌ ojabꞌ junoj noꞌ wacax,
ma junoj noꞌ meꞌ,
ma junoj noꞌ chiw tol cꞌam bꞌey eyoc syaꞌbꞌil,
yet watxꞌ chin chaꞌ jun xaambꞌal tuꞌ an.
22 Cꞌam ojabꞌ che yiꞌtej junoj noꞌ noꞌ tol yaꞌey yin xaambꞌaloj ey jin an,
jaxca noꞌ cꞌam chi skeꞌ yilwani,
noꞌ yasinajtoj,
noꞌ kꞌanajtoj,
noꞌ man tzꞌajanoj junoj tujan smimanil,
yetoj noꞌ eeltej yaꞌbꞌil yinlaj.
Jaꞌ wan noꞌ noꞌ jaxca tuꞌ yili,
cꞌam chi skeꞌ yakꞌle tzꞌaꞌ noꞌ jin sattaj bꞌey jun yet xaambꞌal tuꞌ.
23 Ta ey jex chi el yin je cꞌul je yakꞌon junoj je xaambꞌal ey jin,
chi skeꞌ je yakꞌoni;
caxcꞌal man laan oj steel yajan noꞌ,
asan xin ta jaꞌ junoj xaambꞌal tol je yakꞌnaj can je tiꞌ je yakꞌoni,
ta jaxca tuꞌ,
cꞌam chin chaꞌ jun xaambꞌal tuꞌ.
24 Yetoj pax oj cꞌam chi skeꞌ je yakꞌon noꞌ noꞌ elnajtej sbꞌakꞌ,
ma noꞌ yasinajtoj yin xaambꞌaloj ey jin.
Cꞌam ojabꞌ che bꞌeybꞌalne je yiꞌon eltej sbꞌakꞌ noꞌ noꞌ bꞌey caan jex ecꞌ tuꞌ.
25 Cꞌam ojabꞌ che chaꞌ noꞌ noꞌ jaxca tuꞌ yili tet ebꞌ txꞌoj conobꞌal yet chi oc noꞌ yin xaambꞌaloj ey jin,
noꞌ tol man tzꞌajanoj yeoc smimanil,
cꞌam chin chaꞌ noꞌ noꞌ jaxca tuꞌ yili,
ẍi Dios.
26 Jix yalon pax Jehová tet naj Moisés jaxca tiꞌ:
27 Jaꞌ yet chi ali yuneꞌ noꞌ je wacax,
ma junoj noꞌ yuneꞌ meꞌ,
ma noꞌ yuneꞌ chiw,
sowalil chi can noꞌ yin jujebꞌ cꞌual yetoj xutx,
jaxa yet swaxajebꞌ cꞌual xin,
chi xa skeꞌ yakꞌle tzꞌaꞌ noꞌ yin xaambꞌaloj jin sattaj.
28 Cꞌam chi skeꞌ junne cꞌual chi yun je makꞌon cam noꞌ txutxe wacax yetoj noꞌ yuneꞌ,
cꞌal noꞌ txutxe meꞌ yetoj noꞌ yuneꞌ.
29 Jaꞌ yet che yakꞌon je xaambꞌal yu je yalon yu diosalil ey jin,
yin ojabꞌ xolilal chi yun je yakꞌoni,
yet watxꞌ chin chaꞌ je xaambꞌal tuꞌ.
30 Yetoj cꞌal pax oj,
sowalil che chiꞌeytoj noꞌ yet jun cꞌual tuꞌ,
cꞌam chi skeꞌ chi cancan noꞌ yet junxa cꞌual.
Jain Jehová jin chi walaꞌ.
31 Bꞌeybꞌalnewej jin chejbꞌanil tiꞌ;
catuꞌ che jijeni.
Jain Jehová chi walaꞌ.