Jun Yet Xaambꞌal Yet Incienso
30
Jix yalon Jehová jaxca tiꞌ:
Akꞌ waꞌxoj junoj yet xaambꞌal bꞌey chi tzꞌaꞌ incienso,
jaꞌ teꞌ acacia chi oc yin.
2 Laan chi yun scanpaqꞌuil,
45 centímetro chi yun skꞌatil,
45 centímetro chi yun pax sat,
jaxa steel 90 centímetro chi yunne.
Jacꞌalaꞌ wan yucꞌaꞌ jun yet xaambꞌal tuꞌ,
junne cꞌal chi yun yetoj jun yet xaambꞌal tuꞌ.
3 Chi oc oro yel xacꞌal watxꞌ yili yibꞌan,
cꞌal yinlaj scanpaqꞌuil,
yetoj cꞌal yinlaj yucꞌaꞌ;
chi a pax tzalan chꞌen oro yibꞌan stiꞌlaj.
4 Cha wakꞌon waꞌxoj oc caabꞌoj chꞌen slocxomal yalan stiꞌlaj teꞌ tuꞌ.
Chi oc caabꞌcaabꞌoj chꞌen locxom tol oro cꞌal eloj yin scaabꞌ paqꞌuil.
Jaꞌ bꞌey yul tuꞌ chi ecꞌ el teꞌ sbꞌatxbꞌanil teꞌ yet chi skeꞌ yiꞌle ecꞌoj.
5 Jaꞌ teꞌ sbꞌatxbꞌanil tuꞌ,
jaꞌ teꞌ acacia chi oqui,
catuꞌ chi ale oc oro yin spacꞌul.
6 Chi lawi tuꞌ,
cha waon ey jun yet xaambꞌal tuꞌ sattaj eltej an cortina eyoc yeneloj scaẍail yet jin wa kꞌane,
ja bꞌey smajil teꞌ caẍa tuꞌ,
jaꞌ tituꞌ chin chaꞌle jin bꞌa ja wetoj.
7 Yet junjun cꞌal skꞌinibꞌ yet chi waꞌnele oc skꞌakꞌal wan tzejtebꞌal tuꞌ,
jaꞌ naj Aarón oj akꞌon tzꞌaꞌ incienso tol watxꞌ xacꞌal yel sabꞌ yibꞌan yet xaambꞌal tuꞌ.
8 Jacꞌalaꞌ oj yun pax junjun yeycꞌualil,
jaꞌton yet chi oc skꞌakꞌal tzejtebꞌal.
Oj yun ebꞌ jun tiꞌ masanil tiempo jin sattaj jain Jehová jin tiꞌ.
9 Man ojabꞌ comonoj cha wakꞌ tzꞌaꞌ junojxa incienso yibꞌan jun yet xaambꞌal tuꞌ,
tam wal junoj xaambꞌal chi tzꞌaꞌi,
tam wal ofrenda yin ixim tiriw,
tam wal yal uva chi secle ey yin ofrendail.
10 Jaꞌ jun yet xaambꞌal tuꞌ wet yeocoj.
Yin junjun abꞌil chi secon oc chicꞌ naj Aarón yin yucꞌaꞌ jun yet xaambꞌal tuꞌ,
jaꞌton ẍiqꞌuil noꞌ xaambꞌal oj akꞌon tan masanil je penail.
Junjun abꞌil che yun jun tiꞌ,
ẍi Dios.
Chꞌen Tumin Chi Akꞌle Yu Sqꞌuexeloj Junoj Mactxequel
11 Jix yalon Jehová tet Moisés jaxca tiꞌ:
12 Jaꞌ yet oj ja wiꞌon a sbꞌisil ebꞌ ja wet conobꞌ Israel tiꞌ,
junjun ebꞌ oj yakꞌ junoj tumin ebꞌ ey jin,
jain Jehová jin tiꞌ,
yu scawil ebꞌ,
yet watxꞌ cꞌam junoj syaꞌilal chi oc yin ebꞌ,
cꞌam chi cam ebꞌ yu yaꞌbꞌil.
13 Masanil ebꞌ oj tzꞌibꞌcha sbꞌi tuꞌ,
sowalil chi yakꞌ nanan oj siclo chꞌen plata ebꞌ,
yu stooloj scawil ebꞌ,
jatacꞌalaꞌ jantaj yalil chꞌen echbꞌal chi kꞌanle bꞌey snail jin calubꞌal.
14 Masanil ebꞌ tzꞌibꞌebꞌil sbꞌi tol ecꞌbꞌanxa 20 abꞌil skꞌinal,
jaꞌ ebꞌ oj akꞌon jun toolabꞌal tuꞌ ey jin.
15 Jaꞌ ebꞌ chi akꞌon jun toolabꞌal tuꞌ ey jin,
yu yiquisbꞌi ebꞌ yuxan chi yakꞌ ebꞌ,
man miman oj chi yakꞌ ebꞌ bꞌeom,
catuꞌ man pax txenne oj chi yakꞌ ebꞌ mebꞌa.
16 Cha chaꞌ chꞌen tumin tuꞌ oj yakꞌ ebꞌ ey jin yu stooloj scawil ebꞌ,
yutol jatuꞌ oj kꞌanbꞌalnele chꞌen bꞌey yul snail jin calubꞌal bꞌey chin chaꞌle jin bꞌa je yetoj.
Jaꞌton jun tuꞌ chi oc yu jex jin naꞌontej,
jain Jehová jin tiꞌ,
yutol jix je yakꞌ je toolabꞌal yu je cawil,
ẍi Dios.
Jun Chꞌen Palangana Tol Chꞌen Cꞌal Eloj
17 Jix yalon Dios tet Moisés jaxca tiꞌ:
18 Akꞌ waꞌxoj junoj chꞌen miman palangana tol bronce cꞌal eloj,
jacꞌalaꞌ tol bronce cꞌal pax jun sbꞌatxlubꞌal yalan.
Cha wakꞌon no yetoj jaꞌ.
Cha bꞌatxbꞌan ey snan xol jin calubꞌal bꞌey chin chaꞌle jin bꞌa je yetoj,
bꞌey chi akꞌle xaambꞌal.
19 Jaxa Aarón yetoj ebꞌ yuninal,
jatuꞌ oj yiꞌatej jaꞌ ebꞌ yet oj xꞌaon skꞌabꞌ cꞌal yajan ebꞌ.
20 Jaꞌ yet chi apni oc ebꞌ yul snail jin calubꞌal,
cꞌal yet chi yakꞌon tzꞌaꞌ yofrenda ebꞌ jin sattaj,
sowalil chi xꞌael yajan,
cꞌal skꞌabꞌ ebꞌ,
yet watxꞌ cꞌam chi cam ebꞌ.
21 Man comonoj,
oj cam ebꞌ ta tol chi xꞌael skꞌabꞌ ebꞌ yetoj yajan.
Jaꞌ jun tiꞌ ley chi yun can yibꞌan Aarón yetoj ebꞌ yicꞌaal,
yet oj bꞌey cꞌaltoj tiempo,
ẍi Dios.
Jun Aceite Olivo Chi Kꞌanbꞌalnele Yin Ebꞌ Chi Oc Can Yopiso Yu Jehová
22 Jix yalon pax Jehová tet Moisés jaxca tiꞌ:
23 Cha sicꞌ el jayebꞌoj teꞌ teꞌ tol caw sukꞌukꞌi yoc sabꞌ,
cha yambꞌa lacawebꞌoj libra scolal teꞌ mirra caw watxꞌ,
wajebꞌoj libra teꞌ canela,
wajebꞌoj libra teꞌ teꞌ laan yili jaxca waleꞌ yel xacꞌal watxꞌ,
24 yetoj pax lacawebꞌoj libra teꞌ casia.
Chi echele yetoj wan echbꞌal tol chi kꞌanle bꞌey jin calubꞌal.
Chi cal-le yetoj nanoj scan litro yaceiteal olivo.
25 Jaꞌ junoj yotaj chi waꞌnen perfume,
jaꞌ ojabꞌ chi waꞌneni,
watxꞌ ojabꞌ chi yun swaꞌnele yu junoj chi waꞌnen tuꞌ,
tol jaꞌ chi kꞌanbꞌalnele yet chi oc can junoj mactxequel tol wet chi yun can ocoj.
26 Chi bꞌonle oc aceite olivo tuꞌ yin snail bꞌey chin chaꞌle jin bꞌa je yetoj,
cꞌal yin teꞌ scaẍail yet jin wa kꞌane,
27 cꞌal yin teꞌ meẍa,
cꞌal yin smitxꞌkꞌabꞌil,
yin sbꞌatxbꞌanil tzejtebꞌal yetoj smitxꞌkꞌabꞌil,
cꞌal yin yet xaambꞌal bꞌey chi tzꞌaꞌ incienso,
28 yetoj yin bꞌey chi tzꞌaꞌ xaambꞌal yetoj smitxꞌkꞌabꞌil,
yetoj cꞌal yin jun chꞌen miman palangana yetoj cꞌal sbꞌatxbꞌanil yalan.
29 Jaxca tuꞌ chi yun ja sicꞌon can oc masanil wan tuꞌ,
yet watxꞌ wet chi yun can ocoj,
yuxan jaꞌ masanil tzetyetal chi oc tenna yin,
wet chi yun can ocoj.
30 Jaꞌ jun aceite olivo tuꞌ cha waoc yin Aarón,
yetoj cꞌal yin ebꞌ scꞌaal.
Queytuꞌ chi yun sicꞌcha can oc ebꞌ yin yakꞌomaloj xaambꞌal ey jin an.
31 Chi lawi tuꞌ,
cha walon yabꞌ ebꞌ ja wet conobꞌ Israel wan tiꞌ.
Jaꞌ yet oj bꞌey cꞌaltoj tiempo,
jaꞌ jun aceite olivo tuꞌ oj kꞌanle yin tzetyetal tol wet chi yun can ocoj.
32 Man comonoj chi bꞌonle oc yin junoj comon ánima,
man pax comonoj chi waꞌnele junojxa tujan aceite laan yetoj jun tuꞌ.
Jaꞌ jun tuꞌ,
wet chi yun can ocoj;
yuxan man comonoj che mitxꞌa.
33 Ta ey junoj mactxequel chi waꞌnen junojxa tujan aceite olivo jaxca jun tiꞌ,
catuꞌ chi yaon oc yin junoj comon ánima,
jaꞌ jun tuꞌ sowalil chi iꞌle can el je xol,
ẍi Dios.
Jaꞌ Jun Incienso
34 Jix yalon pax Jehová tet naj Moisés jaxca tiꞌ:
Cha yambꞌatej masanil wanxa tzetyetal tiꞌ,
laan cꞌal chi yun yechelei:
Skꞌolal teꞌ estacte,
skꞌolal teꞌ incienso tol sukꞌukꞌi yoc sabꞌ,
skꞌolal teꞌ gálbano yetoj sjoyal jun tujan noꞌ noꞌ chi yij uña ey yul jaꞌ Mar.
35 Jaꞌ yetoj wan tuꞌ cha waꞌne incienso,
watxꞌ chi yun scal-lei,
jaxca wal chi yun swaꞌxi yu junoj chi waꞌnen perfume,
yutol wet chi yun can ocoj.
36 Caw koocꞌ chi yun a jutxꞌon junoj tujan,
cha waon oc yin teꞌ scaẍail yet jin wa kꞌane,
bꞌey snail jin calubꞌal bꞌey chin chaꞌle jin bꞌa je yetoj.
Jaꞌ jun incienso tuꞌ miman ojabꞌ yeloc apnoj yul je sat.
37 Cꞌam ojabꞌ mactxequel chi swaꞌne yet jaxca jun incienso tuꞌ,
otajnewej eloj tol wet yeocoj,
miman ojabꞌ yeloc apnoj jun tuꞌ yul je sat.
38 Ta ey mactxequel chi swaꞌne yet,
yet chi yabꞌen yoc sabꞌ,
jaꞌ jun tuꞌ chi iꞌle el xol ebꞌ yet conobꞌ,
ẍi Dios.