6 Jix waꞌxi cꞌal pax jun smajil tol oro cꞌal eloj bꞌey chi akꞌle tan spenail,

jun metro yetoj laonebꞌ centímetro jix yun skꞌatil,

65 centímetro jix yun sat.

7 Ey caabꞌ yechel querubín tol chacꞌbꞌil yetoj martillo eyoc yibꞌan stiꞌlaj smajil tuꞌ.

8 Junne cꞌal jix jun smajil yetoj caabꞌ yechel querubín:

Junjun querubín eey bꞌey caabꞌ stiꞌlaj jun smajil tuꞌ.

9 Jaccombꞌa chi yunne.

Jaꞌ tituꞌ chi too tꞌanan bꞌey yibꞌan smajil bꞌey chi akꞌle tan spenail tuꞌ.

Jenantoj xicꞌ yibꞌan smajil teꞌ scaẍail yet swa kꞌane Dios,

jaxca tol yenel yeocoj.

10 Jix swaꞌne cꞌal pax jun meẍa naj Besalel.

Jaꞌ teꞌ acacia jix oc yin,

90 centímetro jix yun skꞌatil;

jaxa sat,

45 centímetro jix yunne;

jaxa steel,

65 centímetro jix yun aoj.

11 Oro cꞌal jix oc yin,

catuꞌ jix oc pax oro yin stiꞌlaj.

12 Jix waꞌnele pax a joyan yin stiꞌlaj bꞌey yibꞌan,

jujebꞌ centímetro jix yun aoj.

Jix oc cꞌal pax oro stiꞌlaj bꞌey yibꞌan tuꞌ.

13 Jix waꞌxi pax canebꞌ chꞌen slocxomal tol oro cꞌal eloj,

catuꞌ jix oc yin scanebꞌal xiquin bꞌey eyoc canebꞌ yajan,

14 junne chi can wan chꞌen slocxomal tuꞌ yetoj jun joyan a stiꞌlaj tuꞌ.

Jaꞌ tituꞌ chi oc sbꞌatxbꞌanil yet watxꞌ chi skeꞌ sbꞌatxle a jun meẍa tuꞌ.

15 Jaꞌ teꞌ sbꞌatxbꞌanil tuꞌ,

jaꞌton teꞌ acacia jix oc yin,

catuꞌ jix oc cꞌal pax chꞌen oro yin.

16 Jix swaꞌnen pax wan mitxꞌkꞌabꞌe tol oro xacꞌal eloj wan chi ey bꞌatxan yibꞌan meẍa tuꞌ;

jaꞌton chꞌen jix kꞌanbꞌalnele tiꞌ:

Chꞌen plato,

chꞌen mimej cuchara,

cꞌal ẍalu,

yetoj secꞌ,

jaꞌton chi kꞌanle bꞌey chi secle ey ofrenda yin jaꞌ chi yun yakꞌlei.

17 Jix swaꞌne pax jun sbꞌatxlubꞌal yet tzejtebꞌal naj Besalel,

tol oro cꞌal eloj,

chacꞌbꞌil yetoj martillo.

Junne cꞌal jix yute swaꞌnen ey bꞌey chi ey bꞌatxan steꞌal yetoj yechel xumac teꞌ tuꞌ.

18 Oxox skꞌabꞌ jix eltej bꞌey scaabꞌ paqꞌuil.

19 Jaꞌ yin junjun wan skꞌabꞌ tuꞌ,

jaꞌ tituꞌ eyoc oxebꞌ svasoal jaxca yili xumac teꞌ almendro junjun eyoc yin skꞌabꞌ tuꞌ.

20 Jaꞌ bꞌey yajantaj eytej tuꞌ,

eyoc canebꞌ svasoal jaxca yili xumac teꞌ almendro.

21 Jaꞌ bꞌey yalan,

bꞌey eeltej caabꞌcaabꞌ skꞌabꞌ tuꞌ,

jaꞌ tituꞌ eeltej junjun yechel xumac teꞌ.

22 Jaꞌ yin xumac teꞌ tuꞌ,

cꞌal skꞌabꞌ,

junne cꞌal yeoc yetoj sbꞌatxlubꞌal.

Jaꞌ jun tuꞌ,

oro cꞌal eloj chacꞌbꞌil yetoj martillo.

23 Catuꞌ jix waꞌxi pax jujebꞌ tzejtebꞌal tol oro cꞌal eloj,

yetoj chꞌen chꞌen chi letxon el staanil smechail,

cꞌal secꞌ bꞌey chi ale eyoj.

24 Jaꞌ yet jix waꞌxi jun sbꞌatxlubꞌ tzejtebꞌal tuꞌ,

yetoj cꞌal smitxꞌkꞌabꞌeal,

75 libra chꞌen oro jix oc yin.

25 Jix waꞌnele pax jun yet xaambꞌal yet incienso yu naj Besalel,

yetoj teꞌ acacia.

Laan cꞌal jix yun scanpaqꞌuil,

45 centímetro cꞌal eloj;

jaxa pax steel 90 centímetro jix yun aoj.

Jaxa pax yucꞌaꞌ bꞌey xiquinlaj,

junne cꞌal chemteꞌal jix yun yetoj jun yet xaambꞌal tuꞌ.

26 Jix lawi tuꞌ,

catuꞌ jix ale oc oro yin bꞌey yibꞌan,

cꞌal yin scanpaqꞌuil,

yetoj cꞌal yin yucꞌaꞌ,

catuꞌ jix oc pax oro yin stiꞌlaj.

27 Jaꞌ bꞌey yalan stiꞌlaj tuꞌ,

jaꞌ tituꞌ jix oc caabꞌcaabꞌ chꞌen oro yin slocxomaloj yin scaabꞌ paqꞌuil,

catuꞌ jix ecꞌtoj teꞌ sbꞌatxbꞌanil bꞌey yul chꞌen slocxomal tuꞌ,

yet chi skeꞌ sbꞌatxle ecꞌ teꞌ.

28 Jaꞌ teꞌ sbꞌatxbꞌanil jix ale oc tuꞌ,

jaꞌton teꞌ acacia jix oc cꞌal pax oro yin.

29 Jix swaꞌnen pax aceite olivo naj Besalel tol yet Jehová jix yun swaꞌnelei,

jaꞌton chi ale oc yin junoj chi oc can yetoj Dios,

jix swaꞌnen pax incienso tol caw sukꞌukꞌi yoc sabꞌ,

jaxca wal chi yun swaꞌnen junoj mactxequel yotaj chi swaꞌne perfume.