2 Jix awteletej naj Besalel yetoj cꞌal Aholiab yu naj Moisés,

yetoj cꞌal masanil ebꞌ naj tol ey sjelanil yu Jehová yin swaꞌnen yal cꞌal tzet mulnail,

jaꞌton ebꞌ chi el yin scꞌul scolwa yin jun mulnail tuꞌ.

3 Jaꞌ ebꞌ naj tuꞌ jix chaꞌon tet naj Moisés wan saꞌbꞌeal jix yiꞌtej ebꞌ conobꞌ Israel,

yet chi el yich mulnail yu waꞌxi scalubꞌal Jehová.

Junjun cꞌal cꞌu jacꞌalaꞌ cꞌal yiꞌontej saꞌbꞌeal ebꞌ Israel tuꞌ yin masanil scꞌul.

4 Jaxa jix yunne,

jaꞌ ebꞌ naj mulnawom tuꞌ,

jix sbꞌejcan smulnail ebꞌ naj,

catuꞌ jix too ebꞌ naj yalon tet naj Moisés:

5 Caw chi ecꞌbꞌan xacꞌaltoj yiꞌontej saꞌbꞌeal ebꞌ ánima,

manxa oj lawoj masanil tzet jix yiꞌtej ebꞌ tiꞌ yin jun mulnail jix yal Jehová tol chi waꞌxi,

ẍi ebꞌ naj.

6 Jaꞌ yet jix yabꞌen naj Moisés jaxca tuꞌ,

jix yalon xol ebꞌ ánima bꞌey caan ecꞌ ebꞌ tuꞌ,

tol cꞌamxa mactxequel chi yiꞌtej saꞌbꞌeal yu swaꞌxubꞌal scalubꞌal Jehová,

yuxan jix oc tucan yiꞌontej saꞌbꞌeal ebꞌ.

7 Yutol jix tzꞌajna smitxꞌkꞌabꞌil oj oc yin,

catuꞌ eyto smitxꞌkꞌabꞌil jix cancanoj.

8 Jaꞌ xol ebꞌ mulnawom tuꞌ,

ey ebꞌ caw ey snaꞌbꞌal yin swaꞌnen a scalubꞌal Jehová ebꞌ.

Jix waꞌne laonebꞌ an cortina ebꞌ yin an lino tol txꞌumbꞌil,

yetoj an kꞌejweinaj kꞌap,

cꞌal an púrpura,

cꞌal yetoj an cajin yili.

Jaꞌ yin wan tuꞌ jix stzꞌisoc yechel wan querubín ebꞌ.

9 Junjun cꞌal jenan tuꞌ,

ey nan yoxlajonebꞌ metro steel,

caabꞌ metro sat,

laan cꞌal jix yun yechel an masanil.

10 Joebꞌ jenan an jix tzꞌisle eyoj,

yin junxane jenan jix yunne.

Jacꞌalaꞌ queytuꞌ jix yun stzꞌisle ey joebꞌxa jenan an.

11 Jix lawi tuꞌ,

jix tzꞌisle pax oc scolkꞌabꞌil yetoj yaax txꞌal yin stiꞌ an bꞌabꞌel jenan tuꞌ yu smitxꞌbꞌaniloj.

Jacꞌalaꞌ queytuꞌ jix yun yoc pax yin stiꞌ junxa jenan an yet scaabꞌ tuꞌ.

12 Jaꞌ an bꞌabꞌel tuꞌ yetoj an yet scaabꞌ,

ey 50 scolkꞌabꞌil jix oc bꞌey junjun stiꞌ yet watxꞌ chi yun ẍaꞌlen ey sbꞌa an scaabꞌ paqꞌuil.

13 Jacꞌalaꞌ jix swaꞌnen pax 50 chꞌen slocxomal tol oro cꞌal eloj,

yet watxꞌ chi yun ẍaꞌlen ey sbꞌa an scaabꞌ paqꞌuil,

junxane jix yun can ey an yet jix ale octoj an yul snail scalubꞌal Jehová.

14 Jix swaꞌnen pax jusluqꞌuebꞌ jenan xil noꞌ chiw ebꞌ,

jaꞌton jun tuꞌ jix oc smajiloj yibꞌan scalubꞌal Jehová,

15 nan scanlajonebꞌ metro steel,

caabꞌ metro sat.

Laan cꞌal yechel masanil.

16 Jix stzꞌisle ey joebꞌ jenan yin junxane jenan jix yun can eyoj,

jaxa wajebꞌ xa xin,

jix stzꞌisle pax ey yin junxane jenan jix yunne.

17 Jix swaꞌnen pax oc 50 slocxomal yin jun pacꞌ stiꞌ jun bꞌabꞌel jenan tuꞌ ebꞌ.

Jix oc pax junxa 50 yin stiꞌ junxa yet scaabꞌ jenan.

18 Jix waꞌnele pax oc 50 slocxomal tol chꞌen bronce cꞌal eloj,

yet chi ẍaꞌlen ey sbꞌa caabꞌ jenan tuꞌ.

19 Jix swaꞌnen pax ebꞌ jun smajil chi oc yibꞌan scalubꞌal Jehová yetoj stzꞌuumal noꞌ meꞌ tol bꞌonbꞌil yetoj cajin,

yetoj cꞌal pax junxa tzꞌuum labꞌabꞌi xacꞌal jix oc smajiloj.

20 Jix lawi tuꞌ,

jix waꞌxi pax oc teꞌ chemteꞌ acacia yin scalubꞌal Jehová tol jichan jix yun swaꞌnen a ebꞌ.

21 Jaꞌ junjun teꞌ chemteꞌ tuꞌ,

nan sjoꞌ metro steel junjun teꞌ,

jaxa sat 65 centímetro,

22 catuꞌ jix cancan caabꞌcaabꞌ yucꞌaꞌ teꞌ yet chi ẍaꞌlen ey sbꞌa teꞌ yetoj sbꞌatxbꞌanil,

laan cꞌal jix yun can xol.

Laan cꞌal jix yun swaꞌxi teꞌ masanil.

23 Jix ale pax oc 20 teꞌ chemteꞌ bꞌey jun pacꞌ bꞌey yetcꞌulal sur,

24 catuꞌ jix waꞌxi 40 sbꞌatxlubꞌal.

Jaꞌ wan tuꞌ,

chꞌen plata cꞌal eloj.

Junjun chemteꞌ,

caabꞌcaabꞌ sbꞌatxlubꞌal yutol junjun cꞌal bꞌey chi ey bꞌatxan junjun yucꞌaꞌ tuꞌ.

25 Jacꞌalaꞌ quey pax tuꞌ jix yun jun pacꞌxa bꞌey scalubꞌal Jehová,

bꞌey yetcꞌulal norte,

yuxan 20 teꞌ chemteꞌ tuꞌ jix waꞌxi.

26 Jix swaꞌnen pax 40 sbꞌatxlubꞌal ebꞌ tol chꞌen plata cꞌal eloj,

yet watxꞌ caabꞌcaabꞌ sbꞌatxlubꞌal chi oc yalan junjun chemteꞌ.

27 Jaxa bꞌey jun pacꞌ yintaj scalubꞌal Jehová,

yetcꞌulal bꞌey chi too cꞌu,

ey wajebꞌ teꞌ chemteꞌ jix oc yin;

28 caabꞌto teꞌ jix oc yin xiquinlaj bꞌey yintaj tuꞌ.

29 Jaꞌ wan chemteꞌ tuꞌ,

nubꞌubꞌi jix yun bꞌey yichlaj,

masantaꞌcꞌal chi aapnoj bꞌey chi snubꞌle sbꞌa yetoj chꞌen slocxomal.

Queytuꞌ jix yun pax bꞌey junxa xiquin.

30 Waxajebꞌ chemteꞌ jix oc yin masanil,

yetoj wajlajonebꞌ sbꞌatxlubꞌal tol chꞌen plata cꞌal eloj,

catuꞌ caabꞌcaabꞌ cꞌal chi oc yalan junjun chemteꞌ.

31 Jix waꞌxi cꞌal pax oc joebꞌ teꞌ regla acacia jix oc yin jun pacꞌ scalubꞌal Jehová.

32 Joebꞌ pax regla jix oc yin teꞌ chemteꞌ bꞌey jun pacꞌxa,

catuꞌ jix oc pax joebꞌxa bꞌey jun pacꞌxa yetcꞌulal bꞌey chi too cꞌu.

33 Jaxa teꞌ regla chi oc snan yul,

jaꞌ bꞌey snan teꞌ chemteꞌ tuꞌ jix oqui,

junne cꞌal teꞌ chi oqui masantaꞌcꞌal bꞌey junjun xiquin.

34 Catuꞌ jix ale oc oro yin teꞌ chemteꞌ tuꞌ,

jix waꞌxi cꞌal pax slocxomal chꞌen oro yet chi ecꞌtoj cꞌatan teꞌ regla tuꞌ yul,

eyxa pax oc oro yin teꞌ regla tuꞌ.

35 Jix waꞌxi pax oc jun an cortina,

yetoj an kꞌejweinaj kꞌap,

an púrpura,

an cajin,

yetoj an lino tol chembꞌil;

catuꞌ jix stzꞌisle oc yechel wan querubín yin yu junoj jelan yin stzꞌiswom.

36 Catuꞌ jix ale oc slocxomal an cortina tuꞌ tol oro cꞌal eloj,

catuꞌ jix a locan yin canebꞌ oy,

jaꞌton teꞌ acacia eyoc oro yin,

ey pax oc yibꞌan canebꞌ sbꞌatxlubꞌal tol plata cꞌal eloj.

37 Jaꞌ bꞌey ẍumuc octoj yul jun kꞌap na tuꞌ,

jaꞌ tituꞌ jix oc cꞌal pax jun an cortina,

an kꞌejweinaj,

an púrpura,

cꞌal cajin,

yetoj an lino chembꞌil jix oc yin,

catuꞌ jix stzꞌisle cꞌal pax oc stzꞌibꞌil yu junoj jelan yin stzꞌislei.

38 Jix waꞌxi pax joebꞌ teꞌ oy yetoj joebꞌ chꞌen slocxomal tol oro cꞌal eloj.

Jix waꞌxi pax joebꞌ sbꞌatxlubꞌal tol bronce,

catuꞌ jix oc oro yinlaj wan teꞌ oy tuꞌ.