Jaꞌ Scalubꞌal Dios Chi Yij Pax Kꞌap Na
26
Jix yalon Jehová jaxca tiꞌ;
cha waꞌne laonebꞌoj an kꞌap chi oc bꞌey snail jin calubꞌal,
jaꞌton an cortina.
An lino tol txꞌumbꞌil chi oc yin,
yetoj an kꞌejweinaj,
an cajin,
yetoj an púrpura,
catuꞌ chi tzꞌisle oc yechel querubín yin an,
yu junoj mactxequel jelan stzꞌisoni.
2 Masanil an cortina tuꞌ,
laan cꞌal chi yun yechele an,
nan yoxlajonebꞌ metro chi yun steel,
caabꞌ metro chi yun sat.
3 Cha wakꞌon tzꞌisle ey joebꞌ an cortina tiꞌ yin junne chi yunne,
jacꞌalaꞌ queytuꞌ chi yun pax joebꞌxa an tuꞌ.
4 Cha waon oc spixil stiꞌlaj an,
jaꞌ an kꞌejweinaj txꞌal chi oc yin,
jaxca chi yun an bꞌabꞌel tuꞌ,
queytuꞌ chi yun pax junxa an tuꞌ.
5 Cha waoc 50 spixil stiꞌ junjun an,
jaxca chi yun yoc yet an bꞌabꞌel,
queytuꞌ chi yun yoc yet junxa jenan an tuꞌ,
yet watxꞌ chi yun ẍaꞌlen ey sbꞌa an scaabꞌil.
6 Catuꞌ cha waꞌnen pax oc junoj chꞌen slocxomal stiꞌ an tol oro cꞌal eloj,
yet watxꞌ chi yun ẍaꞌlen sbꞌa an scaabꞌ paqꞌuil,
junne jenan chi yun yey an bꞌey jin calubꞌal.
7 Cha wakꞌon pax chemle junoj 11 jenan xil noꞌ chiw yet chi ey yul jin calubꞌal tuꞌ.
8 Masanil wan cortina tuꞌ,
laan cꞌal chi yun yechel,
nan scanlajonebꞌ metro chi yun steel,
jaxa sat,
caabꞌ metro chi yunne.
9 Chi lawi tuꞌ,
catuꞌ cha wakꞌon tzꞌisle ey joebꞌoj an cortina tuꞌ,
junne jenan chi yunne,
wajebꞌ chi yun pax junxa jenan an.
Jaꞌ nanojxa jun yet swaj jenan tuꞌ,
jaꞌ tituꞌ chi eytej jenan bꞌey sattaj kꞌap na tuꞌ.
10 Chi lawi tuꞌ,
cha wakꞌon waꞌxoj oc junoj 50 spixil yin spacꞌul stiꞌlaj jun bꞌabꞌel jenan tuꞌ,
chi oc cꞌal pax junojxa 50 smitxꞌbꞌanil yin spacꞌul stiꞌ yin junxa an yet scaabꞌ jenan tuꞌ.
11 Cha wakꞌon pax waꞌxoj junoj 50 chꞌen slocxomal tol bronce cꞌal eloj,
yet watxꞌ chi skeꞌ smitxꞌle sbꞌa an yin scaabꞌil jenan,
yutol junxane jenan chi yun can eloj.
12 Yutol 11 jenan xil noꞌ chiw tuꞌ,
yuxan nan jenan chi ey can jenan yintaj,
jaxca yeoc bꞌey sattaj.
13 Jaxca tuꞌ,
oj yun smajcha ey jin calubꞌal yu wan cortina tuꞌ,
Oj ey jenan an junjun pacꞌ,
45 centímetro chi yun yey jenan an junjuntaj pacꞌ,
jaꞌton an chi majchen el stiꞌlaj an ey can yalan.
14 Chi waꞌxi pax ey stzꞌuumal noꞌ meꞌ chi bꞌonle yetoj cajin,
yet chi oc yibꞌan jun jenan xil noꞌ meꞌ tuꞌ;
yetoj junojxa tujan tzꞌuum caw labꞌabꞌi xacꞌal yet chi oc yibꞌan tuꞌ.
15 Cha wakꞌon pax waꞌxoj jayebꞌoj teꞌ chemteꞌ chi iꞌle el yin teꞌ acacia,
cha waon oc yin jin calubꞌal,
waan chi yun ja waon oc teꞌ.
16 Nan sjoꞌ metro chi yun steel junjun teꞌ chemteꞌ tuꞌ,
jaxa sat,
65 centímetro chi yunne.
17 Chi cancan caabꞌcaabꞌoj yucꞌaꞌ junjun teꞌ chemteꞌ tuꞌ,
yet watxꞌ chi yun ẍaꞌlen sbꞌa teꞌ.
Queytuꞌ chi yun masanil teꞌ chemteꞌ chi oc yin jin calubꞌal tuꞌ.
18 Jaꞌ yet oj waꞌnele a teꞌ tuꞌ,
20 teꞌ chi oc bꞌey yetcꞌulal sur.
19 Cha waon pax ey 40 chꞌen plata chi oc sbꞌatxlubꞌoj teꞌ 20 tuꞌ,
caabꞌcaabꞌ chi yun scancan yalan junjun teꞌ,
junjun cꞌal bꞌey junjun yucꞌaꞌ teꞌ.
20 Jaxca tuꞌ chi yun cꞌal pax bꞌey jun pacꞌxa,
chi yal yeloc apnoj jaꞌton bꞌey yetcꞌulal norte;
20 cꞌal pax teꞌ chemteꞌ tuꞌ chi ale ocoj.
21 Jacꞌalaꞌ chi oc 40 chꞌen plata yin sbꞌatxlubꞌoj,
caabꞌcaabꞌ chꞌen chi ey can yalan junjun teꞌ.
22 Jaxa bꞌey jun pacꞌxa yetcꞌulal bꞌey chi too cꞌu,
wajebꞌ teꞌ chemteꞌ tuꞌ chi waꞌxi ocoj.
23 Chi waꞌxi pax el caabꞌojxa teꞌ chi oc bꞌey xiquinlaj bꞌey jun pacꞌ.
24 Nubꞌubꞌi xacꞌal chi yun wan chemteꞌ tuꞌ masantaꞌcꞌal chi aapnoj bꞌey chi ẍaꞌle sbꞌa yu junoj chꞌen slocxomal,
queytuꞌ chi yun pax bꞌey junxa xiquin.
25 Jaꞌ yu caabꞌxa teꞌ tuꞌ,
yuxan waxajebꞌ teꞌ chemteꞌ tuꞌ yin masanil,
yetoj 16 sbꞌatxlubꞌal,
chi yal yeloc apnoj tol caabꞌcaabꞌ sbꞌatxlubꞌal junjun teꞌ.
26 Cha wakꞌon pax waꞌxoj joebꞌoj teꞌ patzabꞌ chi el yin teꞌ acacia,
chi oc yin teꞌ chemteꞌ bꞌey jun pacꞌoj jin calubꞌal.
27 Joebꞌ pax teꞌ oj oc yin teꞌ chemteꞌ bꞌey jun pacꞌxa,
joebꞌ teꞌ oj oc bꞌey jun pacꞌ yintaj,
jaꞌton yetcꞌulal bꞌey chi too cꞌu.
28 Jaꞌ teꞌ patzabꞌ chi oc tuꞌ,
jaꞌ bꞌey snan teꞌ chemteꞌ tuꞌ chi oqui,
junne cꞌal chi yun teꞌ,
masantaꞌcꞌal bꞌey junjun xiquin.
29 Chi lawi tuꞌ,
catuꞌ chi oc oro yinlaj teꞌ chemteꞌ tuꞌ,
chi oc cꞌal pax chꞌen slocxomal tol oro cꞌal eloj bꞌey chi ecꞌtoj teꞌ patzabꞌ tuꞌ.
Chi oc pax oro yinlaj teꞌ.
30 Jaꞌ yet chi lawi swaꞌxi masanil jin calubꞌal tuꞌ ja wu,
jaxca wal jix wute jin txꞌoxon yechel ey jaach bꞌey sjolom wonan tiꞌ.
31 Chi lawi tuꞌ,
cha wakꞌon waꞌxoj pax junoj an cortina tol kꞌejweinaj yoc xꞌalil,
an púrpura,
an cajin,
cꞌal yetoj an lino watxꞌ yili,
cha wakꞌon tzꞌisle oc yechel querubín yin an,
yu junoj jelan yin tzꞌiswom.
32 Chi lawi tuꞌ,
catuꞌ chi a locan an yetoj slocxomal tol oro cꞌal eloj,
cha locbꞌan a yin canebꞌ teꞌ oy tol acacia.
Jaꞌ teꞌ oy tuꞌ,
sowalil chi oc pax oro yinlaj teꞌ;
chi oc pax canebꞌ sbꞌatxlubꞌal tol plata cꞌal eloj.
33 Chi lawi tuꞌ,
catuꞌ chi a locan an cortina tuꞌ yalan yetcꞌulal bꞌey eyoc chꞌen slocxomal tol oro cꞌal el bꞌey yibꞌan tuꞌ.
Jaxa bꞌey yintaj octoj an cortina tuꞌ,
jaꞌ tituꞌ cha waoctoj teꞌ scaẍail yet jin wa kꞌane.
Jaxca cha wute an cortina tuꞌ chi oc smajiloj jun calubꞌal tol wet yei,
yetoj junxa jin calubꞌal tol Asanne Jin Ey Wet Jin Txꞌojli.
34 Chi lawi tuꞌ,
cha waon oc smajil teꞌ scaẍail yet jin wa kꞌane,
chi cancan teꞌ bꞌey jin calubꞌal tol Asanne Jin Ey Wet.
35 Cha waon pax ey teꞌ meẍa sattaj eltej an cortina tuꞌ,
jaꞌ tituꞌ cha waey bꞌey yetcꞌulal norte bꞌey jin calubꞌal tuꞌ;
jaxa pax bꞌey yetcꞌulal sur,
jaꞌ tituꞌ cha waey jun sbꞌatxlubꞌal tzejtebꞌal bꞌey sattaj teꞌ meẍa.
36 Jaxa bꞌey stiꞌ jin calubꞌal tuꞌ,
jaꞌ tituꞌ cha waꞌne oc junoj an cortina tol kꞌejweinaj yili xꞌalil,
an cajin,
an púrpura,
yetoj an lino caw watxꞌ yili,
watxꞌ chi yun stzꞌisle oc yelawil yu junoj jelan yin stzꞌislei.
37 Chi waꞌxi pax joebꞌoj teꞌ oy tol acacia cꞌal eloj,
catuꞌ chi oc oro yin.
Jaꞌ yin teꞌ oj a locan an cortina tuꞌ,
chi oc cꞌal pax chꞌen slocxomal yin tol oro cꞌal eloj.
Chi waꞌxi pax ey joebꞌoj sbꞌatxlubꞌal bꞌey oj ey teꞌ oy tuꞌ,
tol jaꞌ chꞌen bronce chi oc yin.