2 Jaꞌ bꞌabꞌel cꞌu yet bꞌabꞌel xꞌaaw,

jaꞌ yet tuꞌ cha waꞌne a snail jin calubꞌal,

bꞌey chin chaꞌle jin bꞌa je yetoj.

3 Chi lawi tuꞌ,

catuꞌ cha waon octoj teꞌ caẍa tuꞌ tituꞌ,

bꞌey eeytoj jin chejbꞌanil,

cha waon oc an cortina yeneloj.

4 Cha waon pax octoj teꞌ meẍa tuꞌ yul,

yetoj sbꞌatxlubꞌal tzejtebꞌal,

watxꞌ chi yun ja waꞌnen ey jun meẍa tuꞌ,

catuꞌ cha waon oc skꞌakꞌal jun tzejtebꞌal tuꞌ.

5 Cha waon octoj jun yet xaambꞌal tuꞌ bꞌey sattaj scaẍail yet jin chejbꞌanil tuꞌ,

cha waon octoj jun yet xaambꞌal tol oro cꞌal eloj bꞌey chi tzꞌaꞌ teꞌ incienso tol sukꞌukꞌi yoc sabꞌ,

catuꞌ cha locbꞌan a an cortina bꞌey stiꞌ jun kꞌap na waꞌnebꞌil aoj.

6 Catuꞌ cha waꞌne pax ey jun sneetal bꞌey chi tzꞌaꞌ xaambꞌal bꞌey sattaj octoj stiꞌ jun kꞌap na waꞌnebꞌil a bꞌey chin chaꞌle jin bꞌa je yetoj.

7 Catuꞌ cha waon ey jun chꞌen miman palangana snan xol jun na tuꞌ yetoj jun yet xaambꞌal tuꞌ,

cha wakꞌon noel yetoj jaꞌ.

8 Chi lawi tuꞌ xin,

cha waꞌne oc an cortina smajiloj bꞌey sattaj eltoj tuꞌ,

catuꞌ chi a locan an cortina bꞌey sattaj eltoj yamakꞌil tuꞌ.

9 Chi lawi tuꞌ,

cha wiꞌontej jun aceite olivo chi kꞌanle yet chi sicꞌle el junoj mactxequel chi oc can wetoj;

catuꞌ cha secon ey yibꞌan yet jin calubꞌal,

cꞌal yin masanil tzetyetal eyoctoj yul.

Queytuꞌ chi yun yoc can yin yopiso masanil mitxꞌkꞌabꞌe,

yet watxꞌ wet chi yun can ocoj.

10 Cha secon pax ey aceite olivo tuꞌ yibꞌan jun yet xaambꞌal bꞌey chi akꞌle tzꞌaꞌ xaambꞌal,

yetoj cꞌal masanil smitxꞌkꞌabꞌil.

Jaxca tuꞌ chi yun yoc can yin yopiso,

yuxan jaꞌ jun yet xaambꞌal tuꞌ wet chi yun canoj.

11 Cha secon pax ey aceite olivo tuꞌ yibꞌan jun chꞌen miman palangana yetoj cꞌal sbꞌatxlubꞌal yet yalan;

wet cꞌal chi yun can ocoj.

12 Chi lawi tuꞌ,

cha wiꞌontoj naj Aarón,

yetoj ebꞌ scꞌaal bꞌey stiꞌ jun kꞌap na waꞌnebꞌil a bꞌey chi cu chaꞌle cu bꞌa,

catuꞌ cha chejon aẍnoj ebꞌ tituꞌ.

13 Chi lawi tuꞌ,

chi yaon oc an spichil Aarón chi skꞌan yin yopiso.

Catuꞌ cha waon oc aceite olivo yin yet chi txeclo eloj tol chi oc can yopiso naj yin yakꞌomal xaambꞌal ey jin an.

14 Chi jul pax ebꞌ scꞌaal tuꞌ ja cawilal,

cha waon oc spichil ebꞌ chi skꞌan yin yopiso.

15 Cha waon pax oc aceite olivo yin ebꞌ,

jaxca jix ja wute smam ebꞌ,

yet chi oc can ebꞌ yin yakꞌomal xaambꞌal ey jin an.

Jaꞌ yu chi ale oc jun aceite olivo tuꞌ yin ebꞌ,

queytuꞌ chi yun yoc can jun opiso tuꞌ yul skꞌabꞌ ebꞌ,

catuꞌ oj bꞌey cꞌaltoj yin yicꞌaal ebꞌ,

ẍi Dios.

16 Queytuꞌ jix yun swaꞌnen naj Moisés,

jaxca jix yun yalon Jehová.

17 Jaꞌ yet bꞌabꞌel cꞌu yet scaabꞌ abꞌil yiꞌle eltej ebꞌ bꞌey Egipto,

yet sbꞌabꞌel cꞌu yet sbꞌabꞌel xꞌaaw,

jaꞌton yet tuꞌ jix waꞌnele a scalubꞌal Jehová.

18 Jix yalon naj Moisés tol chi waꞌxi a scalubꞌal Jehová yetoj sbꞌatxlubꞌal yet yalan,

jix ale oc yoyal yetoj spatzabꞌil,

catuꞌ jix bꞌatxle a yetoj sbꞌatxlubꞌal.

19 Catuꞌ jix jenbꞌaletoj jun kꞌap yibꞌan scalubꞌal Jehová,

jix ale atoj wanxa yibꞌan jun na tuꞌ,

jaxca jix yun yalon Jehová tet naj Moisés.

20 Jix lawi tuꞌ xin,

jix yaon eytoj caabꞌ jenan chꞌen chꞌen naj Moisés yul teꞌ caẍa tuꞌ,

jaꞌton chꞌen bꞌey tzꞌibꞌebꞌil oc laonebꞌ ẍejbꞌanil Dios,

catuꞌ jix ale oc sbꞌatxlubꞌal teꞌ caẍa tuꞌ,

jix ale pax oc smajil teꞌ yu naj,

jaꞌton bꞌey chi akꞌle tan spenail.

21 Jix lawi tuꞌ,

jix iꞌletoj teꞌ yul scalubꞌal Jehová,

catuꞌ jix ale oc an cortina bꞌey snan yul scalubꞌal Jehová tuꞌ,

yet watxꞌ chi oc smajiloj teꞌ caẍa tuꞌ,

jaxca jix yun yalon Dios.

22 Jix ale pax octoj teꞌ meẍa tuꞌ yul jun kꞌap na waꞌnebꞌil a bꞌey chi cu chaꞌle cu bꞌa yetoj Dios,

bꞌey yetcꞌulal norte.

23 Jaꞌ yibꞌan jun meẍa tuꞌ jix waꞌxi ey ixim pan chi akꞌle sattaj Dios,

jaxca jix yun yaloni.

24 Catuꞌ jix ale pax octoj chꞌen sbꞌatxlubꞌal tzejtebꞌal sattaj jun meẍa tuꞌ,

bꞌey yul jun kꞌap na waꞌnebꞌil a bꞌey chi ẍaꞌle sbꞌa ebꞌ yetoj Dios,

bꞌey yetcꞌulal sur,

25 catuꞌ jix oc skꞌakꞌal jun tzejtebꞌal tuꞌ bꞌey eyecꞌ Dios jaxca jix yun yaloni.

26 Jix ale octoj jun neet tol oro cꞌal eloj bꞌey chi tzꞌaꞌ teꞌ incienso sukꞌukꞌi yoc sabꞌ sattaj eltej an cortina tuꞌ.

27 Jix nusle stzꞌaꞌ incienso sukꞌukꞌi sabꞌ yu naj Moisés yibꞌan jun yet xaambꞌal tuꞌ,

jaxca jix yun yalon Dios tet naj.

28 Jix lawi tuꞌ jix ale oc an cortina bꞌey smajil stiꞌ bꞌey chi octoj ebꞌ yul scalubꞌal Jehová tuꞌ.

29 Jix ale ey junxa yet xaambꞌal sattaj eltoj stiꞌ jun na tuꞌ,

bꞌey chi akꞌle tzꞌaꞌ xaambꞌal,

bꞌey chi octoj ebꞌ yul jun na bꞌey chi ẍaꞌle sbꞌa ebꞌ yetoj Dios.

Jix lawi tuꞌ xin,

jix yakꞌon tzꞌaꞌ noꞌ xaambꞌal naj Moisés yetoj ixim jarina jaxca jix yun yalon Dios tet naj.

30 Jix ale octoj chꞌen miman palangana bꞌey snan xol jun na yetoj jun yet xaambꞌal tuꞌ;

jix akꞌle no yetoj jaꞌ bꞌey chi aẍni ebꞌ yakꞌomal xaambꞌal.

31 Jaꞌ yul jun neet tuꞌ chi yiꞌatej jaꞌ naj Moisés yet chi xꞌaon el skꞌabꞌ cꞌal yajan yetoj naj Aarón yetoj ebꞌ scꞌaal,

32 yet chi octoj ebꞌ yul jun kꞌap na tuꞌ,

cꞌal yet chi apni oc ebꞌ bꞌey jun yet xaambꞌal tuꞌ,

sowalil chi aẍni ebꞌ,

jaxca jix yun yalon Jehová tet naj Moisés.

33 Yin xa slawubꞌal,

jix waꞌnele oc jun yet sattaj stiꞌ scalubꞌal Jehová yu naj Moisés,

bꞌey chi eecꞌ Dios cꞌal bꞌey jun yet xaambꞌal tuꞌ.

Jix lawi tuꞌ,

jix yaon oc an kꞌap smajiloj bꞌey chi octoj ebꞌ bꞌey sattaj jun na tuꞌ.

Queyton tuꞌ jix yun swaꞌxi masanil tzet jix al-le tet Moisés yu Dios.

34 Jaꞌ yet jix lawi swaꞌxi masanil,

jix eyol jun asun yibꞌan jun kꞌap na bꞌey chi ẍaꞌle sbꞌa Dios yetoj ebꞌ ánima,

pilan jix majcha el jun na tuꞌ yu masanil,

yinlaj yetoj cꞌal yul.

35 Yu jun tuꞌ,

cꞌamxa chi skeꞌ yoctoj naj Moisés yul jun na tuꞌ,

yutol caw wal nonaj el yu jun asun tuꞌ yu tzejejial Dios.

36 Jaꞌ yet chi a leeoj jun asun yibꞌan jun na bꞌey eyecꞌ Dios tuꞌ,

catuꞌ chi yiꞌon a skꞌap na ebꞌ Israel tuꞌ,

catuꞌ chi bꞌey cꞌal stoo ebꞌ sattaj.

37 Ta cꞌam chi a leeoj jun asun tuꞌ,

cꞌam chi yiꞌa skꞌap na ebꞌ tuꞌ;

chi tocꞌal yechbꞌane ebꞌ yel jun asun tuꞌ,

catuꞌ chi too ebꞌ.

38 Jaꞌ yet eyoc ebꞌ Israel tuꞌ yul bꞌe,

jaꞌ jun asun tuꞌ chi ijbꞌan ebꞌ yet cꞌualil,

jaxa yet akꞌbꞌalil xin,

eyoc skꞌakꞌal.