2 Al tet ebꞌ ja wet conobꞌ Israel,

tol chi yaoc kꞌin ebꞌ yet chi snaꞌontej ebꞌ yet jix jajcha eltej ebꞌ bꞌey Egipto,

jaxca cꞌaltaꞌ scꞌual tol txequel ye canoj,

3 chi yal yeloc apnoj,

jaꞌton yet 14 yoc jun xꞌaaw yet yeycꞌualil,

yet watxꞌ chi sjije yunen masanil ebꞌ tzet jix wal canoj,

ẍi Dios.

4 Jix lawi tuꞌ xin,

jix yalon naj Moisés tet ebꞌ yet Israelal tol chi yaoc kꞌin ebꞌ,

yet chi snaꞌontej ebꞌ yet jix jajcha eltej ebꞌ bꞌey txꞌotxꞌ Egipto.

5 Jaꞌ ebꞌ ánima tuꞌ,

jix yaoc jun kꞌin ebꞌ yet yeycꞌualil yet 14 yeoc jun xꞌaaw tuꞌ,

bꞌey txꞌotxꞌ cusiltaj txꞌotxꞌ chi yij sbꞌi Sinaí,

jaxca jix yun yalon Jehová tet naj Moisés.

6 Jaꞌ xol ebꞌ tuꞌ,

ey wan ebꞌ winaj tol man sajbꞌanebꞌiloj yeocoj,

yutol jix smitxꞌ junoj camom ebꞌ;

yuxan jix snaꞌ ebꞌ tol ma skeꞌ yaon oc jun kꞌin ebꞌ yet jun cꞌual tuꞌ yaloni.

Yuxan jix too ebꞌ scꞌatan naj Moisés cꞌal scꞌatan Aarón yet tuꞌ.

7 Jix yalon ebꞌ tet naj Moisés jaxca tiꞌ:

—Jaon tiꞌ jix cu mitxꞌ jun camom jon,

yuxan man sajbꞌanebꞌiloj keoc jaxca yalon chejbꞌanile.

¿Tumi wal man oj chaꞌle kakꞌ cu ofrenda tet Jehová yet jun cꞌual tiꞌ yetoj masanil ebꞌ ket conobꞌ tiꞌ jon?

ẍi ebꞌ.

8 Catuꞌ jix takꞌwi naj Moisés tet ebꞌ jaxca tiꞌ:

—Echbꞌanewej,

oj wabꞌ tzet ẍi Jehová je yu jaex tiꞌ,

ẍi naj Moisés tuꞌ.

9 Catuꞌ jix yalon Jehová tet naj Moisés jaxca tiꞌ:

Al wan tiꞌ tet ebꞌ ja wet Israelal.

10 Je masanil jaex tiꞌ yetoj cꞌal ebꞌ je yicꞌaal,

sowalil che yaoc kꞌin yet che naꞌontej yet jix jex jajcha eltej bꞌey txꞌotxꞌ Egipto,

yu je yiꞌon a can jin bꞌi jain Jehová jin tiꞌ.

Jaꞌ mactxequel man sajbꞌanebꞌiloj yeoc tinaniꞌ yutol jix smitxꞌ junoj camom,

ma ebꞌ eytoj naat yakꞌ junoj ẍejbꞌanil,

11 txꞌojxa chi yun yaon oc jun kꞌin ebꞌ tuꞌ yet 14 yoc yet scaabꞌ xꞌaaw yet yeycꞌualil.

Sowalil chi ẍiꞌ an kꞌakꞌ ita ebꞌ cꞌal noꞌ achꞌe meꞌ yetoj cꞌal ixim pan tol cꞌam yich eeyoj.

12 Cꞌam ojabꞌ niꞌojxa noꞌ chiꞌbꞌe tuꞌ chi can yu ebꞌ yet junxa cꞌu,

cꞌam ojabꞌ chi smakꞌ poꞌo sbꞌajil noꞌ ebꞌ,

jaxca jix yun waloni,

queytuꞌ chi yun je naꞌontej jun kꞌin tuꞌ.

13 Ta ey pax mactxequel cꞌam chi yaoc jun kꞌin yet chi snaꞌontej ebꞌ yet jix jajcha can eltej ebꞌ tuꞌ,

catuꞌ ta saj yeoc ebꞌ,

cꞌam cꞌal bꞌey eytoj ebꞌ yin junoj ẍejbꞌanil,

jaꞌ jun tuꞌ sowalil chi qꞌueyle el xol yet conobꞌ tuꞌ,

yutol ma yakꞌ yofrenda ey jin yet jun cꞌual tol txequel ye can oc tuꞌ.

Jacꞌal oc jun mactxequel tuꞌ chi yiꞌtej camich yibꞌan.

14 Ta ey ebꞌ txꞌoj conobꞌal caan ecꞌ je xol,

chi yoche chi yaoc jun kꞌin tuꞌ je yetoj yu je yiꞌon a can jin bꞌi,

sowalil chi sjije ebꞌ jaxca sleyalil jix wal can ey jex.

Jaxca wan chejbꞌanile chi wakꞌ je yun tuꞌ,

quey ojabꞌ tuꞌ chi yun sjijen pax ebꞌ txꞌoj conobꞌal caan ecꞌ je xol,

ẍi Dios.

15 Jaꞌ yet jun cꞌual yet jix swaꞌxi a snail scalubꞌal Jehová tuꞌ,

chi yal yeloc apnoj jaꞌton jun snail bꞌey yakꞌnaj can stiꞌ Dios,

caw jix majcha el yibꞌan yu jun miman bꞌocꞌan asun.

Jaꞌ yet jix too cꞌu,

laan xa yili jaxca xaj kꞌakꞌ,

masantaꞌcꞌal yet jix sajbꞌi a yet junxa cꞌu.

16 Quey cꞌal tuꞌ jix yun cꞌal masanil tiempo.

Ey cꞌal oc jun asun tuꞌ yibꞌan jun na tuꞌ yet chi ecꞌ cꞌu,

jaxa yet akꞌbꞌalil xin,

jaxca tol eyoc skꞌakꞌal jun asun tuꞌ.

17 Jaꞌ yet chi el jun asun tuꞌ yibꞌan jun na tuꞌ,

catuꞌ jix bꞌey stoo ebꞌ Israel sattaj.

Jaꞌ bꞌey jix oc pax bꞌocꞌan jun asun tuꞌ,

jaꞌ tituꞌ jix swaꞌne pax a jun kꞌap na ebꞌ.

18 Jaꞌ Jehová chi iꞌon bꞌey ebꞌ Israel yet chi bꞌey stoo ebꞌ sattaj,

ma tol chi oc tucan ebꞌ.

Jaꞌ tituꞌ chi cancan ebꞌ ta chi oc tucan jun asun tuꞌ yibꞌan scalubꞌal Jehová.

19 Ta ecꞌal cꞌual chi oc tucan jun asun tuꞌ,

ecꞌal cꞌual chi oc pax tucan ebꞌ Israel tuꞌ.

20 Ta tol jayebꞌne cꞌu chi cancan jun asun tuꞌ xin,

jayebꞌne pax cꞌu chi oc tucan ebꞌ,

chi lawi tuꞌ chi bꞌey stoo ebꞌ sattaj,

jatacꞌalaꞌ tzet chi yun yiꞌle bꞌey ebꞌ yu Dios.

21 Ey bꞌey junne akꞌbꞌal chi cancan jun asun tuꞌ,

jaxa yet skꞌinibꞌalil chi bꞌey stoo ebꞌ.

Ta jaꞌ yet cꞌualil ma yet akꞌbꞌalil chi too jun asun tuꞌ,

chi bꞌey stoo cꞌal pax ebꞌ.

22 Ta tol chi oc tucan jun asun yibꞌan scalubꞌal Jehová tuꞌ yin caabꞌoj cꞌual,

ma junoj xꞌaaw,

ma junoj abꞌil,

jacꞌal tituꞌ chi can cꞌal can ebꞌ Israel tuꞌ,

cꞌam chi too ebꞌ.

Ta tol chi too jun asun tuꞌ xin,

catuꞌ chi too cꞌal pax ebꞌ.

23 Masantaꞌcꞌal jaꞌ Jehová chi aloni,

catuꞌ chi oc tucan ebꞌ;

jaꞌ Naj chi aloni catuꞌ chi bꞌey stoo ebꞌ.

Jix sjije cꞌal ebꞌ tzet jix yal Jehová,

jatacꞌalaꞌ tzet jix yun yalon tet naj Moisés.