5 Jix yalon Jehová tet naj Moisés jaxca tiꞌ:

6 Poꞌoel masanil ebꞌ Levita xol masanil ebꞌ ja wet Israelal tiꞌ,

chi lawi tuꞌ,

chi sajbꞌanen cꞌal sbꞌa ebꞌ.

7 Jaꞌ xolilal tzet oj yun ja sajbꞌanen el ebꞌ:

Tol cha tzictoj jaꞌ jaꞌ yibꞌan ebꞌ,

catuꞌ chi tzujle el xil masanil smimanil ebꞌ.

Catuꞌ chi xꞌaon el spichil ebꞌ,

queytuꞌ chi yun sajbꞌican el ebꞌ.

8 Chi lawi tuꞌ xin,

cha wiꞌontej junoj noꞌ achꞌe wacax,

yetoj junoj echbꞌal ixim jarina caw watxꞌ,

calbꞌil yetoj aceite olivo,

catuꞌ chi akꞌle yin ofrendail yin ixim tiriw.

Chi akꞌle cꞌal pax junojxa noꞌ achꞌe wacax yin xaambꞌaloj yet spenail.

9 Cha walon tet ebꞌ Levita tuꞌ tol chi jul masanil ebꞌ bꞌey scawilal jun Kꞌap Na bꞌey chin chaꞌle jin bꞌa je yetoj,

catuꞌ cha yambꞌa oc masanil ebꞌ ja wet Israelal.

10 Cha walon tet ebꞌ Levita,

tol chi jul ebꞌ jin sattaj jain Jehová jin tiꞌ;

jaꞌ masanil ebꞌ yaaw yeoc xol junjun icꞌaaleal ebꞌ conobꞌ,

chi yaoc skꞌabꞌ ebꞌ yibꞌan sjolom ebꞌ.

11 Jaꞌ Aarón chi aon oc ebꞌ Levita jin sattaj,

yu yofrendaoj ebꞌ je yet Israelal tuꞌ.

Queytuꞌ oj yun yoc can ebꞌ Levita yin jin yakꞌon servil ebꞌ an.

12 Chi lawi tuꞌ xin,

chi yaon oc skꞌabꞌ ebꞌ Levita yibꞌan sjolom cacꞌon noꞌ achꞌe wacax tuꞌ.

Jun noꞌ chi akꞌle yin xaambꞌal yu yakꞌle tan spenail,

jal junxa noꞌ xin,

chi akꞌle tzꞌaꞌ noꞌ yin xaambꞌal ey jin;

queytuꞌ chi yun stancan el spenail ebꞌ Levita tuꞌ.

13 Chi lawi tuꞌ xin,

cha waon oc ebꞌ Levita tuꞌ sattaj Aarón yetoj cꞌal sattaj ebꞌ scꞌaal,

yet chi oc can ebꞌ yin yopiso.

14 Jaxca tuꞌ oj yun ja poꞌon can el ebꞌ Levita xol ebꞌ je yet Israelal,

yet chi oc can ebꞌ wetoj.

15 Jaꞌ yet chi lawi sajbꞌanele el ebꞌ jaxca yalon chejbꞌanile tuꞌ,

yetoj cꞌal yet xax akꞌle can ebꞌ ey jin an,

chi xa skeꞌ sjul ebꞌ mulna bꞌey jun Kꞌap Na bꞌey chin chaꞌle jin bꞌa je yetoj.

16 Jaꞌton ebꞌ tuꞌ,

wet chi yun can oc ebꞌ yin junelne xol ebꞌ je yet Israelal tiꞌ.

Jaꞌton ebꞌ tiꞌ chin chaꞌ ebꞌ sqꞌuexeloj masanil ebꞌ je bꞌabꞌel unin.

17 Yutol wet yeoc masanil ebꞌ bꞌabꞌel swinaj unin ebꞌ Israel tiꞌ;

quey pax tuꞌ noꞌ bꞌabꞌel yuneꞌ sjobꞌbꞌeal noꞌ ebꞌ.

Yutol jaꞌ yet jix wakꞌon cam masanil sbꞌabꞌel unin ebꞌ a Egipto,

jaꞌ yet tuꞌ jix jin colcan ecꞌ masanil ebꞌ sbꞌabꞌel winaj unin ebꞌ je yet conobꞌ Israel tiꞌ,

yet chi oc can ebꞌ wetoj.

18 Yuxan jaꞌ ebꞌ Levita tiꞌ chi can ebꞌ sqꞌuexeloj ebꞌ bꞌabꞌel unin tuꞌ.

19 Jain jix jin sicꞌ can eltej ebꞌ Levita tuꞌ je xol jaex Israel jex tiꞌ,

catuꞌ chi waon can oc ebꞌ yul skꞌabꞌ Aarón cꞌal tet ebꞌ scꞌaal,

yet watxꞌ jaꞌ ebꞌ chin akꞌon servil je qꞌuexeloj bꞌey jun Kꞌap Na bꞌey chin chaꞌle jin bꞌa je yetoj,

yet chi wakꞌon lawoj je penail je yibꞌan.

Jaxa ebꞌ conobꞌ,

cꞌam chi skeꞌ sjul ebꞌ scawilal jin calubꞌal,

yet watxꞌ cꞌam tzet chi iꞌon ebꞌ,

ẍi Dios.

20 Jaꞌ naj Moisés cꞌal naj Aarón,

yetoj masanil ebꞌ conobꞌ Israel,

jix sjije ebꞌ tzet jix yal Jehová tet Moisés yu ebꞌ Levita tuꞌ.

21 Jaꞌ ebꞌ Levita tuꞌ,

jix aẍni ebꞌ cꞌal xꞌaon el spichil ebꞌ,

jaxa naj Aarón jix aon oc ebꞌ sattaj Jehová jaxca yin ofrendail,

jix yakꞌon cꞌal pax xaambꞌal yet chi tancan el spenail ebꞌ.

22 Jaꞌ yet jix lawi masanil wan tuꞌ,

jix el yich smulna ebꞌ Levita tuꞌ bꞌey jun Kꞌap Na,

jaxa naj Aarón yetoj scꞌaal,

jaꞌ ebꞌ jix ijbꞌan ebꞌ yin mulnail tuꞌ.

Jaxca wal jix yun yalon Jehová tet naj Moisés,

queytuꞌ jix yun yoc ebꞌ Levita tuꞌ yin xolilal yu ebꞌ.

23 Jix yalon pax Jehová tet naj Moisés jaxca tiꞌ:

24 Jaꞌ ebꞌ Levita chi el yich yakꞌwi servil ebꞌ bꞌey jun Kꞌap Na bꞌey chin chaꞌle jin bꞌa je yetoj,

yet eyxa 25 abꞌil skꞌinal ebꞌ.

25 Jaxa yet chi lawi ebꞌ yin 50 abꞌil skꞌinal,

catuꞌ chi el ebꞌ yin yopiso junelne.

26 Jaꞌ yet chi aapnoj skꞌinal ebꞌ jaxca tuꞌ,

colwal xacꞌal chi yun ebꞌ yetoj ebꞌ chi mulna bꞌey jun na bꞌey chin chaꞌle jin bꞌa je yetoj,

cꞌamxa cꞌal chi mulna ebꞌ yin smulnail jaxca cꞌaltaꞌ chi yun ebꞌ.

Queytuꞌ cha wute ja waon oc ebꞌ Levita yin smulnail,

ẍi Jehová.