4 Jix lawi tuꞌ xin,

jix yalon pax Jehová tet naj Moisés jaxca tiꞌ:

5 Chaꞌwej wan carreta tuꞌ yetoj cꞌal wan noꞌ icham wacax tuꞌ tet ebꞌ,

catuꞌ che yakꞌon tet ebꞌ Levita yet chi oc yopiso yu ebꞌ yin smulnail bꞌey jun kꞌap na bꞌey chin chaꞌle jin bꞌa je yetoj,

jatacꞌalaꞌ tzet mulnail chi yun junjun ebꞌ,

ẍi Dios.

6 Catuꞌ jix ẍaꞌon ecꞌ wan carreta yetoj noꞌ icham wacax tuꞌ naj Moisés,

catuꞌ jix spoꞌon ecꞌ naj xol ebꞌ Levita.

7 Jaꞌ tet ebꞌ yicꞌaal Guersón jix yakꞌ caabꞌ carreta yetoj cancꞌon noꞌ icham wacax,

yutol jaꞌ chi scan ebꞌ yin smulnail.

8 Jaxa tet ebꞌ yicꞌaal Merarí jix akꞌle canebꞌ carreta yetoj waxajcꞌon noꞌ icham wacax,

yutol jaꞌ chi scꞌan ebꞌ yin smulnail,

bꞌey chi akꞌle yun ebꞌ yu Itamar,

naj scꞌaal Aarón.

9 Jaxa pax tet ebꞌ yicꞌaal naj Quehat,

cꞌam carreta cꞌal noꞌ icham wacax jix akꞌle tet ebꞌ,

yutol jaꞌ ebꞌ chi sjolomxicꞌnetoj smitxꞌkꞌabꞌeal yet snail scalubꞌal Jehová.

10 Jaꞌ yet jix ale oc yopiso jun yet xaambꞌal tuꞌ,

jix yiꞌtoj yofrenda ebꞌ yaaw yeoc yin junjun tujan icꞌaaleal bꞌey sattaj jun yet xaambꞌal tuꞌ.

11 Jix yalon Jehová tet naj Moisés jaxca tiꞌ:

Jaꞌ yin junjun cꞌu,

txꞌoj txꞌoj ojabꞌ cꞌal ebꞌ yaaw yeoc yin junjun icꞌaaleal tiꞌ chi yiꞌtoj yofrenda yu yoc can yopiso jun yet xaambꞌal tuꞌ,

ẍi Dios.

12-83 Jaꞌ yet sbꞌabꞌel cꞌual jix yiꞌtoj yofrenda naj Nahasón,

scꞌaal Aminadab,

yaaw yeoc xol ebꞌ yicꞌaal Judá.

Jaxa yet scaabꞌ cꞌu,

jix yiꞌtoj yofrenda Natanael,

scꞌaal Suar,

yaaw yeoc xol ebꞌ yicꞌaal Isacar.

Jaxa yet yox cꞌual jix yiꞌtoj yofrenda Eliab,

scꞌaal Edón,

yaaw yeoc xol ebꞌ yicꞌaal Zabulón.

Jaxa yet scan cꞌual jix yiꞌtoj yofrenda Elisur,

scꞌaal Sedeúr,

yaaw yeoc xol ebꞌ yicꞌaal Rubén.

Jaxa yet sjoꞌ cꞌual jix yiꞌtoj yofrenda Selumiel,

scꞌaal Surisadai,

yaaw yeoc xol ebꞌ yicꞌaal Simeón.

Jaxa yet swaj cꞌual jix yiꞌtoj yofrenda Eliasaf,

scꞌaal Deuel,

yaaw yeoc xol ebꞌ yicꞌaal Gad.

Jaxa yet sjuj cꞌual jix yiꞌtoj yofrenda Elisamá,

scꞌaal Amihud,

yaaw yeoc xol ebꞌ yicꞌaal Efraín.

Jaxa yet swaxajebꞌ cꞌual jix yiꞌtoj yofrenda Gamaliel,

scꞌaal Pedasur,

yaaw yeoc xol ebꞌ yicꞌaal Manasés.

Jaxa yet sbꞌalonebꞌ cꞌual jix yiꞌtoj yofrenda Abidán,

scꞌaal Gedeoní,

yaaw yeoc xol ebꞌ yicꞌaal Benjamín.

Jaxa yet slaonebꞌ cꞌual jix yiꞌtoj yofrenda Ahizer scꞌaal Amisadai,

yaaw yeoc xol ebꞌ yicꞌaal Dan.

Jaxa yet sjusluqꞌuebꞌ cꞌual jix yiꞌtoj yofrenda Paguiel,

scꞌaal Ocrán,

yaaw yeoc xol ebꞌ yicꞌaal Aser.

Jaxa yet slacawebꞌ cꞌual jix yiꞌtoj yofrenda Ahirá,

scꞌaal Enán,

yaaw yeoc xol ebꞌ yicꞌaal Neftalí.

Laan cꞌal sbꞌisil yofrenda ebꞌ jix yakꞌa,

jaꞌton wan tiꞌ:

Jun chꞌen miman plato jix waꞌnele yin chꞌen plata,

ey 1,430 gramo yalil junjun chꞌen,

yetoj jun ẍalu plata chꞌen cꞌal eloj,

ey 770 gramo yalil junjun chꞌen,

nonaj yetoj ixim jarina calbꞌil yetoj aceite olivo;

jun chꞌen miman cuchara oro cꞌal eloj,

ey 110 gramo yalil junjun,

nonaj yetoj teꞌ incienso sukꞌukꞌi yoc sabꞌ;

yetoj jun noꞌ achꞌe wacax,

jun noꞌ icham meꞌ,

cꞌal junxa noꞌ achꞌe meꞌ jun abꞌil skꞌinal,

jix akꞌle tzꞌaꞌ yin xaambꞌal yet watxꞌcꞌulal;

jun noꞌ icham chiw yu stooloj spenail.

Jaxa yet slawubꞌal,

jix yakꞌon xaambꞌal yet watxꞌcꞌulal ebꞌ,

cacꞌon noꞌ icham wacax,

jocꞌon noꞌ icham meꞌ,

jocꞌon noꞌ icham chiw,

yetoj jocꞌon noꞌ achꞌe meꞌ jun abꞌil skꞌinal,

laan cꞌal sbꞌisil noꞌ jix yakꞌ junjun ebꞌ.

84-88 Yuxan jaꞌ masanil wan ofrenda jix yakꞌ ebꞌ yaaw yeoc xol ebꞌ yicꞌaal Israel yet jix oc can yopiso jun yet xaambꞌal tuꞌ,

jaꞌton wan tiꞌ:

Lacawebꞌ chꞌen mimej plato jix waꞌnele yin chꞌen plata,

ey 1,430 gramo yalil junjun chꞌen,

yetoj lacawebꞌ ẍalu plata chꞌen cꞌal eloj,

ey 770 gramo yalil junjun chꞌen,

nonaj chꞌen yetoj ixim jarina calbꞌil yetoj aceite olivo;

lacawebꞌ chꞌen miman cuchara oro cꞌal eloj,

ey 110 gramo yalil junjun,

nonaj yetoj teꞌ incienso sukꞌukꞌi yoc sabꞌ;

yetoj lacawcꞌon noꞌ achꞌe wacax,

lacawcꞌon noꞌ icham meꞌ,

yetoj lacawcꞌon noꞌ achꞌe meꞌ jun abꞌil skꞌinal,

jix akꞌle tzꞌaꞌ yin xaambꞌal yet watxꞌcꞌulal;

lacawcꞌon noꞌ icham chiw yu stooloj spenail.

Jaxa yet slawubꞌal,

jix yakꞌon xaambꞌal yet watxꞌcꞌulal ebꞌ,

24 noꞌ icham wacax,

60 noꞌ icham meꞌ,

60 noꞌ icham chiw,

yetoj 60 noꞌ achꞌe meꞌ jun abꞌil skꞌinal.

89 Jaꞌ yet jix octoj naj Moisés kꞌanabꞌ yetoj Jehová bꞌey yul jun Kꞌap Na bꞌey chi ẍaꞌle sbꞌa yetoj Dios,

jix yabꞌ wal naj skꞌanabꞌ eltej Jehová bꞌey snan xol cawan querubín eyoc yibꞌan smajil teꞌ Scaẍail Swa Kꞌane Dios tuꞌ,

bꞌey chi akꞌle mimancꞌulal yin spenail.