2 Al wan tiꞌ tet ebꞌ ja wet conobꞌ:

Ta ey junoj winaj ma junoj ix chi yakꞌ stiꞌ yaon oc sbꞌa yul jin kꞌabꞌ yin Nazareoal,

3 jaꞌ jun tuꞌ cꞌamxa chi skeꞌ yuqꞌuen an,

cꞌam chi skeꞌ yuqꞌuen junojxa tzetyetal tol paabꞌinaj yich.

Cꞌamxa cꞌal pax chi skeꞌ yuqꞌuen vinagre.

Cꞌam cꞌal pax chi skeꞌ yuqꞌuen yal an uva,

yetoj an tajin sat uva,

cꞌam chi skeꞌ sloꞌoni.

4 Jaꞌ yet jun tiempoal bꞌey chi yakꞌ stiꞌ jun mactxequel tuꞌ,

cꞌam cꞌal niꞌoj chi skeꞌ yabꞌlen masanil tzetyetal tol chi el yin sat an uva,

jaxca jinat cꞌal stzꞌuumal.

5 Cꞌam cꞌal pax chi skeꞌ yakꞌ tzujom el xil sjolom,

masantaꞌcꞌal chi lawi jantaj stiempoal bꞌey jix yakꞌ can stiꞌ tuꞌ,

yutol wet chi yun can ocoj.

6 Jaꞌ yet jun tiempoal tuꞌ,

cꞌam cꞌal pax chi skeꞌ yapni oc ebꞌ scꞌatan junoj ánima chi cami,

7 caxcꞌal mi smam ma xutx,

ma junoj yuẍtaj ma junoj yanabꞌ chi cami,

cꞌam chi skeꞌ yapni oc ebꞌ scꞌatan,

yutol man watxꞌoj chi yun can el ebꞌ yu.

Sowalil tol watxꞌ cꞌal chi yute sbꞌa ebꞌ,

yutol wet yeoc ebꞌ an.

8 Jaꞌ yin masanil stiempoal yet chi yakꞌon can stiꞌ ebꞌ tuꞌ,

junelne tol wet chi yun can oc ebꞌ.

9 Tala cꞌuxan junne ey yetoj junoj mactxequel chi cameloj,

jaꞌ xil sjolom junoj tol wet xa yeocoj,

manxa watxꞌoj chi yun can jun akꞌbꞌil ey jin tuꞌ.

Ta tol jaxca tuꞌ,

yin jujebꞌ cꞌual chi yakꞌ tzujom el xil sjolom,

yet chi waꞌxi can el jaxca yalon ley.

10 Jaxa yet swaxajebꞌ cꞌual xin,

chi yiꞌontoj cacꞌonoj noꞌ cuateꞌ ebꞌ,

ma cacꞌonoj noꞌ paramuch tet junoj yakꞌomal xaambꞌal,

chi iꞌletoj bꞌey sattaj jun Kꞌap Na bꞌey chin chaꞌle jin bꞌa je yetoj.

11 Jaꞌ naj yakꞌomal xaambꞌal tuꞌ chi akꞌon junoj noꞌ yin xaambꞌal yu spenail;

jal junxa noꞌ xin,

chi akꞌle tzꞌaꞌ noꞌ yin xaambꞌaloj.

Queytuꞌ chi yun yakꞌle tan spenail ebꞌ tol chi ilon smimanil junoj ánima chi cami.

Jaꞌ yet jun cꞌual tuꞌ,

jaꞌ xil sjolom oj chꞌibꞌ pax oj.

Wet xa chi yun can ocoj.

12 Chi el pax yich junojxa tiempoal yet chi yakꞌon can stiꞌ ebꞌ junelxa ey jin.

Jaꞌ jun tiempo xax ecꞌ el yet yalantoj,

cꞌamxa chi oc sbꞌisiloj,

yutol jaꞌ xil sjolom tuxa jix etex eloj.

Yuxan sowalil chi yakꞌ junoj meꞌ jun abꞌil skꞌinal,

yet chi oc noꞌ yin xaambꞌaloj yu stooloj spenail jix oc tuꞌ.

13 Jaꞌ yet chi lawi stiempoal bꞌey yakꞌnaj can stiꞌ jun ánima tuꞌ,

sowalil chi too bꞌey stiꞌ jun Kꞌap Na bꞌey chin chaꞌle jin bꞌa je yetoj,

14 catuꞌ chi akꞌle tzꞌaꞌ junoj noꞌ achꞌe meꞌ yin xaambꞌalil,

noꞌ jun abꞌil skꞌinal,

tol watxꞌ ojabꞌ cꞌal el smimanil noꞌ.

Jacꞌalaꞌ,

chi akꞌle cꞌal pax junoj noꞌ txutxe meꞌ jun abꞌil skꞌinal,

tol watxꞌ ojabꞌ cꞌal smimanil noꞌ.

Jaꞌ jun xaambꞌal tuꞌ,

yopiso yu yakꞌle tan spenail.

Catuꞌ chi akꞌle cꞌal pax junoj noꞌ icham meꞌ yin xaambꞌaloj,

watxꞌ ojabꞌ cꞌal el smimanil noꞌ noꞌ tuꞌ.

15 Yetoj cꞌal pax oj,

sowalil chi akꞌle junoj yaliẍ xuc ixim pan cꞌam yich eeyoj,

jaꞌ ojabꞌ ixim jarina caw watxꞌ chi ale oc yin,

calbꞌil yetoj aceite olivo.

Chi akꞌle cꞌal pax ixim wocꞌox pan tol cꞌam yich eeyoj,

eyoc aceite olivo xol.

Junne chi yun yakꞌon yofrenda yin ixim tiriw tuꞌ,

cꞌal yetoj an yal uva.

16 Jaꞌ jun yakꞌomal xaambꞌal tuꞌ chi bꞌatxon oc jun xaambꞌal stooloj spenail tuꞌ jin sattaj,

yetoj cꞌal xaambꞌal tol chi akꞌle cꞌal tzꞌaꞌ masanil,

17 yetoj pax noꞌ meꞌ yet xaambꞌal yet tzalacꞌulal.

Junne cꞌal chi yun yakꞌon yetoj ixim pan tol cꞌam yich eeyoj;

catuꞌ chi yakꞌon cꞌal pax yofrenda yin ixim tiriw,

yetoj cꞌal an yal uva.

18 Jaꞌ jun jix yakꞌ stiꞌ yoc yin Nazareoal tuꞌ,

jaꞌ tituꞌ chi yakꞌ tzujle el xil sjolom sattaj jun Kꞌap Na.

Catuꞌ chi syambꞌan a xil sjolom tuꞌ,

yu xꞌoxon eloj tol wet yeocoj,

catuꞌ chi akꞌle tzꞌaꞌ xol kꞌakꞌ kꞌakꞌ eyoc yalan xaambꞌal yet watxꞌcꞌulal tuꞌ.

19 Jaꞌ yet xax lawi stzujle el xil sjolom tuꞌ,

catuꞌ chi yiꞌon a jun yakꞌomal xaambꞌal tuꞌ wan ẍiꞌbꞌeal sjolom xicꞌ noꞌ meꞌ tuꞌ tol tanajxa,

yetoj junoj ixim pan tol cꞌam yich eeyoj,

ixim eeytoj yul jun yaliẍ xuc tuꞌ,

yetoj cꞌal pax junoj ixim wocꞌox pan tol cꞌam yich eeyoj,

catuꞌ chi yaon oc masanil yul skꞌabꞌ jun mactxequel jix yaoc sbꞌa yin Nazareoal tuꞌ.

20 Chi lawi tuꞌ xin,

chi sbꞌatxon oc jun yakꞌomal xaambꞌal tuꞌ jin sattaj.

Jaꞌ wan tuꞌ chi cam yil-le ocoj tol yet jun yakꞌomal xaambꞌal tuꞌ yeocoj,

catuꞌ chi bꞌatxle oc noꞌ xaamscꞌul tuꞌ jin sattaj,

cꞌal noꞌ xubꞌ tol sicꞌbꞌil eloj,

yet jun yakꞌomal xaambꞌal tuꞌ yeocoj.

Jaꞌ yet xax lawi masanil wan tuꞌ xin,

jaꞌ jun jix yaoc sbꞌa yin Nazareoal tuꞌ,

chi xa skeꞌ yuqꞌuen yal uva.

21 Jaꞌton jun chejbꞌanile tiꞌ tet junoj mactxequel chi yakꞌ stiꞌ yoc wetoj jain Jehová jin tiꞌ,

yet chi yaon oc sbꞌa yin Nazareoal.

Sowalil chi yakꞌ jun yofrenda tuꞌ ey jin an.

Ta ey junoj mactxequel chi yakꞌ stiꞌ yakꞌon junoj yofrenda tol ecꞌbꞌan yintaj jaxca cꞌaltaꞌ yalon sleyal,

sowalil chi sjije yunen jaxca bꞌey chi yakꞌ can stiꞌ,

ẍi Dios.

22 Jix yalon pax Jehová tet naj Moisés jaxca tiꞌ:

23 Al tet naj Aarón yetoj cꞌal tet ebꞌ scꞌaal,

tol jaꞌ yet oj yalon watxꞌ kꞌane ebꞌ yibꞌan ebꞌ je yet Israelal,

queytuꞌ oj yun yalon ebꞌ jaxca tiꞌ:

27 Quey ojabꞌ tuꞌ oj yun sbꞌina jin bꞌi xol ebꞌ yet Israelal tiꞌ yu ebꞌ.

Jain xa oj wakꞌ jin yaxilal yibꞌan ebꞌ,

ẍi Dios.