2 Waꞌnele ojabꞌ caabꞌoj trompeta tol chꞌen plata cꞌal eloj,

tol chi chacꞌle ey yetoj martillo.

Jaꞌ wan tuꞌ oj xuꞌle yet chi yambꞌale oc ebꞌ ánima,

cꞌal yet chi bꞌey stoo ebꞌ sattaj.

3 Jaꞌ yet chi xuꞌle chꞌen trompeta tuꞌ scaabꞌil,

masanil ojabꞌ ebꞌ conobꞌ chi syambꞌa oc sbꞌa ja sattaj,

bꞌey jun kꞌap na bꞌey chin chaꞌle jin bꞌa je yetoj.

4 Ta tol asanne jun chꞌen trompeta chi xuꞌlei,

asan ebꞌ yaaw yeoc xol junjun bꞌulan icꞌaaleal chi syambꞌa oc sbꞌa.

5 Ta tol kocꞌ xacꞌal xol chi yun xuꞌle chꞌen trompeta tuꞌ yin ipal xin,

chi yal yeloc apnoj tol chi a waan masanil ebꞌ ánima bꞌulan ey tuꞌ,

jaꞌton ebꞌ eyecꞌ yetcꞌulal bꞌey chi aol cꞌu bꞌey snail jin calubꞌal tuꞌ.

6 Jaxa yet oj xuꞌle chꞌen trompeta yet scaelal jaxa stoo ebꞌ bꞌulan ecꞌ bꞌey yetcꞌulal sur.

Yuxan jaꞌ yet chi xuꞌle chꞌen trompeta jaxca tuꞌ,

txꞌoxbꞌanile yeoc yet chi bꞌey stoo ebꞌ.

7 Ta tol man kocꞌ xacꞌal oj xol chi yun xuꞌle chꞌen trompeta tuꞌ,

chi yal yeloc apnoj tol tucꞌal chi yambꞌale oc ebꞌ ánima,

chi yal tuꞌ.

8 Jaꞌ mactxequel chi xuon chꞌen trompeta tuꞌ,

jaꞌton ebꞌ yakꞌomal xaambꞌal,

ebꞌ yicꞌaal Aarón.

Jaꞌ jun tiꞌ chejbꞌanile chi yun can ey jex.

9 Jaꞌ yet jex ecꞌ bꞌey jun txꞌotxꞌ oj wakꞌ ey jex tuꞌ,

ta ey junoj ebꞌ chi jowi oc je yin chi jul yakꞌ jowal je yetoj bꞌey caan jex ecꞌ tiꞌ,

catuꞌ chex eltoj je yakꞌon jowal yetoj ebꞌ,

eyman chi xuꞌle chꞌen trompeta tuꞌ yin ipal,

catuꞌ kocꞌ xacꞌal xol chi yun xuꞌle chꞌen,

yet watxꞌ jain Jehová je Diosal jin tiꞌ oj jex jin naꞌtej,

jaxa jex jin colon el tet ebꞌ chi jul yakꞌ jowal je yetoj tuꞌ.

10 Jaꞌ yet che yaoc junoj kꞌin yet ey je tzalacꞌulal,

jaxca scꞌual kꞌin,

ma yet chi ali xꞌaaw,

che xuon chꞌen trompeta tuꞌ,

yet che yakꞌon je xaambꞌal chi tzꞌaꞌi,

ma xaambꞌal yet watxꞌcꞌulal.

Jaxca tuꞌ oj yun jex jin naꞌontej,

jain ton Jehová je Diosal jin tiꞌ chi walaꞌ,

ẍi Dios.

11 Jaꞌ yet 20 yoc yet scaabꞌ xꞌaaw yet scaabꞌ abꞌil yel ebꞌ conobꞌ Israel bꞌey txꞌotxꞌ Egipto,

jix el jun asun tuꞌ yibꞌan jun na bꞌey scalubꞌal Jehová,

12 catuꞌ jix el ebꞌ Israel bꞌey txꞌotxꞌ cusiltaj txꞌotxꞌ yul yet Sinaí,

yin cꞌuancꞌulal jix bꞌey cꞌal stoo ebꞌ masantaꞌcꞌal jix apni oc ebꞌ bꞌey txꞌotxꞌ cusiltaj txꞌotxꞌ yul yet Parán,

yutol jaꞌ tituꞌ jix oc tucan jun asun tuꞌ.

13 Sbꞌabꞌelto wal tuꞌ,

catuꞌ jix bꞌey stoo ebꞌ Israel yin xolilal jaxca jix yun yalon Jehová tet naj Moisés.

14 Jaꞌ ebꞌ soldado iꞌbꞌil oc sbandera Judá yu,

jaꞌ ebꞌ bꞌabꞌel;

jaꞌ Nahasón scꞌaal Aminadab eyoc syaawiloj ebꞌ.

15 Jaꞌ Natanael scꞌaal Suar,

jaꞌ ijbꞌanen oc ebꞌ soldado yeoc xol ebꞌ yicꞌaal Isacar.

16 Jaꞌ Eliab scꞌaal Helón,

jaꞌ ijbꞌanen oc ebꞌ soldado yeoc xol ebꞌ yicꞌaal Zabulón.

17 Jix lawi tuꞌ xin,

jix xuyon ey scalubꞌal Jehová tuꞌ ebꞌ,

jaxa ebꞌ yicꞌaal Guersón,

cꞌal ebꞌ yicꞌaal Merarí,

jix iꞌontoj yutol jaꞌ ebꞌ tuꞌ eyoc yibꞌan yiꞌon bꞌeyoj.

18 Jix lawi tuꞌ xin,

catuꞌ jix too ebꞌ soldado inen oc sbandera Rubén;

jaꞌ naj Elisur scꞌaal Sedeúr eyoc syaawiloj ebꞌ.

19 Jaꞌ Selumiel scꞌaal Surisadai,

jaꞌ ijbꞌanen oc ebꞌ soldado yeoc xol ebꞌ yicꞌaal Simeón.

20 Jaꞌ Eliasaf scꞌaal Reuel,

jaꞌ ijbꞌanen oc ebꞌ soldado yeoc xol ebꞌ yicꞌaal Gad.

21 Tzajan cꞌal pax oc ebꞌ yicꞌaal Quehat;

jaꞌ ebꞌ inen oc masanil smitxꞌkꞌabꞌil scalubꞌal Jehová.

Jaxa yet jix apni oc ebꞌ,

xax waꞌxi a snail scalubꞌal Jehová yu ebꞌ.

22 Jix lawi tuꞌ,

catuꞌ jix too ebꞌ soldado inen oc sbandera Efraín.

Jaꞌ Elisamá scꞌaal Amihud,

jaꞌ eyoc syaawiloj ebꞌ.

23 Jaꞌ Gamaliel scꞌaal Pedasur,

jaꞌ ijbꞌanen oc ebꞌ soldado yeoc xol ebꞌ yicꞌaal Manasés.

24 Jaꞌ Abidán scꞌaal Gedeoní,

jaꞌ ijbꞌanen oc ebꞌ soldado yeoc xol ebꞌ yicꞌaal Benjamín.

25 Yintaj xacꞌal masanil wan soldado tuꞌ,

tzajan oc ebꞌ inen oc sbandera Dan.

Jaꞌ Ahiézer,

scꞌaal Amisadai,

jaꞌ eyoc syaawiloj ebꞌ.

26 Jaꞌ Paguiel scꞌaal Ocrán,

jaꞌ ijbꞌanen oc ebꞌ soldado yeoc xol ebꞌ yicꞌaal Aser.

27 Jaꞌ Ahirá scꞌaal Enán,

jaꞌ ijbꞌanen oc ebꞌ soldado yeoc xol ebꞌ yicꞌaal Neftalí.

28 Queytuꞌ jix yun yoc ebꞌ Israel yin xolilal,

yet jix bꞌey cꞌal stoo ebꞌ.

29 Ey jun cꞌual,

jix yal naj Moisés tet jun sbꞌax,

jaꞌton naj Hobab,

scꞌaal naj Reuel a Madián:

—Jaon tiꞌ jon,

oj cu too bꞌey jun txꞌotxꞌ bꞌey jix yakꞌ can stiꞌ Dios yakꞌon ey jon;

toon ketoj jon,

xaan oj jaach kilaꞌ,

yutol jix yakꞌ can stiꞌ Dios tol oj cu syaꞌilne jaon Israel jon tiꞌ,

ẍi naj Moisés.

30 Catuꞌ jix takꞌwi naj Hobab jaxca tiꞌ:

—Cꞌamaj,

jain tiꞌ oj jin meltzo can bꞌey jin txꞌotxꞌal,

bꞌey caan ecꞌ masanil ebꞌ wican,

ẍi naj.

31 Jix yalon cꞌal naj Moisés tet naj:

—Chin oc wal tean ja win,

manche jon ja bꞌejcanoj,

yutol jaach tiꞌ ja wotaj yecꞌ masanil bꞌey jun cusiltaj txꞌotxꞌ tiꞌ,

chi skeꞌ tol jaach oj jon ja wijbꞌa.

32 Ta tol chach too ketoj jon,

jaꞌ jantaj tzetyetal oj yakꞌ Jehová ey jon,

oj kakꞌ cꞌal pax ja wet,

ẍi Moisés tet naj.

33 Jix lawi tuꞌ xin,

jix el ebꞌ bꞌey txꞌotxꞌ Sinaí,

jaꞌton jun tzalan bꞌey jix xꞌox sbꞌa Jehová,

oxebꞌ cꞌual jix bꞌey ebꞌ.

Bꞌabꞌel teꞌ Scaẍail Swa Kꞌane Dios yu ebꞌ,

jaꞌ chi txꞌoxon junoj txꞌotxꞌ bꞌey watxꞌ chi xew ebꞌ.

34 Jaꞌ yet jix bꞌey ebꞌ yet cꞌualil,

cꞌuancꞌulal jix yun sbꞌey ebꞌ,

yutol eyoc jun asun yet Dios yibꞌan ebꞌ.

35 Jaꞌ yet chi iꞌletoj teꞌ caẍa tuꞌ,

chi yalon naj Moisés jaxca tiꞌ:

36 Jaꞌ yet chi oc tucan teꞌ caẍa tuꞌ,

chi yalon pax naj jaxca tiꞌ: