4 Ecꞌal ebꞌ txꞌoj conobꞌal eyxa cꞌaltaꞌ oc xol ebꞌ Israel tuꞌ.

Jaꞌ jun tujan ánima tuꞌ,

asan loꞌbꞌe chi yoche oc ebꞌ;

ey pax wan ebꞌ Israel tuꞌ jix alon pena kꞌane tuꞌ yetoj ebꞌ,

jix okꞌa ebꞌ catuꞌ jix yalon ebꞌ jaxca tiꞌ:

¡Mac wal txequel junoj chi akꞌon chiꞌbꞌe cu chiꞌ tinaniꞌ!

5 Caw wal chi cu naꞌtej tinaniꞌ tol caw miman noꞌ pescado jix cu chiꞌ bꞌey txꞌotxꞌ Egipto,

tol tucꞌal jix saꞌle ey jon,

cꞌam chi cu manaꞌ;

ey cꞌal pax an pepino,

ey melón,

ey teꞌ puerro,

ey an cebolla cꞌal an aẍuẍ jix cu kꞌuxuꞌ.

6 Jaxa wal tinaniꞌ,

caw wal chi cu cam yu wail,

cꞌamxa niꞌoj tzet chi cu loꞌ,

caw wal chi ketne cu cꞌul cu loꞌon jun maná tiꞌ,

ẍi ebꞌ tuꞌ.

7 (Jaꞌ wan maná tuꞌ,

laan yili jaxca sat an cilantro,

kꞌan yili jaxca skꞌolal teꞌ ta;

8 jaꞌ sabꞌ laan jaxca sabꞌ ixim wocꞌox pan calbꞌil yetoj aceite olivo.

9 Jaꞌ yet chi ey yal akꞌbꞌal,

catuꞌ chi ey cꞌal pax can maná tuꞌ xol bꞌey bꞌulan ecꞌ ebꞌ tuꞌ.

Yet caw skꞌinibꞌto chi eltoj ebꞌ ánima tuꞌ syambꞌa a yet;

chi sjutxꞌ koo ebꞌ,

catuꞌ chi swaꞌnen ebꞌ jaxca chi yun swaꞌxi ixim pan yul jorna.

Ey bꞌey xin,

tol chi ẍacꞌ poꞌo ebꞌ catuꞌ chi yakꞌon ta ebꞌ.)

10 Jaxa yabꞌen naj Moisés yokꞌa masanil ebꞌ Israel bꞌey stiꞌ smajil skꞌap na junjun ebꞌ.

Caw jix tit sjowal scꞌul Jehová;

jacꞌalaꞌ caw jix tac pax scꞌul naj Moisés yu ebꞌ.

11 Jix yalon Moisés tet Jehová jaxca tiꞌ:

—¿Tzet yuxan cha txꞌox jun syaꞌilal tiꞌ wil jain ja chejabꞌ jin tiꞌ?

¿Tzet wal sjowal ja cꞌul win,

yuxan cha wakꞌ jun conobꞌ tiꞌ jin teyne?

12 ¿Tumi mame jin ma txutxe jin,

yuxan cha walaꞌ tol chin lactoj ebꞌ jaxca junoj yaliẍ unin bꞌey sat txꞌotxꞌ txꞌotxꞌ albꞌilcan tet ebꞌ cu mam icham ja wu?

13 ¿Bꞌeytuꞌ chi too wiꞌoc chiꞌbꞌe chi wakꞌ ẍiꞌ wan ánima tiꞌ?

Caw chi okꞌ ebꞌ,

chi jul ebꞌ yalon ey jin jaxca tiꞌ:

Iꞌtej chiꞌbꞌe cu chiꞌ jon,

ẍi xacꞌal ebꞌ.

14 Caw wal cꞌamxa chi skeꞌ jin takꞌen oc wibꞌan yet chi wiꞌontoj jun conobꞌ tiꞌ.

Jaxca wal junoj ijatz tol caw al,

queytuꞌ yeoc ebꞌ chi wabꞌe.

15 Ta tol oj ja wakꞌ jun syaꞌtajil tiꞌ wil an,

yel xacꞌal mi watxꞌ tol chin ja wakꞌ camoj;

ta ey wal ja camcꞌulal win an xin,

chi wal ey jaach tol chin ja wiꞌel xol jun syaꞌtajil tiꞌ,

ẍi Moisés.

16 Yu jun tuꞌ,

jix yalon Jehová tet naj Moisés jaxca tiꞌ:

—Yambꞌa oc junoj 70 ebꞌ icham winaj yeoc xol conobꞌ Israel,

ebꞌ tol miman yeloc apnoj xol ebꞌ ánima tuꞌ cha wilaꞌ,

catuꞌ cha wiꞌontej ebꞌ bꞌey stiꞌ snail jin calubꞌal bꞌey chin chaꞌle jin bꞌa je yetoj;

jaꞌ tituꞌ chin ja wechbꞌane yetoj ebꞌ.

17 Jaxa jin jain tiꞌ oj jin ey apnoj,

catuꞌ oj jin kꞌanabꞌ ja wetoj,

oj wiꞌel niꞌoj Espíritu eyoc ja win jaach tiꞌ,

catuꞌ oj waon oc yin ebꞌ,

yet watxꞌ oj colwa ebꞌ ja wetoj,

yet chi ijbꞌaletoj wan ánima tiꞌ,

yet watxꞌ man ja txꞌojli oj,

oj ja wiltoj ebꞌ.

18 Chi lawi tuꞌ xin,

cha walon tet ebꞌ ánima tuꞌ tol chi sajbꞌane sbꞌa ebꞌ,

yutol jaꞌ yet yecal chi ẍiꞌ chiꞌbꞌe ebꞌ chi skꞌan ey jaach tuꞌ.

Tuxa wal jix wabꞌ yokꞌilal ebꞌ an yet chi yalon ebꞌ jaxca tiꞌ:

Toloj wal ey chiꞌbꞌe chi cu chiꞌ tinaniꞌ.

Caw wal watxꞌ cꞌaltaꞌ keoc bꞌey Egipto,

ẍi ebꞌ.

Yu jun tuꞌ xin,

yuxan oj wakꞌ ẍiꞌbꞌe ebꞌ an.

19 Man junne oj cꞌu,

man pax caabꞌojne cꞌu,

man joebꞌojne cꞌu,

man laonebꞌojne cꞌu,

man pax juncꞌalojne cꞌual,

20 yutol jun wal xꞌaaw oj wakꞌ chiꞌbꞌe ẍiꞌ ebꞌ,

masantaꞌcꞌal tol oj xabꞌ ebꞌ yu noꞌ chiꞌbꞌe tuꞌ,

caw oj tit noꞌ yul-laj xam ebꞌ,

masantaꞌcꞌal tol oj syaacan el noꞌ ebꞌ;

yutol yeynajil jix jin yute ebꞌ,

jain Jehová jin tiꞌ,

yet ey jin ecꞌ snan je xol tiꞌ;

chi okꞌ ebꞌ jin sattaj chi yalon ebꞌ jaxca tiꞌ:

¿Tzet yuxan jix jon ja wiꞌeltej bꞌey Egipto?

ẍi ebꞌ,

ẍi Dios tet naj Moisés.

21 Yu tuꞌ xin jix takꞌwi naj Moisés jaxca tiꞌ:

—Jaach Jehová,

jin Diosal,

jaꞌ ebꞌ ánima iꞌbꞌil oc wu tiꞌ an,

ey 600,000 ebꞌ naj winaj tol stiempoal wal yoc yin soldadoal.

¿Catuꞌ cha waloni tol oj ja wakꞌ chiꞌbꞌe cu chiꞌ yin junoj xꞌaaw jon?

22 ¿Bꞌey wal tuꞌ oj titoc ecꞌaloj noꞌ meꞌ ma ecꞌaloj noꞌ wacax chi cu makꞌ camoj,

yet chi yabꞌen a yin wan ánima tiꞌ?

Yetoj cꞌal pax oj ta chi kakꞌ noꞌ pescado ẍiꞌ ebꞌ,

caxcꞌal mi chi lawi atej masanil noꞌ ey yul-laj jaꞌ mar,

ma cꞌaltaꞌ yabꞌ noꞌ yin ebꞌ,

ẍi naj Moisés.

23 Catuꞌ jix takꞌwi Jehová tet naj jaxca tiꞌ:

—¿Tumi tol txenne yeoc wipalil cha naꞌ?

Jaꞌ tinaniꞌ,

oj ja wilaꞌ ta tol oj yun jaxca chi yun walon ey jaach,

ma cꞌamaj,

ẍi Dios.

24 Jix lawi tuꞌ xin,

catuꞌ jix eltoj naj Moisés yalon xol ebꞌ ánima tzet jix yal Jehová.

Catuꞌ jix yambꞌale oc jun 70 ebꞌ icham winaj yeoc xol conobꞌ Israel tuꞌ yu naj,

catuꞌ jix oc joyan ebꞌ yinlaj scalubꞌal Jehová yu naj Moisés.

25 Jix lawi tuꞌ xin,

catuꞌ jix eyol Jehová xol jun asun,

jaxa skꞌanabꞌ yetoj naj Moisés tuꞌ.

Jaꞌ yet tuꞌ jacꞌal Espíritu eyoc yin naj Moisés,

jix ale oc yin ebꞌ yu Jehová,

catuꞌ jix yaon oc yin ebꞌ naj 70 icham winaj tuꞌ.

Jaꞌ yet tuꞌ jix cꞌoli skꞌanabꞌ el ebꞌ,

jaxca ebꞌ yalomal el skꞌane Dios,

asan xin,

asan junel jix kꞌanabꞌ ebꞌ jaxca tuꞌ.

26 Ey cawan ebꞌ eyoc sbꞌisiloj ebꞌ 70 tuꞌ,

jun chi yij Eldad,

junxa chi yij Medad.

Jaꞌ ebꞌ cawan tuꞌ ma too ebꞌ bꞌey scalubꞌal Jehová,

yutol jix cancan ebꞌ bꞌey bꞌulan ecꞌ ebꞌ tuꞌ.

Jix oc cꞌal pax Espíritu yin ebꞌ cawan tuꞌ,

catuꞌ jix cꞌoli skꞌanabꞌ el ebꞌ bꞌey bꞌulan ecꞌ ebꞌ tuꞌ.

27 Jaꞌ yet lalan skꞌanabꞌ ebꞌ naj tuꞌ,

ey jun naj achꞌe jix abꞌen tzet jix yal ebꞌ naj,

yuxan yin eymanil jix yun stoo jininoj naj yalon tet naj Moisés jaxca tiꞌ:

—Jaꞌ naj Eldad yetoj cꞌal naj Medad,

lalan skꞌanabꞌ el ebꞌ bꞌey bꞌulan ecꞌ ebꞌ tuꞌ,

jaxca tol alom el skꞌane Dios ebꞌ naj chi kabꞌe,

ẍi jun naj achꞌe tuꞌ.

28 Jaxa Josué naj scꞌaal Nun,

yin tax cꞌal syaliẍ achꞌeal jix cꞌoli scolwa yetoj naj Moisés,

jix yalon jaxca tiꞌ:

—Jaach yaaw Moisés,

jaꞌ tinaniꞌ altoj tet ebꞌ,

catuꞌ chi tenle oc tucan skꞌanabꞌ wan winaj tuꞌ,

ẍi naj achꞌe tuꞌ.

29 Catuꞌ jix takꞌwi naj Moisés jaxca tiꞌ:

—¿Tumi cha woche tol asan jin miman weloc apnoj xol ánima tiꞌ?

Toloj wal chi el yin scꞌul Dios chi yakꞌ Yespíritu tet masanil ánima yet watxꞌ chi oc can ebꞌ ẍejabꞌoj,

ẍi naj.

30 Jix lawi tuꞌ xin,

catuꞌ jix meltzotoj naj yetoj ebꞌ icham winaj yeoc xol conobꞌ bꞌey bꞌulan ecꞌ tuꞌ.

31 Jato cꞌal wal tuꞌ,

catuꞌ jix tit jun miman jow kaꞌeꞌ yul jaꞌ mar yu Jehová,

jaꞌ jun kaꞌeꞌ tuꞌ jix iꞌontej jun miman bꞌulan noꞌ tzꞌiquin chi yij ubꞌ.

Jix eyqꞌuey noꞌ xol bꞌey bꞌulan ecꞌ ebꞌ tuꞌ cꞌal yinlaj eltoj,

ey mi junoj cꞌual stecꞌbꞌanil,

bꞌey jix apni oc ian yeyqꞌuey noꞌ tzꞌiquin tuꞌ,

catuꞌ junxane mi wal metro yea bꞌey chi ecꞌ jenenoj noꞌ yibꞌan txꞌotxꞌ txꞌotxꞌ.

32 Masanil cꞌu,

cꞌal masanil akꞌbꞌal,

cꞌal masanil junxa cꞌu jix smitxꞌ noꞌ tzꞌiquin ebꞌ ánima tuꞌ.

Jaꞌ mactxequel txenne yet jix smitxꞌaꞌ,

asan mi laonebꞌoj bꞌulan noꞌ jix yamcha yu.

Masanil ebꞌ ánima jix oc ian swaꞌnen el noꞌ ebꞌ,

catuꞌ jix yakꞌon taj noꞌ tzꞌiquin ebꞌ tuꞌ bꞌey yinlaj bꞌey bꞌulan ecꞌ ebꞌ tuꞌ.

33 Jaꞌ yet lalan ẍiꞌon noꞌ tzꞌiquin ebꞌ ánima tuꞌ,

caw jix tit sjowal scꞌul Jehová yin ebꞌ,

catuꞌ jix yaontej jun syaꞌilal yibꞌan ebꞌ.

Caw wal miman ebꞌ jix cami.

34 Yu jun tuꞌ,

yuxan jix yij can sbꞌi jun txꞌotxꞌ tuꞌ yin Quibrot-hataavá^b yutol jaꞌ tituꞌ jix mujle can ebꞌ ey spekꞌal yin chiꞌbꞌe.

35 Jix lawi tuꞌ xin,

jix el ebꞌ Israel tuꞌ bꞌey Quibrot-hataavá tuꞌ,

catuꞌ jix bꞌey cꞌal stoo ebꞌ sattaj.

Jix apni oc ebꞌ bꞌey jun txꞌotxꞌ txꞌotxꞌ chi yij Hazerot,

jaꞌ tituꞌ jix caey ecꞌ jun tiempoal ebꞌ.