Jix Al-le Skꞌumal Naj Moisés Yu Naj Aarón Yetoj Cꞌal Ix María
12
Jix oc ian ix María cꞌal naj Aarón yalon skꞌumal Moisés ebꞌ,
yutol jix oc jun ix a Cusita yistiloj naj Moisés.
2 Jacꞌalaꞌ chi yalon cꞌal pax ebꞌ:
Tumi wal asanne tet naj Moisés tuꞌ chi skeꞌ skꞌanabꞌ Jehová,
chi kꞌanabꞌ pax cꞌal Naj ey jon,
ẍi naj Aarón yetoj ix María tuꞌ,
jaxa Jehová jix yabꞌ tzet jix yal ebꞌ.
3 Caw wal yel,
asanne naj Moisés yeynajil chi yute sbꞌa bꞌey yul yibꞌankꞌinal tiꞌ.
4 Yu tuꞌ xin,
yin eymanil jix yun yalon Jehová tet naj Moisés cꞌal tet naj Aarón yetoj cꞌal tet ix María jaxca tiꞌ:
Asiꞌwej je yoxwanil bꞌey stiꞌ snail jin calubꞌal bꞌey chin chaꞌle jin bꞌa je yetoj,
ẍi Dios.
Catuꞌ jix too ebꞌ yoxwanil.
5 Jix lawi tuꞌ,
jix eyol Jehová xol jun miman asun,
jix oc bꞌocꞌan bꞌey stiꞌ jun kꞌap na tuꞌ;
jix awtele naj Aarón cꞌal ix María tuꞌ yu Jehová.
Jaxa yet jix apni oc ebꞌ sattaj Jehová tuꞌ,
jix yalon Naj tet ebꞌ jaxca tiꞌ:
6 Abꞌwej wal tzet oj walaꞌ:
Jaꞌ yet chi waontoj junoj jin chejabꞌ je xol,
jain chin txꞌox jin bꞌa tet cꞌal jin kꞌanabꞌ pax tet yin weyicheal.
7 Jaxa wal pax yetoj naj jin chejabꞌ Moisés tiꞌ,
man jaxca oj tuꞌ chi wute an,
yutol asanne jun jin chejabꞌ tiꞌ caw jijem chi yute sbꞌa xol masanil ebꞌ jin chejabꞌ.
8 Tol jaccombꞌa chi yun jin kꞌanabꞌ yetoj naj,
yutol caw jichan chi yun wil-len oc jin bꞌa yetoj naj sicꞌlebꞌil.
¿Tzet wal yuxan che tecꞌbꞌa je bꞌa je yalon skꞌumal naj?
ẍi Dios.
9 Caw wal jix tit sjowal scꞌul Jehová yin ebꞌ,
jix lawi tuꞌ catuꞌ jix toi.
10 Jaꞌ yet jix el jun asun tuꞌ yibꞌan scalubꞌal Jehová tuꞌ,
jaxa ix María saj wejinaj xacꞌal yili smimanil ix yu jun yaꞌbꞌil chi yij lepra.a
Catuꞌ jix oc tꞌanan naj Aarón tuꞌ yin ix,
jix yiloni tol eyxa oc lepra yin ix.
11 Jix yalon tet naj Moisés jaxca tiꞌ:
¡Akꞌ wal mimancꞌulal kin jon jaach Moisés,
cꞌam ojabꞌ chi oc jun syaꞌilal tiꞌ kibꞌan jon,
yu cꞌam cu naꞌbꞌal jon,
yuxan chi oc cu penail jon!
12 Toloj wal chi okꞌ ja cꞌul kin jon,
cha kꞌan tet Dios tol cꞌam chi cancan ix jaxca junoj yaliẍ unin tol camnajxa yet chi ali,
yutol etexnajxatoj smimanil ix,
ẍi naj Aarón tuꞌ.
13 Yu jun tuꞌ xin,
jix txali naj Moisés tet Jehová,
jix yalon jaxca tiꞌ:
Jaach jin Diosal,
chin oc tean ja win,
toloj wal cha wiꞌel jun syaꞌilal eyoc yin ix wanabꞌ tiꞌ,
ẍi naj Moisés.
14 Catuꞌ jix takꞌwi Jehová tet naj Moisés:
Ta jaꞌ smam ix jix stzubꞌli oc yin sat,
chim can ix yin jujebꞌoj cꞌual yet chi el sqꞌuixwil ix.
Yu tuꞌ xin,
el ojabꞌ cantoj ix yinlaj eltoj bꞌey bꞌulan jex ecꞌ tuꞌ yin jujebꞌoj cꞌual.
Chi lawi tuꞌ xin,
chi chaꞌle pax octej ix junelxa,
ẍi Dios.