Jix Aletoj Yilomal Txꞌotxꞌ Canaán Yu Naj Moisés
13
Jix yalon Jehová tet naj Moisés jaxca tiꞌ:
2 Chejtoj jaywanoj ebꞌ winaj yet chi too ebꞌ yilon txꞌotxꞌ Canaán,
jaꞌton txꞌotxꞌ oj wakꞌ ey jex jaex Israel jex tiꞌ.
Jaꞌ junjunoj ebꞌ ey yopiso xol ebꞌ yicꞌaal Israel,
jaꞌ ebꞌ cha chejtoj,
ẍi Dios.
3 Jaxca jix yun yalon Jehová,
jaxca tuꞌ jix yute naj Moisés ẍejontoj ebꞌ winaj tuꞌ,
jaꞌton yet eyecꞌ ebꞌ yul yet Parán,
jix too ebꞌ yilaꞌ tzet wal yeoc txꞌotxꞌ Canaán tuꞌ.
Jaꞌ ebꞌ jix too tuꞌ yaaw yeoc ebꞌ naj xol ebꞌ Israel.
4 Jaꞌ sbꞌi ebꞌ jaꞌton ebꞌ tiꞌ:
Samúa,
scꞌaal Zacur,
yet ebꞌ yicꞌaal Rubén.
5 Safat,
scꞌaal Horí,
yet ebꞌ yicꞌaal Simeón;
6 Caleb,
scꞌaal Jefuné,
yet ebꞌ yicꞌaal Judá;
7 Igal,
scꞌaal José,
yet ebꞌ yicꞌaal Isacar;
8 Oseas,
scꞌaal Nun,
yet ebꞌ yicꞌaal Efraín;
9 Paltí,
scꞌaal Rafú,
yet ebꞌ yicꞌaal Benjamín;
10 Gadiel,
scꞌaal Sodí,
yet ebꞌ yicꞌaal Zabulón;
11 Gadi,
scꞌaal Susí,
yet ebꞌ yicꞌaal José,
chi yal yeloc apnoj jaꞌton ebꞌ yicꞌaal Manasés;
12 Amiel,
scꞌaal Guemalí,
yet ebꞌ yicꞌaal Dan;
13 Setur,
scꞌaal Micael,
yet ebꞌ yicꞌaal Aser;
14 Nahbí,
scꞌaal Vapsí,
yet ebꞌ yicꞌaal Neftalí;
15 Gueuel,
scꞌaal Maquí,
yet ebꞌ yicꞌaal Gad.
16 Jaꞌton sbꞌi ebꞌ jix ẍejtoj naj Moisés yu stoo yilon ecꞌ txꞌotxꞌ Canaán ebꞌ.
(Jaꞌton naj Oseas scꞌaal Nun,
jix qꞌuexle sbꞌi yu naj Moisés,
Josué xa jix yij sbꞌi.)
17 Jaꞌ yet jix chejletoj ebꞌ yu naj Moisés,
ebꞌ jix too ilon ecꞌ txꞌotxꞌ Canaán tuꞌ,
jix yalon naj tet ebꞌ jaxca tiꞌ:
—Asiꞌwej xin,
jaꞌ tituꞌ chex ecꞌ too bꞌey txꞌotxꞌ Négueb,
catuꞌ chex atoj bꞌey sjolomlaj wonan.
18 Catuꞌ che yiloni tzet wal yili txꞌotxꞌ txꞌotxꞌ tuꞌ.
Chi cam je yilon pax oj tzet wal yili ebꞌ ánima caan tituꞌ,
tumi caw jelan ebꞌ,
ma cꞌam wal sjelanil ebꞌ,
tumi miman sbꞌisil ebꞌ,
ma cꞌam wal txꞌial sbꞌisil ebꞌ.
19 Catuꞌ chi cam je yiloni,
yul-laj mi kꞌap na waꞌnebꞌil a bꞌey caan ebꞌ ánima tuꞌ,
ma tol joybꞌil a sconobꞌ ebꞌ yu smuroal,
ta watxꞌ txꞌotxꞌ,
ma pena yili txꞌotxꞌ,
20 ta yaax sat txꞌotxꞌ,
ma tajin sat txꞌotxꞌ.
Che yiloni ta ey steꞌal sat txꞌotxꞌ.
Cꞌam cꞌal chex xiwi,
ta ey sat teꞌ awbꞌeal teꞌ sat txꞌotxꞌ,
che yiꞌtej jayebꞌoj kilaꞌ,
ẍi naj Moisés tet ebꞌ.
Cꞌuxan cꞌal wal stiempoal xa yelol an bꞌabꞌel sat uva yet jix bꞌetecꞌ ebꞌ tuꞌ.
21 Catuꞌ jix too cꞌal ebꞌ xin,
jix ecꞌtoj ebꞌ bꞌey txꞌotxꞌ cusiltaj txꞌotxꞌ chi yij Sin,
masantaꞌcꞌal jix apni oc ebꞌ bꞌey txꞌotxꞌ Rehob,
bꞌey scawilal Hamat.
22 Jix ecꞌtoj ebꞌ bꞌey txꞌotxꞌ Négueb,
masantaꞌcꞌal jix apni oc ebꞌ bꞌey Hebrón.
Jaꞌ tituꞌ ey sconobꞌ naj Ahimán,
Sesai,
cꞌal Talmai.
Jaꞌ ebꞌ tiꞌ yicꞌaal naj Anac ebꞌ.
Jujebꞌxa abꞌil sjobꞌcha conobꞌ Hebrón tuꞌ yet jix el yich swaꞌxi conobꞌ Soan bꞌey Egipto.
23 Jaꞌ tituꞌ,
jix apni oc ebꞌ bꞌey spananil stiꞌ jun miman jobꞌe chi yij Escol,
jaꞌ tituꞌ jix stzokꞌel jun bꞌoyan sat an uva ebꞌ,
jix skꞌalon oc ebꞌ yin jun teꞌ teꞌ,
catuꞌ jix sjolom xicꞌnentoj ebꞌ,
cawan ebꞌ jix ijontej.
Catuꞌ jix yiꞌon cꞌal pax tej teꞌ granada ebꞌ yetoj cꞌal teꞌ higo.
24 Jaꞌ jun panan tuꞌ jix yij can a sbꞌi Escola yu ebꞌ bꞌeytzem txꞌotxꞌ tuꞌ,
yutol jaꞌ tituꞌ jix yiꞌel jun bꞌoyan sat uva ebꞌ.
25 Cawinaj cꞌu jix smaj ebꞌ yil txꞌotxꞌ txꞌotxꞌ tuꞌ,
catuꞌ jix meltzo ebꞌ.
26 Jaꞌ bꞌey Cadés,
bꞌey txꞌotxꞌ cusiltaj txꞌotxꞌ yul yet Parán.
Jaꞌ tituꞌ eyecꞌ naj Moisés yetoj naj Aarón,
yetoj cꞌal masanil ebꞌ conobꞌ Israel.
Jix lawi tuꞌ xin,
catuꞌ jix oc ian yalon ebꞌ tzet wal yili txꞌotxꞌ txꞌotxꞌ tuꞌ,
jix xꞌoxon sat teꞌ awbꞌeal teꞌ jix yiꞌtej ebꞌ bꞌey txꞌotxꞌ txꞌotxꞌ tuꞌ.
27 Jix yalon ebꞌ tet naj Moisés jaxca tiꞌ:
—Tuxa wal jix bꞌet kil txꞌotxꞌ txꞌotxꞌ jix ja wal ey jon,
caw yel xacꞌal watxꞌ yili txꞌotxꞌ,
caw yaax sat txꞌotxꞌ,
ti ey sat jun teꞌ awbꞌeal teꞌ chi el sat txꞌotxꞌ txꞌotxꞌ tuꞌ.
28 Asan xin,
jaꞌ ebꞌ ánima caan tituꞌ caw jelan ebꞌ,
caw miman conobꞌ yeoc sconobꞌ ebꞌ tuꞌ;
eyoc smuroal yinlaj sconobꞌ ebꞌ.
Yetoj cꞌal pax oj,
jix kil yin wan ebꞌ naj winaj caw mimej steel,
jaꞌton ebꞌ yicꞌaal naj Anac.
29 Jaꞌ bꞌey txꞌotxꞌ Négueb jaꞌ tituꞌ caan ebꞌ Amalecita.
Jaꞌ bꞌey sjolomlaj wonan jaꞌ tituꞌ caan ebꞌ Hitita,
ebꞌ Jebuseo yetoj cꞌal ebꞌ Amorreo.
Jal bꞌey scꞌaxepal ecꞌtoj jaꞌ Mar cꞌal bꞌey stiꞌlaj jaꞌ Jordán xin,
jaꞌ tituꞌ caan ebꞌ Cananeo,
ẍi ebꞌ.
30 Jix lawi tuꞌ,
jix yalon naj Caleb tet masanil ebꞌ Israel linan oc sattaj naj Moisés tuꞌ,
tol tzꞌin cꞌal ẍi ebꞌ,
catuꞌ jix yalon jaxca tiꞌ:
—¡Jaꞌ tinaniꞌ toonwej!
¡Toonwej kil jun txꞌotxꞌ tuꞌ,
jaꞌ ebꞌ ánima eey sat txꞌotxꞌ txꞌotxꞌ tuꞌ oj el ebꞌ kujteni,
yutol ecꞌbꞌan cu jelanil tet ebꞌ!
ẍi naj Caleb tuꞌ.
31 Catuꞌ jix takꞌwi wanxa ebꞌ naj jix bꞌet yetoj naj tuꞌ jaxca tiꞌ:
—Ma skeꞌ kakꞌlen jowal yetoj ebꞌ ánima tuꞌ,
yutol caw ecꞌbꞌan sjelanil ebꞌ naj ey jon,
ẍi ebꞌ naj.
32 Catuꞌ jix yalon ebꞌ naj xol ebꞌ conobꞌ Israel,
tol jaꞌ jun txꞌotxꞌ jix bꞌet yilecꞌ ebꞌ tuꞌ caw pena txꞌotxꞌ,
jix yalon pax ebꞌ:
—Jaꞌ txꞌotxꞌ jix bꞌet kilecꞌ tuꞌ jon caw cꞌuun scam ánima yu txꞌotxꞌ,
jaꞌ masanil ebꞌ ánima tuꞌ,
caw mimej winaj cꞌal el ebꞌ.
33 Catuꞌ jix kilon cꞌal pax ebꞌ naj mimej steel,
jaꞌ tituꞌ ey ebꞌ yicꞌaal Anac.
Jaꞌ yet chi cu oc tecꞌan scꞌatan ebꞌ naj,
laan wal jon jaxca junoj noꞌ kochiꞌ noꞌ queytuꞌ chi kun oc linan xol yajan ebꞌ naj.
Jacꞌalaꞌ quey pax tuꞌ chi yun cu yilon cꞌal pax oc ebꞌ naj,
ẍi ebꞌ.