2 Ey jun cꞌual jix yal ix Rut tet ix Noemí jaxca tiꞌ:

—Chaꞌ jin toj, yet chin too bꞌey lalan skꞌuple a ixim cebada, tala chi ẍaꞌ scꞌul ebꞌ ey yet awo tuꞌ chin yambꞌatej jayebꞌoj yajan cu cebada, ẍi ix.

—Asiꞌ xin, ẍi ix Noemí tuꞌ.

3 Catuꞌ jix too ix Rut bꞌey lalan skꞌuple a ixim cebada tuꞌ. Jix cꞌal apni oc ix bꞌey xol yawo naj Booz, naj yican to sbꞌa yetoj naj camom Elimélec, jaꞌton naj smuꞌ ix. 4 Jaꞌ yet lalan sicꞌon a ixim cebada ix Rut, catuꞌ jix apni oc naj Booz, speto naj bꞌey conobꞌ Belén, jix yalon naj tet ebꞌ smulnawom jaxca tiꞌ:

—Jaꞌ ojabꞌ Dios chi colwa je yetoj, ẍi naj.

—Yakꞌ ojabꞌ swatxꞌcꞌulal Dios ey jaach, ẍi ebꞌ smulnawom naj tet.

5 Catuꞌ jix skꞌanlen naj Booz tuꞌ tet naj eyoc yilomaloj smulnail tuꞌ:

—¿Mactxequel ey yet jun ix kꞌopo tuꞌ? ẍi naj.

6 Catuꞌ jix takꞌwi naj yilomal mulnail tuꞌ tet naj:

—Jaꞌton ix Rut, ix a Moab jix jul yetoj ix Noemí. 7 Jaꞌ yet skꞌinibꞌ jix skꞌanle ix ey jin an, ta chi skeꞌ yecꞌ syambꞌan a cebada ix yintaj ebꞌ naj mulnawom tiꞌ, cꞌam cꞌal chi sbꞌej ix sicꞌon a ixim chi cancan yu ebꞌ naj mulnawom tiꞌ, caw lalan cꞌal smulna ix, yet tax cꞌal jix kꞌinibꞌi jix el yich smulna ix, asanne jun txolan jix xew ix, ẍi naj eyoc yilomaloj ebꞌ mulnawom tuꞌ.

8 Jix lawi tuꞌ, jix too naj Booz scꞌatan ix Rut tuꞌ, jix yalon naj jaxca tiꞌ:

—Jaach cutzꞌin, abꞌ tzet chi wal ey jaach: Cꞌam ojabꞌxa chi too ja yambꞌa a ixim cebada bꞌey xol junojxa tujan awo, canan can yetoj ebꞌ ix wakꞌomal servil chi mulna bꞌey xol jin awo tiꞌ, ẍi naj tet ix. 9 Oj jaach toj yetoj ebꞌ ix bꞌey chi kꞌupwi cebada ebꞌ naj jin mulnawom. Jix wal tet ebꞌ achꞌe winaj tol cꞌam chach yetne ebꞌ. Jaꞌ yet ey ja tajin tiꞌal, chi skeꞌ ja wiꞌon eltej jaꞌ jaꞌ, ja wucꞌ yul mooc tiꞌ, ẍi naj tet ix.

10 Jaꞌ yet jix yabꞌen ix jaxca tuꞌ, catuꞌ jix ey noan ix sat txꞌotxꞌ sattaj naj, catuꞌ jix yalon yu diosalil ix tet naj. Jix skꞌanlen ix tet naj jaxca tiꞌ:

—¿Tzet yuxan caw cha txꞌox ja watxꞌcꞌulal ey jin an? Yutol jain tiꞌ, txꞌoj conobꞌal jin an, ẍi ix. 11 Catuꞌ jix takꞌwi naj Booz jaxca tiꞌ:

—Yutol jix wabꞌoc an, tol caw xaan cꞌal jix ja wil ix ja walibꞌ yet tax cꞌal jix cam naj ja wichamil, catuꞌ jix al-le ey jin an, tol jix ja bꞌejcan ja mam ja txutx yetoj cꞌal ja conobꞌ bꞌey alinaj jaach, jaxa tinaniꞌ chach jul caey ecꞌ cu xol tiꞌ jon, bꞌey jun conobꞌ tol man ja conobꞌoj. 12 Jaꞌ ojabꞌ cu Diosal jaon Israel jon tiꞌ, chi akꞌon spaj masanil ja watxꞌcꞌulal, yutol chi jul ja col ja bꞌa titiꞌ, ẍi naj Booz tet ix.

13 Catuꞌ jix takꞌwi ix tet naj:

—Caw watxꞌ ja cꞌul win an, caw miman chi tzala a jin cꞌul yu tzet cha wal ey jin, caxcꞌal man laan oj jin yetoj junoj ebꞌ ix ja wakꞌomal servil tiꞌ, ẍi ix Rut tet naj.

14 Jaꞌ yet jix apni oc yorail slow ebꞌ, jix awtele ix Rut low yu naj Booz, jix yalon naj jaxca tiꞌ:

—Titan loꞌ junoj ja pan ketoj jon. Laeytoj ja pan xol yal uva tiꞌ, ẍi naj tet ix.

Catuꞌ jix ey chotan ix scꞌatan ebꞌ mulnawom tuꞌ, jix yakꞌon ixim kꞌanbꞌinaj cebada naj tet ix. Caw jix low ix, masantaꞌcꞌal jix no scꞌul ix, caw eyto ma lawoj loꞌbꞌe tuꞌ yu ix, catuꞌ jix yiꞌontoj niꞌojxa ix tet yalibꞌ.

15 Jaꞌ yet jix too ix yambꞌa cebada tuꞌ junelxa, catuꞌ jix yalon naj Booz tuꞌ tet ebꞌ smulnawom jaxca tiꞌ:

—Chi skeꞌ sicꞌon a ix Rut jantaj ixim cebada chi pujcan ey xol ixim yin stopanil xa ye tuꞌ. 16 Catuꞌ chi skeꞌ je bꞌejon can junjunxa yajan ixim yet chi ecꞌ ix yiꞌon a yet. Cꞌam cꞌal mactxequel chi tenchanen ix, ẍi naj.

17 Jix mulna cꞌal ix Rut masantaꞌcꞌal jix too cꞌu. Jix lawi tuꞌ, jix smakꞌon el ixim cebada jix syambꞌa a ix yet jun cꞌu tuꞌ, ey mi oxebꞌoj almu ixim. 18 Jix lawi tuꞌ, catuꞌ jix meltzo ix bꞌey conobꞌ, jix too yakꞌon ix tet yalibꞌ jantaj ixim cebada jix yamcha yu ix yetoj wanxa loꞌbꞌe ma lawoj yu ix yet chuman.

19 —¿Caw miman tzet jix ja wiꞌtej? ¿Mactxequel ey yet awo bꞌey jix jaach bꞌet mulna tuꞌ? Ey ojabꞌ syaaxilal Dios yibꞌan jun mactxequel ey yet jun mulnail tuꞌ, ẍi ix Noemí. Catuꞌ jix takꞌwi ix Rut, jaꞌ bꞌey xꞌotxꞌ naj chi yij Booz, jix jin bꞌet mulna an, ẍi ix.

20 Jix yalon pax ix Noemí tuꞌ jaxca tiꞌ:

—Yakꞌ ojabꞌ syaaxilal Dios yibꞌan jun naj winaj tuꞌ, yutol caw watxꞌ scꞌul naj kin, jaxca jix yute xꞌoxon scamcꞌulal naj kin, cꞌal tet naj camom wichamil an. Yutol kicanto cu bꞌa yetoj naj, yuxan sowalil chi colwa naj kin,^a ẍi ix.

21 Jix yalon ix Rut tet ix jaxca tiꞌ:

—Jix yal naj ey jin an, tol chi skeꞌ jin too cꞌal jin sicꞌon ixim cebada tuꞌ, catuꞌ jaꞌ yetoj ebꞌ ix smulnawom naj oj jin toj an, masantaꞌcꞌal chi lawi a skꞌuple masanil yawo naj tuꞌ, ẍi ix.

22 —Catuꞌ jix takꞌwi ix Noemí tet ix jaxca tiꞌ: Caw watxꞌ jaach walibꞌ, ta tol asanne yetoj ebꞌ ix smulnawom naj tuꞌ chach eqꞌui. Cꞌam ojabꞌ chach too xol junojxa tujan awo, yet watxꞌ cꞌam mactxequel chach etneni, ẍi ix Noemí tuꞌ.

23 Jix lawi tuꞌ xin, jix too ix Rut yetoj ebꞌ smulnawom naj Booz, masantaꞌcꞌal yet jix lawi skꞌuple a ixim cebada yetoj ixim tiriw tuꞌ. Junne tocꞌal eyecꞌ ix Rut yetoj yalibꞌ tuꞌ.