—Jaach wuneꞌ, oj jin sey junoj ja wichamil catuꞌ chach can bꞌey ja na yetoj yin tzalacꞌulal. 2 Jaꞌ naj Booz, naj ey smulnawom bꞌey jix jaach bꞌet mulna tuꞌ, naj jix okꞌ scꞌul ja win. Jaꞌ tituꞌ eytoj naj sweyne bꞌey chi swaꞌne el ixim cebada. 3 Yuxan, yun ojabꞌ jaxca chi yun walon ey jaach: Aẍnan, catuꞌ cha waon oc ambꞌal sukꞌukꞌi yoc sabꞌ ja win, catuꞌ cha waon oc ja pichil caw sakꞌal yili, catuꞌ chach too bꞌey eyecꞌ naj tuꞌ, cꞌam ojabꞌ tocꞌal cha txꞌox ja bꞌa tet naj, masantaꞌcꞌal chi lawi slowi cꞌal yuqꞌuen jaꞌ naj. 4 Tucꞌal cha wil bꞌeytuꞌ chi ey telan naj, jaꞌ yet lalanxa swey naj, catuꞌ oj jaach toj ey telan bꞌey yajantaj naj tuꞌ, catuꞌ cha wiꞌon a niꞌoj stiꞌ xoow bꞌey yajantaj tuꞌ. Jaxa naj oj alon tzet oj ja wunne, ẍi ix Noemí tuꞌ.

5 Catuꞌ jix takꞌwi ix Rut jaxca tiꞌ:

—Oj wun masanil tzet jix ja wal ey jin tiꞌ an, ẍi ix. 6 Jaꞌ yet jun akꞌbꞌal tuꞌ jix too ix Rut bꞌey chi mulna naj Booz tuꞌ, jix sjije ix Rut tzet jix yal ix Noemí tuꞌ. 7 Jaꞌ yet jix lawi slow naj Booz tuꞌ yet yeycꞌualil, caw chi tzala scꞌul naj. Jix lawi tuꞌ, catuꞌ jix ey telan naj weyoj bꞌey scawilal bꞌey yaman sat yawo naj tuꞌ. Jaxa yet jix a cꞌal akꞌbꞌal xin, yin cꞌuancꞌulalil jix yun yapni oc ix Rut scꞌatan naj, catuꞌ jix iꞌle a stiꞌ xoow naj bꞌey yajantaj yu ix, catuꞌ jix ey telan ix wey bꞌey yajantaj naj tuꞌ. 8 Jaꞌ yet chuman akꞌbꞌal jix el sweyan naj Booz, jaxa yet jix tzꞌeyan naj, caw jix qꞌueya scꞌul naj yilon oc yin jun ix ix telan ey bꞌey yajantaj naj tuꞌ.

9 —¿Mac jaach txequel? ẍi naj.

—Jain Rut jin an, jain ja chejabꞌ jin an, jaach tiꞌ smoo chach colwa win an, yutol kicanto cu bꞌa ja wetoj, yuxan chi woche tol chach nupi wetoj an, ẍi ix tet naj.

10 —Jix yalon naj Booz tet ix: Yakꞌ ojabꞌ syaaxilal Dios ja wibꞌan. Jaꞌ tinaniꞌ jix naꞌcha el wu, yutol caw watxꞌ ja naꞌbꞌal, yet cha seyon ecꞌ tzetyetal watxꞌ, yet chi bꞌina can sbꞌi naj camom ja wichamil. Kꞌinaloj ta man jaxca oj tuꞌ cha wute, chim skeꞌ ja nupi yetoj junojxa yel xacꞌal tol achꞌeto jin sattaj, caxcꞌal mebꞌa ma bꞌeom junoj naj chach nupi yetoj, yutol ma yal ja cꞌul jix ja wun jaxca tuꞌ. 11 Tinaniꞌ manche jaach xiwi, yutol jaꞌ yul jin conobꞌ tiꞌ, otajbꞌil jaach, caw watxꞌ ja bꞌina yu ebꞌ ánima, yuxan oj wun tzet sowalil chi wun an, yet watxꞌ chi eloc jaxca cha woche. 12 Yel toni, kicanto cu bꞌa ja wetoj, asan xin eyto junxa naj yel xacꞌal jaachto oc yetoj. 13 Canan can yet jun akꞌbꞌal tiꞌ wetoj an. Jaꞌ yet skꞌinibꞌ yecal chi too jin kꞌanle tet naj, ta oj ẍaꞌ scꞌul naj snupi ja wetoj jaxca yalon sleyalil. Ta cꞌam chi yoche naj chi yun jaxca tuꞌ, chi wakꞌ jin tiꞌ sattaj Dios iquis tol chin nupi ja wetoj. Weyan tinaniꞌ, jato yet oj sajbꞌoj eloj, catuꞌ chach paxtoj, ẍi naj tet ix.

14 Yuxan jaꞌ yet jun akꞌbꞌal tuꞌ jix wey ix Rut bꞌey yajantaj naj Booz. Eyto wal sajbꞌi eloj, catuꞌ jix a waan ix, yet watxꞌ cꞌam chi yotajne el ebꞌ ánima, ta tol jix eecꞌ ix tituꞌ yet akꞌbꞌalil, jix yalon naj Booz jaxca tiꞌ: Cꞌam junoj mactxequel otajneni ta ey junoj ix ix jix julecꞌ titiꞌ, ẍi naj.

15 Catuꞌ jix yalon naj Booz tet ix jaxca tiꞌ:

—Iꞌel ja xotil tuꞌ ja win, catuꞌ cha pixon ey xaam an, ẍi naj tet ix.

Jaꞌ yet mitxꞌbꞌil a xaam an xotil ix tuꞌ yu, catuꞌ jix secon eytoj ixim cebada naj yul, ey mi caabꞌoj arroba yalil ixim cebada tuꞌ. Catuꞌ jix slacon atoj naj sjolom xicꞌ ix, catuꞌ jix too ix bꞌey sconobꞌ.

16 Jaꞌ yet jix apni oc ix bꞌey yalibꞌ tuꞌ xin, jix skꞌanlen yalibꞌ ix tuꞌ tet:

—¿Tzet ẍi xin jaach wuneꞌ? ẍi ix.

Catuꞌ jix yalon ix Rut masanil tzet jix yal naj Booz tet ix. 17 Jix yalon cꞌal ix jaxca tiꞌ:

—Jaꞌ ixim cebada tiꞌ jix yakꞌ naj ey jon, jix yalon naj ey jin tol cꞌam chi skeꞌ ja meltzo bꞌey sna ix ja walibꞌ yin tol cꞌam tzet iꞌbꞌil oc ja wu, ẍi ix.

18 Catuꞌ jix yalon ix Noemí tet ix Rut jaxca tiꞌ:

—Jaꞌ tinaniꞌ xin, echbꞌane masantaꞌcꞌal chi kabꞌ tzet chi elocoj, jaꞌ jun winaj tuꞌ man oj cu chaꞌ xewoj masantaꞌcꞌal chi waꞌxi yeoc jun kꞌane tuꞌ yet jun cꞌu tiꞌ, ẍi ix Noemí tuꞌ.