—Wuẍtaj, titan titiꞌ, eyan chotanoj, yutol oj jin kꞌanabꞌ ja wetoj, ẍi naj Booz tet naj.

Catuꞌ jix ey chotan ebꞌ kꞌanabꞌoj. 2 Jix lawi tuꞌ, catuꞌ jix awteletej laonwan ebꞌ icham winaj yul conobꞌ tuꞌ yu naj Booz, jix yalon naj tet ebꞌ tol chi oc ebꞌ naj yin testigoal. 3 Jix yalon naj Booz tuꞌ tet naj yican tuꞌ jaxca tiꞌ:

—Ja wotaj ix Noemí jaꞌton ix jix paxtej bꞌey txꞌotxꞌ Moab. Jaꞌ ix Noemí lalan xonon el txꞌotxꞌ txꞌotxꞌ yet kican camom Elimélec. 4 Yu jun tuꞌ, yuxan chi wal ey jaach an, tala cꞌuxan cha woche cha man txꞌotxꞌ. Ta oj ja man txꞌotxꞌ tinaniꞌ, yun ojabꞌ sattaj ebꞌ testigo tiꞌ. Akꞌ wotajne el tinaniꞌ ta cha man txꞌotxꞌ ma cꞌamaj, ta cꞌam cha man txꞌotxꞌ oj jin man txꞌotxꞌ jain tiꞌ, yutol ey walon wet ja wintaj. Catuꞌ jix takꞌwi naj yican tuꞌ jaxca tiꞌ: Oj jin man txꞌotxꞌ an, ẍi naj tet naj Booz.

5 Jix yalon naj Booz tuꞌ tet naj tzet utbꞌil yeocoj:

—Jaꞌ tinaniꞌ xin, ta cha man can el txꞌotxꞌ tet ix Noemí tuꞌ, sowalil chach nupi yetoj ix Rut a Moab, yet watxꞌ chi ali yuninal yet chi bꞌina can sbꞌi naj camom yichamil ix tuꞌ yin txꞌotxꞌ, ẍi naj Booz.

6 Jaꞌ yet jix yabꞌen oc naj tol jaxca tuꞌ yeocoj, catuꞌ jix yalon pax naj jaxca tiꞌ:

—Ta jaxca tuꞌ yeoc xin, cꞌam chi skeꞌ jin manon txꞌotxꞌ an. Tucꞌal tala wetne el jin bꞌa yin txꞌotxꞌ an. Yuxan ta cha woche cha man txꞌotxꞌ jaach tiꞌ, chi skeꞌ ja manon txꞌotxꞌ, chi wakꞌ jin tiꞌ yin txꞌotxꞌ ey jaach an, ẍi naj.

7 (Jaꞌ yet jun tiempoal tuꞌ, ey jun sbꞌeybꞌal ebꞌ Israel, ta tol ey junoj chi yakꞌ smajul tzetyetal tet junojxa eyto yu sbꞌa yetoj, yin jun tzetyetal chi smanaꞌ ma chi xoneloj, jaꞌ yet chi waꞌxi ey junoj kꞌane tuꞌ, chi yiꞌeltej xanabꞌ ebꞌ eyocoj, catuꞌ chi yakꞌon tet jun mactxequel tuꞌ, jaxca tuꞌ chi yun xeclo eloj, yet chi waꞌxi yeoc jun kꞌane tuꞌ.) 8 Jix lawi tuꞌ xin, jix yiꞌon eltej xanabꞌ jun yican naj Booz tuꞌ, catuꞌ jix yaontoj tet naj Booz tuꞌ, jix yalon jaxca tiꞌ:

—Jain chi walaꞌ, chi skeꞌ cha man can el txꞌotxꞌ txꞌotxꞌ tuꞌ, ẍi naj. 9 Jix lawi tuꞌ xin, jix yalon naj Booz tet ebꞌ icham winaj yeoc yul conobꞌ tuꞌ, yetoj cꞌal tet ebꞌ ánima bꞌulan ecꞌ tituꞌ, jix yalon naj jaxca tiꞌ:

—Je masanil jaex tiꞌ, testigo che yun can ocoj, tol oj jin man can el txꞌotxꞌ txꞌotxꞌ tet ix Noemí tiꞌ, txꞌotxꞌ yet naj camom Elimélec, cꞌal Quelión, cꞌal camom Mahlón. 10 Jacꞌalaꞌ testigo pax che yun can ocoj, tol oj jin nupoj yetoj ix Rut a Moab tiꞌ, ix camnajxa yichamil tiꞌ, yet watxꞌ oj bꞌina can sbꞌi naj camom yichamil ix yin txꞌotxꞌ yet oj bꞌey cꞌaltoj, yet watxꞌ man oj qꞌueyel sbꞌi naj Mahlón tuꞌ xol ebꞌ yican, cꞌal bꞌey yul sconobꞌ, yuxan testigo che yun can oc yin jun kꞌane tiꞌ, ẍi naj Booz tuꞌ tet ebꞌ.

11 Catuꞌ jix takꞌwi ebꞌ icham winaj yeoc yul conobꞌ tuꞌ, cꞌal masanil ebꞌ yaman ecꞌ tituꞌ:

—Yel toni, testigo chi kun can oc jon. Yakꞌ ojabꞌ syaaxilal Dios yibꞌan ix ix tuꞌ, catuꞌ chi oc cantoj ix yul ja na. Laan ojabꞌ oj yun yeloc ix jaxca ix Raquel, cꞌal ix Lía bꞌey titnaj kicꞌaal jaon Israel jon tiꞌ. Jacꞌalaꞌ pax jaach tiꞌ, miman ojabꞌ oj yun ja bꞌina yul yet txꞌotxꞌ Efrata, cꞌal bꞌey conobꞌ Belén tiꞌ. 12 Ecꞌal ojabꞌ sbꞌisil ja wuninal oj yakꞌ Dios yetoj jun ix ix tiꞌ, chꞌibꞌ ojabꞌ cꞌal ebꞌ ja wicꞌaal yetoj ix, jaxca jix yun ẍꞌibꞌ sbꞌisil yicꞌaal naj Fares scꞌaal Judá, naj yuneꞌ ix Tamar, ẍi ebꞌ naj.

13 Jaxca tuꞌ jix yun snupi naj Booz yetoj ix Rut. Jix lawi tuꞌ xin, catuꞌ jix wey naj yetoj ix, jix yakꞌon syaaxilal Jehová yibꞌan ix, jix yijon oc yuneꞌ ix, jix lawi tuꞌ, catuꞌ jix ali jun yuneꞌ ix.

14 Catuꞌ jix yalon masanil ebꞌ ix ix caan bꞌey Belén tuꞌ yin ix Noemí jaxca tiꞌ:

—Al-le ojabꞌ watxꞌ kꞌane tet Dios, yutol jaꞌ Naj jix akꞌon jun ja witxiquin. Jaꞌ yet oj chꞌibꞌa naj, miman ojabꞌ oj yun sbꞌina sbꞌi naj yul conobꞌ Israel tiꞌ. 15 Jaꞌ naj oj jaach aon oc yin tzalacꞌulal, jaꞌ naj oj jaach ilon yet oj jaach oc yin ixnamil ixal, yutol yuneꞌ ix ja walibꞌ naj. Jaꞌton ix caw ey scamcꞌulal ja win, ecꞌbꞌan xacꞌal scamcꞌulal ix yintaj tol ey jujwanoj ja wuneꞌ, ẍi ebꞌ tet ix.

16 Jix lawi tuꞌ, jix ẍelon a naj unin ix Noemí tuꞌ, caw chi tzala ix yetoj, jaxca tol scaabꞌ yuneꞌ ix yeocoj, jaꞌ ix Noemí tuꞌ jix ilon chꞌibꞌ naj unin tuꞌ. 17 Jaꞌ yet jix yilon ebꞌ ix ix caan scawilal ix tuꞌ, jix yalon ebꞌ jaxca tiꞌ:

—Jaxca wal tol jix ali jun yuneꞌ ix Noemí, ẍi ebꞌ ix. Catuꞌ jix yakꞌon ebꞌ ix yij sbꞌi jun unin tuꞌ, Obed. Jaꞌton smam naj Jesé, smam icham naj rey David.

18 Jaꞌton ebꞌ yichmam naj rey David yin xolilal tiꞌ, chi ẍaꞌel yich yin naj Fares: Fares, jaꞌton smam Hesrón 19 naj Hesrón jaꞌton smam naj Ram, jaꞌ naj Ram jaꞌton smam Aminadab, 20 jaꞌ naj Aminadab jaꞌton smam Nahasón, jaꞌ Nahasón jaꞌton smam naj Salmón. 21 Salmón jaꞌton smam Booz, naj Booz jaꞌton smam Obed, 22 naj Obed jaꞌton smam naj Jesé, jaxa Jesé smam naj rey David.