—¿Tzet chi jul yun wan Hebreo tuꞌ titiꞌ?

Jix takꞌwi naj Aquís tet ebꞌ jaxca tiꞌ:

—Jaꞌton David, naj yakꞌomal servil Saúl, sreyal ebꞌ Israel. Ecꞌalxa abꞌil yeecꞌ ebꞌ naj wetoj titiꞌ. Yet tax cꞌal jix jul naj wetoj an, cꞌam cꞌal bꞌey chi yun junoj spenail chi wilaꞌ, ẍi naj.

4 Yu jun tuꞌ, jix tit sjowal ebꞌ syaawil ebꞌ soldado Filisteo tuꞌ yin naj rey Aquís, jix yalon ebꞌ jaxca tiꞌ:

—Al tet ebꞌ tol chi meltzotoj ebꞌ bꞌey sconobꞌ jix ja wakꞌ tet ebꞌ, cꞌam chi skeꞌ stoo ebꞌ ketoj yin jowal tuꞌ, jaxa tala chi yunne, chi pakꞌoc ebꞌ naj kin xol jowal tuꞌ. Tala chi yoche David chi can watxꞌil yul sat naj Saúl tuꞌ, tala cꞌuxan chi makꞌle cam jaywanoj cu soldado tiꞌ yu ebꞌ, ẍi ebꞌ naj. 5 Yutol jaꞌ yin jun David tiꞌ jix bꞌitnele yu ebꞌ ix ix yet chi canalwi ebꞌ ix, yet jix yalon ebꞌ ix jaxca tiꞌ: Jaꞌ naj Saúl ecꞌbꞌan mil ebꞌ jix smakꞌ camoj, jal pax naj David xin, ecꞌbꞌan 10,000 ebꞌ jix smakꞌ camoj, ẍi ebꞌ ix.

6 Catuꞌ jix awtele naj David yu naj Aquís, jix yalon jaxca tiꞌ:

—Chi yil Jehová, tol caw watxꞌ ja naꞌbꞌal, caw wal jix ẍaꞌ jin cꞌul ja bꞌeybꞌal yet ey jaach ecꞌ bꞌey bꞌulan jon ecꞌ tiꞌ. Cꞌam cꞌal niꞌoj spenail jix ilcha el ja win wu an, yet tax cꞌal jix jaach jul ey jin tiꞌ an, masantaꞌcꞌal tinaniꞌ. Asan xin, jaꞌ ebꞌ wet yaawil tiꞌ an, cꞌam chi yal scꞌul ebꞌ chach too yetoj ebꞌ yin jowal tuꞌ. 7 Yu tuꞌ xin, paxantoj yin tzalacꞌulal, yet watxꞌ man penaoj chi yabꞌ ebꞌ naj, ẍi naj Aquís tet naj David.

8 Jix yalon David jaxca tiꞌ:

—¿Tzetyetal jix wunne? ¿Tzetyetal jix ilcha el win ja wu jaach rey Aquís, yet ey jin ecꞌ ja wetoj yet jun tiempoal tiꞌ, yu jun tuꞌ, tzet yu, yuxan cꞌam chin ja chaꞌtoj wakꞌon jowal yin mactxequel tol chi jowi oc ja win? ẍi naj David.

9 Jix takꞌwi naj Aquís, jix yaloni:

—Jain tiꞌ chi waoc yin jin cꞌul tol caw watxꞌ jaach, laan jaach jaxca junoj ángel yet Dios, jal ebꞌ wet yaawil tiꞌ chi yalaꞌ, tol cꞌam chi skeꞌ ja woc cu xol yin jowal tiꞌ. 10 Yu jun tuꞌ, yuxan jaꞌ yet chi kꞌinibꞌi yet yecal chach meltzo yetoj ebꞌ ja soldado jaꞌjun ja wetoj tiꞌ, jaꞌton ebꞌ yakꞌomal servil naj ja yaawil. Yuxan chex pax toj yet skꞌinibꞌ yecal tuꞌ, ẍi naj tet ebꞌ.

11 Queytuꞌ jix yun smeltzo naj David yetoj ebꞌ soldado yet jix kꞌinibꞌi a yet junxa cꞌual bꞌey xꞌotxꞌ ebꞌ Filisteo tuꞌ, jal ebꞌ naj Filisteo xin, jix toocan ebꞌ bꞌey Jezreel.