—Jaach tiꞌ, sowalil oj jaach toj wetoj yin jowal yetoj ebꞌ jaꞌjun ja wetoj tiꞌ, ẍi naj.

2 Jix takꞌwi naj David jaxca tiꞌ:

—Ye xin, jaꞌ tinaniꞌ jaach rey, oj ja wotajne eloj tzetyetal chi skeꞌ wu jain ja chejabꞌ jin tiꞌ, ẍi naj.

—Ta jaxca tuꞌ xin, oj jaach waoc jin teynemaloj yin junelne, ẍi naj Aquís tet David.

3 Jaꞌ yet jix cam naj Samuel, masanil ebꞌ Israel jix okꞌ ebꞌ yu scamichal naj. Jatuꞌ jix mujle can naj bꞌey conobꞌ Ramá. Yutol xax ujtele el ebꞌ chi naꞌon el junoj kꞌane cꞌal ebꞌ chi kꞌanabꞌ yetoj spixan camom yu naj Saúl bꞌey conobꞌ Israel.

4 Jaꞌ jix yunne, jix syambꞌa oc sbꞌa ebꞌ Filisteo, jix too swaꞌne ey bꞌulan sbꞌa ebꞌ bꞌey Sunem. Jacꞌalaꞌ jix yambꞌale cꞌal pax oc masanil ebꞌ Israel yu naj Saúl, jaꞌ bꞌey Guilboa jix syambꞌa oc sbꞌa ebꞌ. 5 Jaꞌ yet jix yilontoj naj Saúl bꞌey bꞌulan ey ebꞌ Filisteo tuꞌ, yel xacꞌal jix xiwa naj. 6 Yu jun tuꞌ, yuxan jix skꞌanle naj tet Jehová, ma xacꞌal takꞌwoj tet naj yin weyicheal, cꞌal tet ebꞌ ẍejabꞌ Dios. 7 Yu jun tuꞌ, jix yalon naj Saúl tet ebꞌ yakꞌomal servil jaxca tiꞌ:

—Seywej junoj ix ix tol chi skeꞌ skꞌanabꞌ yetoj spixan camom, yet watxꞌ jaꞌ tet oj jin kꞌanlen jin naꞌbꞌal, ẍi naj.

Jix takꞌwi ebꞌ eyoc yin opiso tuꞌ yetoj jaxca tiꞌ:

—Jaꞌ bꞌey Endor, ey jun ix ix chi skeꞌ skꞌanabꞌ yetoj spixan camom, ẍi ebꞌ tet naj.

8 Jix sqꞌuexon el spichil chi skꞌan naj Saúl yin sreyal, catuꞌ jix yiꞌontoj cawanxa winaj yetoj, jix too yilon jun ix tuꞌ yet akꞌbꞌalil, jix yalon tet jaxca tiꞌ:

—Chin kꞌanle ey jaach tol cha wawte spixan jun mactxequel chi woche chin kꞌanabꞌ yetoj, ẍi naj Saúl.

9 Jix takꞌwi ix ix tuꞌ tet naj jaxca tiꞌ:

—Ja wotaj tzet jix utele ebꞌ tzꞌajan scꞌul cꞌal ebꞌ chi kꞌanabꞌ yetoj spixan camom yu naj Saúl, tol jix ujtele el ebꞌ yul conobꞌ tiꞌ yu naj. ¿Tzet yu, yuxan cha sey tzet chi yun weyqꞌueyi yet chin makꞌle camoj? ẍi jun ix tuꞌ tet naj.

10 Jix yalon naj Saúl jaxca tiꞌ:

—Chi wakꞌcan jin tiꞌ sattaj Jehová tol cꞌam tzet oj jaach ionoj, ẍi naj tet ix.

11 —¿Mac pax jun oj wawte spixan tuꞌ ja waloni? ẍi jun ix ix tuꞌ.

—Jaꞌton naj camom Samuel cha wawte spixan jin kꞌanaꞌ, ẍi naj tet ix.

12 Yet wal jun txolan tuꞌ jix yilon jun ix tuꞌ yin naj Samuel; caw wal ip xacꞌal yel yaw ix yu xiwcꞌulal, jix yalon ix tet naj Saúl jaxca tiꞌ:

13 —¿Tzet yu yuxan chin ja wetne an, ta jaach Saúl jaach tiꞌ? ẍi jun ix ix tuꞌ tet naj.

Jix takꞌwi naj rey Saúl tet ix:

—Cꞌam chach xiwi, ¿tzetyetal jun jix ja wil tuꞌ? ẍi naj tet ix.

—Ey jun spixan camom jix wil yaol yul txꞌotxꞌ tiꞌ, ẍi jun ix tuꞌ.

14 —¿Tzet utbꞌil yili? ẍi naj Saúl tuꞌ.

—Ey jun winaj caw icham winajxa eyoc jun jojan pichile yu, ẍi jun ix ix tuꞌ.

Jix naꞌcha el yu naj Saúl tuꞌ tol jaꞌton naj Samuel jix xꞌox sbꞌa; yu jun tuꞌ, yuxan jix ey noan naj sat txꞌotxꞌ. 15 Jix yalon naj Samuel tet Saúl jaxca tiꞌ:

—¿Tzet yu, yuxan chin ja wetne yu chin ja wawte? ẍi naj.

Jix takꞌwi naj Saúl jaxca tiꞌ:

—Caw ey jin oc yin xiwcꞌulal an, yutol caw chi tit ebꞌ naj Filisteo win an, manxa eyoj oc Jehová wetoj an, cꞌamxa chi takꞌwi Naj ey jin an, cꞌamxa cꞌal chi takꞌwi niꞌoj Naj yet chin kꞌanle tet ebꞌ ẍejabꞌ Dios, tam wal yin weyicheal, yuxan chach wawte yet cha walon ey jin tzet wal oj wute jin bꞌa, ẍi naj tet Samuel.

16 Jix takꞌwi naj Samuel jaxca tiꞌ:

—Ta ma takꞌwoj Jehová ey jaach, ¿tzet yu, yuxan jaꞌ ey jin cha kꞌanle? Jaꞌ tinaniꞌ jaxca tol ja cajat ja bꞌa yetoj Jehová, yuxan jix jaach bꞌejlecan yu. 17 Lalanxa yunen tzet jix yal Jehová tol jix wal ey jaach an. Yutol tuxa oj yiꞌecꞌ ja wopiso yul ja kꞌabꞌ, jaxa yul skꞌabꞌ naj David oj oc canoj. 18 Yutol ma ja jije ja qꞌueyon el ebꞌ Amalecita yet jix yalon Jehová ey jaach, yu jun tuꞌ jix jaach bꞌejlecan yu. 19 Jaꞌ Jehová oj jaach aon oc yul skꞌabꞌ ebꞌ Filisteo yetoj ebꞌ conobꞌ, yuxan jaꞌ yet yecal chach jul yetoj ebꞌ ja cꞌaal wetoj bꞌey ey jon ecꞌ jaon camnaj jon xa tiꞌ, yutol jaꞌ Jehová oj aon oc ebꞌ soldado Israel yul skꞌabꞌ ebꞌ Filisteo, ẍi naj Samuel.

20 Jaꞌ yet jix yabꞌen naj Saúl jaxca tuꞌ, jix telcꞌotoj naj. Caw wal jix xiwa naj yu tzet jix yal naj Samuel tuꞌ. Jix pax xacꞌal yip yutol ma low yet jun cꞌual tuꞌ, cꞌal yet jun akꞌbꞌal yet eyoc yul-laj bꞌe. 21 Yu jun tuꞌ, jaꞌ yet jix yilon jun ix ix tuꞌ tol jix calcha a snaꞌbꞌal naj, jix yalon ix tet naj jaxca tiꞌ:

—Jain ja wakꞌomal jin servil tiꞌ masanil tzet jix ja walaꞌ jix jin jije, caxcꞌal ey smey jin cam yu tzet jix wun tiꞌ. 22 Yu tuꞌ xin, abꞌ tzet chi walaꞌ: Oj wakꞌ niꞌoj tzet oj ja loꞌ, yet watxꞌ oj oc niꞌoj ja wip catuꞌ chach paxtoj, ẍi jun ix ix tuꞌ tet naj.

23 Ma cꞌal yal scꞌul naj Saúl chi lowi, jaxa ebꞌ yakꞌomal servil jaꞌjun yetoj, cꞌal jun ix ix tuꞌ, jix oc tean ebꞌ yin tol chi lowi. Jix a waan naj Saúl tuꞌ, catuꞌ jix ey chotan naj stiꞌ jun teꞌ txꞌat. 24 Jaꞌ jun ix tuꞌ, yin eymanil jix smakꞌ cam jun achꞌe wacax caw wal bꞌakꞌech eyecꞌ bꞌey sna ix tuꞌ, jix swaꞌne eloj, catuꞌ jix swaꞌnen cꞌal pax ixim pan tol cꞌam yich eeyoj. 25 Jix yiꞌontoj jun loꞌbꞌe tuꞌ ix tet naj Saúl cꞌal tet ebꞌ yakꞌomal servil jaꞌjun yetoj tuꞌ. Jaꞌ yet jix lawi slow ebꞌ, catuꞌ jix yalontoj sbꞌa ebꞌ tet jun ix ix tuꞌ, jix pax ebꞌ yet jun akꞌbꞌal tuꞌ.