Jix Caey Ecꞌ Naj David Bꞌey Xꞌotxꞌal Ebꞌ Filisteo
27
Jaxa naj David jix naꞌon jaxca tiꞌ: Ey mi wal bꞌakꞌin oj jin makꞌle cam yu naj Saúl tuꞌ, yuxan jaꞌ tzet chi wun tinaniꞌ an, watxꞌ chin too can bꞌey xꞌotxꞌ ebꞌ Filisteo, yet watxꞌ cꞌamxa chin seyle ecꞌ yu naj, queytuꞌ oj yun jin colcha el yul skꞌabꞌ, ẍi naj David. 2 Yuxan jix too naj David yetoj 600 ebꞌ soldado jaꞌjun yetoj, yet chi too yaoc sbꞌa ebꞌ yakꞌomal servil naj Aquís, scꞌaal Maoc, sreyal conobꞌ Gat. 3 Jix caey ecꞌ naj David yetoj naj Aquís bꞌey conobꞌ Gat, junjun cꞌal ebꞌ jix can yetoj yistil cꞌal yuninal. Jaꞌ naj David tuꞌ jix yiꞌtoj cawan yistil, jaꞌton ix Ahinóam a Jezreel, yetoj ix Abigail ix yistil naj camom Nabal, a conobꞌ Carmel. 4 Jaꞌ yet jix yabꞌen skꞌumal naj Saúl tol jix too naj bꞌey conobꞌ Gat, yu jun tuꞌ, ma xa ujtele ecꞌ naj David tuꞌ yu naj Saúl.5 Jix yalon naj David tet naj Aquís jaxca tiꞌ:
—Jaach rey, chi kꞌan ey jaach an, chioj wal el yin ja cꞌul tol chin can caan bꞌey junoj yaliẍ conobꞌ bꞌey yul ja nación tiꞌ. Yutol ma skeꞌ jin can caan ja wetoj bꞌey yul miman conobꞌ tiꞌ, ẍi naj David tuꞌ.
6 Jaꞌ yet jun cꞌual tuꞌ, jaꞌ naj Aquís, jix yakꞌon jun conobꞌ chi yij Siclag tet naj, yuxan jaꞌ conobꞌ Siclag tuꞌ, yet ebꞌ sreyal Judá yeocoj.
7 Jun abꞌil yetoj canebꞌ xꞌaaw yapni oc naj David yul yet ebꞌ Filisteo tuꞌ. 8 Catuꞌ jix eltej naj David yetoj ebꞌ soldado jaꞌjun yetoj, jix yujten eltej ebꞌ a Guesur, ebꞌ a Guézer, yetoj cꞌal ebꞌ Amalecita, jaꞌton ebꞌ tuꞌ mimanxa tiempo scaey ecꞌ bꞌey jun conobꞌ tuꞌ, bꞌey yetcꞌulaltoj conobꞌ Sur, masantaꞌcꞌal bꞌey txꞌotxꞌ Egipto. 9 Pilan jix makꞌle cam ebꞌ, ebꞌ winaj cꞌal ix ix yu ebꞌ. Jix yiꞌon cꞌal pax toj noꞌ wacax ebꞌ, noꞌ meꞌ, noꞌ bꞌuru, cꞌal noꞌ camello, yetoj cꞌal pax pichile. Jix lawi tuꞌ, jix meltzo pax tej ebꞌ bꞌey eyecꞌ naj Aquís. 10 Jix skꞌanle naj Aquís tet naj David jaxca tiꞌ: ¿Tzet conobꞌal jix je yakꞌ lawoj tinaniꞌ? ẍi naj. Jix yalon David tet naj jaxca tiꞌ: Jaꞌton bꞌey sur yul yet Judá, cꞌal bꞌey sur yet Jerahmeel, cꞌal bꞌey sur bꞌey xꞌotxꞌal ebꞌ Quenita, ẍi David.
11 Cꞌamxa junoj winaj tam wal junoj ebꞌ ix ix jix too cancan yin yiquisal yu naj David tuꞌ; junelne cꞌamxa mactxequel chi too alon bꞌey conobꞌ Gat tzet jix yunne. Jaꞌ yet jix caey cꞌal ecꞌ naj David bꞌey yul sconobꞌal ebꞌ Filisteo tuꞌ, quey cꞌal tuꞌ jix yun naj. 12 Jix yaon oc yipoj scꞌul naj Aquís yin David, jix snaꞌon naj jaxca tiꞌ: Tejan chi jowi xacꞌal oc ebꞌ yet Israelal yin David tiꞌ, ta jaxca tuꞌ, tejan oj can xacꞌal can naj yin jin yakꞌon servil, ẍi naj Aquís tuꞌ.