2 Yu tuꞌ xin, catuꞌ jix too naj Saúl yetoj 3,000 ebꞌ soldado jelan yin jowal xol ebꞌ Israel. Queytuꞌ jix yun stoo can ebꞌ bꞌey cusiltaj txꞌotxꞌ yul yet Zif, yu seyle ecꞌ naj David yu ebꞌ. 3 Catuꞌ jix swaꞌnen ey bꞌulan sbꞌa ebꞌ bꞌey jun tzalan chi yij Haquilá bꞌey chi ecꞌtoj sbꞌeal txꞌotxꞌ cusiltaj txꞌotxꞌ, jal naj David xin, jatuꞌ eyecꞌ naj bꞌey txꞌotxꞌ cusiltaj txꞌotxꞌ tuꞌ. Jix yabꞌeni tol lalan seyle ecꞌ yu naj Saúl tituꞌ, 4 yuxan jix ẍejtoj jaywan yilomal ta yel jix apni oc naj Saúl tuꞌ. 5 Jix lawi tuꞌ, jix too naj David bꞌey eyecꞌ naj Saúl tuꞌ, jix cam wal yilon bꞌeytuꞌ chi weyoc Saúl yetoj naj Abner, scꞌaal Ner, jaꞌton jun tuꞌ syaawil ebꞌ soldado naj Saúl. Jaxa jix yun xin, jaꞌ bꞌey snan xol bꞌey bꞌulan ey ebꞌ tuꞌ jatuꞌ chi wey naj Saúl, joyan oc ebꞌ soldado yinlaj naj. 6 Jix yalon naj David tet naj Ahimélec, Hitita cꞌal tet naj Abisai, yuneꞌ ix Seruiá,^a yuẍtaj sbꞌa yetoj naj Joab; jix yalon tet ebꞌ jaxca tiꞌ:

—¿Mactxequel bꞌejan scꞌul stoo wetoj bꞌey eyecꞌ naj Saúl? ẍi naj.

—Jain tiꞌ oj jin toj ja wetoj, ẍi naj Abisai.

7 Jaꞌ yet jun akꞌbꞌal tuꞌ, jix too naj David yetoj naj Abisai bꞌey bꞌulan ey ebꞌ tuꞌ. Jaꞌ naj Saúl lalan swey naj tituꞌ. Jaꞌ bꞌey sjolomtaj naj, jatuꞌ ey can ey chꞌen lanza, jejbꞌil can eytoj chꞌen yul txꞌotxꞌ. Jal pax naj Abner yetoj cꞌal masanil ebꞌ soldado chi wey ebꞌ bꞌey yinlaj naj tuꞌ. 8 Jix lawi tuꞌ, jix yalon naj Abisai tet naj David jaxca tiꞌ:

—Jaꞌ tinaniꞌ, jaꞌ Dios chi aon oc naj ja cajat yul ja kꞌabꞌ. Chioj wal el yin ja cꞌul chin makꞌ cam naj tinaniꞌ an; jaꞌ slanza naj tiꞌ chin jejeytoj xaamscꞌul masantaꞌcꞌal chi ecꞌ eytoj chꞌen yul txꞌotxꞌ, junocne chi wakꞌ tet, ẍi naj Abisai.

9 Jaxa stakꞌwi David jaxca tiꞌ:

—Manche ja makꞌ camoj, yutol yal cꞌal mactxequel chi makꞌon cam junoj naj rey tol sicꞌbꞌil el yu Jehová, jaꞌ jun tuꞌ sowalil chi jul syaꞌilal yibꞌan. 10 Jain tiꞌ chi wakꞌ jin tiꞌ tet Dios, tol jaꞌ ojabꞌ Naj oj akꞌon camoj, jam scamichal oj apnoj ocoj, ma xin ja xol jowal oj camoj. 11 Jaꞌ ojabꞌ Jehová cꞌam chi chaꞌon jin makꞌon cam naj rey tol sicꞌbꞌil el yu. Asan tol cha wiꞌtoj slanza eyecꞌ bꞌey sjolomtaj tuꞌ yetoj jun sneetal jaꞌ chi skꞌanaꞌ, catuꞌ chi cu toi, ẍi naj David.

12 Queytuꞌ jix yun yiꞌletej chꞌen lanza yetoj jun sneetal jaꞌ eyecꞌ bꞌey sjolomtaj naj Saúl tuꞌ yu naj David, catuꞌ jix tita; cꞌam cꞌal mactxequel jix iloni, cꞌam cꞌal mactxequel jix abꞌeni. Cꞌam mactxequel jix el sweyan; masanil ebꞌ camnaj sweyi, yutol jaꞌ Jehová jix aontej jun miman weyan yibꞌan ebꞌ. 13 Jix lawi tuꞌ xin, jix ecꞌtoj naj David bꞌey junxa spananil stiꞌ jobꞌe, catuꞌ jix atoj naj bꞌey jun tzalan naat eyaoj, yet watxꞌ, naat jix yun can xol ebꞌ. 14 Jaxa David caw ip jix yun yawi tet naj Abner cꞌal tet ebꞌ soldado naj rey tuꞌ:

—Abner, takꞌwan ey jin, ẍi naj David.

Catuꞌ jix takꞌwi naj Abner jaxca tiꞌ:

—¿Mac jaach txequel yuxan chach awi eytej tet naj rey? ẍi naj Abner.

15 Jix yalon David jaxca tiꞌ:

—¿Tumi man yeloj tol jaach tiꞌ caw jelan ja wakꞌon jowal xol ebꞌ soldado yet Israel? ¿Tzet yuxan tol cꞌam cha teyne naj ja reyal tuꞌ? Ey jun mactxequel jix octoj tituꞌ jix yoche jix makꞌle cam naj yu. 16 Caw wal man watxꞌoj jun cha wun tuꞌ. Jain tiꞌ chi wal sattaj Jehová tol je moo chex cam je masanil, yutol cꞌam che teyne naj rey sicꞌbꞌil el yu Jehová. Seyto wal je yil chꞌen slanza naj rey, yetoj jun sneetal jaꞌ eyecꞌ bꞌey sjolomtaj naj tuꞌ, oj je yilaꞌ ta oj ilcha je yu, ẍi naj David.

17 Jaꞌ yet jix yabꞌen naj Saúl tol jaꞌ yul snukꞌ naj David chi awi, catuꞌ jix a yaw naj:

—¿Tumi jaach David jaach chach awi tuꞌ, jaach tol jaxca jin cꞌaal ja weocoj? ẍi naj Saúl.

Jix takꞌwi David, jix yalon jaxca tiꞌ:

—Jaaꞌ, jain ton an jaach rey. 18 Yuxan jaꞌ tinaniꞌ xin, jaach rey, ¿tzet wal yu, yuxan chin ja wujte ecꞌ jain ja chejabꞌ jin tiꞌ? ¿Tzet junoj spenail jix wun ey jaach an? ¿Tzet jin mul jix oc ey jaach? 19 Chin oc tean ja win jaach rey, tol cha chaꞌ ja wabꞌ tzet oj wal jain ja chejabꞌ jin tiꞌ: Ta jaꞌ Jehová Dios jix jaach aon oc jin cajatoj, ta jaxca tuꞌ, tol oj wal chi yakꞌ mimancꞌulal Naj win, catuꞌ chi ẍaꞌon junoj jin saꞌbꞌeal Naj. Ta tol snaꞌbꞌal ánima jun tiꞌ xin, jaꞌ ojabꞌ Dios chi aon oc syaꞌilal yibꞌan. Tzet yu, yuxan chin ujtele ebꞌ yu sat jun txꞌotxꞌ txꞌotxꞌ tol yet Jehová yeocoj, jaxca xacꞌal tol chin tenle cantoj yu ebꞌ yet chi wakꞌon servil wan comon dios. 20 Cꞌam chi yoche jin cꞌul tol naat ey jin el scꞌatan Jehová yet chin cami. Jal jaach, jaach tiꞌ xin jaach rey, ¿tzet yuxan chin ja seyecꞌoj, jaxca wal junoj noꞌ kꞌaj chin ja wute, catuꞌ chin ja wujten ecꞌ bꞌey tzalquiltaj jaxca junoj noꞌ ubꞌ? ẍi naj David.

21 Catuꞌ jix yalon naj Saúl:

—Jaach David, jaxca tol jin cꞌaal jaach, chi wotajne eloj tol jain jix oc jin penail, jaxca xacꞌal junoj cꞌam snaꞌbꞌal chi wute jin bꞌa, caw jix jin comonli xacꞌal. Asan xin, toloj wal chach meltzo, catuꞌ manxa oj jaach jin seyecꞌoj, manxa oj wun spenail ja win, yutol jaꞌ yet jun cꞌu tiꞌ jix ja txꞌoxeloj tol ey weloc apnoj yul ja sat, ẍi naj Saúl.

22 Jix yalon pax naj David jaxca tiꞌ:

—Ti ey chꞌen ja lanza jaach rey, tit ojabꞌ junoj ebꞌ naj ja wakꞌomal servil tuꞌ, chi jul iꞌon chꞌen titiꞌ. 23 Jaꞌ ojabꞌ Jehová chi pajtzen ey jin yu jin watxꞌ naꞌbꞌal. Caxcꞌal jaꞌ tinaniꞌ, jix jaach yaoc Dios yul jin kꞌabꞌ, ma cꞌaltaꞌ yal jin cꞌul jix jaach jin makꞌ camoj, yutol jaꞌ Naj jix jaach sicꞌon oc yin ja wopiso. 24 Jaxca ton jix yun tinaniꞌ, caw miman ja weloc apnoj yul jin sat, queywal tuꞌ chi woche tol ey ojabꞌ weloc apnoj yul sat Jehová. Jaꞌ ojabꞌ chin colon el tet masanil syaꞌtajilal chi jul wibꞌan, ẍi naj David.

25 Jix a pax yaw naj Saúl junelxa, jix yalon jaxca tiꞌ:

—Ey ojabꞌ watxꞌcꞌulal ja win jaach David, jaach tol jaxca wal jin cꞌaal ja weocoj. Ey tzet miman yeloc apnoj oj ja wunne, watxꞌ cꞌal oj jaach elocoj, ẍi naj.

Jix lawi tuꞌ, jix meltzotoj naj Saúl bꞌey sna, catuꞌ jix too cꞌal pax naj David tuꞌ.