Scamichal Naj Samuel
25
Jix cam naj Samuel catuꞌ jix syambꞌan oc sbꞌa masanil ebꞌ yet Israelal. Caw wal jix okꞌ ebꞌ yu scamichal naj. Jatuꞌ jix muji can naj bꞌey Ramá, bꞌey sconobꞌ.David Yetoj Ix Abigail
Jix lawi tuꞌ jix toocan naj David bꞌey txꞌotxꞌ cusiltaj txꞌotxꞌ yul yet Parán.
2 Jaꞌ yul yet Maón ey jun winaj caw wal bꞌeom, ey oxebꞌ mil smeꞌ, jun mil noꞌ chiw. Ey xꞌotxꞌ naj bꞌey scawilal conobꞌ Carmel, jacꞌal tituꞌ chi stzujel xil smeꞌ naj. 3 Jaꞌ jun winaj tuꞌ chi yij Nabal, yicꞌaal Caleb, junelne caw pena snaꞌbꞌal. Jaxa yistil xin, chi yij Abigail. Jaꞌ jun ix tuꞌ caw watxꞌ yili ix, caw ey snaꞌbꞌal ix.
4 Jaꞌ yet eyecꞌ naj David bꞌey cusiltaj txꞌotxꞌ tuꞌ, jix yabꞌoc naj tol jaꞌ naj Nabal tuꞌ, eyecꞌ naj stzujel smeꞌ bꞌey Carmel, 5 yuxan jix ẍejtoj laonwan ebꞌ yakꞌomal servil yet chi too akꞌle scawil scꞌul naj Nabal tuꞌ, 6 yet chi too al-le wan kꞌane tiꞌ tet naj: Jix yalontoj David jaxca tiꞌ: Watxꞌ ojabꞌ cꞌal ja cꞌul yetoj masanil ebꞌ ja wuninal yetoj cꞌal ebꞌ ey yul ja na, yetoj masanil tzetyetal ey, ey jaach. 7 Jix wabꞌe tol abꞌ ey jaach ecꞌ ja tzujon noꞌ ja meꞌ. Ja wotaj cꞌal pax oj, tol jaꞌ ebꞌ naj chi ilon noꞌ ja meꞌ ey cꞌal ecꞌ ebꞌ ketoj bꞌey Carmel tiꞌ jon. Jaꞌ yet eyecꞌ ebꞌ ketoj titiꞌ, cꞌam niꞌoj tzet jix iꞌon ebꞌ, cꞌam pax niꞌoj tzet jix iꞌle ecꞌ tet ebꞌ. 8 Chi skeꞌ cha kꞌanle wan tuꞌ tet ebꞌ eyecꞌ titiꞌ. Jaꞌ ebꞌ tuꞌ oj skeꞌ yalon ebꞌ ey jaach, ẍi David. Scꞌual wal ja waon oc kꞌin yet chi cu jul tiꞌ jon, yuxan chi oc tean David ja win tol chon ja chaꞌ yin watxꞌcꞌulal, catuꞌ cha wakꞌon niꞌoj tzetyetal ey ey jaach tet naj David, jaꞌton naj ja watxꞌil ánima, je chi, ẍi naj David.
9 Jaꞌ yet jix apni oc ebꞌ naj yakꞌomal servil David tuꞌ bꞌey naj, catuꞌ jix yalon ebꞌ masanil tzet jix yaltoj David tuꞌ tet naj Nabal, jix lawi tuꞌ jix cancan ebꞌ yechbꞌanen spajtzebꞌal tuꞌ. 10 Jaxa naj Nabal tuꞌ xin, jix spajtze naj tet ebꞌ jaxca tiꞌ:
—¿Mactxequel jun David tuꞌ? ¿Mactxequel jun scꞌaal naj Jesé tuꞌ? Jaꞌ tinaniꞌ ecꞌal wan winaj chi ela bꞌey syaawil. 11 ¿Tumi oj skeꞌ wakꞌon sloꞌbꞌe, cꞌal jaꞌ, cꞌal ẍiꞌbꞌe ebꞌ naj jin tzujom meꞌ tiꞌ, tumi oj skeꞌ waontoj tet wan ánima man wotaj oj tuꞌ, man pax wotaj oj bꞌey chi kakꞌ stitocoj? ẍi naj.
12 Queytuꞌ jix yun smeltzo ebꞌ yakꞌomal servil David yul bꞌe junelxa. Jaꞌ yet jix apni oc ebꞌ scꞌatan naj David, jix yalon ebꞌ masanil tzet jix yal naj Nabal tuꞌ tet ebꞌ, 13 yuxan jix yal David tet ebꞌ soldado jaꞌjun yetoj:
—Je masanil, iꞌwej je yespada, ẍi naj.
Masanil ebꞌ winaj tuꞌ jix yaoc yespada ebꞌ yin snan, jix ya cꞌal pax oc yet David yin snan. Ey 400 ebꞌ soldado naj David, jaxa junxa 200 ebꞌ jix cancan teyne mitxꞌkꞌabꞌe. 14 Jaxa jix yun xin, ey jun ebꞌ naj yakꞌomal servil naj Nabal jix bꞌet alon tet ix Abigail, ix yistil naj Nabal tuꞌ:
—Jaꞌ bꞌey txꞌotxꞌ cusiltaj txꞌotxꞌ jix ẍejtej wan ẍejabꞌ naj David sjul kꞌanabꞌ yetoj naj chi kakꞌ servil tiꞌ jon, yet jix jul akꞌle scawil scꞌul naj yu ebꞌ. Jaxa jix yun xin, caw pena jix yute kꞌanabꞌ sbꞌa naj tet ebꞌ. 15 Jaꞌ wan winaj tuꞌ, caw watxꞌ cꞌal snaꞌbꞌal ebꞌ naj, caw watxꞌ jix yute snaꞌbꞌal ebꞌ naj kin jon yet jix cu ecꞌ cꞌal ilo meꞌ bꞌey eyecꞌ ebꞌ naj tuꞌ, cꞌam cꞌal tzet jix cu naꞌ niꞌoj jon. Cꞌam cꞌal bꞌey jix cu yetne ebꞌ naj jon, cꞌam cꞌal bꞌey jix yiꞌecꞌ tzetyetal ebꞌ ey jon, jon. 16 Tol jix cu steyne ebꞌ naj jon yet cꞌualil cꞌal yet akꞌbꞌalil yet chi cu teynen noꞌ meꞌ jon. 17 Jaxa naj ja wichamil tiꞌ, caw pena snaꞌbꞌal naj, caw cꞌam chi skeꞌ cu kꞌanabꞌ yetoj naj. Yu jun tuꞌ xin, naꞌ jaach tiꞌ, cha wil tzet cha wute, yutol caw ey tzetyetal oj tit kibꞌan je yetoj.
18 Jaxa ix Abigail tuꞌ, yin xacꞌal eymanil jix yiꞌontoj 200 ixim pan, caabꞌ neet nonaj yu yal uva, jocꞌon noꞌ kꞌanbꞌinaj meꞌ yetoj joebꞌ arroba ixim kꞌanbꞌinaj tiriw, yetoj 100 an tajin uva, yetoj cꞌal pax 200 teꞌ tajin higo tzajbꞌilxa eloj. Eyman jix yaoc ix yibꞌan noꞌ bꞌuru. 19 Jix yalon ix tet ebꞌ yakꞌomal servil tuꞌ jaxca tiꞌ:
—Bꞌabꞌanwejtoj jaex tiꞌ, oj xa jin tzajlo je yintaj yul-laj bꞌe, ẍi ix.
Cꞌam cꞌal niꞌoj tzet jix yalel ix tet yichamil tuꞌ.
20 Catuꞌ jix oc ix Abigail tuꞌ yibꞌan jun noꞌ bꞌuru, yin ewantajil jix yun stit ix, jix cꞌoli yeytej ix bꞌey jun tzalan. Yin eymanil jix yun yilontoj ix tol lalan stit naj David yetoj ebꞌ soldado sattaj ix, catuꞌ jix bꞌet chaꞌle ebꞌ naj yu ix.
21 Jaxa naj David tuꞌ, lalan snaꞌon naj: Caw naꞌbꞌa xacꞌal jix cu teyne stzetyetal naj Nabal tuꞌ bꞌey cusiltaj txꞌotxꞌ. Cꞌam cꞌal niꞌoj tzetyetal jix kiꞌecꞌoj. Caw pena xacꞌal chi yun spajtzen naj ey jon jaxca swatxꞌilal jix kun tet naj. 22 Jaꞌ ojabꞌ Dios chi aon oc jin yaꞌilal, ta cꞌam tocꞌal chin makꞌ cam naj Nabal yetoj masanil ebꞌ naj yican tuꞌ yet yecal yabꞌ jaxca tiꞌ.
23 Jaꞌ yet jix yilontoj ix Abigail tuꞌ naj David, jix eytej ix yibꞌan noꞌ bꞌuru, catuꞌ jix ey noan ix sat txꞌotxꞌ yu xꞌoxon el ix tol miman yeloc apnoj naj yul sat ix. 24 Eyman jix too ix bꞌey yajantaj naj, jix yalon ix jaxca tiꞌ:
—Jaꞌ ojabꞌ spenail jix yun naj wichamil ey jaach, jaꞌ ojabꞌ chi tit can wibꞌan an. Chin oc tean ja win tol chin ja chaꞌ kꞌanabꞌ niꞌoj, catuꞌ cha wabꞌen tzet oj walaꞌ. 25 Cꞌam ojabꞌ cha jije tzet chi yal naj Nabal tuꞌ. Jaꞌ jun winaj tuꞌ caw cꞌam snaꞌbꞌal, yuxan jaxca tuꞌ yoc sbꞌi, yuxan asan cꞌal spenail chi yalaꞌ. Jain ja wakꞌomal servil tiꞌ, ma wil sbꞌetecꞌ ebꞌ naj ja wakꞌomal servil jix ja chejaꞌ. 26 Jaꞌ tinaniꞌ xin, jaꞌ Jehová Dios jix jaach mitxꞌon oc tucanoj yet cha makꞌon cam ánima yu ja waon ecꞌ spaj yu spena naꞌbꞌal ebꞌ ey jaach. El ojabꞌ yin scꞌul Jehová tol jaꞌ ebꞌ chi jowi oc ja win cꞌal ebꞌ chach etneni, jaxca wal oj yun stit yibꞌan naj Nabal, quey ojabꞌ tuꞌ oj yun stit can yibꞌan ebꞌ. 27 Jal tinaniꞌ xin, chi wal ey jaach tol jaꞌ wan saꞌbꞌeal iꞌbꞌil oc wu tiꞌ an, cha poꞌoecꞌ je xol yetoj ebꞌ ja chejabꞌ jaꞌjun ja wetoj. 28 Catuꞌ cha wakꞌon mimancꞌulal win jain jin ja wakꞌomal servil tiꞌ. Caw yel jaꞌ Jehová oj jaach aon cꞌal oc yin ja wopiso yetoj ebꞌ ja wicꞌaal, ilaꞌ tol jaꞌ yu Jehová yuxan cha wakꞌ jowal tiꞌ. Yuxan cꞌam ojabꞌ bꞌakꞌin cha wil syaꞌilal. 29 Caxcꞌal ey mactxequel chach ujten ecꞌoj, catuꞌ chi yochen chach smakꞌ camoj, cꞌam tzet oj jaach ionoj; yutol ey jaach oc yul skꞌabꞌ Jehová cu Diosal. Jal pax ebꞌ chi jowi oc ja win xin, jaꞌ Jehová oj kꞌojon el ebꞌ jaxca junoj mactxequel chi kꞌojontoj junoj chꞌen yetoj jinich. 30 Jaxca tuꞌ xin, jaꞌ yet oj yunen Jehová masanil swatxꞌil jix yal can ja win, tol oj jaach oc yin yaawil bꞌey cu conobꞌ tiꞌ, 31 man oj cus ja cꞌul yutol ian cha makꞌ cam ebꞌ ánima tol cꞌam spenail, ma yu ja waon ecꞌ spaj yin ebꞌ chi jowi oc ja win. Jaꞌ yet oj jaach yiꞌon a can Jehová yetoj ja wopiso, chin ja naꞌtej jain ja wakꞌomal servil tiꞌ, ẍi ix tet naj.
32 Jix takꞌwi David tet ix jaxca tiꞌ:
—Al-le ojabꞌ watxꞌ kꞌane yin Jehová cu Diosal, jaon Israel jon tiꞌ, yutol jaꞌ jix jaach chejontej yet chin ja chaꞌon juloj. 33 Al-le ojabꞌ watxꞌ kꞌane ja win yutol caw watxꞌ ja naꞌbꞌal, yutol jaach chin ja tenoc tucan jin makꞌon cam ánima, cꞌal jin pajtzen jin bꞌa tet ebꞌ. 34 Jaꞌ tinaniꞌ chi wakꞌcan jin tiꞌ ey jaach sattaj Jehová, cu Diosal jaon Israel jon tiꞌ, jaꞌ Naj jix jin tenon oc tucan wunen spenail ja win, ta wal ma ja wakꞌ ja wip ja tita yet jix jin jul ja chaꞌoni, jaꞌ yet yecal manxa iquis oj naj Nabal cꞌamxa junoj yicꞌaal naj chi cani, ẍi naj David.
35 Jix lawi tuꞌ xin, jix ẍaꞌon ecꞌ naj David masanil tzettaj yetal iꞌbꞌil oc yu ix, jix yalon naj jaxca tiꞌ:
—Chi skeꞌ chach too bꞌey ja na yin tzalacꞌulal. Chi cam ja wiloni, jix wabꞌ tzet cha walaꞌ, oj jin jije tzet cha kꞌanaꞌ.
36 Jaꞌ yet jix meltzo ix Abigail bꞌey eyecꞌ naj Nabal, jix yilon ix tol eyoc jun kꞌin yu naj jaxca chi yun yoc junoj kꞌin yu ebꞌ rey; caw uqꞌuem an naj, caw chi tzala scꞌul naj, yu jun tuꞌ yuxan cꞌam cꞌal tzet jix yal ix tet naj, jato cꞌal yet junxa cꞌual jix yalel ix tet naj. 37 Jaꞌ yet jix kꞌinibꞌi a yet junxa cꞌu, yet jix waꞌxi el scꞌul naj Nabal tuꞌ yu an, catuꞌ jix yalon ix Abigail tzetyetal jix yunne, yuxan jix oc jun yaꞌbꞌil yin naj, jix sicbꞌican el smimanil naj yu. 38 Laonebꞌxa cꞌual syaꞌbꞌi ey naj, catuꞌ jix makꞌle cam naj yu Jehová. 39 Jaꞌ yet jix yabꞌen oc naj David tol xax cam naj Nabal tuꞌ, jix yalon naj jaxca tiꞌ:
—Al-le ojabꞌ watxꞌ kꞌane yin Jehová yutol jix spajtze tet naj camom Nabal yu tzet jix jin yute. Jaꞌcꞌal pax Jehová jix jin tenon tucan yin tzetyetal man watxꞌoj ian jix wunne, jacꞌal oc spenail naj camom Nabal tuꞌ jix tit can yibꞌan, ẍi naj.
Jix lawi tuꞌ catuꞌ jix ẍejontoj ebꞌ yakꞌomal servil naj David bꞌey ix Abigail yet chi too yalon ebꞌ tol chi yoche chi il-le ix yu naj yet chi oc ix yistiloj naj. 40 Jaꞌ yet jix apni oc ebꞌ yakꞌomal servil naj David bꞌey Carmel tuꞌ, jix kꞌanabꞌ ebꞌ yetoj ix, jix yalon ebꞌ jaxca tiꞌ:
—Jaꞌ Naj David jix cu chejontej ey jaach tiꞌ, yutol chi yoche naj tol chach oc yistiloj, ẍi ebꞌ tet ix.
41 Jix ey noan ix Abigail, jix yalon ix jaxca tiꞌ:
—Jain tiꞌ yakꞌomal xa servil David weocoj, bꞌejan jin cꞌul wunen tzet chi yal naj, ta chi skeꞌ, chin txꞌael yajan ebꞌ yakꞌomal servil naj, ta tol jaxca tuꞌ chi yal naj ey jin, ẍi ix.
42 Jaꞌ yet jix lawi yalon wan kꞌane tuꞌ ix, catuꞌ jix swaꞌnen xacꞌal el sbꞌa ix yin eymanil, jix tit jowan ebꞌ ix yakꞌomal servil ix yetoj, jix oc ix yibꞌan jun noꞌ bꞌuru jix oc tzajan yintaj ebꞌ yakꞌomal servil naj David. Queytuꞌ jix yun snupi ix yetoj naj, catuꞌ jix oc ix yistiloj naj David tuꞌ.