Jix Yakꞌ Mimancꞌulal Naj David Yin Naj Saúl
24
Jaꞌ yet jix meltzo naj Saúl yakꞌon jowal yetoj ebꞌ Filisteo, catuꞌ jix al-le tet naj tol eyecꞌ naj David bꞌey txꞌotxꞌ cusiltaj txꞌotxꞌ yul yet En-gadi. 2 Yu jun tuꞌ, yuxan jix sicꞌ el jun 3,000 ebꞌ soldado naj Saúl caw jelan yin jowal xol ebꞌ Israel, jix too seyle ecꞌ naj David yetoj ebꞌ soldado yu naj Saúl bꞌey satlaj chꞌen, bꞌey ey noꞌ xol-lajil teꞌ chiw. 3 Jaꞌ yet jix apni oc naj Saúl yetoj ebꞌ soldado tituꞌ, ey wan scolal noꞌ meꞌ bꞌey stiꞌ bꞌe tuꞌ, jaꞌ scawilal tuꞌ ey jun chꞌen nachꞌen, jix octoj naj Saúl txuloj yul stiꞌ jun chꞌen nachꞌen tuꞌ. Man yotaj oj naj ta jaꞌ tituꞌ eyoctoj naj David yetoj ebꞌ soldado. 4 Jaꞌ ebꞌ soldado jix alon tet David jaxca tiꞌ:—Jaꞌ tinaniꞌ chi eloc jaxca tzet jix yal can Jehová tol chi yaoc ebꞌ ja cajat yul ja kꞌabꞌ, jaach cha naꞌ tzet cha wute, ẍi ebꞌ tet naj.
Yin cꞌuancꞌulal jix yun stit naj David scꞌatan naj, catuꞌ jix jul spolon el stiꞌ an sjojan pichil naj Saúl tuꞌ. 5 Jix lawi yuten jaxca tuꞌ jix cus pax a scꞌul, 6 jix yalon tet ebꞌ soldado tuꞌ jaxca tiꞌ:
—Jaꞌ ojabꞌ Jehová ma chaꞌon jin makꞌon cam naj rey tiꞌ, yutol jaꞌ sicꞌnen oc naj yin reyal, ẍi David. 7 Queytuꞌ jix yun stenchanen ebꞌ soldado tuꞌ naj David. Ma yoche naj tol chi makꞌle cam Saúl tuꞌ yu ebꞌ; tucꞌal tꞌanan oc ebꞌ yin yet jix eltej naj yul chꞌen nachꞌen tuꞌ. 8 Catuꞌ jix eltej naj David yul chꞌen nachꞌen tuꞌ, jix tit tzajan naj yintaj Saúl, catuꞌ jix awitoj tet naj:
—Jaach yaaw, jaach rey, ẍi naj.
Catuꞌ jix meltzotoj tꞌanan naj Saúl yintaj, jix ey noan naj David, jix yalon jaxca tiꞌ:
9 —Jaach rey, ¿tzet yu, yuxan cha chaꞌ ja wabꞌ tet ebꞌ ánima chi aloni tol pena tzet chin naꞌoc ja win? 10 Jaꞌ tinaniꞌ, otajne eloj tol jaꞌ Jehová jix jaach aon oc yul jin kꞌabꞌ bꞌey yul jun chꞌen nachꞌen tiꞌ. Jaꞌ ebꞌ jin soldado jaꞌjun wetoj tiꞌ jix yal ebꞌ tol jaꞌ tituꞌ chach jin makꞌ camoj, ma yal jin cꞌul chi wun jaxca tuꞌ; yutol jix wakꞌ mimancꞌulal ja win, yutol jaꞌ Jehová jix jaach sicꞌon oc yin reyal. 11 Jaach rey, il ton abꞌ stiꞌ an ja jojan pichil eyoc yul jin kꞌabꞌ tiꞌ. Kꞌinaloj ta jix yal jin cꞌul jix jaach jin makꞌ camoj. Tinaniꞌ otajne eloj tol cꞌam junoj spenail chi naꞌoc ja win. Jaach tiꞌ chin ja seyecꞌoj, yet chin ja makꞌon camoj. 12 Yuxan jaꞌ ojabꞌ Jehová chi naꞌon oc kin cu cawanil. Jaꞌ ojabꞌ chi pajtzen ey jaach yu tzet chin ja wute. Jain tiꞌ cꞌam bꞌakꞌin oj jaach jin makꞌ camoj. 13 Ey jun kꞌane chi yal ebꞌ ánima yet peyxa jaxca tiꞌ: Jaꞌ spenail chi tit yibꞌan ebꞌ penawom, ẍi. Yu jun tuꞌ, yuxan cꞌam bꞌakꞌin oj waoc jin kꞌabꞌ ja win jaach rey. 14 Jaach sreyal conobꞌ Israel: ¿Mactxequel lalan ja seyon ecꞌ tuꞌ catuꞌ cha makꞌon cam ja waloni? jain tiꞌ, cꞌam niꞌoj weloc apnoj. Laan jin cꞌal jaxca noꞌ camnaj txꞌiꞌ, ma jaxca noꞌ kꞌaj. 15 Yu jun tuꞌ, yuxan jaꞌ ojabꞌ Jehová chi naꞌon oc kin cu cawanil mactxequel jon ey cu penail. Jaꞌ ojabꞌ Naj chi naꞌon oc win, catuꞌ chin scolon el yul ja kꞌabꞌ, ẍi David.
16 Jix lawi skꞌanabꞌ David tuꞌ, catuꞌ jix yalon Saúl jaxca tiꞌ:
—¿Tumi jaach David jaach tiꞌ, tol lalan ja kꞌanabꞌ wetoj tiꞌ? Jaxca wal jin cꞌaal jaach an, ẍi naj Saúl, catuꞌ jix okꞌa naj. 17 Jix yalon naj jaxca tiꞌ:
—Jaach tiꞌ caw wal jichan yeoc ja naꞌbꞌal, caw wal ey ja mimancꞌulal, yuxan ma jin ja makꞌ camoj. Caw watxꞌ jix yun ja pajtzen ey jin an, yu spenail chin naꞌoc ja win. 18 Jaꞌ tinaniꞌ cha txꞌoxeloj tol jaꞌ swatxꞌilal cha seyecꞌoj. Jaꞌ Jehová jix jin yaoc yul ja kꞌabꞌ, jal jaach ma jin ja makꞌ camoj. 19 Caw yel, cꞌam junoj mactxequel tol jaꞌ yet chi chaꞌlo el scajat yu catuꞌ chi sjajon eloj. Jaꞌ Jehová oj pajtzen ey jaach yu jun ja watxꞌcꞌulal tiꞌ win an. 20 Jix naꞌcha el wu tinaniꞌ an, tol jaach tiꞌ oj jaach oc yin reyal yibꞌan cu conobꞌ tiꞌ, cꞌam mactxequel oj skeꞌ yiꞌon ecꞌ ey jaach, yutol watxꞌ cꞌal oj jaach elocoj. 21 Akꞌ can ja tiꞌ ey jin tinaniꞌ, tol man oj ja qꞌueyel ebꞌ wicꞌaal, yetoj cꞌal ebꞌ eyto wu jin bꞌa yetoj, ẍi Saúl tuꞌ tet naj.
22 Jix yakꞌon can stiꞌ David, tet naj Saúl tuꞌ. Jix lawi tuꞌ, catuꞌ jix meltzotoj Saúl bꞌey sdespacho, jaxa pax naj David xin, yetoj cꞌal ebꞌ soldado, jix oc pax cantoj ebꞌ bꞌey yul chꞌen nachꞌen tuꞌ junelxa.