—¿Chim jin ja chaꞌtoj wakꞌ jowal yin wan Filisteo tiꞌ? ẍi naj.

Catuꞌ jix takꞌwi Jehová tet naj jaxca tiꞌ:

—Chi skeꞌ xin, asiꞌ akꞌ jowal tuꞌ, yet cha colon can el conobꞌ Queilá tiꞌ, ẍi Dios tet naj.

3 Jaꞌ ebꞌ winaj jaꞌjun yetoj naj David tuꞌ, jix yalon ebꞌ tet naj jaxca tiꞌ:

—Ilaꞌ tol yin xiwcꞌulal cꞌal ey jon ecꞌ bꞌey Judá tiꞌ, jajxa tam wal chi too kakꞌ jowal yetoj wan soldado ebꞌ Filisteo bꞌey conobꞌ Queilá tuꞌ, ẍi ebꞌ.

4 Yu jun tuꞌ, yuxan jix skꞌanle pax David junelxa tet Jehová. Jix takꞌwi pax Dios tet naj jaxca tiꞌ:

—Asiꞌ bꞌey conobꞌ Queilá. Jain oj waoc ebꞌ Filisteo tuꞌ yul ja kꞌabꞌ, ẍi Dios tet naj.

5 Jix too naj David bꞌey conobꞌ Queilá yetoj ebꞌ soldado jaꞌjun yetoj tuꞌ. Jaꞌ tituꞌ jix yakꞌ jowal yetoj ebꞌ Filisteo. Jix eyqꞌuey ebꞌ yu, jix yiꞌon can oc masanil noꞌ jobꞌbꞌeal noꞌ ebꞌ. Queytuꞌ jix yun scolcha can el ebꞌ caan bꞌey Queilá tuꞌ yu naj David yetoj ebꞌ jaꞌjun yetoj.

6 Jaꞌ naj Abiatar scꞌaal Ahimélec, jun jix elcan bꞌey jix oc camich tuꞌ, jaꞌ tituꞌ jix apni oc yintaj naj David bꞌey conobꞌ Queilá, iꞌbꞌil oc jun an camiẍe chaleco yu naj.

7 Jix lawi tuꞌ, jix al-le cꞌal pax yabꞌ naj Saúl tol jaꞌ bꞌey conobꞌ Queilá, jaꞌ tituꞌ eyecꞌ naj David. Jix snaꞌon naj jaxca tiꞌ: Jaꞌ tinaniꞌ tuxa jix ale oc jun David tiꞌ yul jin kꞌabꞌ yu Dios, yutol jix too smajche can octoj sbꞌa bꞌey yul jun conobꞌ caw watxꞌ yeoc smajil tuꞌ, ẍi naj Saúl.

8 Jix lawi tuꞌ, catuꞌ jix yawten naj Saúl masanil ebꞌ soldado, yet chi too sjoymone oc sbꞌa ebꞌ yin naj David yetoj ebꞌ soldado bꞌey conobꞌ Queilá tuꞌ. 9 Jaꞌ yet tuꞌ jix yabꞌen oc naj David, tol lalan stit naj Saúl yakꞌon jowal yin ebꞌ; yuxan jix yal tet jun yakꞌomal xaambꞌal chi yij Abiatar, tol chi yiꞌtej an camiẍe chaleco yet chi yakꞌon skꞌanlebꞌal ebꞌ tet Jehová. 10 Jix yalon naj David jaxca tiꞌ:

—Jaach Jehová, cu Diosal jaach jaon Israel jon tiꞌ, yutol jain ja chejabꞌ tiꞌ jix wabꞌocoj, tol jaꞌ naj Saúl lalan snaꞌon naj tol chi jul yakꞌ lawoj el conobꞌ Queilá tiꞌ jin yaꞌiloj, yetoj cꞌal jin jain tiꞌ. 11 ¿Oj mi jul naj Saúl tuꞌ jin jul seyon ecꞌ titiꞌ, jatacꞌalaꞌ jix yun wabꞌeni? ¿Oj mi jin yaoc ebꞌ caan bꞌey conobꞌ Queilá tiꞌ yul skꞌabꞌ naj? Yuxan chin oc tean ja win jaach Jehová cu Diosal jaon Israel jon tiꞌ, chi woche cha wal ey jin, ẍi naj David.

Jix yalon Jehová tet naj jaxca tiꞌ:

—Jaꞌ naj Saúl lalan stit naj yu yakꞌon jowal.

12 Jix skꞌanlen pax David tet Jehová junelxa: ¿Oj mi jin yaoc ebꞌ a conobꞌ Queilá tiꞌ yul skꞌabꞌ naj Saúl, yetoj cꞌal ebꞌ jin soldado tiꞌ?

Jix yalon pax Jehová jaxca tiꞌ:

—Yel toni, oj jex ale oc yul skꞌabꞌ naj Saúl tuꞌ yu ebꞌ ẍi Dios.

13 Queytuꞌ jix yun yel naj David yetoj ebꞌ soldado, ey mi junoj 600 ebꞌ. Cꞌamxa chi naꞌcha bꞌey chi kaꞌ stooc ebꞌ. Jaxa yet jix yabꞌen oc naj Saúl, tol jix el naj David bꞌey conobꞌ Queilá tuꞌ, ma xa toj naj Saúl tuꞌ yintaj naj David.

14 Yu jun tuꞌ xin, jix yewbꞌa el sbꞌa naj David bꞌey wan chꞌen nachꞌen bꞌey tzalquiltaj, bꞌey txꞌotxꞌ cusiltaj txꞌotxꞌ yul yet Zif. Caxcꞌal junjun cꞌu chi seyle ecꞌ naj David yu naj Saúl, jaꞌ Dios jix colon el naj David yul skꞌabꞌ naj Saúl tuꞌ. 15 Jix yabꞌen oc naj David tol chi seyle cꞌal ecꞌ yu naj Saúl yet chi makꞌle camoj, yuxan caw chi xiw naj. Yu jun tuꞌ, jix apni oc naj bꞌey chꞌen nachꞌen bꞌey Hores, bꞌey txꞌotxꞌ cusiltaj txꞌotxꞌ yul yet Zif.

16 Ey jun cꞌual jix bꞌet il-le ecꞌ naj David yu Jonatán bꞌey Hores tuꞌ, yet watxꞌ chi akꞌle stecꞌanil snaꞌbꞌal cꞌal yaon oc scꞌul naj yin Dios. 17 Jix yalon Jonatán jaxca tiꞌ:

—Cꞌam ojabꞌ chach xiwi, yutol man oj jaach ilcha oc yu naj jin mam tuꞌ. Yutol jaach tiꞌ, oj jaach oc cꞌaltaꞌ sreyaloj conobꞌ Israel tiꞌ, jain xa oj jin oc yet scaabꞌ yaawil ja wetoj. Jaꞌ jun tiꞌ yotaj xa naj jin mam tuꞌ, ẍi naj Jonatán.

18 Jix lawi tuꞌ, jix swaꞌne jun swa kꞌane ebꞌ sattaj Jehová junelxa. Jix meltzo naj Jonatán bꞌey sna; jal pax David xin, jix can cꞌal bꞌey Hores tuꞌ. 19 Jal pax ebꞌ ánima caan bꞌey Zif, jix too ebꞌ kꞌanabꞌ yetoj naj Saúl bꞌey Guibeá, jix yalon ebꞌ jaxca tiꞌ:

—Jaꞌ naj David, jatuꞌ ewan el naj bꞌey sat cu txꞌotxꞌ jon, bꞌey wan chꞌen nachꞌen ey bꞌey txꞌotxꞌ tzalquiltaj txꞌotxꞌ bꞌey Haquilá, bꞌey Hores, yetcꞌulal sur bꞌey cusiltaj txꞌotxꞌ. 20 Yu jun tuꞌ xin, yuxan ta cha woche chach too bꞌey eyecꞌ naj tuꞌ, chi cu txꞌox ey jaach bꞌeytuꞌ eyoc ecꞌ naj, ẍi ebꞌ tet naj.

21 Jix yalon Saúl tet ebꞌ jaxca tiꞌ:

—Yakꞌ ojabꞌ syaaxilal Jehová je yibꞌan, yutol chi yiloc je cꞌul win an. 22 Jaꞌ tinaniꞌ, chi wal ey jex tol chi too cam je yiloni, bꞌey wal tuꞌ eyoc ecꞌ naj, cꞌal yetoj mactxequel chi ilon yin tituꞌ, yutol chi al-le wabꞌe tol caw jelan naj scolon sbꞌa. 23 Chi cam wal je yiloni bꞌey wal tuꞌ ewan oc eloj, catuꞌ chi jul je yalon pax ey jin yin sjichanil, queytuꞌ chi yun jin too je yetoj. Ta caw wal yel eyecꞌ naj tituꞌ, oj jin sey cꞌal ecꞌ naj xol masanil sat xꞌotxꞌ ebꞌ yicꞌaal Judá, ẍi Saúl.

24 Catuꞌ jix yalon can too sbꞌa ebꞌ a Zif tuꞌ tet naj Saúl, jix too ebꞌ bꞌey sconobꞌ. Jal pax naj David xin, jatuꞌ eyecꞌ yetoj ebꞌ soldado bꞌey Maón bꞌey cusiltaj txꞌotxꞌ, bꞌey jun acꞌal bꞌey yetcꞌulal sur, 25 yuxan jix too seyle ecꞌ naj David yu naj Saúl yetoj ebꞌ soldado. Jaꞌ yet jix al-le jun tiꞌ tet naj David, jix eytej bꞌey sat chꞌen chꞌen tuꞌ, catuꞌ jix toocan bꞌey cusiltaj txꞌotxꞌ bꞌey Maón, yuxan jaꞌ yet jix yabꞌen naj Saúl jaxca tuꞌ, jix too bꞌey txꞌotxꞌ cusiltaj txꞌotxꞌ yul yet Maón, yet chi too seyle ecꞌ naj David tuꞌ yu naj. 26 Jaꞌ bꞌey spacꞌulal jun wonan tuꞌ, jaꞌ tituꞌ jix ecꞌtoj naj Saúl yetoj ebꞌ soldado. Jaꞌ bꞌey jun pacꞌxa, jatuꞌ chi too pax David yetoj ebꞌ soldado jaꞌjun yetoj, yet chi yakꞌon yip ebꞌ yel tet naj Saúl tuꞌ. Jaꞌ yet jix joycha ey David yu Saúl yetoj ebꞌ soldado tuꞌ, tuxa wal oj michꞌcha ebꞌ naj yu yaloni; 27 jaꞌ yet tuꞌ jix apni oc jun ẍejabꞌ naj Saúl, jix yaloni:

—Yin eymanil chach meltzo jaach rey, yutol jaꞌ ebꞌ Filisteo lalan smajbꞌan oc sbꞌa ebꞌ naj yul cu conobꞌ.

28 Queytuꞌ jix yun yoc tucan yujtele ecꞌ naj David tuꞌ yu naj Saúl, catuꞌ jix too yakꞌon jowal yetoj ebꞌ Filisteo tuꞌ. Yu jun tuꞌ, yuxan jix yij can sbꞌi jun nachꞌen tuꞌ jaxca tiꞌ: Nachꞌen yet poꞌolebꞌail.

29 Jix lawi tuꞌ, jix too David bꞌey wan chꞌen nachꞌenlaj caw ey smey bꞌey yul yet En-gadi.