3 Speto naj David tituꞌ, catuꞌ jix toocan naj bꞌey Mizpá, yul yet txꞌotxꞌ Moab; jix yalon tet naj sreyal Moab jaxca tiꞌ:

—Chin oc wal tean ja win, tol chi cancan naj jin mam cꞌal ix jin txutx ja wetoj masantaꞌcꞌal oj wil tzet oj yun Dios wetoj, ẍi naj David.

4 Queytuꞌ jix yun yiꞌontoj smam naj David tuꞌ sattaj naj sreyal Moab. Jaꞌ yetoj jix eyecꞌoj yajbꞌan eyecꞌ naj David scolon sbꞌa. 5 Jaꞌ naj ẍejabꞌ Dios chi yij Gad jix alon tet David jaxca tiꞌ:

—Manche jaach cancan titiꞌ yin ja colon ja bꞌa; yutol oj jaach toj masantaꞌcꞌal bꞌey yul yet Judá, ẍi naj Gad.

Queytuꞌ jix yun stoo naj David, masantaꞌcꞌal jix apni oc naj bꞌey jun txꞌotxꞌ eltzabꞌ yul yet Héret.

6 Ey jun cꞌual, chotan ey naj Saúl yich jun teꞌ tamarisco sbꞌi bꞌey snail scalubꞌal Jehová bꞌey Guibeá, lacbꞌil a slanza naj yu, joyan oc ebꞌ soldado yin. Jaꞌ yet tuꞌ jix yabꞌeni, tol jix il-le bꞌey eyecꞌ naj David yetoj ebꞌ soldado. 7 Yuxan jix yal tet ebꞌ soldado joyan oc yin tuꞌ jaxca tiꞌ:

—Jaꞌ tinaniꞌ jex yicꞌaal Benjamín, abꞌwej tzet oj walaꞌ: ¿Tumi che yaoc yin je cꞌul, tol jaꞌ jun scꞌaal naj Jesé tuꞌ, jaꞌ oj akꞌon je txꞌotxꞌ cꞌal je yuva? ¿Tumi wal je masanil oj jex oc xacꞌal yin capitanil yu? 8 Yuxan je masanil xacꞌal jaex tiꞌ chex jowi oc win an. Toj eyto junoj mactxequel chi alon ey jin an, ta tol jaꞌ naj jin cꞌaal jix yakꞌ swa kꞌane yetoj jun scꞌaal naj Jesé tuꞌ. Caw wal cꞌam junoj jex chex oc il niꞌoj wu an. Cꞌam junoj jex che yal ey jin ta tol jix oc naj jin cꞌaal tuꞌ yakꞌon scꞌul jun wakꞌomal servil tuꞌ yet chin smajon bꞌeytuꞌ chin ecꞌ ocoj, jaxca chin yute naj tinaniꞌ, ẍi naj Saúl tet ebꞌ.

9 Jaꞌ naj Doeg, Edomita, linan oc naj scꞌatan ebꞌ soldado Saúl, jix takꞌwi naj jaxca tiꞌ:

—Jain tiꞌ jix wil jun scꞌaal naj Jesé tuꞌ, yet jix ecꞌ naj bꞌey Nob. Jaꞌ tituꞌ jix apni oc scꞌatan naj Ahimélec scꞌaal naj Ahitub. 10 Jaꞌ naj Ahimélec tuꞌ jix kꞌanlen tet Jehová yu naj David tuꞌ, jix yakꞌon cꞌal pax loꞌbꞌe tet naj, jix yakꞌon pax can chꞌen yespada naj Goliat tet David tuꞌ, ẍi naj Doeg tuꞌ.

11 Queytuꞌ jix yun yawtele naj Ahimélec yu naj rey tuꞌ, yetoj cꞌal masanil ebꞌ yakꞌomal xaambꞌal bꞌey conobꞌ Nob tuꞌ, jaꞌton ebꞌ yican to sbꞌa yetoj naj Ahimélec tuꞌ. Jaꞌ yet jix apni oc ebꞌ masanil sattaj naj rey tuꞌ, 12 jix yalon naj rey Saúl tuꞌ tet naj Ahimélec jaxca tiꞌ:

—Jaach scꞌaal Ahitub, abꞌ tzet oj walaꞌ, ẍi naj Saúl.

—Ey jin ecꞌ yul ja kꞌabꞌ jaach rey, ẍi naj Ahimélec.

13 Jix skꞌanlen naj Saúl tet naj jaxca tiꞌ:

—¿Tzet yu, yuxan chach jowi oc win yetoj jun scꞌaal naj Jesé tuꞌ? Jaach jix ja wakꞌ sloꞌbꞌe, jix ja wakꞌon cꞌal pax jun chꞌen espada tet naj, catuꞌ jix ja kꞌanlen tet Dios yu, yet chi oc naj jin cajatoj, catuꞌ chi oc naj jin smajon bꞌey chin eqꞌui, jaxca ton chin yute naj tinaniꞌ, ẍi naj Saúl tuꞌ.

14 Jix lawi tuꞌ, jix takꞌwi naj Ahimélec tet naj rey jaxca tiꞌ:

—¿Jaach rey, mactxequel junoj xol ebꞌ ja wakꞌomal servil tiꞌ, yutol yel xacꞌal jijem jaxca naj David tuꞌ, yetoj cꞌal pax oj tol ja niꞌ yeoc naj, yaaw pax yeoc naj xol ebꞌ chach teyneni, caw chi iꞌle a can sbꞌi naj bꞌey ja despacho tiꞌ? 15 Tumi wal jin bꞌabꞌelto chin kꞌanle tet Dios yu naj David tuꞌ. Cꞌam cꞌal bꞌey chin jowi oc ja win jaach rey, yuxan cꞌam ojabꞌ tzet cha naꞌ win, cꞌal yin ebꞌ wican tiꞌ, yutol man wotaj oj tzet utbꞌil yeoc jun kꞌane tiꞌ, ẍi naj Ahimélec tuꞌ.

16 Catuꞌ jix yalon xacꞌal naj rey tet naj Ahimélec jaxca tiꞌ:

—Asan tol cha waoc yin ja cꞌul, tol oj jaach cam yetoj masanil ebꞌ ja wican tiꞌ, ẍi naj.

17 Jaꞌ yet jun txolan tuꞌ jix yalon naj rey tet ebꞌ chi teynen, jaxca tiꞌ:

—Makꞌwej cam masanil ebꞌ yakꞌomal xaambꞌal yet Jehová tiꞌ, yutol eyoc ebꞌ yetoj naj David. Yotaj ebꞌ, tol chi el ecꞌ jun David tuꞌ ey jin an, ma cꞌal yal niꞌoj ebꞌ naj wabꞌ an, ẍi naj Saúl tuꞌ.

Jaꞌ ebꞌ soldado chi teynen naj rey tuꞌ, ma yal scꞌul ebꞌ chi yaoc skꞌabꞌ yin ebꞌ yakꞌomal xaambꞌal yet Jehová tuꞌ. 18 Yu tuꞌ xin, jix yalon naj rey tet naj Doeg, Edomita jaxca tiꞌ:

—Makꞌ cam ebꞌ tuꞌ jaach tiꞌ, ẍi naj rey tet naj.

Queytuꞌ jix yun yoc ian naj Doeg smakꞌon cam ebꞌ yakꞌomal xaambꞌal tuꞌ. Jaꞌ yet jun tiempoal tuꞌ ey 85 ebꞌ jix smakꞌ camoj, jaꞌton ebꞌ naj chi aon oc an camiẍe chaleco, tol lino cꞌal eloj. 19 Yin eymanil, jix oc cꞌal pax toj bꞌey yul conobꞌ Nob, jaꞌton sconobꞌ ebꞌ yakꞌomal xaambꞌal tuꞌ. Jix makꞌle cam masanil ebꞌ winaj, ebꞌ ix ix, ebꞌ unin yetoj cꞌal ebꞌ unin tol to chi ali. Jix smakꞌon cꞌal pax cam noꞌ wacax ebꞌ, noꞌ bꞌuru yetoj cꞌal noꞌ smeꞌ ebꞌ. 20 Ey chꞌan junxa ebꞌ scꞌaal naj Ahimélec tuꞌ, jun chi yij Abiatar, jix tzaji yel bꞌey jix oc camich tuꞌ, jix toocan bꞌey eyecꞌ naj David. 21 Jaꞌ jix alon tet naj David, tol masanil ebꞌ yakꞌomal xaambꞌal yet Jehová, jix chejle makꞌle cam ebꞌ masanil yu naj Saúl. 22 Jix yalon naj David tet naj Abiatar jaxca tiꞌ:

—Jaꞌ jun tuꞌ wotajxa cꞌaltaꞌ an, yutol jix wil yet tuꞌ, tol eyecꞌ naj Doeg tituꞌ, yuxan wotaj tol jaꞌ jix alon tet naj Saúl tuꞌ. Jaꞌ tinaniꞌ jin yaꞌiloj an, yuxan jix cam masanil ebꞌ ja wican tuꞌ, 23 yu tuꞌ xin, canan can wetoj titiꞌ an; cꞌam ojabꞌ chach xiwi, yutol jaꞌ jun chi jowi oc ja win tuꞌ, chi jowi cꞌal pax oc win an; yuxan watxꞌ cꞌal ja we titiꞌ wetoj an.