—¿Tzet la yu, yuxan cꞌam junoj mactxequel jaꞌjun ja wetoj? ẍi naj tet.

2 Jix takꞌwi naj David jaxca tiꞌ:

—Yutol ey jun tzet jix yal naj rey Saúl ey jin, jaꞌ chi jul wunne; yuxan chi yoche tol cꞌam junoj mactxequel chi otajnen eloj; jaxa pax ebꞌ naj jaꞌjun wetoj tiꞌ an, jix wal tet ebꞌ bꞌeytuꞌ oj jin chaꞌle jin bꞌa yetoj ebꞌ. 3 Jaꞌ tinaniꞌ caw ey jin wail an, ¿ey mi niꞌoj tzet chi cu loꞌ ey jaach tiꞌ? Ta ey joebꞌoj ixim pan, ma junojxa tzetyetal eyecꞌ ja wu, akꞌ niꞌoj wet an, ẍi naj David.

4 Jix takꞌwi naj yakꞌomal xaambꞌal tuꞌ jaxca tiꞌ:

—Man comon pan oj ixim eyecꞌ wu an. Ey ixim, asanne ixim chi ale oc sattaj Jehová. Chi skeꞌ wakꞌon ixim ey jaach an, asantane watxꞌ yeoc ebꞌ naj jaꞌjun ja wetoj tuꞌ, jatacꞌalaꞌ yalon ley, ta cꞌam tzet jix yun ebꞌ naj yetoj yistil, ẍi naj yakꞌomal xaambꞌal tuꞌ tet naj.

5 Jix takꞌwi naj David tet naj jaxca tiꞌ:

—Cꞌamaj, caw naat ta ey can ebꞌ ix kistil tuꞌ jon, yet tax cꞌal ewi caabꞌi jix can ebꞌ ix tuꞌ. Caxcꞌal mi cꞌam wal yeloc apnoj jun cu chejbꞌanil tiꞌ jon, jatax yet jix cu tit jon, watxꞌ xacꞌaltaꞌ yeoc ebꞌ naj iꞌbꞌil oc wu tiꞌ an, jatacꞌalaꞌ yalon ley, yuxan yel xacꞌal watxꞌ yeoc ebꞌ naj tinaniꞌ, ẍi naj David.

6 Jix lawi tuꞌ xin, jix akꞌle ixim pan chi akꞌle sattaj Dios tet naj David yu naj yakꞌomal xaambꞌal tuꞌ. Cꞌam junojxa tujan ixim pan eyecꞌ yul skꞌabꞌ naj yakꞌomal xaambꞌal tuꞌ, asanxane ixim tuꞌ jix yiꞌeltej bꞌey snail scalubꞌal Jehová, jaxa ixim kꞌaxan pan jix oc sqꞌuexeloj ixim. 7 Jaꞌ yet jun cꞌu tuꞌ, eyecꞌ jun yakꞌomal servil naj Saúl bꞌey scawilal scalubꞌal Jehová tituꞌ, yutol ey tzet eyoc yibꞌan. Jaꞌ jun winaj tuꞌ, Edomita naj, Doeg sbꞌi naj, yaaw yeoc xol ebꞌ yilomal smeꞌ naj Saúl.

8 Jix yalon David tet naj Ahimélec jaxca tiꞌ:

—¿Ey mi junoj lanza, ma junoj chꞌen espada eyecꞌ ey jaach tiꞌ? Yutol yin xacꞌal eymanil jix yun jin ẍejontej naj rey, yuxan ma xacꞌal wiꞌtej wespada an, tam wal junojxa chꞌen mitxꞌkꞌabꞌe iꞌbꞌil oc wu an.

9 Catuꞌ jix takꞌwi naj yakꞌomal xaambꞌal tuꞌ jaxca tiꞌ:

—Eyecꞌ chꞌen yespada naj Goliat, naj Filisteo jix eyqꞌuey bꞌey spananil yet Ela. Jaꞌ titiꞌ eyecꞌ chꞌen, pichan oc jun kꞌap yin chꞌen, jatuꞌ ey bꞌey yintaj an chaleco; chi skeꞌ ja wiꞌontoj ta tol cha woche ja wet, jal junojxa tujan mitxꞌkꞌabꞌe yet jowal xin, cꞌam tzet eyecꞌ wu an, ẍi naj yakꞌomal xaambꞌal tuꞌ tet naj.

Jix takꞌwi David jix yaloni:

—Jaꞌ jun tuꞌ yel xacꞌal watxꞌ, tumi ey junojxa laan yetoj jun tuꞌ. Akꞌ jun tuꞌ ey jin an, ẍi David tet naj.

10 Jaꞌ yet jun cꞌual tuꞌ jix too yewbꞌa el sbꞌa naj David tet naj Saúl, catuꞌ jix apni oc bꞌey naj Aquís, sreyal conobꞌ Gat. 11 Jix yalon jun soldado tet naj Aquís jaxca tiꞌ:

—Tumi manaj jun chi yij David tiꞌ xin, jaxca rey yeoc naj bꞌey txꞌotxꞌ Israel tuꞌ. Jaꞌton jun tiꞌ chi bꞌitnele yu ebꞌ ix ix yet chi oc canal, chi yalon ebꞌ ix jaxca tiꞌ: Ecꞌbꞌan jun mil ebꞌ jix smakꞌ cam naj Saúl, jal pax naj David xin, ecꞌbꞌan 10,000 ebꞌ jix smakꞌ camoj, ẍi ebꞌ ix, ẍi naj yakꞌomal servil naj Aquís tuꞌ tet.

12 Jix smaj yabꞌ naj David yoc wan kꞌane tuꞌ, yuxan jix xiwa naj tet naj Aquís, sreyal conobꞌ Gat. 13 Yu jun tuꞌ xin, jix qꞌuexcha yili naj David sattaj ebꞌ, jix yuten sbꞌa naj yin locoal, comon xacꞌal chi stzꞌibꞌe oc niẍtej letra yinlaj smajil na, catuꞌ chi eyxa cꞌaltej jiioj yal stiꞌ yin xil stiꞌ. 14 Jix yalon naj Aquís tet ebꞌ yakꞌomal servil jaxca tiꞌ:

—Ta jix je yilaꞌ tol ey sloco jun winaj tiꞌ, ¿tzet yuxan jix je yiꞌtej naj titiꞌ? 15 Tumi manxa tzꞌajanoj sbꞌisil ebꞌ loco bꞌey jin despacho tiꞌ che yilaꞌ, yuxan jix je yiꞌtej junxa naj tiꞌ yet chi jul yakꞌon slocoal naj yul jin despacho tiꞌ an, ẍi naj tet ebꞌ.