—¿Tzet wal spenail jix wunne? ¿Tumi ey junoj jin penail jix oc tet naj ja mam tuꞌ, yuxan caw chin seyle ecꞌ yu naj, yet chin smakꞌon camoj? ẍi naj David.

2 Jix takꞌwi naj Jonatán jaxca tiꞌ:

—Cꞌam tzet cha naꞌ yu jun tuꞌ. Man oj jaach camoj. Chi cam walon ey jaach, yutol jaꞌ masanil tzet chi snaꞌ naj jin mam, chi yal cꞌal el naj ey jin; caxcꞌal miman yeloc apnoj ma txenne. ¿Tzet wal yu, yuxan man oj yalel naj jin mam tuꞌ ey jin yu jun tiꞌ? Caw ma cꞌal xin, ẍi naj Jonatán.

3 Jix oc cꞌal ian naj David yalon tet naj Jonatán jaxca tiꞌ:

—Yotaj naj ja mam tuꞌ, tol caw kamigo cu bꞌa ja wetoj, yu jun tuꞌ, yuxan mi cꞌam chi yalel naj ey jaach, cꞌam chi yoche scꞌul naj cha wotajne eloj, yet cꞌam chach oc yin cuscꞌulal wu an. Asan xin, yotaj Jehová tol tꞌananxa oc camich win an, ẍi David.

4 Jix yalon naj Jonatán:

—Ta ey junoj bꞌey chi skeꞌ jin colwa ja wetoj an, al ey jin an, ẍi naj.

5 Jix takꞌwi naj David jaxca tiꞌ:

—Jaꞌ yet yecal chi oc kꞌin yu cu naꞌontej yali xꞌaaw, sowalil chin ey chotan low scꞌatan naj rey. Yuxan jaꞌ chin kꞌan ey jaach tinaniꞌ, tol chi wewbꞌa can el jin bꞌa xol-laj teꞌ tiꞌ, masantaꞌcꞌal yet yeycꞌualil yet caabꞌe. 6 Ta chin skꞌanle naj ja mam tuꞌ, cha wal tet naj, tol jaꞌ ey jaach jix wal too jin bꞌa tol chin too can bꞌey jin conobꞌ bꞌey Belén, yutol masanil ebꞌ wican tituꞌ chi yaoc kꞌin ebꞌ jaxca cꞌal chi yun junjun abꞌil. 7 Watxꞌ xin, ta ẍi naj, watxꞌ wet chi yal tuꞌ. Ta tol chi tit sjowal naj xin, chi yal yeloc apnoj tol ey cꞌal oc yin snaꞌbꞌal naj jin smakꞌon camoj. 8 Yu tuꞌ xin, eloj wal yin ja cꞌul, ilaꞌ tuxa jix kakꞌ can cu tiꞌ ey jon junjun jon sattaj Jehová, tol watxꞌ kakꞌoni. Ta yel jain ey jin penail xin, chi cꞌal skeꞌ jin ja makꞌon camoj, manxa sowaliloj chin too ja wetoj bꞌey naj ja mam tuꞌ, ẍi naj David.

9 Jix takꞌwi naj Jonatán jaxca tiꞌ:

—Caw manche ja naꞌ jaxca tuꞌ, ta chi wabꞌ skꞌumal tol chi yoche naj jin mam tuꞌ chach smakꞌ camoj, chi wal ey jaach yin eymanil, ẍi naj Jonatán tuꞌ.

10 Yuxan jix yalon pax David jaxca tiꞌ:

—¿Mac pax oj alon ey jin an, ta pena oj yun stakꞌwoj naj ja mam tuꞌ ey jaach? ẍi naj David.

11 Jix yalon naj Jonatán jaxca tiꞌ:

—Toon wetoj stiꞌeltoj conobꞌ tiꞌ, ẍi naj.

Jix too ebꞌ scawanil xin. 12 Jaꞌ yet jix apni oc ebꞌ bꞌey cꞌamxa ánima, jix yalon naj Jonatán jaxca tiꞌ:

—Yotaj Jehová cu Diosal tol yel chi walaꞌ. Jaꞌ yet yecal ma caabꞌe yabꞌ jaxca tiꞌ, oj jin kꞌanle el tet naj jin mam tuꞌ, tzet wal snaꞌoni yu jun tiꞌ. Ta watxꞌ tzet chi snaꞌ naj jin mam tuꞌ ja win, oj waltej ey jaach. 13 Ta tol pena cꞌal snaꞌbꞌal naj ja win xin, jaꞌ ojabꞌ Jehová oj aon oc syaꞌilal wibꞌan, ta man oj wal ey jaach yu tzet oj yun ja colon el ja bꞌa. Yuxan jaꞌ tinaniꞌ, colwa ojabꞌ Jehová ja wetoj, jaxca jix yun scolwa yetoj naj jin mam tuꞌ. 14 Jaꞌ tinaniꞌ xin, ta iquis jin to, catuꞌ oj jaach oc can yin reyal, chin kꞌan ey jaach tol chi okꞌ ja cꞌul win, jaxca wal chi yun yokꞌ scꞌul Jehová ja win, cꞌam ojabꞌ chin ja makꞌ camoj. 15 Ta xax jin cam an xin, chin kꞌan ey jaach, tol cha naꞌtej ebꞌ wicꞌaal yet bꞌakꞌin. Jaꞌ yet oj qꞌueyle el ebꞌ pena snaꞌbꞌal yu Jehová, cꞌam ojabꞌ chi tan el jin bꞌina ecꞌ bꞌey yul ja conobꞌ tiꞌ, ẍi Jonatán. 16 Queytuꞌ jix yun swaꞌnen can jun swa kꞌane naj Jonatán yetoj naj David, tol chi bꞌina cꞌal ecꞌ sbꞌi ebꞌ yicꞌaal xol ebꞌ yicꞌaal David tuꞌ. Jix yalon jaxca tiꞌ: Jaꞌ ojabꞌ Jehová chi pajtzen tet ebꞌ chi jowi oc yin naj David tiꞌ, ẍi.

17 Yutol caw chi camcꞌulnele naj David tuꞌ yu naj Jonatán, yuxan jix yakꞌ can stiꞌ ebꞌ tet junjun junelxa. 18 Jix yalon pax Jonatán junelxa jaxca tiꞌ:

—Yecal chi oc skꞌinal yu yali xꞌaaw, oj txeclo eloj, tol cꞌam jaach ey jaach ecꞌoj, yutol colan chi yun can bꞌey chach ey cꞌaltaꞌ chotan yul ja ẍila. 19 Jaꞌ yet yeycꞌualil caabꞌe, chi too ja wewbꞌa el ja bꞌa bꞌey jix ja wewbꞌa el ja bꞌa yet sbꞌabꞌelal. Jaꞌ tituꞌ cha wechbꞌane bꞌey scawilal chꞌen chꞌen chi yij Ezel. 20 Oj jin jultoj oxebꞌoj jin julbꞌal tituꞌ, jaxca tol yin junoj tzetyetal chin jultoj. 21 Chi lawi tuꞌ, catuꞌ chi walon tet jun wakꞌomal servil jaxca tiꞌ: Asiꞌ iꞌtej jin julbꞌal tuꞌ, jin chi tet. Ta tol chi wal tet jaxca tiꞌ: Tol jaꞌ ja sattajtej tiꞌ ey teꞌ, ta jin chi, catuꞌ cꞌam chach xiw ja tita, cꞌam tzet oj jaach iꞌon chi yal tuꞌ. Tuxa jix wakꞌ jin tiꞌ sattaj Jehová tol jaxca tuꞌ oj wute. 22 Asan xin, ta chi wal tet jaxca tiꞌ: Jaꞌ jun jin julbꞌal tuꞌ, naat ta ey bꞌey ja sattajto tuꞌ, ta jin chi tet, naat chach too yin ja colon ja bꞌa. Yutol jaꞌ Jehová chach chejontoj naat chi yal tuꞌ. 23 Jaꞌ yin jun cu wa kꞌane bꞌey chi kakꞌ can cu tiꞌ, jaꞌ Jehová testigo chi yun can oc kin, yutol junelne chi kal canoj, ẍi naj Jonatán.

24 Jix lawi tuꞌ xin, catuꞌ jix yewbꞌan el sbꞌa naj David xol-laj teꞌ. Jaꞌ yet jix el yich kꞌin yet chi ali xꞌaaw tuꞌ, catuꞌ jix ey chotan naj rey Saúl tuꞌ lowoj. 25 Jix ey wojan naj rey jaxca cꞌaltaꞌ chi yunne, jaꞌ bꞌey yich na jix ey chotan naj, jaꞌ yetcꞌulal bꞌey sattaj, jaꞌ tituꞌ jix ey chotan naj Jonatán, jaxa bꞌey yin scꞌul naj Saúl tuꞌ, jatuꞌ jix ey chotan naj Abner, jal pax teꞌ ẍila naj David xin, cꞌam mactxequel jix ey chotan yul teꞌ. 26 Jaꞌ yet bꞌabꞌel cꞌu, cꞌam tzet jix yal naj Saúl tuꞌ, jaxa jix yun snaꞌon xin: Tejan ey junoj tzet man watxꞌoj jix yun David, tumi ma skeꞌ swaꞌnen sbꞌa yin eyojto jayebꞌoj cꞌu, jatacꞌalaꞌ yalon ley, ẍi naj Saúl tuꞌ. 27 Jaxa yet scaabꞌ cꞌual ẍaꞌon oc jun kꞌin tuꞌ, colan cꞌal teꞌ ẍila naj David tuꞌ, cꞌam cꞌal mactxequel jix ey chotan yul teꞌ. Yu jun tuꞌ, jix skꞌanle naj Saúl tet naj Jonatán:

—¿Tzet yu, yuxan ma jul naj scꞌaal Jesé tuꞌ low tinaniꞌ yetoj cꞌal yet ewi? ẍi naj.

28 Jix takꞌwi Jonatán jaxca tiꞌ:

—Jaꞌ naj David tuꞌ jix yal ey jin yet ewi, 29 tol chin chaꞌtoj naj, tol abꞌ masanil ebꞌ yican naj chi yaoc kꞌin ebꞌ yet xaambꞌal bꞌey sconobꞌ; yuxan jix awteletoj naj yu ebꞌ yuẍtaj. Jix yal naj ey jin jaxca tiꞌ: Chaꞌ jin toj yet chi too wakꞌon tzalabꞌoj jin cꞌul bꞌey ebꞌ wuẍtaj tuꞌ an, ẍi naj ey jin. Yu jun tuꞌ yuxan cꞌam naj chi jul low bꞌey ja meẍa tiꞌ, ẍi naj Jonatán.

30 Jaꞌ yet jix yabꞌen naj rey jaxca tuꞌ, jix tit sjowal naj yin Jonatán, jix yalon jaxca tiꞌ:

—Jaach tiꞌ caw yuneꞌ jaach jaxca junoj penawom ix. ¿Tumi man wotaj oj tol watxꞌ ja wakꞌon yetoj jun scꞌaal naj Jesé tuꞌ, caw cha wiꞌel sqꞌuixwil ix ja txutx ja wetoj? 31 ¿Cꞌam mi chi naꞌcha el ja wu tol yajbꞌan iquis ecꞌ jun scꞌaal naj Jesé tuꞌ, man oj jaach oc yin reyal? Jaꞌ tinaniꞌ xin, atoj seyomal naj, tit ojabꞌ naj, cꞌam chi ecꞌtoj scam naj, ẍi naj Saúl tuꞌ tet Jonatán.

32 Jix takꞌwi naj Jonatán jaxca tiꞌ:

—¿Tzet yu, yuxan oj cam naj? ¿Tumi ey junoj spenail jix el yunen naj, yuxan jaxca tuꞌ chi yun ja waloni? ẍi naj.

33 Jaꞌ yet jix yabꞌen naj Saúl jaxca tuꞌ, jix sjulontoj jun slanza naj yin Jonatán yet chi yakꞌon cam yaloni. Yu jun tuꞌ xin, yuxan jix snaꞌel naj Jonatán tol jaꞌ smam tuꞌ, chi yoche chi makꞌle cam naj David tuꞌ. 34 Yu tuꞌ xin, caw jix tit sjowal naj Jonatán tuꞌ, jix a lemnaoj, jix eltej naj yin meẍa; ma xa low naj yetoj ebꞌ yin yet scaabꞌ scꞌual jun kꞌin tuꞌ, yutol jix cus scꞌul yu naj David, yutol caw pena tzet jix yal naj Saúl tuꞌ jix yabꞌe. 35 Jaxa yet jix kꞌinibꞌi a yet junxa cꞌu, jix too naj Jonatán yilon naj David, jaxca ye can yalon ebꞌ, tzajan oc jun naj achꞌe yakꞌomal servil yintaj naj. 36 Jix yalon Jonatán tet naj achꞌe unin tuꞌ jaxca tiꞌ:

—Eyman, asiꞌ iꞌtej jin julbꞌal oj jin jultoj tuꞌ, ẍi naj tet.

Catuꞌ jix too naj yiꞌontej. Jaꞌ yet tuꞌ jix sjulontoj junxa sjulbꞌal naj caw naat sattajto naj achꞌe tuꞌ. 37-38 Jaꞌ yet jix apni oc naj bꞌey jix eyqꞌuey jun julbꞌal tuꞌ, caw ip jix yun yawi naj Jonatán, jix yalon jaxca tiꞌ:

—¡Caw ani chi yun ja toi, manche jaach oc tucanoj; jata cꞌal ja sattajto tuꞌ jix apni wan jin julbꞌal tuꞌ! ẍi naj.

Jix lawi tuꞌ, jix yiꞌontej wan julbꞌal tuꞌ naj achꞌe tuꞌ, catuꞌ jix yakꞌon tet naj Jonatán. 39 Cꞌam cꞌal niꞌoj jix naꞌcha el yu jun naj achꞌe yu tzet chi yun naj Jonatán tuꞌ; asanne naj otajnen yin snaꞌbꞌal, yu tzet yeoc yalon can ebꞌ yetoj naj David. 40 Jix lawi tuꞌ, jix akꞌle wan smitxꞌkꞌabꞌ yet jowal tuꞌ yu naj Jonatán tet jun achꞌe tuꞌ, catuꞌ jix chejle meltzo naj yu bꞌey sna yul conobꞌ.

41 Jix cꞌal too can naj achꞌe tuꞌ, catuꞌ jix elcantej naj David bꞌey yintaj jun chꞌen chꞌen; oxel jix ey noan naj sat txꞌotxꞌ sattaj Jonatán. Jix lawi tuꞌ jix stzꞌubꞌlen el stiꞌ ebꞌ, jix okꞌ ebꞌ scawanil, cꞌuancꞌulal tocꞌal jix yun yoc tucan naj David tuꞌ yokꞌi. 42 Jix lawi tuꞌ, jix yalon Jonatán tet naj David jaxca tiꞌ:

—Asiꞌ, cꞌam cꞌal tzet cha naꞌ. Jaꞌ Jehová ey cꞌal oc ja wetoj, yetoj cꞌal ebꞌ ja wicꞌaal, yetoj cꞌal pax ebꞌ wicꞌaal jain tiꞌ, yet chi yunen el jun cu wa kꞌane jix cu waꞌne can ja wetoj tiꞌ, ẍi naj Jonatán.

Jix lawi tuꞌ xin, jix too naj David tuꞌ; catuꞌ jix meltzo pax cantej naj Jonatán bꞌey sconobꞌ.