—Jaꞌ naj jin mam, caw chi yoche naj chach smakꞌ camoj. Yuxan ewbꞌa el ja bꞌa tinaniꞌ masantaꞌcꞌal yet skꞌinibꞌ yecal. 3 Yutol jaꞌ yet skꞌinibꞌ yecal, chin eltoj yetoj naj jin mam tuꞌ scawilal bꞌey ey jaach ecꞌ tuꞌ, chi walon tet naj ja wu jaach tiꞌ, kilon cꞌal tzet oj yun yelocoj, oj wal ey jaach, ẍi Jonatán tet naj.

4 Jix yalon naj Jonatán tet smam yu swatxꞌiloj naj David tuꞌ. Jix yalon jaxca tiꞌ:

—Mamin, man watxꞌoj ta tol pena tzet cha naꞌ yin naj David naj ja wakꞌomal servil, yutol chi colwa naj ja wetoj, man pena oj chi yute sbꞌa naj ey jaach. 5 Jaach caw jix ja wilaꞌ, tol jix yaoc sbꞌa naj yul skꞌabꞌ camich yet jix smakꞌon cam naj jun chi yij Goliat, queyton tuꞌ jix yun scolcha can el cu conobꞌ tiꞌ yu Jehová; jaꞌ jun tuꞌ, jix ja wil jaach tiꞌ, tol jix jaach tzala a yet jix ja wilon tuꞌ. ¿Tzet yu, yuxan cha naꞌ tol oj ja makꞌ cam junoj mactxequel tol cꞌam niꞌoj spenail, yutol jaꞌ David cꞌam spenail chi oc ey jaach? ẍi naj Jonatán tet smam.

6 Jaꞌ yet jix yabꞌen naj Saúl jaxca tuꞌ, tol yel wan tzet chi yal naj Jonatán tuꞌ, jix yalon naj jaxca tiꞌ:

—Chi wakꞌcan jin tiꞌ sattaj Jehová, tol man oj jin makꞌ cam naj David tuꞌ, ẍi naj Saúl.

7 Jix lawi tuꞌ jix awtele naj David yu naj Jonatán, jix yalon tet tzet jix yun skꞌanabꞌ smam tuꞌ. Jix lawi tuꞌ, jix yiꞌontoj bꞌey smam tuꞌ, catuꞌ jix oc cꞌaltaꞌ yin smulnail jaxca yet yalantoj.

8 Jayebꞌ jixto wal cꞌu, catuꞌ jix oc pax jowal yetoj ebꞌ Filisteo junelxa, jix el paxtoj David yakꞌon jowal yin ebꞌ, caw wal miman ebꞌ jix cam yu, yuxan jix el ebꞌ Filisteo tuꞌ tet. 9 Jal pax naj Saúl tuꞌ xin, jix oc pax can jun pena espíritu yin yu Jehová, chotan ey naj bꞌey sna, lacbꞌil a slanza yu, catuꞌ jix awtele naj David yu, yet chi stenon teꞌ arpa sattaj naj Saúl. 10 Jix yiꞌon a chꞌen slanza tuꞌ, jix sjulontoj yin naj David yet chi oc can lakꞌan naj yich na tuꞌ yu chꞌen yaloni; jaxa pax David jix scol sbꞌa, jaxa chꞌen slanza Saúl tuꞌ jix oc cantoj chꞌen yich na, jix el naj David, jix too naj bꞌey sna. 11 Jaꞌ yet jun akꞌbꞌal tuꞌ, jix yalon naj Saúl, tol chi too teynele naj David bꞌey sna, yet watxꞌ jaxa yet chi kꞌinibꞌi a yet junxa cꞌu, catuꞌ chi makꞌle camoj. Jaxa ix Mical xin, ix yistil naj David tuꞌ jix alon tet jaxca tiꞌ:

—Ta man oj ja col ja bꞌa yet jun akꞌbꞌal tiꞌ, yecal camnaj jaachxa, ẍi ix tet naj.

12 Jix lawi tuꞌ, jix yaon eltej ix Mical jun txꞌan lasu bꞌey yul swentanail sna, jaꞌ tituꞌ jix eytej tꞌununoj naj David yet jix scolon sbꞌa. 13 Catuꞌ jix yiꞌontej jun sdiosal ix, jix yaon oc skꞌan jun echele tuꞌ ix, jix yaontoj jun an sábana kꞌap ix yibꞌan. 14 Jaꞌ yet jix yaontoj ebꞌ soldado naj Saúl yet chi too mitxꞌle naj David yu ebꞌ, jix yalon ix Mical tet ebꞌ, tol yaꞌey naj. 15 Jix ẍejon pax toj ebꞌ soldado naj Saúl junelxa, jix yalon naj tet ebꞌ jaxca tiꞌ:

—Iꞌwej cꞌaltej naj yibꞌan txꞌat tuꞌ titiꞌ, oj jin makꞌ camoj, ẍi naj Saúl.

16 Jix octoj ebꞌ soldado yul sna naj David, jaxa jix yilon ebꞌ tol asan jun comon dios telan ey sat txꞌat tuꞌ, eyoc jun xil chiw skꞌaanoj sjolom. Jix lawi tuꞌ jix too ebꞌ yalon tet naj Saúl. 17 Jix yalon naj Saúl tet ix Mical jaxca tiꞌ:

—¿Tzet yu, yuxan chin ja wetne, catuꞌ cha colon el jun jin cajat tuꞌ? ẍi naj Saúl.

Jix takꞌwi ix Mical jaxca tiꞌ:

—Yutol jix yal naj ey jin jaxca tiꞌ an: Oj jaach jin makꞌ camoj, ta cꞌam chin ja chaꞌtoj yet chin colon jin bꞌa, ẍi naj, ẍi ix Mical.

18 Queytuꞌ jix yun scolcha el naj David yul skꞌabꞌ naj Saúl, catuꞌ jix apni oc scꞌatan naj Samuel bꞌey conobꞌ Ramá. Jix yalon cꞌal naj tzet chi utele naj yu naj Saúl tuꞌ. Jaꞌ yet tuꞌ jix too naj Samuel yetoj David bꞌey conobꞌ Naiot, jaꞌ tituꞌ jix caey ecꞌ ebꞌ. 19 Jaꞌ yet jix yabꞌen naj Saúl tol eyecꞌ naj David bꞌey Naiot yul yet Ramá, 20 jix yaontoj jun bꞌulan ebꞌ soldado yet chi too iꞌletej naj yu ebꞌ. Jaꞌ yet jix apni oc ebꞌ soldado tuꞌ, jix yilon ebꞌ tol ey wan ebꞌ ẍejabꞌ Dios, lalan yalon el skꞌane Dios ebꞌ, jaxa naj Samuel chi ijbꞌan ebꞌ. Jaꞌ yet jun txolan tuꞌ, jix oc pax Yespíritu Dios yin ebꞌ soldado naj Saúl tuꞌ, catuꞌ jix oc ian ebꞌ yalon el skꞌane Dios.

21 Jaꞌ yet jix yabꞌen naj Saúl jun tuꞌ, jix yaontoj junxa tujan ebꞌ soldado, jacꞌalaꞌ jix oc cꞌal pax ebꞌ yalon el skꞌane Dios; jix yaon pax toj naj Saúl junxa yet yox tujan ebꞌ soldado, palan cꞌal yapni pax oc ebꞌ, yin yalon el skꞌane Dios. 22 Yu jun tuꞌ xin, jaꞌcaw naj Saúl jix too iloni; jaxa yet jix apni oc naj bꞌey jun miman ucꞌbꞌal jaꞌ ey bꞌey Secú, jix skꞌanlen ecꞌ naj bꞌeytuꞌ eyoc naj Samuel yetoj naj David. Jix al-le tet yu ebꞌ ánima, tol jaꞌ bꞌey Naiot yul yet Ramá eyecꞌ ebꞌ. 23 Yu jun tuꞌ, yuxan jix too naj tituꞌ. Eyman jix oc Yespíritu Dios yin naj Saúl, catuꞌ jix oc ian naj yalon el skꞌane Dios yet lalantocꞌal sbꞌey naj, masantaꞌcꞌal jix apni oc naj bꞌey conobꞌ Naiot tuꞌ. 24 Jix yiꞌon el spichil eyocoj, cꞌamxa spichil naj eyoc yet eyecꞌ sattaj naj Samuel, jun cꞌu jun akꞌbꞌal jix yalon el skꞌane Dios naj. Jaꞌ yet tuꞌ jix el yich yal-le jun kꞌane jaxca tiꞌ: Ey cꞌal pax oc naj Saúl xol ebꞌ ẍejabꞌ Dios, ẍi.