Jix Yamigone Sbꞌa Naj David Yetoj Naj Jonatán
18
Jaꞌ yet jix lawi skꞌanabꞌ naj David yetoj naj Saúl tuꞌ, caw jix camcꞌulnele xacꞌal David yu naj Jonatán, scꞌaal naj Saúl tuꞌ, jaxca wal chi yute syaꞌilnen sbꞌa, queytuꞌ jix yute. 2 Jaꞌ yet jun cꞌual tuꞌ, ma xa chaꞌletoj naj David bꞌey sna smam yu naj Saúl tuꞌ, yutol jix can xacꞌal can mulna yetoj naj. 3 Jix yakꞌon stiꞌ naj Jonatán tet naj David tol chi yamigone sbꞌa yetoj yin junelne, yutol yel xacꞌal ey scamcꞌulal naj Jonatán tuꞌ yin naj. 4 Jix yiꞌon el an sjojan pichil naj Jonatán tuꞌ eyocoj, an pichile chi skꞌan naj yin yopiso, jix yakꞌon tet naj David, yetoj cꞌal chꞌen yespada naj, cꞌal chꞌen julbꞌal chi skꞌanaꞌ, yetoj cꞌal jun miman sat kꞌalile eyoc yin snan, yet chi xꞌoxon el scamcꞌulal tuꞌ.5 Caw wal watxꞌ jix eloc naj David yin masanil tzet jix chejle yun yu naj Saúl tuꞌ; yuxan jix oc naj yin yaawilal xol jun bꞌulan ebꞌ soldado. Caw wal jix tzala ebꞌ soldado yetoj naj, yetoj cꞌal ebꞌ yaaw yeoc yintaj naj Saúl tuꞌ.
Jix Chichon Oc Scꞌul Naj Saúl Yin David
6 Jaꞌ yet jix meltzo masanil ebꞌ soldado yin jowal, yet xax cam can naj Goliat yu naj David, catuꞌ jix syambꞌa oc sbꞌa masanil ebꞌ ix ix ey bꞌey yul yet Israel, yet chi ẍaꞌon sjul naj rey Saúl ebꞌ ix. Chi canalwi ebꞌ ix, catuꞌ chi stenon wan chꞌen pandereta ebꞌ ix, yetoj wanxa chꞌen patxquiltaj, 7 chi bꞌitni ebꞌ ix ix tuꞌ, chi yalon ebꞌ ix jaxca tiꞌ:
Ecꞌbꞌan mil ebꞌ cu cajat jix cam yu naj Saúl.
Jal pax naj David xin, ecꞌbꞌan 10,000 ebꞌ jix smakꞌ camoj, ẍi ebꞌ ix.
8 Jaꞌ yu jun tuꞌ, caw pena yoc kꞌane jix yabꞌ naj Saúl tuꞌ; yuxan jix chichon a scꞌul naj, jix snaꞌon naj jaxca tiꞌ:
—Yel xacꞌal chi iꞌle a can naj David tiꞌ jin sattaj, yuxan chi yal ebꞌ ix ix tiꞌ tol ecꞌal mil ebꞌ jix smakꞌ camoj, jal jin jain tiꞌ txenne smilal ebꞌ jix jin makꞌ camoj. Niꞌanxane mi wal catuꞌ chi oc naj tiꞌ yin reyal jin qꞌuexeloj, ẍi naj Saúl yin snaꞌbꞌal.
9 Jatax cꞌal yet tuꞌ jix cꞌoli ẍichon oc scꞌul naj Saúl yin naj David tuꞌ.
10 Jaxa yet junxa cꞌual, jix oc jun pena espíritu yin naj Saúl yu Jehová, jix tit sloco naj bꞌey sdespacho, catuꞌ jix oc ian stenon teꞌ arpa naj David, jaxca cꞌaltaꞌ chi yunne, iꞌbꞌil a jun lanza yu naj Saúl tuꞌ. 11 Jix tit wal numna jix yil naj Saúl tuꞌ, jix sjulontoj chꞌen slanza tuꞌ yin naj David, yet chi oc can lakꞌan naj yin yich na tuꞌ snaꞌoni, jaxa pax naj David jix scol sbꞌa, cael jix yun jaxca tuꞌ.
12 Yu jun tuꞌ, jix xiwa naj Saúl tet naj David, yutol jaꞌ Jehová eyoc yetoj naj, jal pax yetoj naj Saúl xin, cꞌamxa chi colwa Dios yetoj naj. 13 Yu cꞌal jun tuꞌ xin, jix iꞌle el naj David yu naj Saúl bꞌey sdespacho tuꞌ, tol jix ale oc naj yin syaawiloj jun mil ebꞌ soldado yu, jaꞌton inen oc ebꞌ yet jix bꞌetecꞌ ebꞌ yin jowal. 14 Yal cꞌal bꞌeytuꞌ jix ecꞌ naj David, watxꞌ cꞌal jix yun yelocoj, yutol jaꞌ Jehová eyoc yetoj naj. 15 Yu jun tuꞌ, yel xacꞌal jix xiwa naj Saúl tet naj David, yutol watxꞌ cꞌal chi yute sbꞌa bꞌey chi eqꞌui, cꞌal yin tzet chi yunne. 16 Masanil ebꞌ Israel, cꞌal ebꞌ a Judá jix ochen naj David tuꞌ; caw chi tzala ebꞌ yetoj naj, yutol jaꞌcaw naj chi ijbꞌan ebꞌ yin jowal.
17 Jaꞌ yet junel, jix yal Saúl tet naj David jaxca tiꞌ:
—Chi wakꞌ ix jin bꞌabꞌel cutzꞌin chi yij Merab ja wistiloj, ta caw yel jelan jaach ja wakꞌon jowal, ta cꞌam chach xiw ja wakꞌon jowal tuꞌ ku jaon sconobꞌ jon Jehová tiꞌ, ẍi naj tet David.
Jix snaꞌ Saúl, tol cꞌam chi sloc spenail yin naj David yin smakꞌon camoj; yel xacꞌal mi watxꞌ tol jaꞌ ebꞌ Filisteo chi makꞌon camoj. 18 Jix takꞌwi naj David tet jaxca tiꞌ: Tumi ey niꞌoj weloc apnoj, tumi miman yeloc apnoj jin mam yetoj ebꞌ wican xol ebꞌ ket Israelal tiꞌ, catuꞌ oj jin oc ja niꞌ oj jaach rey, ẍi naj David tuꞌ.
19 Jaxa yet jix apni oc scꞌual yet jix yakꞌon scutzꞌin naj Saúl yistiloj naj David tuꞌ, jaxa jix yunne, jaxa tet naj Adriel a conobꞌ Meholá jix yakꞌ jun scutzꞌin naj Saúl tuꞌ. 20 Ey junxa ix cutzꞌin naj Saúl tuꞌ chi yij Mical, caw wal chi ochele naj David tuꞌ yu ix; yuxan, jaꞌ yet jix yabꞌen oc naj Saúl tuꞌ jaxca tuꞌ, jix tzala a naj. 21 Yuxan jix snaꞌ naj Saúl tuꞌ, tol chi yakꞌ ix scutzꞌin tuꞌ yistiloj David, yet watxꞌ jaꞌ ix oj akꞌon eyqꞌuey naj David tuꞌ yul skꞌabꞌ ebꞌ Filisteo. Jix yalon xacꞌal naj Saúl tet naj David yet scaelal jaxca tiꞌ:
—Jaꞌ tinaniꞌ, caw oj jaach oc cꞌaltaꞌ jin niꞌoj an, ẍi naj tet David.
22 Catuꞌ jix stzꞌaj yalon naj Saúl tuꞌ tet ebꞌ chi mulna yetoj:
—Alwej tet naj David tuꞌ yin cꞌuancꞌulal jin kꞌanaꞌ, tol chi woche jain rey jin tiꞌ, yetoj cꞌal masanil ebꞌ chi mulna wetoj, tol caw chi ochele cꞌal pax naj yu ebꞌ; yu jun tuꞌ, yuxan jaꞌ naj chi woche chi oc jin niꞌ oj an, ẍi naj Saúl tuꞌ tet ebꞌ.
23 Jix too ebꞌ yakꞌomal servil naj Saúl tuꞌ yalon tet naj David, catuꞌ jix takꞌwi naj David tet ebꞌ jaxca tiꞌ:
—Jaꞌ je naꞌon jaex tiꞌ tol subꞌo koc niꞌeal yintaj junoj rey, ta mebꞌa jon, catuꞌ cꞌam wal niꞌoj keloc apnoj, ẍi naj David tet ebꞌ.
24 Jix lawi tuꞌ xin, jix too ebꞌ yakꞌomal servil yalon tet naj Saúl tuꞌ, tzet jix yun yalon naj David tuꞌ. 25 Catuꞌ jix yalon naj jaxca tiꞌ tet ebꞌ: Yu tzet chi yun yeyqꞌuey David tuꞌ yul skꞌabꞌ ebꞌ Filisteo tuꞌ snaꞌoni, yuxan jix yal naj Saúl tet ebꞌ yakꞌomal servil tol chi al-le tet naj David yu ebꞌ, jix yalon naj jaxca tiꞌ:
—Alwej wal tet naj xin, cꞌam cꞌal chi stoolane naj yu ix jin cutzꞌin tiꞌ, jaxca taꞌ sbꞌeybꞌal ebꞌ ánima, asan tol chi yiꞌtej junoj 100 sjolom swinajil ebꞌ Filisteo naj ey jin, jaxca tuꞌ chi yun waon ecꞌ spaj tet ebꞌ jin cajat tuꞌ, ẍiꞌ toj naj Saúl tuꞌ.
26 Jix too pax ebꞌ yakꞌomal servil tuꞌ yalon tet naj David tuꞌ. Jix ẍaꞌon scꞌul tzet jix yal naj Saúl tuꞌ, jix snaꞌ tol yin subꞌoal chi yun yoc niꞌeal tet naj rey tuꞌ. Jaꞌ yet cꞌamto chi apni oc scꞌual, 27 jix too naj David yetoj ebꞌ soldado, yin smakꞌon cam jun 200 ebꞌ Filisteo; catuꞌ jix yiꞌontoj naj David, sjolom swinajil ebꞌ tuꞌ tet naj Saúl, queytuꞌ jix yun yoc naj yin niꞌeal yintaj naj. Catuꞌ jix yakꞌon jun scutzꞌin chi yij Mical yistiloj naj David tuꞌ.
28 Jaꞌ yet tuꞌ, jix naꞌcha el yu naj Saúl, tol jaꞌ Jehová eyoc yetoj naj David, catuꞌ yel xacꞌal chi tzala scꞌul ix Mical yin David, 29 yu jun tuꞌ, yel xacꞌal jix xiwa naj Saúl tet naj David, yintaj yet yalantoj; yel xacꞌal jix el sjowal naj Saúl yin naj David yin masanil tiempo. 30 Catuꞌ jix oc cꞌal ian ebꞌ Filisteo yakꞌon jowal yin ebꞌ Israel, jaxa naj David jelan cꞌal yakꞌon jowal naj tet wanxa ebꞌ yet yaawil, yuxan caw bꞌinabꞌil naj David yu ebꞌ.