Jix Makꞌle Cam Naj Goliat Yu Naj David
17
Ey jun cꞌual, jix syambꞌa oc sbꞌa ebꞌ Filisteo bꞌey conobꞌ Socó, yul yet Judá, yet chi yakꞌon jowal ebꞌ yin Israel. Jaꞌ tituꞌ jix swaꞌne ey bꞌulan sbꞌa ebꞌ bꞌey Efes-damim, snan xol Socó yetoj Azecá. 2 Jacꞌalaꞌ cꞌal pax naj Saúl, jix syambꞌa oc sbꞌa yetoj ebꞌ yet Israelal bꞌey spananil stiꞌ sjobꞌeal txꞌotxꞌ Ela, yet chi yakꞌon lista sbꞌa ebꞌ yakꞌon jowal yetoj ebꞌ Filisteo. 3 Jaꞌ ebꞌ Filisteo eyecꞌ ebꞌ bꞌey jun tzalan, jal bꞌey junxa tzalan, jatuꞌ eyecꞌ ebꞌ Israel; ey jun jobꞌe ey spananil stiꞌlaj ey can snan xol ebꞌ. 4 Ey jun soldado xol ebꞌ Filisteo jix eltej, caw wal miman steel, ey oxebꞌ metro steel, chi yij sbꞌi Goliat, a conobꞌ Gat. 5 Eyoc jun chꞌen kꞌoxkꞌome yin sjolom, bronce chꞌen cꞌal eloj, yetoj jun chꞌen coraza eyoc xaamscꞌul, ey mi junoj quintal yetoj laonebꞌojxa libra yalil chꞌen. 6 Bronce chꞌen cꞌal eyoc yin yajan, bronce chꞌen cꞌal eyoc yinlaj sjolom xicꞌ, yetoj cꞌal chꞌen kocꞌtaj lanza eyoc yin yichin. 7 Caw miman steel jun lanza iꞌbꞌil oc yu, caw miman yin, ecꞌbꞌan 13 libra yalil chꞌen hierro eyoc yin xaam. Bꞌabꞌel jun naj inen oc jun chi majon sat julbꞌal yu. 8 Jix lawi tuꞌ, jix oc linan naj Goliat sattaj ebꞌ soldado Israel, chi awitej naj tet ebꞌ, chi yalon jaxca tiꞌ:—¿Tzet yu, yuxan tol txololi xacꞌal che yute eltej je bꞌa yin jowal tuꞌ? Jain tiꞌ, Filisteo jin, jal jex jaex tiꞌ soldado jex naj Saúl. Jaꞌ tinaniꞌ, sicꞌwej eltej junoj winaj je xol tuꞌ, yet chi eltej yakꞌon jowal wetoj an. 9 Ta chi tzaji yakꞌlen jowal wetoj an, ta chin eyqꞌuey yu, chi cu oc can je yakꞌomal servil; ta jaꞌ jun naj tuꞌ chi eyqꞌuey wu an xin, catuꞌ chex oc can yin kakꞌomal servil jon. 10 Jaꞌ yet jun cꞌual tiꞌ chejwejtej junoj winaj chi yakꞌ jowal wetoj tinaniꞌ an, ẍi naj Goliat tuꞌ.
11 Jaꞌ yet jix yabꞌen naj Saúl, cꞌal ebꞌ conobꞌ Israel jun kꞌane tuꞌ, jix somcha a snaꞌbꞌal ebꞌ yu xiwcꞌulal.
12 Jaꞌ bꞌey Belén yul yet Judá, ey jun naj icham winaj chi yij Jesé. Jaꞌ yul stiempoal naj rey Saúl tuꞌ caw icham winajxa xol ebꞌ yet conobꞌ. Jaꞌ jun winaj tuꞌ, ey waxajwan scꞌaal; jaꞌ xol ebꞌ naj tuꞌ ey jun naj chi yij David. 13 Ey oxwan ebꞌ scꞌaal naj Jesé tuꞌ, eyoc ebꞌ yin soldadoal yu naj Saúl; jaꞌton naj Eliab bꞌabꞌel winaj, jaxa naj yet scaabꞌ, jaꞌton Abinadab, jaxa naj yet yox, jaꞌton naj Samá. 14 Tzunan unin xacꞌal naj David tuꞌ; jaꞌ ebꞌ oxwan tuꞌ tzajan oc ebꞌ yintaj naj Saúl. 15 Jal pax naj David tuꞌ, tucꞌal chi bꞌetecꞌ scꞌatan naj Saúl, catuꞌ chi too pax naj steynen smeꞌ smam bꞌey conobꞌ Belén.
16 Jaꞌ yet tuꞌ, ey cꞌal oc jun Filisteo tuꞌ yalon bꞌuchwal kꞌane yin ebꞌ Israel. Junjun cꞌal skꞌinibꞌalil, cꞌal junjun yeycꞌualil ey cꞌal oc naj sbꞌuchwai, quey cꞌal tuꞌ jix yun naj yin cawinaj cꞌu.
17 Ey jun cꞌual jix yal naj Jesé jaxca tiꞌ tet jun scꞌaal chi yij David:
—Iꞌtoj oxebꞌoj almu ixim tiriw kꞌanbꞌinajxa tiꞌ, yetoj laonebꞌoj ixim pan, catuꞌ chi too ja wilon ecꞌ ebꞌ naj ja wuẍtaj tuꞌ. 18 Catuꞌ cha wiꞌontoj laonebꞌoj noꞌ queso tiꞌ tet naj scapitán ebꞌ soldado tuꞌ; catuꞌ cha wiloni ta watxꞌ scꞌul ebꞌ naj, catuꞌ cha wiꞌontej junoj tzetyetal txꞌoxbꞌaniloj ta yel watxꞌ scꞌul ebꞌ naj, ẍi Jesé tuꞌ tet naj David.
19 Jaꞌ bꞌey spananil stiꞌ sjobꞌeal txꞌotxꞌ Ela, jatuꞌ ey naj Saúl yetoj ebꞌ yuẍtaj naj David tuꞌ, yetoj cꞌal masanil ebꞌ soldado Israel, yet chi yakꞌon jowal ebꞌ yetoj ebꞌ Filisteo.
20 Jaxa yet jix kꞌinibꞌi a yet junxa cꞌual, catuꞌ jix yakꞌon can abꞌenal noꞌ meꞌ naj David tet junxa naj winaj, catuꞌ jix too naj, iꞌbꞌil oc tzettaj yetal jix yatoj smam tuꞌ tet. Jaꞌ yet jix apni oc bꞌey bꞌulan ey ebꞌ soldado Israel tuꞌ, lalanxa stoo ebꞌ yin jowal, chi yaon el yaw ebꞌ. 21 Jix swaꞌnen oc txolan sbꞌa ebꞌ Israel, jacꞌalaꞌ quey pax tuꞌ jix yute pax sbꞌa ebꞌ Filisteo tuꞌ, jix oc txolan ebꞌ sattaj ebꞌ Israel tuꞌ. 22 Yin eymanil jix yakꞌ can naj David wan tzettaj yetal iꞌbꞌil oc yu tuꞌ tet jun naj chi teynen mitxꞌkꞌabꞌe yet jowal, bꞌey bꞌulan ey ebꞌ tuꞌ; jix too yaoc sbꞌa xol ebꞌ, catuꞌ jix skꞌanlen tzet utbꞌil yeoc ebꞌ yuẍtaj naj. 23 Jaꞌ yet lalan skꞌanabꞌ yetoj ebꞌ, catuꞌ jix eltej naj Goliat, a conobꞌ Gat, snan xol ebꞌ Filisteo, catuꞌ chi yalon wan bꞌuchwal kꞌane chi yal cꞌaltaꞌ naj yet junjun cꞌu yin ebꞌ Israel. Cꞌuxan jix yabꞌ naj David tzet jix yalaꞌ.
24 Jaꞌ yet jix yilontoj ebꞌ Israel jun Filisteo tuꞌ, caw chi xiwa ebꞌ, chi el ebꞌ tet naj. 25 Catuꞌ chi yalon ebꞌ: ¿Jix mi je yil yelol jun winaj tuꞌ yet chi yalon bꞌuchwal kꞌane kin? Ta ey wal junoj jon chi tzaji smakꞌon camoj, jix yal naj rey tol miman tumin chi yakꞌa, catuꞌ chi yakꞌon scutzꞌin yistiloj jun mactxequel tuꞌ, catuꞌ cꞌamxa chi yakꞌ stoolabꞌal ebꞌ yican, ẍi ebꞌ.
26 Jix skꞌanlen naj David tet ebꞌ eey scawilal tuꞌ:
—¿Tzetyetal chi akꞌle tet junoj chi makꞌon cam jun Filisteo tiꞌ, catuꞌ chi sbꞌej yalon wan bꞌuchwal kꞌane tiꞌ kin? ¿Tzet yeloc apnoj jun txꞌoj conobꞌal tiꞌ, yuxan chi txꞌemle ebꞌ soldado yet Naj Dios Iquis yu? ẍi naj David.
27 Jacꞌalaꞌ jix yute yalon ebꞌ jaxca cꞌal jix yute yalon ebꞌ yet sbꞌabꞌelal, tol miman tzetyetal chi akꞌle tet junoj mactxequel chi makꞌon cam jun scajat ebꞌ tuꞌ. 28 Jaꞌ yet lalan yabꞌen naj Eliab, naj sbꞌabꞌel yuẍtaj naj David tuꞌ, tzet chi yalaꞌ, cꞌal tzet chi yal ebꞌ tuꞌ, caw jix tit sjowal naj sicꞌlebꞌil, jix yalon naj jaxca tiꞌ:
—¿Tzet chi jul ja wun titiꞌ? ¿Mactxequel jix ja wakꞌcan yilomaloj jaycꞌon noꞌ meꞌ bꞌey txꞌotxꞌ cusiltaj txꞌotxꞌ tuꞌ? Wotaj tol miman ja weloc apnoj ja naꞌoni; caw lekꞌtiꞌ jaach, caw pena ja naꞌbꞌal; tucꞌal chi jul ja wil tzet utbꞌil chi yun yoc jowal tiꞌ, ẍi jun yuẍtaj naj tuꞌ tet.
29 —¿Tumi ey tzet chex wute an xin? Tucꞌal chin kꞌanle tzet ye jun naj Filisteo tiꞌ, ẍi naj David.
30 Jix lawi tuꞌ, jix el scꞌatan ebꞌ yuẍtaj tuꞌ, jix too skꞌanle tet junxa naj; jacꞌalaꞌ jix yun spajtzele tet. 31 Jaxa pax ebꞌ jix abꞌen tzet jix yal naj David tuꞌ, jix too ebꞌ yalon tet naj Saúl; yu jun tuꞌ, jix awtele naj David yu naj Saúl. 32 Jix yalon David tet naj Saúl jaxca tiꞌ:
—Cꞌam ojabꞌ chex xiw tet jun naj Filisteo tuꞌ. Yutol jain ja chejabꞌ jin tiꞌ jain oj toj wakꞌ jowal yetoj jun naj Filisteo tuꞌ, ẍi naj David.
33 —Ma skeꞌ ja too ja wakꞌon jowal yetoj jun Filisteo tuꞌ, yutol achꞌe jaachto; jal pax naj tuꞌ xin, icham winaj naj, yin tax cꞌal yachꞌeal jix cꞌoli yakꞌon jowal naj, yuxan caw wal jelan naj yakꞌon jowal, ẍi naj Saúl.
34 Jix takꞌwi naj David tet naj Saúl jaxca tiꞌ:
—Jain ja wakꞌomal servil jin tiꞌ, jaꞌ yet chi wilon noꞌ smeꞌ naj jin mam, ey bꞌey chi jul noꞌ bꞌalam, cꞌal noꞌ oso yet chi iꞌletoj noꞌ meꞌ yu noꞌ, 35 chin too tzajan yintaj noꞌ an, catuꞌ chin tokꞌon can ecꞌ noꞌ meꞌ tuꞌ tet noꞌ. Ta chi tit noꞌ win, catuꞌ chin tzakꞌontej yalan stiꞌ noꞌ, chin makꞌon cam noꞌ an. 36 Yu tuꞌ xin, caxcꞌal bꞌalam, ma oso chi juli, tucꞌal chin makꞌ camoj. Queytuꞌ oj wute jun txꞌoj conobꞌal tuꞌ. ¿Tzet yu, yuxan tol chi txꞌemle ebꞌ soldado Naj Dios iquis tiꞌ yu naj? 37 Jaꞌ Jehová jix jin colon el tet noꞌ bꞌalam cꞌal tet noꞌ oso, jacꞌalaꞌ jaꞌ Jehová oj jin colon pax el yul skꞌabꞌ jun Filisteo tiꞌ, ẍi naj David.
Jix yalon naj Saúl tet jaxca tiꞌ:
—Asiꞌ xin, jaꞌ Jehová oj colwa ja wetoj, ẍi naj tet David.
38 Jix lawi tuꞌ, eyman jix yiꞌel spichil naj Saúl chi skꞌanbꞌalne yin jowal, jix ale oc yin naj David. Jix ale atoj jun chꞌen kꞌoxkꞌome tol chꞌen bronce cꞌal el yin sjolom naj cꞌal jun chꞌen coraza yin xaamscꞌul. 39 Jix lawi tuꞌ, jix skꞌalon oc chꞌen espada tuꞌ naj David yin snan, catuꞌ jix yakꞌlen sbꞌey yaloni; ma skeꞌ sbꞌey yetoj wan pichile tuꞌ yetoj cꞌal wan mitxꞌkꞌabꞌe tuꞌ, yutol man qꞌueynaj oj naj. Yu jun tuꞌ, jix yalon tet naj Saúl jaxca tiꞌ:
—Cꞌam chi skeꞌ jin bꞌey yetoj wan tiꞌ an, yutol man qꞌueynaj oj jin yetoj, ẍi naj David.
Yu tuꞌ xin, jix yiꞌon el masanil wan tuꞌ naj yin. 40 Jix lawi tuꞌ, jix too naj, jix yiꞌontoj jun skꞌojoch teꞌ, catuꞌ jix sicꞌon a joebꞌ pilan chꞌen chꞌen bꞌey stiꞌ jaꞌ jaꞌ, jix yaon eytoj yul syaliẍ pa, iꞌbꞌil oc jun jinich yu, jix sjitzontoj sbꞌa scawilal jun Filisteo tuꞌ. 41 Jacꞌalaꞌ jun Filisteo tuꞌ, jix sjitz cꞌal pax tej sbꞌa bꞌey scawilal naj David tuꞌ, bꞌabꞌel naj inen oc jun majbꞌal julbꞌal tuꞌ yu. 42 Jaꞌ yet jix il-letej yin naj David tuꞌ yu naj Filisteo tuꞌ, tol sakꞌal chꞌan yili naj, caw caj wainaj xacꞌal yili, cꞌam cꞌaltaꞌ yeloc apnoj niꞌoj yul sat, yutol achꞌe unin to naj. 43 Jix yalon naj Filisteo tuꞌ jaxca tiꞌ:
—¿Tumi txꞌiꞌ jin cha wilaꞌ, yuxan chach tit win yetoj jun kꞌojoch teꞌ tuꞌ? ẍi naj tet David tuꞌ.
Jix lawi tuꞌ, jix bꞌuchle naj David tuꞌ yu naj, yin sbꞌi sdiosal, jix yalon jaxca tiꞌ:
44 —Titan titiꞌ, oj wakꞌ ja chiꞌbꞌeal tuꞌ ẍiꞌ noꞌ miij, cꞌal tet noꞌ xol-laj teꞌal noꞌ, ẍi tet naj David tuꞌ. 45 Jix takꞌwi naj David tet jaxca tiꞌ:
—Jaach tiꞌ iꞌbꞌil ja wespada ja wu, cꞌal chꞌen lanza yetoj cꞌal chꞌen kocꞌtaj lanza, catuꞌ chach jul ja wakꞌon jowal wetoj an. Jal jin jain tiꞌ, chin jul yin sbꞌi Jehová, Naj Ey Yipal Yibꞌan Masanil, jaꞌton cu Diosal jaon soldado Israel jon tiꞌ, Naj tol cꞌam yeloc apnoj yul ja sat tuꞌ. 46 Jaꞌ tinaniꞌ, jaꞌ Jehová oj jaach aon oc yul jin kꞌabꞌ, catuꞌ oj jaach jin makꞌon camoj, oj jin tzokꞌon el ja jolom, catuꞌ oj wakꞌon ja chiꞌbꞌeal tuꞌ ẍiꞌ noꞌ miij cꞌal noꞌ xol-laj teꞌal noꞌ; yetoj cꞌal pax ẍiꞌbꞌeal ebꞌ ja wet conobꞌ tiꞌ, oj wakꞌ ẍiꞌ noꞌ xol-laj teꞌal noꞌ tuꞌ. Queytuꞌ oj yun yotajnen el masanil ebꞌ ánima, tol ey jun Dios cu xol jaon Israel jon tiꞌ. 47 Jaꞌ masanil ebꞌ ánima yaman ecꞌ titiꞌ, oj naꞌcha el yu ebꞌ, tol man espadaoj, man pax lanzaoj chi mulna yu Jehová yet chi scolon el ebꞌ sconobꞌ. Jaꞌ jun jowal tiꞌ yet Jehová, jaꞌcaw oj jex aon oc yul cu kꞌabꞌ jon, ẍi naj David.
48 Jaxa jix yunne, jix tit naj Goliat yakꞌon jowal yetoj naj David tuꞌ, jacꞌalaꞌ naj David tuꞌ eyman jix too cꞌal pax yakꞌon jowal yetoj naj Goliat tuꞌ. 49 Eyman jix yaeytoj skꞌabꞌ naj yul syaliẍ pa, jix yiꞌon atej jun chꞌen chꞌen, jix yaon octoj yul jun jinich tuꞌ naj, catuꞌ jix skꞌojontoj. Palan cꞌal slow yin spalan naj Goliat tuꞌ, jix can xacꞌal can txꞌapan chꞌen snan spalan naj, catuꞌ jix eyqꞌuey nonaj naj Filisteo tuꞌ sat txꞌotxꞌ. 50 Queytuꞌ jix yun yeyqꞌuey naj Goliat tuꞌ yu naj David; junne kꞌetxan chꞌen chꞌen yetoj jun jinich jix akꞌon cam naj Goliat tuꞌ. Cꞌam cꞌal yespada naj David tuꞌ iꞌbꞌil oc yu. 51 Jix lawi tuꞌ, catuꞌ jix too lemna naj David tuꞌ yibꞌan naj Goliat tuꞌ, jix yiꞌon atej chꞌen espada yet Goliat tuꞌ, jacꞌal oc chꞌen jix akꞌon xacꞌal camoj, catuꞌ jix stzokꞌle el sjolom naj Goliat tuꞌ yu naj David yetoj chꞌen.
Jaꞌ yet jix yilon ebꞌ Filisteo tol jix cam jun caw jelan yin jowal yeoc xol ebꞌ tuꞌ, jix el ebꞌ yin ani. 52 Jaꞌ yet jix yilon ebꞌ Israel, cꞌal ebꞌ a Judá, jix el yaw ebꞌ, jix too tzajan ebꞌ yintaj ebꞌ Filisteo tuꞌ, masantaꞌcꞌal jix apni oc ebꞌ bꞌey stiꞌ conobꞌ Gat, cꞌal Ecrón. Bꞌey masanil yul-laj bꞌe chi too tacꞌal bꞌey Saaraim, chi apni oc bꞌey Gat, cꞌal bꞌey Ecrón, tuxa cꞌal telan cantoj smimanil ebꞌ soldado Filisteo camnajxa.
53 Jaꞌ yet jix tzajlo ebꞌ Israel yintaj ebꞌ Filisteo bꞌey wan conobꞌ tuꞌ, catuꞌ jix meltzo ebꞌ yiꞌon eltej masanil tzettaj yetal bꞌey bꞌulan ey ebꞌ Filisteo tuꞌ. 54 Jix lawi tuꞌ, catuꞌ jix iꞌle a sjolom naj Goliat yu naj David tuꞌ, jix yiꞌontoj bꞌey Jerusalén; jaxa chꞌen mitxꞌkꞌabꞌe yet jowal chi skꞌanbꞌalne naj Goliat tuꞌ, jix yiꞌtoj, jix yaon octoj naj yul skꞌap na.
55 Jaꞌ yet jix yilon naj Saúl stoo naj David yakꞌon jowal yin naj Goliat tuꞌ, jix skꞌanlen tet naj Abner, naj general yeoc xol ebꞌ soldado tuꞌ:
—Jaach Abner, ¿mactxequel smam jun naj achꞌe tiꞌ? ẍi naj.
56 —Jaach rey, caw man wotaj oj an, ẍi naj Abner.
—Chi wal ey jaach, tol cha kꞌanle ecꞌoj, ẍi naj rey Saúl tuꞌ.
57 Jaꞌ yet lalan smeltzo naj David, yet xax cam naj Goliat tuꞌ yu, iꞌbꞌil oc jun jolome tuꞌ yu naj, catuꞌ jix yiꞌontoj naj Abner tet naj Saúl. 58 Jix skꞌanlen naj Saúl tet naj David jaxca tiꞌ:
—¿Mactxequel ja mam, cha achꞌe? ẍi naj Saúl tet naj. Jix takꞌwi naj David jaxca tiꞌ:
—Scꞌaal jin naj Jesé, naj ja wakꞌomal servil caan bꞌey conobꞌ Belén, ẍi naj.