—¿Bꞌakꞌin oj oc tucan ja cuscꞌulal yu naj Saúl tuꞌ? Cꞌamxa chi yal jin cꞌul tol oj yakꞌ cꞌal yaawil naj xol conobꞌ Israel tiꞌ. Jaꞌ tinaniꞌ, akꞌ noel noꞌ yucꞌaꞌ wacax yetoj aceite olivo, catuꞌ chach too bꞌey sna naj Jesé, bꞌey conobꞌ Belén, yutol jix jin sicꞌ el jun scꞌaal naj yet chi oc yin reyal, ẍi Jehová.

2 —¿Tzet wal chi yun jin too an? Ta chi yabꞌ naj Saúl jun tiꞌ, chim jin makꞌle cam yu naj, ẍi naj Samuel.

Jix takꞌwi Jehová jaxca tiꞌ tet naj:

—Iꞌtoj junoj noꞌ kꞌopo wacax catuꞌ chach toi, cha waloni, tol chi jul ja wakꞌ yin xaambꞌal. 3 Chi lawi tuꞌ, catuꞌ cha wawten naj Jesé low ja wetoj, jaꞌ tituꞌ oj wal ey jaach tzet oj ja wunne. Jaꞌ jun oj jin txꞌoxoc ey jaach tuꞌ, jaꞌ jun tuꞌ cha sicꞌ can eloj, catuꞌ cha waon can atoj aceite olivo yin sjolom naj, ẍi Jehová.

4 Jix sjije naj Samuel tzet jix yal Jehová. Jaꞌ yet jix apni oc naj bꞌey conobꞌ Belén tuꞌ, jix jul chaꞌle apnoj naj yu ebꞌ icham winaj yeoc yul conobꞌ yin xiwcꞌulal, eyman jix skꞌanle ebꞌ tet naj jaxca tiꞌ:

—¿Tzet wal chi jul ja wunne? ¿Watxꞌ mi wal ma yu junoj jowal, yuxan chach juli? ẍi ebꞌ tet naj.

5 —Watxꞌ tzet chi jul wun an, tol chi jul wakꞌ jun xaambꞌal tet Jehová. Waꞌnewej je bꞌa jatacꞌalaꞌ yalon ley, catuꞌ oj jex toj wetoj yet oj wakꞌon jun xaambꞌal tiꞌ, ẍi naj Samuel tet ebꞌ.

Jix yalon tet naj Jesé, cꞌal tet ebꞌ scꞌaal, tol chi swaꞌne sbꞌa ebꞌ, jatacꞌalaꞌ yalon ley, yet chi ẍiꞌon noꞌ xaambꞌal ebꞌ tuꞌ yetoj naj. 6 Jaꞌ yet jix apni oc naj Jesé yetoj ebꞌ scꞌaal, eyman jix yiloc naj Samuel, jix oc tꞌanan naj yin naj Eliab, naj bꞌabꞌel cꞌaale, jix yalon naj yin snaꞌbꞌal jaxca tiꞌ: Tala taꞌ jaꞌ jun naj tiꞌ jix sicꞌle can el yu Jehová, ẍi naj yin snaꞌbꞌal.

7 Jix yalon Jehová jaxca tiꞌ tet naj: Manche jaach oc tꞌanan yin tzet utbꞌil yili jun naj achꞌe tiꞌ, cꞌal yin steel, yutol cꞌam chi woche naj. Jaex ánima jex tiꞌ, jaꞌ yili oc junoj mactxequel jaꞌ che yilocoj, jal jin jain tiꞌ, jaꞌ tzet wal yili oc spixan junoj mactxequel, cꞌal snaꞌbꞌal, jaꞌ chi wilocoj, ẍi Jehová.

8 Jix lawi tuꞌ, jix yiꞌontej naj Jesé jun scꞌaal chi yij Abinadab, sattaj naj Samuel tuꞌ, jix yalon cꞌal pax naj Samuel jaxca tiꞌ:

—Man pax jaꞌ oj junxa naj tiꞌ jix sicꞌ el Jehová, ẍi naj.

9 Jix yiꞌon pax tej naj Jesé junxa scꞌaal chi yij Samá, sattaj naj Samuel tuꞌ; jix yalon tet jaxca tiꞌ:

—Manaj junxa naj tiꞌ jix sicꞌ el Jehová, ẍi naj.

10 Jix tzꞌajna yecꞌtoj ebꞌ jujwan scꞌaal naj Jesé sattaj naj Samuel tuꞌ. Tam wal junoj ebꞌ naj tuꞌ jix sicꞌ el Jehová, ẍi naj. 11 Yin xa slawubꞌal tuꞌ, jix skꞌanlen Samuel tet naj Jesé jaxca tiꞌ:

—¿Tumi asanne ebꞌ naj ja cꞌaal tiꞌ? ẍi naj.

—Jix yalon naj Jesé jaxca tiꞌ: Ey chꞌan junxa naj tzunan unin, eycantoj naj teyne meꞌ, ẍi naj Jesé.

—Atoj yiꞌomal naj xin, ta cꞌam naj eyecꞌoj, yutol masantaꞌcꞌal chi jul naj catuꞌ chi cu lowi, ẍi naj Samuel.

12 Jix aletoj yiꞌomal naj tzunan unin tuꞌ yu naj Jesé. Jaxa yet jix jul naj, jix yilon oc naj Samuel, tol caj wainaj yili naj, caw wal watxꞌ yili sat, cꞌal smimanil. Jaꞌ yet jun txolan tuꞌ, jix yalon Jehová tet naj Samuel:

—Jaꞌton naj tiꞌ xin, aan waanoj catuꞌ cha waon atoj aceite olivo yibꞌan sjolom naj, ẍi Jehová tet naj Samuel.

13 Jix lawi tuꞌ xin, jix yiꞌontej noꞌ yucꞌaꞌ meꞌ naj Samuel bꞌey eeytoj aceite olivo tuꞌ, sattaj masanil ebꞌ naj yuẍtaj tuꞌ jix yaon atoj aceite olivo naj Samuel yibꞌan sjolom naj David. Yet tax cꞌal jun cꞌual tuꞌ, jix oc can Yespíritu Jehová yin naj. Jaꞌ yet jix lawi slow ebꞌ xin, jix stakꞌele can sbꞌa naj Samuel yetoj ebꞌ, catuꞌ jix meltzotoj naj bꞌey Ramá.

14 Jix yiꞌel Yespíritu Jehová yin naj Saúl, jaxa jun pena espíritu jix ale can oc yin naj, caw wal chi etenele naj yu. 15 Yu jun tuꞌ, jix yalon ebꞌ chi akꞌon servil jaxca tiꞌ tet:

—Jaach rey, chim naꞌcha el jun tiꞌ ja wu, tol eyoc jun pena espíritu ja win, jun jix yaoc Dios yu jaach yetneni. 16 Jaꞌ tinaniꞌ, ta chi ẍaꞌ ja cꞌul, chi cu too jaon ja chejabꞌ jon tiꞌ, yet chi cu sey junoj naj chi skeꞌ stenon teꞌ arpa, yet watxꞌ jaꞌ yet chach yetnen jun pena espíritu tiꞌ, catuꞌ chi stenon teꞌ arpa naj tuꞌ, catuꞌ oj el leeoj cha wilaꞌ, ẍi ebꞌ tet naj Saúl.

17 —Asiꞌwej xin; jaꞌ ojabꞌ wal junoj naj caw jelan stenon arpa che yiꞌtej, ẍi naj Saúl tet ebꞌ.

18 Jix yalon jun yakꞌomal servil naj jaxca tiꞌ:

—Ey wal jun naj wotaj jain tiꞌ, scꞌaal naj Jesé, caw watxꞌ chi yun stenon teꞌ arpa naj, jatuꞌ caan naj bꞌey conobꞌ Belén. Jix yalon cꞌal pax oj, caw jelan naj yin jowal; caw jichan cꞌal skꞌanabꞌi, catuꞌ watxꞌ yili smimanil. Ey cꞌal oc Dios yetoj, chi kilaꞌ, ẍi naj.

19 Yu tuꞌ xin, jix ẍejontoj wan yakꞌomal servil naj Saúl bꞌey naj Jesé tuꞌ, jix yalontoj naj jaxca tiꞌ: Chi woche cha watej naj ja cꞌaal David ey jin tiꞌ an, naj yilomal ja meꞌ, ẍi toj naj Saúl. 20 Jix sjije cꞌal naj Jesé, jix yaontoj jun scꞌaal chi yij David bꞌey naj Saúl. Jix yaontoj jun noꞌ bꞌuru yetoj, ijbꞌil oc jun ijatzil ixim pan yu noꞌ, yetoj jun neet tzꞌuum eey yal uva yul, yetoj cꞌal jun noꞌ yuneꞌ chiw. 21 Jaꞌ yet jix apni oc naj David bꞌey naj Saúl tuꞌ, jix oc can yin yakꞌomaloj servil. Caw xaan jix il-le naj David tuꞌ yu naj Saúl, jix yaon oc yin yijomaloj smitxꞌkꞌabꞌ yet jowal. 22 Jix yaontoj jun yakꞌomal servil naj Saúl bꞌey naj Jesé, yu skꞌanlen tet naj jaxca tiꞌ: Chi skeꞌ chi can xacꞌal can naj ja cꞌaal tiꞌ wetoj an, yutol caw chin tzala yetoj naj an, ẍi toj naj. 23 Jaꞌ yet chi tit jun pena espíritu eyoc yin naj Saúl tuꞌ, catuꞌ chi oc ian naj David stenon teꞌ arpa tuꞌ. Jaꞌ yet chi yabꞌen naj Saúl jun tuꞌ, catuꞌ chi el jun pena espíritu tuꞌ yin, chi el leeoj yin chi yabꞌe.