—Jaꞌ Jehová jix jin chejontej, yet jix jin jul jaach waon can oc yin reyal xol ebꞌ sconobꞌ, jaꞌton Israel. Yu jun tuꞌ, yuxan chaꞌ cꞌal ja wabꞌ tzet chi yal Jehová ey jaach. 2 Jaxca tiꞌ yalon Jehová, Naj Yaaw Yibꞌan Masanil: Jain oj waoc syaꞌilal yibꞌan ebꞌ Amalecita yu jix yakꞌ jowal ebꞌ yin ebꞌ Israel yet jix tit ebꞌ bꞌey txꞌotxꞌ Egipto. 3 Yuxan, jaꞌ tinaniꞌ xin, asiꞌ yetoj ebꞌ ja soldado, catuꞌ cha wakꞌon jowal yetoj ebꞌ Amalecita tuꞌ. Che qꞌueycan el masanil tzetyetal ebꞌ ey tet. Cꞌam ojabꞌ bꞌey chi okꞌ je cꞌul yin ebꞌ. Che makꞌwej cam masanil ebꞌ winaj, ebꞌ ix ix, ebꞌ unin, cꞌal yetoj ebꞌ unin tol to chi ali, yetoj cꞌal pax noꞌ wacax, noꞌ meꞌ, noꞌ camello, cꞌal noꞌ bꞌuru, ẍi naj Samuel.

4 Jix yambꞌale oc masanil ebꞌ conobꞌ Israel tuꞌ yu naj Saúl, bꞌey jun conobꞌ chi yij Telaím. Ey 200,000 ebꞌ soldado Israel chi bꞌeyi, yetoj cꞌal 10,000 ebꞌ a Judá. 5 Jix lawi tuꞌ, catuꞌ jix too naj Saúl yetoj ebꞌ soldado, bꞌey sbꞌeal miman conobꞌ Amalec, catuꞌ jix yewbꞌa el sbꞌa ebꞌ bꞌey spananil stiꞌ sjobꞌeal jun jaꞌ yaliẍ jaꞌ. 6 Jix yaontoj kꞌane naj Saúl tet ebꞌ Quenita jaxca tiꞌ:

—Elanwej xol ebꞌ Amalecita tuꞌ, yet watxꞌ cꞌam chex cu qꞌueycan el yetoj ebꞌ jon; yutol jaex tiꞌ, jix okꞌ je cꞌul yin ebꞌ ket conobꞌ Israelal tiꞌ jon, yet jix jul ebꞌ titiꞌ, yet jix eltej ebꞌ bꞌey txꞌotxꞌ Egipto, ẍi naj Saúl tet ebꞌ.

Eyman jix spoꞌoel sbꞌa ebꞌ Quenita xol ebꞌ Amalecita tuꞌ. 7 Jaxa yapni oc lemna Saúl yin ebꞌ Amalecita bꞌey Havilá, masantaꞌcꞌal bꞌey Sur bꞌey smoonal yet txꞌotxꞌ Egipto; yetcꞌulal bꞌey chi aol cꞌu. 8 Jix michꞌchatej naj Agag yu ebꞌ, jaꞌton naj sreyal conobꞌ Amalec, jix yiꞌontoj ebꞌ preso; jal masanil ebꞌ Amalecita xin, jix makꞌle cam ebꞌ. 9 Asan xin, jaꞌ naj Saúl yetoj ebꞌ soldado jaꞌjun yetoj, jix yakꞌ mimancꞌulal ebꞌ yin naj Agag, ma makꞌle cam naj yu ebꞌ. Ma cꞌal pax smakꞌ cam noꞌ wacax ebꞌ, noꞌ tol caw bꞌakꞌech, noꞌ meꞌ, noꞌ achꞌe wacax tol caw bꞌakꞌech, cꞌal noꞌ icham meꞌ, yetoj cꞌal wanojxa tzettaj yetal tol caw wal ey stool; jal pax masanil tzetyetal tol cꞌam swatxꞌil xin, masanil jix qꞌueyle can el yu ebꞌ.

10 Jaꞌ Jehová jix alon tet naj Samuel jaxca tiꞌ:

11 Majtaꞌ wal waoc naj Saúl yin reyal, caw wal chi wabꞌ syaꞌil yu naj, yutol jix jin yintajne can eloj, ma sjije naj tzet jix walaꞌ, ẍi Jehová.

Jaꞌ yet jix yabꞌen naj Samuel jaxca tuꞌ, caw jix oc naj yin cuscꞌulal, masanil akꞌbꞌal jix txali naj tet Jehová. 12 Jaꞌ yet caw skꞌinibꞌto jix too naj bꞌey eyecꞌ naj Saúl. Jaxa jix yun yalon ebꞌ ánima tet naj tol jix too naj Saúl bꞌey Carmel, jaꞌ tituꞌ jix swaꞌne a tzꞌujan jun miman monumento naj yu sbꞌinale ecꞌoj; jix lawi tuꞌ jix too naj bꞌey Guilgal. 13 Yu tuꞌ xin, jix too naj Samuel seyon ecꞌ naj tituꞌ, jix ilcha oc Saúl yu naj, jix yalon naj Saúl jaxca tiꞌ:

—Yakꞌ ojabꞌ syaaxilal Jehová ja wibꞌan; tuxa jix jin jije tzet jix yalaꞌ, ẍi naj Saúl.

14 —¿Tzet pax ye noꞌ meꞌ cꞌal noꞌ wacax chi el yaw chi wabꞌ tuꞌ? ẍi naj Samuel.

15 —Jaꞌ wan tuꞌ, jix tit noꞌ bꞌey yul yet Amalec, tol jix yiꞌcan ebꞌ naj soldado noꞌ meꞌ tol caw bꞌakꞌech, cꞌal noꞌ achꞌe wacax tol oj oc noꞌ yin xaambꞌaloj tet Jehová cu Diosal. Jal pax masanil xin, jix cu qꞌueycan el jon, ẍi naj Saúl.

16 Cꞌamxa tzet watxꞌ cha walaꞌ. Oj wal ey jaach tzet jix yal Jehová ey jin yet skꞌejbꞌintajil ewi, ẍi naj Samuel tet naj Saúl.

—Alaꞌ, ẍi naj Saúl.

17 Jix yalon naj Samuel tet naj Saúl jaxca tiꞌ:

—¿Caxcꞌal jaꞌ yet yalantoj tol cha naꞌ cꞌam niꞌoj ja weloc apnoj? Caxcꞌal mi jaxca tuꞌ, jaꞌ Jehová jix jaach aon oc yin reyal yibꞌan masanil ebꞌ yicꞌaal Israel; jaꞌ Jehová jix jaach aon oc sreyaloj cu conobꞌ tiꞌ. 18 Jaꞌ Naj jin jaach chejoni, yet jix yalon ey jaach jaxca tiꞌ: Tol chi too ja qꞌueycan el masanil ebꞌ Amalecita tuꞌ, yetoj masanil tzetyetal ey yul skꞌabꞌ ebꞌ, 19 ¿tzet yuxan ma ja jije tzet jix yal Jehová, ilaꞌ tol jix ja wiꞌtej wan tzetyetal ey yul skꞌabꞌ ebꞌ ja cajat tuꞌ? Caw wal pena tzet jix el ja wunen sattaj Jehová, ẍi naj Samuel.

20 Catuꞌ jix takꞌwi naj Saúl jaxca tiꞌ:

—Cꞌamaj, jix jin jije tzet jix yal Dios, jix bꞌet jin mitxꞌtej naj Agag sreyal ebꞌ Amalecita, jix jin qꞌueyon can el masanil ebꞌ ánima tituꞌ. 21 Jaꞌ ebꞌ soldado jaꞌjun wetoj tiꞌ, jaꞌ ebꞌ jix colon can el noꞌ meꞌ, noꞌ wacax, noꞌ tol tꞌinan cꞌaltaꞌ sqꞌueyle eloj; jix yiꞌtej ebꞌ, yet oj akꞌle noꞌ yin xaambꞌaloj sattaj Jehová cu Diosal bꞌey Guilgal tiꞌ, ẍi naj Saúl tuꞌ.

22 Yu jun tuꞌ, jix yalon naj Samuel jaxca tiꞌ:

24 Jix yalon Saúl tet naj Samuel jaxca tiꞌ:

—Yel toni, jix oc jin penail an, ma jin jije tzet jix yal Jehová, yetoj cꞌal tzet jix ja wal ey jin, yutol jix jin xiw tet ebꞌ soldado jaꞌjun wetoj tiꞌ an, jix jin jijen tzet jix yal ebꞌ. 25 Jaꞌ tinaniꞌ xin, chi kꞌan ey jaach an, tol cha wakꞌ mimancꞌulal win yu jin penail jix oqui, meltzaan wetoj an catuꞌ chi cu oc yin eyilal sattaj Jehová, ẍi naj Saúl.

26 —Cꞌam chin meltzo ja wetoj an, yutol jix ja wintajne can el tzet jix yal Jehová; tuxa jix jaach yiꞌcan el Naj yin sreyalil cu conobꞌ Israel tiꞌ, ẍi naj Samuel.

27 Jaxa yet jix meltzo naj Samuel tuꞌ yaloni, jix oc nicꞌan naj Saúl yin stiꞌ an xotil naj eyocoj, jix nicꞌcha an yu naj. 28 Yu jun tuꞌ, jix yalon naj Samuel tet naj Saúl jaxca tiꞌ:

—Jaxca wal tuꞌ oj yun ja wiꞌle el yin ja wopiso yin sreyaliloj conobꞌ Israel tiꞌ yu Jehová, catuꞌ oj yaon can oc ja wopiso tuꞌ yul skꞌabꞌ junxa ja wet conobꞌ tol yel xacꞌal jijem ja wintaj. 29 Sowalil oj yun jun tiꞌ, yutol jaꞌ Jehová, Naj tol chi kiꞌa can sbꞌi jaon Israel jon tiꞌ, cꞌam cꞌal bꞌey chi sqꞌuex snaꞌbꞌal, yutol man laan oj yetoj ebꞌ ánima, ẍi naj Samuel.

30 Jix yalon Saúl jaxca tiꞌ:

—Yel toni jix oc jin penail sattaj Dios, yu jun tuꞌ xin, chin kꞌan ey jaach an, tol cha wal tet Dios wu an, yet watxꞌ tol ey ojabꞌ weloc apnoj sattaj masanil ebꞌ ket conobꞌ tiꞌ. Yuxan meltzaan wetoj an xin, catuꞌ chi cu oc yin eyilal tet Jehová cu Diosal, ẍi naj Saúl.

31 Yu jun tuꞌ xin, jix meltzo naj Samuel yetoj, catuꞌ jix oc naj Saúl yin eyilal tet Jehová. 32 Jix lawi tuꞌ, jix yalon naj Samuel jaxca tiꞌ:

—Iꞌwejtej naj Agag jin sattaj an, naj sreyal Amalec, ẍi naj Samuel.

Jix tzala xacꞌal a scꞌul naj Agag tuꞌ, jix oc linan sattaj naj Samuel. Jaꞌ mi snaꞌon naj tol jix ecꞌ el camich yibꞌan. 33 Jix yalon naj Samuel tet naj jaxca tiꞌ:

—Yu cꞌal chꞌen ja wespada tiꞌ, yuxan caw ecꞌal ebꞌ ix ix tol cꞌamxa junoj yuneꞌ jix cancanoj. Jaxca wal ye can ebꞌ xꞌojli tinaniꞌ, queytuꞌ oj yun scancan ix ja txutx xol ebꞌ ix tuꞌ, ẍi naj Samuel.

Yin eymanil tuꞌ, jix yun stit sjowal naj Samuel, kocꞌ tzokꞌ jix uteletoj naj Agag sattaj Jehová bꞌey Guilgal yu naj. 34 Jix lawi tuꞌ, jix meltzotoj naj bꞌey conobꞌ Ramá, catuꞌ jix meltzo cꞌal pax toj naj Saúl bꞌey sna, bꞌey Guibeá. 35 Jaꞌ yet iquisto ecꞌ naj Samuel tuꞌ cꞌamxa bꞌey jix yiꞌle sbꞌa yetoj naj Saúl, asan caw chi oc naj yin cuscꞌulal yu. Quey pax tuꞌ Jehová caw jix cus scꞌul, yutol jix yaoc Saúl yin sreyaloj conobꞌ Israel.