—Ecꞌoj jon toj bꞌey skꞌaxepal jaꞌ jaꞌ tuꞌ, yet chi cu apni oc bꞌey bꞌulan ey ebꞌ soldado ebꞌ Filisteo, catuꞌ chi cu qꞌueyon can el ebꞌ, ẍi naj.

Cꞌam cꞌal tzet jix yal Jonatán tuꞌ tet smam. 2 Jal naj Saúl, jatuꞌ bꞌulan ey yetoj ebꞌ soldado bꞌey scawilal conobꞌ Guibeá yich jun teꞌ teꞌ chi yij granada bꞌey chi tecꞌle ixim tiriw; ey 600 ebꞌ soldado tzajan oc yintaj. 3 Junne ey naj Ahías scꞌaal Ahitub yetoj Saúl. Eyoc spichil yet yakꞌomal xaambꞌal yu. (Jaꞌ naj Ahitub yuẍtaj Icabod, scꞌaal naj Finees ebꞌ, yitxiquin naj Elí, jaꞌton naj yakꞌomal xaambꞌal bꞌey conobꞌ Siló.)

Man yotaj oj naj Saúl cꞌal ebꞌ soldado ta tol jix too naj Jonatán tituꞌ. 4 Jal pax naj Jonatán xin, eyoc yin snaꞌbꞌal tol oj apnoj oc bꞌey bꞌulan ey ebꞌ Filisteo tuꞌ. Bꞌey snan caabꞌ chꞌen mimej chꞌen sat chꞌen, jaꞌ tituꞌ chi ecꞌtoj jun bꞌe tuꞌ, ey jun chꞌen chi yij Bosés, jal junxa chꞌen chi yij Sene. 5 Ey jun chꞌen ey bꞌey sattaj Micmás yetcꞌulal norte, jal junxa chꞌen, ey bꞌey sattaj Guibeá yetcꞌulal sur. 6 Jix yalon naj Jonatán tet naj inen oc smitxꞌkꞌabꞌ yet jowal tuꞌ jaxca tiꞌ:

—Jaꞌ tinaniꞌ ecꞌoj jonwejtoj bꞌey chꞌen sat chꞌen tuꞌ, yet chi cu apni oc bꞌey bꞌulan ey ebꞌ txꞌoj conobꞌal tuꞌ. Jaxta wal oj colwa Jehová ketoj; tumi man oj skeꞌ scolwa Dios ketoj che naꞌ, ta chi el yin scꞌul, caxcꞌal mi cꞌam jon txꞌial, ma ecꞌal jon, ẍi naj Jonatán.

7 —Yun ojabꞌ tzet chi yoche ja cꞌul cha wunne, jain tiꞌ oj jin colwa cꞌal ja wetoj bꞌeytuꞌ chi yoche ja cꞌul chin colwa ja wetoj, ẍi naj inen oc mitxꞌkꞌabꞌe yet jowal tuꞌ.

8 Jix yalon naj Jonatán:

—Toon xin, jaꞌ yet oj cu ecꞌ apnoj bꞌey junxa jobꞌe tuꞌ, oj cu txꞌox cu bꞌa tet ebꞌ. 9 Ta oj yal ebꞌ ey jon jaxca tiꞌ: Ocanwej tucan tituꞌ ta ẍi ebꞌ, oj kechbꞌane yeyol ebꞌ titiꞌ, cꞌam chi cu atoj bꞌey eyecꞌ ebꞌ tuꞌ. 10 Ta oj yal ebꞌ tol chi cu atoj bꞌey ebꞌ tuꞌ, catuꞌ oj cu atoj. Queytuꞌ oj yun xꞌoxon Jehová ey jon tol oj colwa ketoj, ẍi naj Jonatán tuꞌ.

11 Queytuꞌ jix yute ebꞌ, jix xꞌox sbꞌa ebꞌ tet ebꞌ Filisteo tuꞌ. Jaꞌ yet jix yilontej ebꞌ Filisteo ebꞌ cawan tuꞌ, jix yalon ebꞌ jaxca tiꞌ: Ilwej ton abꞌi, lalan yeltej ebꞌ Hebreo yul-laj jolan bꞌey ewan el ebꞌ, ẍi ebꞌ. 12 Jaꞌ yet jun txolan tuꞌ jix awi eytej ebꞌ tet naj Jonatán, cꞌal tet naj jaꞌjun yetoj tuꞌ jaxca tiꞌ:

—Eymanwej, aanwejtej titiꞌ, ey tzet oj kal ey jex, ẍi ebꞌ Filisteo tuꞌ.

Yet cꞌal jun txolan tuꞌ jix yalon naj Jonatán tet naj inen oc mitxꞌkꞌabꞌe yet jowal tuꞌ:

—Tzajan jaach cꞌal wintaj an, yutol jaꞌ Jehová, oj aon oc ebꞌ Filisteo tiꞌ yul cu kꞌabꞌ jaon Israel jon tiꞌ, ẍi naj.

13 Catuꞌ jix atoj txactxon naj Jonatán yetoj naj inen oc smitxꞌkꞌabꞌ yet jowal tuꞌ; jix eyqꞌuey ebꞌ Filisteo yu naj Jonatán, jaxa naj yijomal mitxꞌkꞌabꞌe tuꞌ jix makꞌon xacꞌal cam ebꞌ. 14 Jaꞌ yin jun bꞌabꞌel jowal jix oc yu naj Jonatán tuꞌ, ey 20 ebꞌ Filisteo jix smakꞌ camoj, asanne mi canebꞌoj txꞌanil bꞌey jix bꞌeytoj ebꞌ. 15 Masanil ebꞌ soldado eyecꞌ bꞌey bꞌulan ey ebꞌ Filisteo tuꞌ cꞌal ebꞌ sajleminaj yetoj, jaꞌton ebꞌ eytoj iꞌo eltej tzettaj yetal tuꞌ, caw jix xiwa ebꞌ. Jaꞌ yet jun txolan tuꞌ jix ecꞌ pax jun quixcabꞌ, caw wal jow jix yute, yu jun tuꞌ, caw yel xacꞌal jix xiwa ebꞌ.

16 Jaxa ebꞌ eyoc smajomaloj yu naj Saúl bꞌey Guibeá yul yet Benjamín, jix yiltoj ebꞌ yecꞌ bꞌulbꞌon ebꞌ Filisteo tuꞌ. 17 Yu jun tuꞌ, jix yalon naj Saúl tet ebꞌ soldado tzajan oc yintaj jaxca tiꞌ:

—Seywej il cu xol tiꞌ, tzꞌajan jon mi ma cꞌamaj, catuꞌ che yiloni mactxequel man eyoj ecꞌoj, ẍi naj tet ebꞌ.

Jaxa yet jix yilontej ebꞌ xin, tol cꞌam naj Jonatán eyecꞌ yetoj jun yijomal ecꞌ smitxꞌkꞌabꞌ yet jowal. 18 Jaꞌ yet tuꞌ, eyecꞌ teꞌ Scaẍail Swa Kꞌane Jehová xol ebꞌ Israel, yuxan jix yal Saúl tet naj Ahías jaxca tiꞌ:

—Iꞌtej teꞌ scaẍa Jehová tiꞌ, ẍi naj. 19 Lalanto wal skꞌanabꞌ naj Saúl yetoj naj yakꞌomal xaambꞌal tuꞌ, jix a xacꞌal somna ebꞌ Filisteo yel jininoj. Yuxan jix yal naj Saúl tet naj yakꞌomal xaambꞌal jaxca tiꞌ:

—Manche xa ja wiꞌtej teꞌ caẍa tuꞌ, manxa oj cu kꞌanle tet Jehová, ẍi naj Saúl tuꞌ.

20 Jix lawi tuꞌ, jix syambꞌan oc masanil ebꞌ soldado naj Saúl, catuꞌ jix too yakꞌon jowal yin ebꞌ Filisteo tuꞌ. Jaꞌ yet jix apni oc ebꞌ, jix yilon ebꞌ tol xax somcha el snaꞌbꞌal ebꞌ Filisteo, jaxa cꞌal oc ebꞌ chi smakꞌle cam sbꞌa. 21 Yetoj cꞌal pax oj, jantaj to ebꞌ Israel eycantoj xol ebꞌ Filisteo yet yalantoj, jaꞌ yet jix yilon ebꞌ tol yelcꞌulal chi oc jowal, catuꞌ jix ecꞌtoj ebꞌ yetoj naj Saúl, cꞌal yetoj Jonatán. 22 Jaxa ebꞌ Israel ewan can el bꞌey txꞌotxꞌ tzalquiltaj txꞌotxꞌ yul yet Efraín, tol yin elilal xa chi yun yel ebꞌ Filisteo tuꞌ, jix oc pax ian ebꞌ yakꞌon jowal yin ebꞌ. 23 Jix too tzajan ebꞌ Israel yintaj ebꞌ Filisteo tuꞌ, masantaꞌcꞌal bꞌey sattaj ecꞌtoj Bet-avén; queytuꞌ jix yun scolon el conobꞌ Israel Jehová yet jun cꞌual tuꞌ.

24 Jaꞌ yet jun cꞌual tuꞌ, caw wal jix cꞌuumbꞌi a ebꞌ Israel, yutol cꞌam junoj ebꞌ jix low yet jun cꞌu tuꞌ, yuxan jix yal jun kꞌane naj Saúl jaxca tiꞌ: Ta ey mactxequel oj low yet jun skꞌejbꞌintajil tiꞌ, yet cꞌamto chi wiꞌel sjowal jin cꞌul yin ebꞌ jin cajat tiꞌ, oj tit can syaꞌtajilal yibꞌan, ẍi naj. 25 Jaxa yet jix apni oc ebꞌ soldado bꞌey xol-laj teꞌ, ey noꞌ yal awcabꞌ bꞌey sat txꞌotxꞌ txꞌotxꞌ tuꞌ, 26 jaxca xacꞌal yel sne jaꞌ jaꞌ, queytuꞌ sbꞌey yal noꞌ awcabꞌ tuꞌ sat txꞌotxꞌ, yutol cꞌam cꞌal junoj ebꞌ jix abꞌlen niꞌoj noꞌ yal awcabꞌ tuꞌ, yutol caw chi xiw ebꞌ tet jun kꞌane jix yal naj Saúl tuꞌ. 27 Jal naj Jonatán xin, ma yabꞌoc naj jun kꞌane jix yal smam tuꞌ, yuxan jix slaeytoj xaam jun teꞌ teꞌ xol noꞌ yal awcabꞌ tuꞌ, jix sloꞌon eytoj naj, caw jix oc yip naj jix yabꞌe. 28 Ey jun naj soldado jix alon tet naj:

—Ey jun skꞌane naj ja mam jix yal can jaxca tiꞌ: Ta ey junoj mactxequel chi loꞌon junoj tzetyetal tol oj tit can syaꞌtajilal yibꞌan, yu jun tuꞌ, yuxan lalan xacꞌal spax kip cu masanil, ẍi jun soldado tuꞌ tet naj.

29 Catuꞌ jix takꞌwi naj Jonatán jaxca tiꞌ:

—Jaꞌ naj jin mam tuꞌ, caw pena tzet chi yiꞌtej naj yibꞌan cu conobꞌ tiꞌ. Ilaꞌ jin jain tiꞌ, caw wal jix wabꞌ yoc wip yu niꞌan noꞌ yal awcabꞌ jix jin loꞌeytoj tiꞌ. 30 Jaxca tam wal ebꞌ ket conobꞌ tiꞌ, yel xacꞌal mi jix oc yip ebꞌ, ta jix sloꞌ ebꞌ niꞌoj tzet jix yiꞌcan ecꞌ ebꞌ tet ebꞌ cu cajat tuꞌ; ecꞌal mi to ebꞌ Filisteo jix cam kuwej, ẍi naj Jonatán.

31 Jaꞌ yet jun cꞌual tuꞌ, jix tzajlo ebꞌ Israel yintaj ebꞌ Filisteo bꞌey Micmás, masantaꞌcꞌal bꞌey Aialón. Caw wal jix pax xacꞌal yip ebꞌ soldado Israel tuꞌ. 32 Yu tuꞌ xin, jantaj cꞌal tzet jix yiꞌecꞌ ebꞌ Israel tet ebꞌ scajat tuꞌ, ey noꞌ wacax, noꞌ meꞌ, yetoj cꞌal noꞌ yuneꞌ wacax, jix smakꞌ cam ebꞌ, ma xacꞌal yechbꞌane ebꞌ yel ẍiqꞌuil noꞌ yet jix ẍiꞌon eytoj ebꞌ. 33 Eyman jix bꞌet al-le tet naj Saúl yu ebꞌ:

—Jaꞌ ebꞌ conobꞌ caw jix oc spenail ebꞌ sattaj Jehová, jix ẍiꞌeytoj noꞌ chiꞌbꞌe ebꞌ yetoj ẍiqꞌuil, ẍi ebꞌ. Yu jun tuꞌ, yuxan jix yal naj Saúl jaxca tiꞌ:

—Jix oc je penail yul sat Jehová, jaꞌ tinaniꞌ xin, bꞌalwejtej junoj chꞌen miman chꞌen tuꞌ titiꞌ. 34 Catuꞌ che yalon tet ebꞌ ánima, yiꞌ ojabꞌtej junoj swacax, ma junoj smeꞌ ebꞌ, catuꞌ chi smakꞌon cam ebꞌ, chi ẍiꞌon ebꞌ titiꞌ, yet watxꞌ cꞌam chi oc spenail ebꞌ sattaj Jehová yintaj pax tol chi ẍiꞌ noꞌ chiꞌbꞌe ebꞌ tol eyto oc ẍiqꞌuil, ẍi naj Saúl.

Jaꞌ yet jun akꞌbꞌal tuꞌ, junjun cꞌal jix yiꞌtej swacax, ma smeꞌ, catuꞌ jix smakꞌon cam ebꞌ, jix ẍiꞌon ebꞌ. 35 Catuꞌ jix swaꞌnen jun yet xaambꞌal naj Saúl tituꞌ. Jaꞌton jun tiꞌ sbꞌabꞌel yet xaambꞌal jix swaꞌne naj Saúl sattaj Jehová. 36 Catuꞌ jix yalon naj Saúl tet ebꞌ soldado jaxca tiꞌ:

—Toonwej, kakꞌwej cꞌal jowal yin ebꞌ Filisteo tiꞌ, catuꞌ oj kiꞌon ecꞌ masanil stzettaj yetal ebꞌ, masantaꞌcꞌal chi cu kꞌinibꞌi aoj, cꞌamxa junoj chi cu bꞌejcan yin yiquisal, ẍi naj Saúl.

—Yun ojabꞌ bꞌey chi ẍaꞌ ja cꞌul, ẍi ebꞌ.

Jix takꞌwi naj yakꞌomal xaambꞌal, jix yalon naj jaxca tiꞌ:

—Jaꞌ yet cꞌamto chi cu toowej, watxꞌ ta chi cu kꞌanle tet Dios, ẍi naj.

37 Jix lawi tuꞌ, jix skꞌanlen naj Saúl tet Dios:

—¿Tumi chi too kakꞌ jowal yin ebꞌ Filisteo tuꞌ? ¿Oj mi ja waoc ebꞌ yul cu kꞌabꞌ jon? ẍi naj.

Ma takꞌwoj Jehová tet naj yet jun akꞌbꞌal tuꞌ. 38 Yu jun tuꞌ, yuxan jix yal naj jaxca tiꞌ: Jitzwejtej je bꞌa jex syaawil conobꞌ tiꞌ, catuꞌ oj cu seyon kilaꞌ, mactxequel jix oc spenail tinaniꞌ. 39 Tuxa jix wakꞌ jin tiꞌ tet Jehová cu Colomal, jaon Israel jon tiꞌ, caxcꞌal jaꞌ naj jin cꞌaal Jonatán jix oc spenail, tol tꞌinan cꞌal scami, ẍi naj Saúl.

Cꞌam junoj ebꞌ soldado tuꞌ jix takꞌwi tet naj. 40 Yu jun tuꞌ, jix yalon Saúl tet masanil ebꞌ jaxca tiꞌ:

Ecꞌanwejtej je masanil bꞌey jun pacꞌ tiꞌ, jain xa oj jin ecꞌtoj bꞌey jun pacꞌxa tuꞌ yetoj naj jin cꞌaal Jonatán tiꞌ, ẍi naj.

—Yun ojabꞌ bꞌey chi ẍaꞌ ja cꞌul, ẍi ebꞌ soldado tuꞌ.

41 Jix yalon Saúl jaxca tiꞌ:

—Jaach Jehová cu Diosal. Txꞌox wal yin sjichanil yin mactxequel jix oc spenail, ẍi naj.

Jaxa jix yunne ja yibꞌan naj Jonatán, yetoj Saúl jix eyqꞌueyi, jix colcha can el ebꞌ conobꞌ. 42 Jix yun yalon Saúl yin eymanil jaxca tiꞌ:

—Jaꞌ tinaniꞌ xin, awej oc suerte wibꞌan yetoj naj jin cꞌaal tiꞌ, ẍi naj Saúl.

Jaxa jix yunne, jaꞌ yibꞌan Jonatán jix eyqꞌueyi. 43 Yu jun tuꞌ, jix yalon Saúl tet naj Jonatán jaxca tiꞌ:

—Al ey jin an tzet jix ja wunne, ẍi naj Saúl tet naj.

Jix yalon Jonatán jaxca tiꞌ:

—Caw yel jix wabꞌle niꞌan noꞌ yal awcabꞌ an, tucꞌal jix jin laeytoj xam jun teꞌ teꞌ xol noꞌ, jix jin loꞌoni, yu jun tuꞌ yuxan bꞌejan jin cꞌul jin cami, ẍi naj Jonatán.

44 Jix yalon Saúl jaxca tiꞌ:

—Yakꞌ ojabꞌtej Dios junoj miman syaꞌilal wibꞌan ta cꞌam chach cami, ẍi naj Saúl tet Jonatán.

45 Jix takꞌwi masanil ebꞌ ánima:

—Cꞌam chi cu chaꞌ cam naj Jonatán tiꞌ, yutol jaꞌ yu naj, yuxan jix cu colcha el jaon Israel jon tiꞌ. Cꞌam ojabꞌ chi yun jaxca tuꞌ. Caw yel cꞌam junoj xil sjolom Jonatán tiꞌ oj eyqꞌuey bꞌey sat txꞌotxꞌ tiꞌ, yutol jaꞌ tzet jix yun tinaniꞌ, jaꞌ Dios jix colwa yetoj, ẍi masanil ebꞌ ánima tuꞌ. Queytuꞌ jix yun scolcha can el naj Jonatán yu ebꞌ yet conobꞌ, yuxan ma makꞌle cam naj. 46 Jaꞌ yet tuꞌ, ma xa too tzajan yintaj ebꞌ Filisteo naj Saúl, catuꞌ jix meltzo cantoj naj yetoj ebꞌ Israel bꞌey sconobꞌ.

47 Jaꞌ yet jix oc naj Saúl sreyaloj ebꞌ conobꞌ Israel, jix ẍaꞌon el yich yakꞌon jowal yetoj ebꞌ scajat, jaꞌton ebꞌ tiꞌ; ebꞌ a Moab, ebꞌ yicꞌaal Amón, ebꞌ Edom, naj sreyal Sobá, cꞌal ebꞌ Filisteo. Jantaj cꞌal bꞌey jix ecꞌ cꞌal yin jowal, jix eyqꞌuey cꞌal ebꞌ yu. 48 Jaꞌ yet junel jix syambꞌa oc sbꞌa masanil ebꞌ soldado, jix yakꞌon jowal ebꞌ yetoj ebꞌ Amalec. Jaxca tuꞌ jix yun scolon el sconobꞌ yul skꞌabꞌ ebꞌ chi jowi oc yin tuꞌ.

49 Ey oxwan scꞌaal naj Saúl tuꞌ, jaꞌton Jonatán, Isví yetoj naj Malquisúa; ey cꞌal pax cawan scutzꞌin naj, jaꞌ ix bꞌabꞌel chi yij Merab, jal ix yet scaabꞌ, chi yij Mical. 50 Jaꞌ ix yistil naj Saúl tuꞌ Ahinóam sbꞌi ix, scutzꞌin naj Ahimaas. Jal naj sat yaaw yeoc xol ebꞌ soldado naj Saúl, chi yij pax Abner scꞌaal Ner yican sbꞌa yetoj naj Saúl. 51 Jaꞌ naj Quis, jaꞌton smam naj Saúl, jaꞌ naj Ner smam naj Abner, scꞌaal Abiel ebꞌ.

52 Jaꞌ yet eyoc naj Saúl yin reyal xol ebꞌ yet Israelal, ey cꞌal oc jowal yu yetoj ebꞌ Filisteo; yu jun tuꞌ, yuxan jix sicꞌle el ebꞌ achꞌe tol jelan cꞌal ebꞌ ey yip, jix oc ebꞌ yin soldadoal yu naj Saúl.