4 Masanil ebꞌ Israel jix abꞌeni, tol jix makꞌle cam jun miman bꞌulan ebꞌ soldado Filisteo yu naj Saúl. Yu jun tuꞌ caw jix tit sjowal ebꞌ Filisteo yin conobꞌ Israel. Jal ebꞌ Israel tuꞌ, yin eymanil jix syambꞌa oc sbꞌa ebꞌ soldado yetoj Saúl bꞌey Guilgal. 5 Jacꞌalaꞌ pax ebꞌ Filisteo tuꞌ, jix syambꞌa cꞌal pax oc sbꞌa ebꞌ yet chi yakꞌon jowal ebꞌ yetoj ebꞌ Israel; ey 30,000 scarruaje ebꞌ yet jowal, ey 6,000 ebꞌ soldado eya yibꞌan che, catuꞌ ecꞌal mactxequel tol chi bꞌeyi, cꞌamxa chi bꞌischa jantaj ebꞌ. Eyman jix too ebꞌ bꞌey Micmás, jix swaꞌnen ey bꞌulan sbꞌa ebꞌ yetcꞌulal bꞌey chi aol cꞌu bꞌey Bet-avén.

6 Jix oc ebꞌ Israel yin bꞌiscꞌulal, yutol lalan yeyqꞌuey ebꞌ yu ebꞌ Filisteo tuꞌ. Yuxan jix too yewbꞌa el sbꞌa yul-laj nachꞌen, xol-laj chꞌen mimej chꞌen, yul-laj kꞌobꞌ bꞌey cꞌam jaꞌ jaꞌ, cꞌal yul-laj jobꞌe. 7 Ey pax mactxequel jix ecꞌtoj skꞌaxepal jaꞌ Jordán, jix too ebꞌ bꞌey yul yet Gad, cꞌal bꞌey Galaad. Jal naj Saúl xin, jix toocan naj bꞌey Guilgal; jal jantaj to ebꞌ soldado tzajan yintaj naj, tuxa cꞌal chi lujlon ebꞌ yu xiwcꞌulal. 8 Jujebꞌ cꞌual jix echbꞌanele naj Samuel yu naj Saúl bꞌey Guilgal, yutol queytuꞌ jix yun yalon can naj. Jaxa jix yunne cꞌam cꞌal chi apni oc naj Samuel bꞌey Guilgal tuꞌ, yuxan lalanxa sbꞌejlecan naj Saúl yu ebꞌ soldado tuꞌ. 9 Yu tuꞌ xin, jix yalon naj Saúl jaxca tiꞌ:

—Iꞌwejtej noꞌ xaambꞌal tol oj akꞌle tzꞌaꞌoj, cꞌal xaambꞌal yet watxꞌcꞌulal chi akꞌle tet Jehová, ẍi naj Saúl.

Jaꞌcaw naj jix akꞌon tzꞌaꞌ wan xaambꞌal tuꞌ.

10 Lalanxa wal slawi yakꞌon tzꞌaꞌ wan xaambꞌal tuꞌ naj Saúl, catuꞌ jix apni oc naj Samuel. Jaꞌ yet jix yabꞌen naj Saúl tol chi apni, jix eltoj ẍaꞌoni, cꞌal yakꞌon scawil scꞌul. 11 Jix yalon naj Samuel jaxca tiꞌ:

—¿Tzet yuxan jaach caw jix ja wakꞌ tzꞌaꞌ wan xaambꞌal tuꞌ? ẍi naj.

—Yutol jix wilaꞌ tol lalan xacꞌal yel ebꞌ soldado tiꞌ jin cꞌatan an, catuꞌ cꞌam cꞌal chach jul pax jaxca jix yun ja walon canoj, tuxa cꞌal bꞌulan pax ecꞌ ebꞌ Filisteo bꞌey txꞌotxꞌ Micmás, 12 yuxan jix jin naꞌ an, tala chi jul ebꞌ yakꞌ jowal win bꞌey Guilgal tiꞌ, catuꞌ cꞌam tocꞌal chi wakꞌ abꞌenal jin bꞌa yul skꞌabꞌ Jehová; yu jun tuꞌ, yuxan jix waoc wet wakꞌon wan xaambꞌal tiꞌ, ẍi naj Saúl.

13 Catuꞌ jix takꞌwi naj Samuel jaxca tiꞌ:

—Yin xacꞌal yaxkꞌainajil jix ja wunen jun tiꞌ. Ma ja jije tzet jix yal Jehová ey jaach. Ta cꞌamaj, jix mi la jaach yaoc Naj yin sreyaloj ebꞌ Israel tiꞌ yin junelne. 14 Jal tinaniꞌ xin, man naatil oj jaach oc yin reyal; jaꞌ Jehová oj seyon oc junojxa mactxequel tol oj sjije tzet oj yalaꞌ, jaꞌ oj yaoc yin yaawilal ja qꞌuexeloj, yutol ma ja jije tzet chi yal ẍejbꞌanil.

15 Jix lawi tuꞌ, catuꞌ jix el naj Samuel bꞌey Guilgal, jix too naj bꞌey Guibeá yul yet Benjamín. Jix bꞌison naj Saúl jantaj to ebꞌ soldado jaꞌjun yetoj, asanxane jun 600 ebꞌ yin masanil. 16 Jaꞌ yintaj Saúl tuꞌ tzajan oc jun scꞌaal chi yij Jonatán, yetoj cꞌal ebꞌ soldado, jatuꞌ jix can ebꞌ bꞌey Guibeá, jal pax ebꞌ soldado Filisteo xin, jatuꞌ bꞌulan ey ebꞌ bꞌey Micmás. 17 Oxebꞌ tujan jix yute sbꞌa ebꞌ Filisteo tuꞌ, jix too ebꞌ yiꞌon eltej tzettaj yetal ebꞌ Israel; jun tujan jix toocan yetcꞌulal Ofrá yul yet txꞌotxꞌ Sual. 18 Jal junxa tujan jix too bꞌey Bet-horón, jal junxa yet yox tujan xin, jix toocan bꞌey spananil stiꞌ sjobꞌeal Zeboim bꞌey chi ẍaꞌel yich txꞌotxꞌ cusiltaj txꞌotxꞌ.

19 Jaꞌ yul masanil conobꞌ Israel, cꞌam junoj ebꞌ waꞌnem chꞌen. Cꞌam junoj ebꞌ chi waꞌnen chꞌen hierro xol ebꞌ, yutol yalnaj can ebꞌ Filisteo, tol cꞌam chi yoche ebꞌ tol jaꞌ ebꞌ Israel chi swaꞌne yespada cꞌal slanza. 20 Yuxan jaꞌ xol ebꞌ Israel tuꞌ, jaꞌ yet chi el yee junoj smitxꞌkꞌabꞌ ebꞌ, sowalil chi bꞌet ebꞌ snij yee smitxꞌkꞌabꞌ chꞌen tuꞌ tet ebꞌ Filisteo, jaxca chꞌen chi skꞌan noꞌ wacax yet chi kꞌuwi txꞌotxꞌ, chꞌen azarón, chꞌen eche, cꞌal chꞌen piocha. 21 Caabꞌ tujan chꞌen tumin plata chi skꞌan ebꞌ Filisteo tet ebꞌ yet chi nijle atej yee chꞌen arado, cꞌal chꞌen azarón; jaxa yet chi nijle atej yee junoj chꞌen eche jun qꞌuetxan chꞌen tumin plata chi skꞌan ebꞌ, yetoj cꞌal chꞌen chi chucle oc yin noꞌ wacax. 22 Yu tuꞌ xin, cꞌam cꞌal junoj ebꞌ tzajan oc yintaj naj Saúl, cꞌal yintaj naj Jonatán iꞌbꞌil oc yespada, ma lanza yet jix oc jowal; asan naj Saúl yetoj Jonatán iꞌbꞌil oc yet ebꞌ. 23 Jal ebꞌ Filisteo tuꞌ xin, jix yaoc ebꞌ smajomal jun bꞌe txenne sat, bꞌey chi too sbꞌeal Micmás.