—Jaex tiꞌ che yilaꞌ tol jix jin jije cꞌal masanil tzetyetal che yalaꞌ, yuxan chi wa can oc jun je reyal tiꞌ. 2 Jaꞌ tinaniꞌ, ti ey jun je reyal oj jex ijbꞌanoj, jaꞌ oj alon ey jex yu tzet oj je yunne. Jain tiꞌ icham winaj jin xa, caw sajxa xil jin jolom. Yuxan jaꞌ naj tiꞌ jix jin sicꞌ can el xol ebꞌ jix mulna wetoj. Yet tax cꞌal wachꞌeal jix cꞌoli jex wijbꞌani, masantaꞌcꞌal yet jun cꞌu tiꞌ. 3 Tinaniꞌ ey jin ecꞌ sattaj Dios cꞌal je sattaj, chi walon canoj: Cꞌam junoj mactxequel jix welkꞌane ecꞌ junoj swacax ma sbꞌuru, cꞌam junoj mactxequel jix welkꞌane, cꞌal jin makꞌoni, cꞌam bꞌey jix jin chaꞌ chꞌen tumin yin ewantajil tet junoj mactxequel tol man yin oj eyocoj. Alwej sattaj Jehová cꞌal sattaj jun cu reyal jix yaoc Dios tiꞌ, ta ey bꞌey jix wute jaxca tuꞌ, chi skeꞌ chin toolane tinaniꞌ, ẍi naj Samuel tuꞌ.

4 —Jix yalon ebꞌ jaxca tiꞌ: Cꞌam juneloj jix jon ja wetne, cꞌam bꞌey jix ja chaꞌ tumin yin ewantajil ey jon, ẍi ebꞌ ánima tuꞌ.

5 —Jaꞌ Jehová, yetoj cꞌal naj cu reyal tiꞌ, jaꞌ chi yaoc sbꞌa yin testigoal win an, yutol cꞌam jin penail jix ilchatej je yu, ẍi naj Samuel.

—Cꞌamaj, cꞌam cꞌal tzet, ẍi ebꞌ ánima tuꞌ.

6 Jix yalon pax naj Samuel tet masanil ebꞌ yet Israelal jaxca tiꞌ:

—Jaꞌ Jehová jix sicꞌon el naj Moisés, cꞌal naj Aarón, yet jix yiꞌon eltej ebꞌ kichmam bꞌey txꞌotxꞌ Egipto. 7 Jaꞌ tinaniꞌ xin, tzꞌin ojabꞌ je chi, sattaj wal Jehová chi walon ey jex yu jantaj tzetyetal watxꞌ jix yun Naj kin, cꞌal yin ebꞌ kichmam tuꞌ. 8 Jaꞌ yet jix apni naj Jacob yetoj masanil ebꞌ yuninal bꞌey txꞌotxꞌ Egipto, caw jix etex ebꞌ yu ebꞌ ánima tuꞌ, jix skꞌanon ebꞌ kichmam tuꞌ tet Jehová tol chi col-le el ebꞌ yu. Yuxan jix aletoj naj Moisés cꞌal naj Aarón yu Jehová, yet jix bꞌet iꞌle eltej ebꞌ kichmam tuꞌ, jix yiꞌontej ebꞌ bꞌey ey jonwej ecꞌ tinaniꞌ. 9 Asan xin, jix too qꞌueycꞌulal Jehová yu ebꞌ kichmam tuꞌ. Yu cꞌal jun tuꞌ, yuxan jix ale oc ebꞌ yul skꞌabꞌ naj Sísara, naj general yeoc xol ebꞌ soldado yul conobꞌ Hasor, cꞌal yul skꞌabꞌ ebꞌ Filisteo, cꞌal yul skꞌabꞌ naj sreyal Moab. Jaꞌ masanil ebꞌ tuꞌ jix yakꞌ jowal ebꞌ yetoj ebꞌ ket conobꞌ Israel. 10 Yu jun tuꞌ, jix a yaw ebꞌ tet Jehová, jix yalon ebꞌ jaxca tiꞌ: Caw wal jix oc cu penail ey jaach, yutol jix jaach cu bꞌejcanoj, jaxa jun comon dios Baal cꞌal Astarté jix kakꞌ servil. Jaꞌ tinaniꞌ xin, colon el yul skꞌabꞌ ebꞌ cu cajat tiꞌ jon, asanxane jaach, oj jaach kakꞌ servil, ẍi ebꞌ.

11 Yu jun tuꞌ, yuxan jix aletej naj Jerubaal, naj Barac, cꞌal naj Jefté, yetoj cꞌal jin jain tiꞌ yu Jehová, yet chex col-le el yul skꞌabꞌ ebꞌ je cajat tuꞌ. Yu jun tuꞌ, yuxan tzalacꞌulal je ye tinaniꞌ. 12 Jaꞌ yet jix je yiloni, tol chi tit naj Nahas sreyal ebꞌ Amonita yin jowal kin, jix je kꞌanon junoj rey ey jin, yet chi yakꞌon yaawilal cu xol, ilaꞌ tol jaꞌcaw Jehová cu Diosal, cu reyal ton yeocoj. 13 Yuxan jaꞌ tinaniꞌ xin, ti ey jun je reyal jix je kꞌan tuꞌ, tuxa jix yaoc Jehová jun rey cu xol tinaniꞌ. 14 Jaꞌ tinaniꞌ, chi cancan yul je kꞌabꞌ je yiꞌon a can sbꞌi Jehová cꞌal je yoc yin eyilal tet, cꞌal je jijen tzet chi yalaꞌ, cꞌam ojabꞌ che yintajne el tzet chi yalaꞌ. Ta tol oj je jije masanil yetoj jun je reyal chex ijbꞌan tiꞌ, jantaj tzet chi yoche Jehová cu Diosal je yin, ta jaxca tuꞌ oj je yunne, watxꞌ cꞌal oj yun je bꞌeytoj je sattaj. 15 Ta man oj je jije tzet chi yal Jehová xin, oj yaoc syaꞌilal je yibꞌan yetoj jun je reyal tiꞌ, jaxca jix utele ebꞌ kichmam.

16 Yu tuꞌ xin, oj cam je yiloni, yutol oj xꞌox Jehová junoj tzetyetal tol qꞌueyubꞌtaj yoc je sattaj. 17 Jaꞌ tinaniꞌ stiempoal wal skꞌuple a ixim tiriw tiꞌ, man stiempoal oj yakꞌon nabꞌ. Jaꞌ tinaniꞌ oj je yilaꞌ tol oj jin kꞌan tet Jehová, yin eymanil oj yun yakꞌon junoj miman nabꞌ cꞌal smakꞌwa nabꞌ. Catuꞌ oj naꞌcha el je yu tol pena tzet jix je yun sattaj Dios, yu jix je kꞌan jun je reyal tiꞌ, ẍi naj Samuel.

18 Jix lawi tuꞌ, jix txali naj Samuel tet Jehová. Jaꞌ yet jun txolan tuꞌ jix makꞌwa cꞌu, catuꞌ jix tit nabꞌ; yu jun tuꞌ, masanil ebꞌ ánima caw jix xiwa ebꞌ tet Jehová, cꞌal tet naj Samuel. 19 Yuxan masanil ebꞌ jix alon tet naj Samuel jaxca tiꞌ:

—Kꞌan tet Jehová cu Diosal cu jon, tol cꞌam chi cu cami; caw yel jix oc cu penail yutol jix cu kꞌan jun cu reyal tiꞌ, ẍi ebꞌ.

20 Jix takꞌwi naj Samuel tet ebꞌ conobꞌ jaxca tiꞌ:

—Cꞌam ojabꞌ chex xiwi, caxcꞌal jix oc je penail sicꞌlebꞌil, asan xin, cꞌam ojabꞌ che yiꞌel je bꞌa yintaj Jehová, tol ojabꞌ che yakꞌ servil yetoj masanil je cꞌul. 21 Cꞌamxa che yaoc je naꞌbꞌal yin wan comon dios tol cꞌam niꞌoj yeloc apnoj, yutol cꞌam chi skeꞌ scolwa je yetoj, cꞌam pax chi skeꞌ jex scolon eloj. 22 Yutol jaꞌ Jehová chi yun cꞌal tzet chi yalaꞌ, man oj jex sbꞌejcan je txꞌojli, yutol chi yoche scꞌul tol chex oc sconobꞌoj. 23 Colwa ojabꞌ Jehová wetoj yet chin txali je yu, yet watxꞌ, cꞌam ojabꞌ chi oc jin penail sattaj. Jaꞌ jun smoo oj wunne, tol oj jex jin cuy yin sjichanil cꞌal yin swatxꞌilal. 24 Jaex tiꞌ asan tol che jije cꞌal je yoc yin eyilal tet Jehová yetoj masanil je cꞌul, catuꞌ che yotajne eloj tol ecꞌal tzetyetal watxꞌ jix yun Naj je yin. 25 Ta tol oj jex oc cꞌal ian je yunen spenail xin, oj jex qꞌueyle el yetoj jun je reyal tiꞌ yu Jehová, ẍi naj tet ebꞌ.