—Cu waꞌne yeoc junoj cu wa kꞌane ja wetoj, catuꞌ chi kaon oc cu bꞌa yul ja kꞌabꞌ, ẍi ebꞌ tet naj.

2 Jix takꞌwi naj Nahas sreyal ebꞌ Amonita tuꞌ, jix yalon jaxca tiꞌ:

—Chin waꞌne yeoc junoj jin wa kꞌane je yetoj, ta chi ẍaꞌ je cꞌul tol chi wiꞌeltej sbꞌakꞌ je sat bꞌey je watxꞌ kꞌabꞌ junjun jex, queytuꞌ oj yun yel je qꞌuixwil yetoj ebꞌ je yet Israelal tiꞌ, ẍi naj tet ebꞌ.

3 Jix takꞌwi ebꞌ syaawil conobꞌ Jabés jaxca tiꞌ:

—Ta jaxca tuꞌ xin, akꞌ can jujebꞌojxa cꞌual cu tiempo jon, yet oj kaontoj cu chejabꞌ bꞌey masanil ebꞌ ket Israelal jon, ta cꞌam mactxequel chi skeꞌ scolwa ketoj jon, jaxa kaon oc cu bꞌa yul je kꞌabꞌ, ẍi ebꞌ.

4 Jaꞌ yet jix apni oc ebꞌ yakꞌomal servil tuꞌ bꞌey Guibeá bꞌey ey sconobꞌ naj Saúl tuꞌ, jix yalon ẍejbꞌanil ebꞌ tet ebꞌ ánima tuꞌ. Jaxa yet jix yabꞌen oc masanil ebꞌ ánima jun kꞌane tuꞌ, caw jix a yaw ebꞌ yokꞌ sicꞌlebꞌil. 5 Lalan wal yokꞌ ebꞌ ánima tuꞌ, jix apni oc naj Saúl, speto naj bꞌey smulnail, joybꞌil oc wan noꞌ wacax yu naj; jix skꞌanleni:

—¿Tzet yeoc ebꞌ ánima chi okꞌ tuꞌ? ẍi naj.

Jix yalon ebꞌ ánima tuꞌ tzet jix jul yal ebꞌ chejabꞌwom jix tit bꞌey Jabés. 6 Jaꞌ yet jix yabꞌen naj Saúl jaxca tuꞌ, eyman jix oc Yespíritu Dios yin, catuꞌ jix akꞌle yip; jix tit wal sjowal sicꞌlebꞌil. 7 Jix skocꞌ tzokꞌnetoj cacꞌon noꞌ wacax tuꞌ, jix yaontoj tet ebꞌ chejabꞌwom tuꞌ, yet chi too ebꞌ xꞌoxon tet masanil ebꞌ yet Israel, yet chi yalon ebꞌ chejabꞌwom tuꞌ jaxca tiꞌ: Queywal tiꞌ oj utele noꞌ swacax ebꞌ Israel, ebꞌ tol man oj oc tzajan yintaj Saúl, cꞌal yintaj naj Samuel, yet chi too yin jowal yetoj ebꞌ, ẍi ebꞌ.

Catuꞌ jix oc jun miman xiwcꞌulal yin ebꞌ ánima yu Jehová, junxane jix yute sbꞌa ebꞌ masanil, jix jul sjunbꞌane sbꞌa ebꞌ yetoj Saúl. 8 Jaꞌ yet jix sbꞌison naj Saúl jantaj ebꞌ ánima tzajan oc yintaj bꞌey Bézec, ey 300,000 ebꞌ winaj jix syambꞌa oc sbꞌa yul yet Israel, ey pax 30,000 ebꞌ ey yul yet Judá. 9 Jaꞌ yet tuꞌ jix yalon naj Saúl tet ebꞌ chejabꞌwom jix tit bꞌey Jabés tuꞌ, jix yalon jaxca tiꞌ:

—Alwej tet ebꞌ a conobꞌ Jabés tuꞌ, tol jaꞌ yet yecal yet chuman, xax colcha ebꞌ ánima tuꞌ masanil, ẍi naj tet ebꞌ.

Jix too ebꞌ chejabꞌwom tuꞌ, jix yalon ebꞌ tet ebꞌ conobꞌ tuꞌ, tol jaꞌ yet yecal chi colcha el ebꞌ; caw wal jix tzala a ebꞌ ánima tuꞌ sicꞌlebꞌil. 10 Jix yalontoj ebꞌ tet naj Nahas jaxca tiꞌ:

—Jato yet yecal chi too kaoc cu bꞌa yul je kꞌabꞌ, catuꞌ che naꞌoni tzet chon je yute, ẍi toj ebꞌ.

11 Jaxa yet junxa cꞌual, yet tuxa wal chi sajbꞌi eloj, jix spoꞌon ecꞌ ebꞌ soldado naj Saúl tuꞌ, oxebꞌ tujan jix yute ecꞌoj. Eyto wal sajbꞌi eloj, catuꞌ jix apni oc lemna bꞌey bꞌulan ey ebꞌ scajat tuꞌ, jix oc ian yakꞌon jowal yin ebꞌ Amonita tuꞌ, masantaꞌcꞌal yet jix oc chuman, jaxa ebꞌ ma camoj jix sajlem cantoj ebꞌ, junjun xacꞌal jix yun stoo can ebꞌ.

12 Jix lawi tuꞌ, jix skꞌanlen jaywan ebꞌ ánima tet naj Samuel jaxca tiꞌ:

—¿Mactajtxequel ebꞌ jix aloni tol man smoo oj yoc naj Saúl cu reyaloj? Iꞌwejtej ebꞌ titiꞌ, oj cu makꞌ cam ebꞌ jon, ẍi ebꞌ naj.

13 Jix takꞌwi naj Saúl jaxca tiꞌ tet ebꞌ:

—Jaꞌ yet jun cꞌual tiꞌ, man smoo oj chi cam junoj ebꞌ ket conobꞌ tiꞌ, yutol miman yeloc apnoj jun cꞌual tiꞌ, yutol jix cu col-le el yu Jehová, ẍi naj tet ebꞌ.

14 Jix yalon cꞌal pax naj Samuel tet masanil ebꞌ ánima jaxca tiꞌ:

—Toonwej bꞌey Guilgal, jaꞌ tituꞌ oj kawej oc junoj kꞌin yu kiꞌon a can naj Saúl yin yopiso, ẍi naj.

15 Yu tuꞌ xin, jix syambꞌa oc sbꞌa masanil ebꞌ ánima sattaj Jehová bꞌey Guilgal; catuꞌ jix oc can yopiso naj Saúl yin reyal. Jix lawi tuꞌ, jix yakꞌon xaambꞌal ebꞌ yet watxꞌcꞌulal sattaj Jehová; jix oc conobꞌ Israel yin mimej tzalacꞌulal yetoj naj Saúl.