—Jaꞌ tinaniꞌ, jaꞌcaw Jehová chach sicꞌon can oc yin yaawilal yibꞌan conobꞌ Israel tiꞌ. 2 Jaꞌ yet oj cu poꞌolen can cu bꞌa tiꞌ, oj ja chaꞌle ja bꞌa yetoj cawan winaj scawilal bꞌey mujan ix camom Raquel, bꞌey conobꞌ Selsah yul yet Benjamín. Jaꞌ ebꞌ naj tuꞌ oj alon ey jaach, tol xax ilcha oc noꞌ ja bꞌuru cha seyecꞌ tuꞌ, cꞌamxa sbꞌiscꞌulal naj ja mam yu noꞌ, yutol jaxa ja wu jaach tiꞌ eyoc naj yin sbꞌiscꞌulal, catuꞌ chi snaꞌon naj, chi yalon naj jaxca tiꞌ: Tzet wal oj yun yilcha oc naj jin cꞌaal tuꞌ wu an, ẍi naj. 3 Jaꞌ cu sattajto tuꞌ, oj jaach apnoj oc bꞌey teꞌ jii bꞌey Tabor, jaꞌ tituꞌ ey oxwan naj winaj oj ja chaꞌle ja bꞌa yetoj, tol chi too ebꞌ yin eyilal tet Jehová bꞌey Betel. Jaꞌ naj bꞌabꞌel, iꞌbꞌil oxcꞌon noꞌ chiw yu, jaꞌ naj yet scaabꞌ iꞌbꞌil oc oxebꞌ ixim pan yu, jal naj yet yox, iꞌbꞌil oc jun neet nonaj yu yal uva yu. 4 Oj yakꞌ scawil ja cꞌul ebꞌ naj, catuꞌ oj yakꞌon caabꞌ ixim pan tuꞌ ebꞌ ey jaach; oj ja chaꞌ ecꞌ tet ebꞌ naj. 5 Chi lawi tuꞌ xin, catuꞌ oj jaach apnoj oc bꞌey conobꞌ Guibeá, bꞌey chi oc cꞌaltaꞌ eyilal tet Jehová. Jaꞌ tituꞌ ey jun bꞌulan ebꞌ soldado Filisteo. Jaꞌ yet oj jaach oc yul conobꞌ tuꞌ, catuꞌ oj ja wilon jaywan ebꞌ ẍejabꞌ Dios lalan sbꞌitni ebꞌ, yet lalan spaxeytej ebꞌ bꞌey chi oc eyilal tet Dios, jaꞌ sattaj ebꞌ tuꞌ, bꞌabꞌel stoo ebꞌ chi tenon chꞌen salterio, pandereta, flauta, cꞌal teꞌ arpa, yu ebꞌ. 6 Jaꞌ yet jun txolan tuꞌ, oj oc Yespíritu Jehová ja win, jaxca xa ebꞌ tuꞌ oj ja wunne, catuꞌ oj qꞌuexcha ja naꞌbꞌal. 7 Jaꞌ yet oj yunen wan chi wal ey jaach tiꞌ, jaꞌ tzetyetal watxꞌ, jaꞌ oj ja wunne, yutol jaꞌ Dios oj colwa ja wetoj. 8 Chi lawi tuꞌ, catuꞌ chach bꞌabꞌitoj bꞌey Guilgal; jaꞌ tituꞌ oj cu chaꞌle cu bꞌa, catuꞌ oj wakꞌon tzꞌaꞌ xaambꞌal sattaj Jehová, yetoj cꞌal xaambꞌal yet watxꞌcꞌulal. Jujebꞌ cꞌual oj jin ja wechbꞌane tituꞌ, jato yet oj jin aapnoj, catuꞌ oj walon ey jaach tzet oj ja wunne, ẍi naj Samuel.

9 Jix cꞌal lawi yalon cantoj sbꞌa naj Saúl tet naj Samuel, catuꞌ jix qꞌuexle snaꞌbꞌal naj Saúl yu Dios; yuxan jaꞌ yet jun cꞌual tuꞌ jix yunen el wan yechel jix yal naj Samuel. 10 Jaxa yet jix apni oc naj Saúl bꞌey Guibeá yetoj jun yakꞌomal servil tuꞌ, jix eltej ebꞌ ẍejabꞌ Dios jaxca jix yun yalon naj Samuel tuꞌ, jix chaꞌle apnoj ebꞌ naj yu ebꞌ. Jaꞌ yet jun txolan tuꞌ, jix oc Yespíritu Dios yin, catuꞌ jix oc ian sbꞌitni yetoj ebꞌ. 11 Jaꞌ mactxequel otajnen naj Saúl tuꞌ yet yalantoj, jaꞌ yet jix yilon ebꞌ yoc yin eyilal, cꞌal yet jix qꞌuexcha yili jaxca wanxa ebꞌ ẍejabꞌ Dios, jix yalon ebꞌ jaxca tiꞌ: ¿Tzet la ye jun scꞌaal naj Quis tiꞌ? ¿tumi eyxa oc naj yetoj ebꞌ ẍejabꞌ Dios tiꞌ? ẍi ebꞌ.

12 Ey jun winaj a Guibeá jix alon jaxca tiꞌ: ¿Mactxequel smam wanxa ebꞌ naj tiꞌ xin? ẍi naj. Jatuꞌ jix el yich yal-le jun skꞌane ebꞌ ánima jaxca tiꞌ: ¿Tumi jacꞌal pax jun Saúl yetoj ebꞌ ẍejabꞌ Dios? ẍi ebꞌ.

13 Jix lawi yecꞌtoj wan tuꞌ, catuꞌ jix aapnoj naj Saúl bꞌey jun tzalan bꞌey chi oc eyilal tet Jehová.

14 Ey jun yican naj Saúl jix kꞌanlen tet, cꞌal tet jun yakꞌomal servil iꞌbꞌil oc yu tuꞌ:

—¿Bꞌeytuꞌ jix jex bꞌetocoj? ẍi tet ebꞌ.

Jix takꞌwi Saúl jaxca tiꞌ:

—Tol jix bꞌet cu sey noꞌ cu bꞌuru jon; caw ma ilcha noꞌ cu jon, yuxan jix too cu kꞌanlen tet naj Samuel jon, ẍi naj Saúl.

15 Jix yalon jun yican naj Saúl tuꞌ tet jaxca tiꞌ:

—Caw chi yoche jin cꞌul, tol che yal masanil ey jin tzet jix yal naj Samuel tuꞌ ey jex, ẍi tet ebꞌ.

16 Jix takꞌwi naj Saúl tet jun yican tuꞌ jaxca tiꞌ:

—Watxꞌ jix yun yalon naj ey jon, jon, tol xax ilcha oc noꞌ bꞌuru tuꞌ, ẍi naj Saúl.

Cꞌam cꞌal niꞌoj tzet jix yalel naj ta oj oc naj yin reyal, jaxca jix yun yalon naj Samuel tuꞌ. 17 Jix ecꞌ cꞌaltoj jayebꞌ cꞌual xin, jix yambꞌale oc ebꞌ conobꞌ Israel yu naj Samuel bꞌey Mizpá, sattaj Jehová. 18 Jix yalon naj tet ebꞌ jaxca tiꞌ:

—Jaꞌ Jehová cu Diosal jix alon ey jin jaxca tiꞌ je yin: Jain jix jex wiꞌeltej bꞌey txꞌotxꞌ Egipto jaex Israel jex tiꞌ, jain jix jex jin coleltej yul skꞌabꞌ ebꞌ ánima tuꞌ, bꞌey ey jex oc yin syaꞌtajilal, ẍi Jehová. 19 Jal pax tinaniꞌ, caw che yintajne el cu Diosal, Naj jix cu iꞌon eltej bꞌey jix cu ecꞌ yin syaꞌtajilal tuꞌ, cꞌal yin cuscꞌulal, catuꞌ jix cꞌoli je kꞌanon junoj cu reyal yu yakꞌon yaawil cu xol. Yu tuꞌ xin, jaꞌ tinaniꞌ yambꞌawej oc je bꞌa sattaj Jehová yin junjun icꞌaaleal, yin junjun tujan chi yun je juli, ẍi naj tet ebꞌ.

20 Jix lawi tuꞌ, jix yalon naj Samuel, tol chi sjitztej sbꞌa junjun tujan ebꞌ yicꞌaal Israel, cꞌuxan wal jaꞌ ebꞌ yicꞌaal Benjamín jix sicꞌcha eltej. 21 Jix yalon naj tol yelcꞌulal chi sjitztej sbꞌa ebꞌ yicꞌaal Benjamín tuꞌ, cꞌuxan wal jaꞌ yibꞌan ebꞌ yicꞌaal Matrí jix eyqꞌueyi jun sicꞌwal tuꞌ. Jix yalon naj tol chi sjitztej sbꞌa ebꞌ yicꞌaal Matrí tuꞌ, cꞌuxan wal yibꞌan naj Saúl scꞌaal Quis jix eyqꞌueyi. Jix seyle ecꞌ naj yu ebꞌ, ma ilcha oc naj yu ebꞌ. 22 Yu tuꞌ xin, jix skꞌanlen ebꞌ tet Jehová ta eyecꞌ naj Saúl tituꞌ; jix yalon Jehová tol eyxa ecꞌoj, asan tol jix yewbꞌa el sbꞌa naj xol-laj wan ijatz. 23 Jix too lemna ebꞌ seyon eltej bꞌey ewan octoj naj tuꞌ; jaꞌ yet jix xꞌoxon a sbꞌa naj xol ebꞌ ánima tuꞌ, jix yilon oc ebꞌ tol caw miman steel naj, asan bꞌey sjolom xicꞌ naj chi aapnoj steel ebꞌ.

24 Jix yalon naj Samuel tet ebꞌ ánima jaxca tiꞌ:

—Jaꞌton naj cu reyal jix sicꞌle el yu Jehová tiꞌ, cꞌam junoj ebꞌ ket Israelal tiꞌ chi skeꞌ slaanbꞌane sbꞌa yetoj, ẍi naj Samuel tuꞌ. Yu jun tuꞌ, jix yalon ebꞌ conobꞌ jaxca tiꞌ:

—¡Miman ojabꞌ yeloc naj cu reyal! ẍi xacꞌal ebꞌ masanil.

25 Jix lawi tuꞌ xin, catuꞌ jix yalon naj Samuel tuꞌ sleyalil rey tet ebꞌ conobꞌ Israel. Jix oc ian naj Samuel stzꞌibꞌen yin juun, jix yaon can octoj naj yul scalubꞌal Jehová. 26 Jix lawi tuꞌ, jix yalon naj tet masanil ebꞌ Israel tol chi meltzo ebꞌ bꞌey sna. Quey cꞌal pax tuꞌ Saúl, jix meltzo bꞌey sna bꞌey Guibeá, catuꞌ jix yaon oc Dios yin snaꞌbꞌal wan ebꞌ winaj caw jelan yin jowal, jix too ebꞌ yetoj. 27 Jaꞌ yet tuꞌ ey pax wan ebꞌ ánima pena snaꞌbꞌal chi alon pena kꞌane yin: ¿Tumi jaꞌ jun tiꞌ oj cu colonoj? ẍi ebꞌ. Caw comon ánima cꞌal jix utele naj Saúl tuꞌ yu ebꞌ, cꞌam cꞌal niꞌoj tzet jix yakꞌ ebꞌ tet; ma cꞌal xꞌoxel naj Saúl tuꞌ, ta pena chi yabꞌe.