3 Ey jun cꞌual jix qꞌueytoj wan noꞌ sbꞌuru naj Quis tuꞌ. Yuxan jix yal naj tet Saúl jaxca tiꞌ:

—Jaach jin cꞌaal, akꞌ lista ja bꞌa yet chach too yin eymanil, chi too ja seyon ecꞌ noꞌ cu bꞌuru jix qꞌueytoj tuꞌ, iꞌtoj junoj ebꞌ naj kakꞌomal servil tiꞌ ja wetoj, ẍi naj Quis tet scꞌaal tuꞌ.

4 Jix too naj Saúl tuꞌ, jix kꞌaxbꞌo ecꞌtoj ebꞌ bꞌey txꞌotxꞌ tzalquiltaj bꞌey xꞌotxꞌ ebꞌ yet Efraín, catuꞌ jix ecꞌtoj ebꞌ yul yet Salisá; ma cꞌal ilcha noꞌ bꞌuru tuꞌ yu ebꞌ. Jix ecꞌ pax toj ebꞌ yul yet txꞌotxꞌ Saalim, cꞌal yul yet Benjamín, ma cꞌal ilcha pax noꞌ yu ebꞌ. 5 Jaꞌ yet jix apni oc ebꞌ bꞌey jun txꞌotxꞌ txꞌotxꞌ chi yij Suf, jix yalon naj Saúl tet jun yakꞌomal servil tzajan oc yintaj tuꞌ jaxca tiꞌ:

—Meltzoj jon titiꞌ, jaxa tala chi yunne, chi oc naj jin mam yin bꞌiscꞌulal ku yintaj pax noꞌ bꞌuru tuꞌ, ẍi naj Saúl.

6 Jix takꞌwi jun yakꞌomal servil tuꞌ jaxca tiꞌ:

—Jaꞌ yul jun conobꞌ tiꞌ ey jun naj ẍejabꞌ Dios, caw miman yeloc apnoj naj yul sat ebꞌ ánima; jaꞌ masanil tzet chi yalaꞌ chi cꞌal yunne. Toon kilaꞌ, oj yal naj tzet bꞌeal oj cu toj, ẍi jun yakꞌomal servil tuꞌ tet.

7 —Toon xin, asan cꞌam wal niꞌoj tzet chi kiꞌtoj tet naj, cꞌamxa junoj ixim pan eey yul cu pa tiꞌ, caw cꞌam niꞌoj tzet watxꞌ kakꞌon tet naj, ¿tzet wal oj kiꞌtoj tet? ẍi naj Saúl tuꞌ.

8 Catuꞌ jix takꞌwi jun yakꞌomal servil tuꞌ jaxca tiꞌ:

—Ey junxa chꞌen tumin plata iꞌbꞌil oc wu an, jaꞌ oj kakꞌ tet naj ẍejabꞌ Jehová tuꞌ, yuxan oj yalaꞌ, tzet bꞌeal bꞌey oj caꞌ cu toocoj, ẍi jun yakꞌomal servil tuꞌ tet.

9 (Jaꞌ yet peyxa tuꞌ, ta ey junoj Israel chi yoche chi skꞌanle yabꞌ snaꞌbꞌal tet Dios chi yal jaxca tiꞌ: Ton kil jun chi skeꞌ yalon junoj tzetyetal tuꞌ, ẍi ebꞌ. Jaꞌton jun chi al-le ẍejabꞌoj Dios tinaniꞌ, jaꞌ yet peyxa tuꞌ chi al-le yin ebꞌ tol chi skeꞌ yalon junoj tzetyetal.)

10 —Watxꞌ xin, toon kilaꞌ, ẍi naj Saúl tet jun yakꞌomal servil tuꞌ:

Jix too ebꞌ scawanil bꞌey eyecꞌ jun ẍejabꞌ Dios tuꞌ. 11 Jaꞌ yet lalan yatoj ebꞌ naj yalan eytej jun conobꞌ tuꞌ, jix ẍaꞌlen sbꞌa ebꞌ naj yetoj wan ebꞌ ix kꞌopo ix, tol chi too ebꞌ ix iꞌo jaꞌ, jix skꞌanlen ebꞌ naj tet ebꞌ ix jaxca tiꞌ:

—¿Ey mi ecꞌ naj ẍejabꞌ Dios bꞌey yul jun conobꞌ tiꞌ che yilaꞌ? ẍi ebꞌ naj tet ebꞌ ix.

12 Jix takꞌwi ebꞌ ix tet ebꞌ naj jaxca tiꞌ:

—Jaaꞌ, eyecꞌ naj, asan tol che laoc je too je sattajto tuꞌ, yet watxꞌ oj to ilcha naj je yu. Tol to wal chi jul naj yul conobꞌ tiꞌ, yutol ey jun kꞌin oj ẍaꞌel yich yoc bꞌey jun tzalan tuꞌ, yet chi akꞌle xaambꞌal bꞌey scalubꞌal Jehová. 13 Asan cꞌal chex apni ocoj catuꞌ che kꞌanlen ecꞌ naj yul conobꞌ tuꞌ, yajbꞌan cꞌamto chi too naj bꞌey oj oc eyilal tuꞌ, bꞌey lalan yechbꞌanele naj yu ebꞌ ánima. Masantaꞌcꞌal oj apnoj naj, catuꞌ oj yalon watxꞌ kꞌane naj yibꞌan wan xaambꞌal tuꞌ, jaxa slow naj yetoj ebꞌ ánima awtebꞌil tuꞌ. Yu jun tuꞌ, che laoc je too tinaniꞌ, kꞌuxanto oj ilcha naj je yu, ẍi ebꞌ ix tet ebꞌ naj.

14 Catuꞌ jix too ebꞌ naj, jix aapnoj ebꞌ naj yul conobꞌ tuꞌ, cꞌuxan wal pax jix ẍaꞌlen el sbꞌa ebꞌ yetoj naj Samuel, yutol lalan stoo naj yetcꞌulal bꞌey chi oc eyilal tuꞌ.

15 Yecaloj to yapni oc naj Saúl tuꞌ, jix yalon Jehová tet naj Samuel jaxca tiꞌ: 16 Jaꞌ yet yecal yabꞌ jaxca tiꞌ, ey jun winaj chi jul ja cꞌatan, jatuꞌ oj tit bꞌey yul yet Benjamín, jaꞌ jun tuꞌ cha waoc aceite olivo yibꞌan sjolom, jaꞌ oj oc yin yaawilal xol conobꞌ Israel tiꞌ. Jaꞌ oj colon el ebꞌ jin conobꞌ yul skꞌabꞌ ebꞌ Filisteo tiꞌ, yutol tuxa jix wabꞌ tzet jix skꞌan ebꞌ ey jin an, ẍi Jehová.

17 Jaꞌ yet jix apni oc naj Saúl yetoj jun yakꞌomal servil jaꞌjun yetoj tuꞌ, jix oc taꞌnan naj Samuel yin naj, jix yalon Jehová tet naj jaxca tiꞌ: Jaꞌton jun winaj tiꞌ jix wal ey jaach tol jaꞌ oj oc yin yaawiloj jin conobꞌ, ẍi Jehová.

18 Jaꞌ bꞌey spuertail jun conobꞌ tuꞌ, jatuꞌ jix ẍaꞌle sbꞌa ebꞌ, jix yalon Saúl tet naj Samuel jaxca tiꞌ:

—Al ey jin an, bꞌeytuꞌ ey eyoc sna naj ẍejabꞌ Dios, ẍi naj Saúl.

19 —Jain toni, toon wetoj an, bꞌabꞌan jin sattaj. Jaꞌ tituꞌ oj jaach low wetoj bꞌey chin too tuꞌ an. Jato yet yecal oj wal ey jaach, tzet cha woche cha kꞌanle ey jin, jix lawi tuꞌ, catuꞌ jix paxeytej ebꞌ. 20 Jaꞌ yu noꞌ ja bꞌuru jix qꞌueytoj yet tax oxi tuꞌ, cꞌam ojabꞌ chi tac ja cꞌul yu noꞌ, tuxa jix ilcha noꞌ ja wu. Jaꞌ tinaniꞌ, masanil tzet ochebꞌil yu ebꞌ ket conobꞌ Israel tiꞌ, jaꞌ wan tuꞌ ja wet xa yeocoj, yetoj cꞌal ebꞌ ja wuninal, ẍi naj Samuel. 21 Jix takꞌwi naj Saúl jaxca tiꞌ:

—Jain tiꞌ, titnaj jin yin yicꞌaal Benjamín, jaꞌ jun icꞌaaleal tuꞌ yel xacꞌal txenne yeoc yintaj masanil ebꞌ yicꞌaal Israel. Jacꞌalaꞌ ebꞌ wichmam bꞌey jix jin tita, caw wal yeynajil chꞌan xol ebꞌ yicꞌaal Benjamín. ¿Tzet wal yu, yuxan cha wal wan tiꞌ ey jin? ẍi naj Saúl.

22 Jix lawi tuꞌ xin, jix iꞌletoj naj Saúl yu naj Samuel tuꞌ, yetoj jun yakꞌomal servil jaꞌjun yetoj tuꞌ, bꞌey yul jun miman na bꞌey eyoctoj ebꞌ naj mimej winaj awtebꞌil tuꞌ, ey mi junoj 30 ebꞌ awtebꞌil yin jun loꞌo tuꞌ. 23 Jix lawi tuꞌ, jix yalon naj Samuel tet naj chi waꞌnen loꞌbꞌe tuꞌ jaxca tiꞌ:

—Iꞌtej jun tujan noꞌ chiꞌbꞌe jix wal ey jaach tol txꞌoj jix a poꞌocan eloj, ẍi naj Samuel tuꞌ.

24 Yin eymanil jix yun yiꞌontej noꞌ xubꞌ naj chi waꞌnen loꞌbꞌe tuꞌ, jix yaon ey sattaj naj Saúl; jix yalon naj Samuel tet naj jaxca tiꞌ:

—Jaꞌton noꞌ chiꞌbꞌe tiꞌ, tol poꞌobꞌilxa cꞌaltaꞌ el wu, yet jix wawten ebꞌ ánima tiꞌ lowoj. Yuxan lowan wetoj tinaniꞌ, ẍi naj Samuel tet naj.

Junne jix yun slow Saúl yetoj naj Samuel yet jun cꞌual tuꞌ. 25 Jaꞌ yet jix paxeytej ebꞌ tituꞌ xin, jix eyol ebꞌ bꞌey yul conobꞌ tuꞌ, jix atoj naj Samuel kꞌanabꞌ yetoj Saúl bꞌey spananil yibꞌan na tuꞌ. 26 Jaxa yet jix sajbꞌi a yet junxa cꞌual, jix awtele naj Saúl yu naj Samuel, jix yalon tet jaxca tiꞌ:

—Aan waanoj catuꞌ chach toi, ẍi naj.

Jix a waan naj; jix lawi tuꞌ, catuꞌ jix too naj Samuel yetoj Saúl scawanil yul scalleal jun conobꞌ tuꞌ. 27 Jaxa yet jix el apnoj ebꞌ stiꞌlaj conobꞌ tuꞌ, jix yalon naj Samuel tet naj Saúl jaxca tiꞌ:

—Al tet naj ja wakꞌomal servil tiꞌ tol chi bꞌabꞌitoj naj cu sattaj, catuꞌ chach can niꞌojxa wetoj an, yutol ey niꞌoj tzet oj wal ey jaach, tol jix yal Jehová tol sowalil chi wal ey jaach an, ẍi naj. Catuꞌ jix ẍejon bꞌabꞌojtoj jun yakꞌomal servil naj Saúl tuꞌ sattaj.