Chi Yoche Conobꞌ Israel Chi Oc Junoj Sreyal
8
Jaꞌ yet caw icham winajxa naj Samuel tuꞌ, ey cawan scꞌaal naj jix yaoc yin juezal xol conobꞌ Israel. 2 Joel sbꞌi jun naj bꞌabꞌel, jal junxa naj, Abías sbꞌi naj. Jaꞌton ebꞌ naj tiꞌ jix oc yin juezal xol ebꞌ Israel bꞌey conobꞌ Beerseba. 3 Asan xin, caw man watxꞌoj jix yute sbꞌeybꞌal ebꞌ naj, ma sbꞌeybꞌalne ebꞌ jaxca sbꞌeybꞌal smam. Tol jaꞌ yin chꞌen tumin jix yaoc snaꞌbꞌal ebꞌ naj, chi ẍaꞌ tumin ebꞌ yin ewantajil yet chi swaꞌnen yeoc junoj kꞌane ebꞌ, jaxa yetoj ebꞌ chi akꞌon tumin tuꞌ chi yaoc sbꞌa ebꞌ, junelne cꞌam niꞌoj swatxꞌil chi yun swaꞌnen yeoc junoj kꞌane ebꞌ. 4 Yu cꞌal jun tuꞌ xin, yuxan jix syambꞌa oc sbꞌa masanil ebꞌ icham winaj yeoc yul conobꞌ Israel, catuꞌ jix too ebꞌ yilon naj Samuel bꞌey conobꞌ Ramá. 5 Jix yalon ebꞌ tet naj jaxca tiꞌ: Jaach tiꞌ, caw icham winaj jaachxa; jaxa ebꞌ naj ja cꞌaal, man watxꞌoj chi yute sbꞌa ebꞌ naj, jal jaach, watxꞌ jix ja wute ja bꞌa. Yu tuꞌ xin, chi jul kal ey jaach tol cha sicꞌ junoj cu reyal yet chi yakꞌon yaawil cu xol jon, jaxca yeoc wanxa nación, ẍi ebꞌ tet naj.6 Caw jix tac el scꞌul naj Samuel yet jix yabꞌen oc naj tzet jix yal ebꞌ tuꞌ, yutol chi skꞌan junoj sreyal ebꞌ chi akꞌon yaawil xol ebꞌ; yu jun tuꞌ, jix txali naj tet Jehová. 7 Jix takꞌwi Jehová tet naj jaxca tiꞌ: Jije cꞌal tzet chi yal ebꞌ ánima tiꞌ, yutol man jaach oj chach yintajne can el ebꞌ, yutol jain chin bꞌejlecan yu ebꞌ, yutol cꞌamxa chi yoche ebꞌ chi wakꞌ yaawil yibꞌan ebꞌ, yuxan jaxca tuꞌ chi yun yalon ebꞌ. 8 Jaꞌ yet jix wiꞌon eltej ebꞌ bꞌey txꞌotxꞌ Egipto, jix oc cꞌal ebꞌ yin eyilal tet comon dios, cꞌam weloc apnoj yul sat ebꞌ; jaxca wal jix jin yute cꞌal ebꞌ, queytuꞌ chach yute ebꞌ tinaniꞌ. 9 Yu tuꞌ xin, jije cꞌal tzet chi yal ebꞌ. Asan xin, cha wal tet ebꞌ yin sbꞌabꞌelal tzet oj utele ebꞌ yu junoj sreyal ebꞌ oj yaoc tuꞌ, ẍi Jehová tet naj Samuel.
10 Jix lawi tuꞌ, jix yalon naj Samuel tzet jix yun yalon Jehová, yu tzet oj jul yibꞌan ebꞌ jix kꞌanon oc jun rey tuꞌ. 11 Jix yalon jaxca tiꞌ:
—Queywal tuꞌ oj jex utele yu junoj je reyal oj yakꞌ yaawil je xol: Oj yambꞌale oc ebꞌ je yuninal yu, ey ebꞌ oj ale oc yul carruaje yet jowal, ey ebꞌ oj oc yibꞌan che, catuꞌ oj toj ebꞌ yin jowal; ey pax ebꞌ xin, oj oc can steynemaloj jun rey tuꞌ, 12 ey ebꞌ oj oc syaawiloj xol junoj mil soldado, ey pax ebꞌ oj oc syaawiloj junoj 50 soldado. Ey pax ebꞌ xin, oj oc yin mulnail yin kꞌuo txꞌotxꞌ, cꞌal yin kꞌupo a tiriw; ey pax ebꞌ xin, oj waꞌnen mitxꞌkꞌabꞌe yet jowal, cꞌal yin swaꞌnen tzetyetal ebꞌ chi oc yin carruaje yet jowal. 13 Catuꞌ oj iꞌletoj ebꞌ ix je cutzꞌin yu bꞌey sna yin waꞌne perfume, ma yin waꞌne loꞌbꞌe, cꞌal yin waꞌne pan. 14 Jaꞌ je txꞌotxꞌ caw ey syaxil sat oj yiꞌcan oc ebꞌ, oj yiꞌon ecꞌ teꞌ uva awbꞌil je yu, cꞌal je aceite olivo awbꞌil eyoj, jaxa oj yakꞌ ebꞌ tet ebꞌ eyoc yin yakꞌomal servil. 15 Catuꞌ oj yiꞌon el ebꞌ sdiezmoal je yawo che yawaꞌ, cꞌal je yal uva, catuꞌ oj yakꞌon ebꞌ tet ebꞌ eyoc yin yakꞌomaloj servil tuꞌ. 16 Catuꞌ oj iꞌle ecꞌ ebꞌ naj je yakꞌomal servil yu, cꞌal ebꞌ ix je yakꞌomal servil, ebꞌ tol caw jelan yin mulnail, oj yiꞌon pax ecꞌ je wacax cꞌal noꞌ je bꞌuru ebꞌ, catuꞌ oj yaon oc ebꞌ yin smulnail. 17 Jacꞌalaꞌ oj skꞌanon cꞌal pax sdiezmoal je meꞌ ebꞌ, catuꞌ oj jex oc cꞌal yakꞌomaloj servil ebꞌ jaex tiꞌ. 18 Jaꞌ yet jun tiempoal tuꞌ, oj el je yaw je yabꞌen syaꞌil yu tzet oj jex utele yu jun je reyal oj je sicꞌoc tuꞌ, man xacꞌal oj ẍaꞌ yabꞌ Jehová tzet oj je yalaꞌ, ẍi naj Samuel tet ebꞌ.
19 Ma xacꞌal ẍaꞌ yabꞌ ebꞌ conobꞌ Israel tzet jix yal naj Samuel tuꞌ, yuxan jix takꞌwi ebꞌ tet naj jaxca tiꞌ:
—Cꞌam cꞌal yeloc apnoj wan cha wal tuꞌ, asan tol chi oc junoj cu reyal jon. 20 Yet watxꞌ laan chi kun jaxca wanojxa nación, chi koche tol jaꞌ junoj cu reyal tuꞌ chi yakꞌ yaawil cu xol, cꞌal cu yijbꞌan yin jowal, ẍi ebꞌ.
21 Jaꞌ yet jix yabꞌen oc naj Samuel tzet jix yal ebꞌ ánima tuꞌ, jix yalon pax naj tet Jehová. 22 Jix takꞌwi Jehová tet naj jaxca tiꞌ:
—Jije cꞌal tzet chi yal ebꞌ conobꞌ tiꞌ, aoc junoj sreyal ebꞌ, ẍi Jehová.
Jix lawi tuꞌ, jix yalon naj Samuel tet ebꞌ, tol chi paxtoj junjun ebꞌ bꞌey sconobꞌ bꞌey jix tita.